ဘွားကြူကခွန်းသန့်အားယပ်ခပ်ပေးရင်း အသံကိုခပ်အေးအေးသာမေးလာသည်။ ခွန်းသန့်အားရှိုင်းနဲ့ရင်းနှီးသည်ဟုသိရသည့်အချိန်တည်းက ဒေါ်စန်းဌေးနှင့်ဘွားကြူက ခွန်းအပေါ်အတော်လေးဂရုစိုက်သည်။ ငယ်စဥ်တည်းကမိသားစုဘ၀ကိုမရရှိခဲ့သည့် ခွန်းသန့်အတွက် ထိုအခိုက်အတန့်ကသူ့စိတ်ကိုပျော်ရွှင်စေသည်။
" 24နှစ်ပါ "
" ရှိုင်းဌေးထက်တောင်ငယ်တာပဲ သားကိုကြီးကမြို့မှာတစ်ယောက်တည်းနေရတာဆိုတော့ သားကပဲစောင့်ရှောက်ပေးပါဦးနော် "
ဘွားကြူက သူ့မြေးအားစောင့်ရှောက်ပေးရန် ခွန်းသန့်အားအထပ်ထပ်မှာနေတာမို့ ခေါင်းညိတ်ကာလက်ခံလိုက်၏။
" မောင်ရှိန်၀ါကရော လူပျိုပဲလား "
" ကျွန်တော့်မှာသားလေးတစ်ယောက်ရှိပါတယ်အန်တီ ကျွန်တော်က ကလေးအဖေတစ်ယောက်ပါ "
(ကလေးအဖေ)ဟူသောစကားက ခွန်းသန့်အတွက် အချိန်မရွေးတုံ့ဆိုင်းခြင်းမရှိပဲပြောထွက်သောစကားဖြစ်သည်။ သားအတွက်သိမ်ငယ်သွားရမည့်အရာတွေကို မလိုလားတာမို့ သူသာလျှင်ကလေးအဖေဖြစ်ကြောင်း တလောကလုံးကိုကြေညာလိုက်ချင်သည်။( နေနေးအဖေက သူ့မိန်းမနဲ့ကွဲနေတာလေ/ ကလေးအမေက သေသွားပြီ) အစရှိသော ကောလဟာလသတင်းတွေအား ခွန်းသန့်လုံး၀ဂရုမစိုက်။ အများကသူ့အား မဟုတ်မမှန်သတင်းတွေနဲ့အမျိုးမျိုးပုတ်ခပ်ရင်တောင် သားရဲ့အနာဂတ်ကိုမထိခိုက်ရင်ရပြီမို့ ကလေးအဖေကသူသာဖြစ်ကြောင်း အတိအလင်းချပြထားတာဖြစ်သည်။
" ဟုတ်လား ဒါဆိုငယ်ငယ်ရွယ်ရွယ်နဲ့အိမ်ထောင်ကျတာထင်တယ် သားလေးကောအသက်ဘယ်နှနှစ်ရှိပြီလဲ "
" သားကအသက်လေးနှစ်ရှိပါပြီအန်တီ ကလေးအမေကတော့ဆုံးသွားပါပြီ "
ခွန်းသန့်စကားအဆုံး၌ ဒေါ်စန်းဌေးကစိတ်မကောင်းဖြစ်သွားသည့်ပုံစံဖြင့်နှုတ်ဆိတ်သွားသည်။ ရှိုင်းကလည်း ဂရုဏာသက်စွာခွန်းသန့်အားလှမ်းကြည့်သည်။ နေနေးအမေဆုံးသွားသည့်သတင်းအား ရှိုင်းအနေနဲ့အခုမှအသေအချာသိလိုက်ရတာဖြစ်သည်။
