▪️مرجـــــــــــــــانة▪️
▫️من كتابة هيرا▫️
▪️الجزء التاسع والأربعون▪️
حدا الباب وقفو..وعينيهم كيشوفو..كان راجل من لبلاسه باين خدام ومعاه مرسول فيدو..وبنت شهبة زينة والحرير والذهب لابسة فجنبو.
الراجل ضور عينيه فيهم..وشاف جنابهم..وهضر ما مسوق ليهم.
-فين القايد..كلموه..هدي جارية هدية من الوزير للقايد الغالي!
الخدامات لي تما فعوض ما يشوفو الجارية..كلشي تلفت لحورية..وهي كرزات على نجوى بيدها..وزمات فمها لعندها..وحدرات راسها..الدموع بداو يبانو فعينها!
نجوى: القايد مكيدخلش الجواري لدار!
طلعها ونزلها..وكيف المرة لولة ما تسوق لها.
-الهدية هدية من الوزير..ووزير السلطان..ماشي عيب تكون لولة..كلموه نعطيه الجارية والمرسول!
نجوى: الهدية كتبقا هدية..وهو ما كيقبل هدية سهمها مال ولا نساء!
الجارية من حداه حيدات..ولجيهت حورية مشات..ومن لبسها بانت لها من صحاب الدار وخلات حورية فنجوى زادت دخلات.
-واش خت القايد الصغيرة؟ وريني خوك فين هو!
قبل ما يجاوبها حد..تسمع صوته..ومن الباب دخل منه..نزل من عوده..وللخدام مشا ووقف مضرگ حورية بضهره.
الغالي: الخدام لي كيجي مسخر..كيعطي سخرة لمول دار..وكيبعد من النساء الدار!
كيهضر وكيمشي وخلى الخدام راجع بلور حتى خرج من الدار.
الغالي: والصوت مكيترفعش على لي كبر منك!
قبل ما يحل الخدام فمه..عاود الغالي حبسه.
الغالي: ورجع عند الوزير..وقوليه شفت هديتك..وعرفت بحسن نيتك..لكن داري..مكدخل لها مرة من غير مراتي!
غير الخدام بغى يجاوبه..جبد الغالي نص سيفه من بلاصته..حتى تكمش لآخر قدامه.
ضار ومخليه وعينيه شافت غير فحورية..تم غادي جيهتها..و الجارية جات قبالته بلا ما بطلع شوفة فيها..كمل طريقه لحورية خلا ضحكتها تجمع والخدام كيشر بيديه ليها!
يديه حطها على يديها..لي كانت كتمسد كرشها بيها..واليد لاخرة هز بيها راسها..ولقى دموعها على طرف عينيها.
جرها معاه غادي بيها..حتال لبيت ودخلها..جلسها فالسرير وجلس قفازي مقابل معاها.
يديه على حنكها حطها..و دموعها مسحهم ليها..وحنكها باسو ليها.
الغالي: مالكي كتبكي..واش على لي وقع برى!
مجاوباتوش وتجمع عليها كلشي..وجع كرشها..ولي وقع برى لها.
قرب ماسح على شعرها..وحط فمه على جبهتها..وطول البوسة تما ليها.
الغالي: عاطيك وعد حر..عمر المرة لداري من غيرك ما تدخل!
ــــــــــــ
خارجة كتسلت من بيت السلطان..مبدلة بالحوايج لي جابت لها رحيمو..قول النص فحوايجها لي ركنتهم فبيتو!
غير بانو لها الخدم والجواري وهي تطلع داك الراس..ودفعات الصدر والجبهة..غادة وتعوج فالمشية..وهوما حناو الراس ليها.. لهضرة لي طلقات رحيمو نفعات..غير مشات وبداو يهضرو عليها..يومين وهي فجناح السلطان!
فينما تدوز كتسمع الهضرة عليها..وهي غير سايرة تقاد تاجها وتهز راسها!
خرجات لجنان كيف ديما سالتة..غير خرج السلطان للمجلس بدلات وتغدات ودبا سلتات!
عيات ما تفنعه يخرج برى القصر معاها..كتقول ليه يشوف غير الرعية..وهي باغي تزرب عليه وتهز دهبها!
عيون حضاتها وهي خارجة..نفس العيون لي كانت ديما حاطة عليها فدار باها.
كيشوفها من بعيد وقلبه ما صبرش عليه..ومشى واقف حاني الراس ليها!
المهدي: لالة مرجانة!
طلعاته ونزلاته همهمات ليه ودازت مخطياه..حتى عاود وقفها وهي مقابلة معاه.
المهدي: بغيت نهضر معاك..أنا المهدي..ولد خالت الغالي راجل ختك!
متسوقاتش للي كيقول..غير هزات الحاجب كتشوف أش بغا يوصل.
بقا غير كيشوف فيها..حتى طلع الدم ليها..وزادت خلاته حاضيها..حتى عيا ومشا عكس طريقها.
يد جراتها بنطرة..حتى ضارت معفرة..معاه لصقها..ونفسو كتضرب فوجهها.
شمس الدين: أش قلنا على الخروج برا الحريم؟
تفتفات عليه تما..خافته يكون مع المهدي شافها.
مرجانة: غير سخرت منى وكنتسناها!
طلع حاجب ونزله ودور لها راسها
شمس الدين: منى لي خارجة دبا؟
ضحكات ضحكة صفرة..فاش شافت منى من دارها خارجة..تفكرات راجلها لي كيقابل جنان ولفقات الهضرة.
مرجانة: كانت غادة ولكن مشات تكلم لراجلها!
قالت كلامها..وهي خايفة يخرج من شي قنت راجلها..زربات عليه دغيا ضايرة عنده حتى ولا مقابل معاها.
مرجانة: أش درتي..يلاه نخرجو كيف قلت لك نزور مي بالرضاعة ومن بعدها نمشو نشوفو الدواور والمدينة!
شمس الدين: وجدي نمشو دبا!
كتدوي وهي كترمش وفرحانة بلي قال.
مرجانة: انا بلاصة نمشو ليها هي اللولة؟
مع نص تبسيمة..وعينيه مصغرة.
شمس الدين: أقرب دوار..مع الصباح نوصلو..دوار علال!
طاحت الضحكة لي كانت فوجهها..والصدمة بانت عليها..وبلا ما تحس نطقات.
مرجانة: الله أكبر!
▪️توقعاتكم وأرائكم ▪️
لي معقلش علا دوار علال..هو لي سرقات فيه القايد موسى والقاضي المختار.
تلاهيتو بالجارية ونسيتو الغالي لي كيحماق على حورية ومغاديش يقبلها..بس الجارية باقة لاصقة😣
JE LEEST
مرجانة🌙مكتملة🌙
Romantiek💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
