▪️مرجـــــــــــــــانة▪️
▫️من كتابة هيرا▫️
▪️الجزء الرابع عشر▪️
كمش عينيه قارم عليهم وقال.
-إمتى غادي تكملي؟
كان صوته خفيف وهضرته ثقيلة..وفنفس الوقت قاصحة وما هي رهيفة..جوج الصفات فواحد!
حلات عين بشوي..وتبعتها الخرى حتى هي..الحيلة كتنفع..ودموع المرى كتشفع..داكشي علاش خرجات دميعاتها..وطلقات حليقاتها..البكى والشكى والتغبان..كتهضر وتنخصص!
-والله مكنت كندير شي حاجة..أنا غير "كتضور فعينيها" أنا غير تجرحت..أه تجرحت كنت غادة نزور ختي وتجرحت فطريق وبغيت العشوب..قلبت عليهم وبانو ليا تما ومشيت نهزهم..حتى وقفو عليا.
ركز الشوفة فيها..ورد عليها..بنفس النبرة لي دوا بيها.
-علاش هربتي؟
مكيدويش غير كيسول..وخلاها فخاطرها تولول..قفارت قفارت..جمعات النفس ورجعات لتخنصيص وهي كتشرح ليه.
-أنا غير خفت..كنخاف كنخاف..مالقيت ما ندير غير نهرب..اش قربني لشي قتيلة..ولا عرفت خيام الرجال فين كاينة "كتدور عينيها لباب" حل الباب مخاصناش نتجمعو بلا شرع ولا حكام..فين لثامي..فين سلهامي..وجهي ميشوفوه غير الرجال لي حرام عليا وحلالي..علاش حابسني هنا وشكون نتا! "عينيها حلاتهم وإيديها الرطبين مداتهم" واش هاد ليدين ديال القتيلة..والله حتى تجرحت وبغيت غير لعشوب.
كتهضر هنا ولهيه..كلمة من هنا وكلمة من لهيه..باش تلفو ولكن هاد شي عاق بيه!
قال يسايرها..ويشوف فين غتوصل بحبل كذوبها..وكيف العادة نطق بصوته..لي باقة ما ولفاته..ولا تعودات عليه.
-فين تجرحتي! وريني!
خرجات عينيها..ولسانها دخل وتربط ليها..شافت حداها بان ليها طبسيل من الحديد محطوط عليه الشمع..ربطاتها فراسها وقالت هادي تنفع.
-آه جرحة..جرحة أييه وخا.
تحدرات كتطلع كم قفطانها..وهو حاضيها..وحاضي كل حاجة كتديرها..كان الكم مقبوط وبقات تمثل بلا كتحاول تطلعو حتى كحزات لجيهت الطبسيل وعطاته بالظهر..الضورة لي بغات تضور قالت ليه ها جرحة وعاطتو ليه لراس..خلاته طايح بلا ساس.
مرجانة: محكمة با عياط هادي..كالس تسول فيا من صباح "طلات..وحست بحالة نفس زهقات" ويلي عنداك يكون مات.
قالت كلامها وناضت قافزة وخى رجلها لي كتضرها..بغات تمد يده تقلب ليه جيهت نيفه ساعة جمعاتها.
مرجانة: وإلا مات أنا مالي..هو لي حبسني هنا.
ولات بحال الحمقة تهضر وتجاوب راسها..مدات يديها والترعيدة شاداها..قربات لنيفه ونفسه باقي سخون..بزز حتى حيدات ليه السلهام الكحل لي لابس..ومشات تعرج للباب حلاته ونزلات!
خرجات كتسلت قالت تلبس السلهام وتهرب مغطية راسها..تسمح فرحيمو وما يجي منها..ساعة لقات الدار مطوقة والحراس ضايرين بيها..إوا فكها يا من وحلتيها.
STAI LEGGENDO
مرجانة🌙مكتملة🌙
Storie d'amore💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
