💎مكتملة💎
🌙🌙🌙مرجـــــــــــانة🌙🌙🌙
✨كان يا مكان في قديم الزمان! ✨
جملة سحرية فتحات البيبان وخلات الأنس يتزوج بالجن والغول حتى هو ليه مكان..
كاين السلطان وكاين الخدم والحشم...وكيفما كاينة الفهيمة كاينا الدميمة..
كان يا مكان جملة تقالت فكل مكا...
رحيمو مشات هازة كتافها ومرجانة كيف ديما خرجات لجنان ومنى معاها جراتها..حتى لا حصلات تقول غادة هي ومنى لدارها!
كانت هنية غادة وكتمختر فمشبتها..معطرة ولابسة احسن ما عندها..ضافرة وماشطة شعرها..وخدمها موراها.
بان لها السلطان شمس الدين وحاشيته جايين..والسلطان نسيبها الجديد وحداه جدو العالي معاه كاينين!
تبسمات طالقة الزين لي مشا مع الزمان..ومشات جيهت السلطان.
لي معاه شافوها وبعدو من طريق احتراما ليها..وهي حلفات عينها ما هبطات من العالي..تشوف وتبسم حشمانة وهو يردها لها!
كلشي مشا..وغير شمس الدين لي بقا..وحتى هي جراته..ونوات تدوي معاه.
هنية: أش خبار الحمل لي دايعة فالقصر أمولاي؟
شمس الدين: مامنهاش وما تعدبيش راسك بيها.
هنية: إيوا هكاك باقة صغيرة وماشي ديال الحمالة..نتا قريب غادي لحرب جديدة ومجاتش تمشي كيف ديما وما مخلي وراك ولي عهد ولا واحد يخلفك..غنقول لعود روح توجد راسها..تريحك هاد ليلة والدواء غنقطعو ليها.
شمس الدين: بلا متعدبي راسك..الحمالة لي غير هضرة معاها غتولي بصح.
مشا وخلاها مخرجة عينيها..ومفهمات الهضرة لي لاح ليها.
هنية: واش أمولاي لي نويتي تحمل معاها هي مرجانة!
كمل طريقه مبسم ومخليها تولول فخاطرها!
ـــــــ
كتجمع مع الدريسية لي عوالة تمشي دبا حوايجها..وفرحانة فخاطرها..وكتقول تهنات منها!
وخا هكاك كتعاونها وتنگر عليها..مرة تقول لا مديريش هكا مرة تقول ياك قلت ليك ديري هكا.
حتى طاب راسها ليها.. ومن طبعها ما تقول لا للي كبر منها.
غير حانية الراس فسرير الدريسية وكتدير ما بغات..سمعات الدقان و مشات تحل الباب مبسمة وعارفاه هو!
الغالي: خالتي نتي لي عيطتي على الحكيمة؟
دريسية: لا ماشي انا.. غير حورية بغات تشوف امتى غتحمل..قرب العام يدور وباقي مكاين والو!
