" ညစာကို အခုလိုပဲခေါက်ဆွဲတွေစားတာလား အစ်ကိုကတော့ကြာရင်ကျန်းမာရေးထိတော့မယ် "
" ငါ့ကိုမဆုံးမခင် မင်းကိုယ်မင်းလည်းပြန်ကြည့်ဦး အခုလေးတင်ခေါက်ဆွဲစားပြီးတာမလား "
ရှိုင်းက မင်းခန့်အားပြန်လည်ချေပကာ သူ၀ယ်လာသောအိတ်အတွင်းမှ ဘီယာတစ်ဘူးအားမင်းခန့်ထံလှမ်းပေး၏။ သူကိုယ်တိုင်လည်း ဘီယာတစ်ဘူးဖောက်သောက်နေတာဖြစ်သည်။
" အစ်ကိုကတကယ်မထင်ရဘူးပဲ ဒါမျိုးတွေလည်းသောက်တာပဲလား "
" အဲ့ထက်ပြင်းတာတောင် ငါကအသာလေးပဲ "
ရှိုင်းကအစားဆက်စားရင်း မင်းခန့်ရဲ့ပုံပန်းသွင်ပြင်အားအကဲခတ်၏။ သူသတိထားမိသလောက် မင်းခန့်ကအမြဲလိုလိုလက်ရှည်အင်္ကျီတွေသာ ၀တ်တတ်တာဖြစ်သည်။ ပျော်ပျော်နေတတ်သည်ဟုထင်မှတ်ခဲ့သော်လည်း တကယ့်အနီးကပ်ကြည့်ရင် မင်းခန့်မျက်၀န်းထဲ၌ပျော်ရွှင်မှုအရိပ်အယောင်များ ပျောက်ကွယ်နေတာဖြစ်သည်။ လက်သည်းထိပ်တွေကပွန်းပဲ့နေပြီး လက်ဆစ်များက သွေးဆို့နေ၏။ အပြင်ပန်းကကြည့်နေသူသာ စိတ်မချမ်းမသာဖြစ်ရသော်လည်း မင်းခန့်ကထိုကိစ္စနဲ့ပတ်သတ်ပြီး အထွေအထူးခံစားမည့်ပုံမပေါ်ပေ။
" ဒီမှာခဏနေဦး "
ရှိုင်းကမင်းခန့်အား ထိုင်ခုံပေါ်တွင်သာခဏထိုင်နေဖို့အချက်ပြရင်း convenience storeထဲသို့ခပ်သွက်သွက်လေးပြန်၀င်သွား၏။ မင်းခန့်ကတော့ ရှိုင်းရဲ့အပြုအမူအားအပြင်ကတွင်သာ မသိမသာလေးအကဲခတ်သည်။
.
.
.
" မင်းလက်ပေး "
ရှိုင်းက ပွန်းပဲ့နေသည့်မင်းခန့်ရဲ့လက်ချောင်းထိပ်တွေအား ပလာစတာဖြင့်ကပ်ပေး၏။ လက်ချောင်းဆယ်ချောင်းလုံးကပ်ပေးနေတာမို့ မင်းခန့်ရဲ့လက်ထိပ်တွေက ကျောက်ပတ်တီးစည်းထားသည့်နယ် ပလာစတာများဖြင့်ပြည့်နှက်နေသည်။
" အစ်ကိုကပ်လည်းအလကားပဲ ကျွန်တော်ကအိမ်ပြန်ရောက်ရင် ပြန်ခွာပစ်မှာ "
" မင်းကိုငါ့ညီလေးတစ်ယောက်လို သဘောထားလို့လုပ်ပေးနေတာ စေတနာမစော်ကားနဲ့ "
ရှိုင်းက မင်းခန့်ရဲ့ဘယ်ဘက်လက်အားပြန်ဆွဲယူကာ ကျန်နေသည့်လက်ချောင်းနှစ်ချောင်းအားဆက်ကပ်ပေး၏။ မင်းခန့်ကတော့ ရှိုင်းလုပ်သမျှအားခပ်ငြိမ်ငြိမ်လေးသာထိုင်ကြည့်သည်။
