▪️مرجـــــــــــــــانة▪️
▫️من كتابة هيرا▫️
▪️الجزء الثاني والستون▪️
تلفتات للخدامة لي مع رحيمو..كانت حانية الراس وتفتت غير بحدها.
مرجانة: لي كيوصل ليك الهضرة كيوصلها حتى عليك!
غمزات قايلاها..وزادت خارجة من الحريم فطريقها.
غادة مفقوسة..كتقلب على منى الخارجة..قالت غا تكون فدارها..وشدات طريقها غادة لها..لكن يد تحطات عليها وقفاتها.
كان يونس بلباس المقلوب كيف ديما..لابس بلغة غير فرجلة وحدة..ولي بقات بالوسخ كحلة..كان كيحك راسه ويضرب فيه.
بدا كيعيط باسم مرجانة بشكل هستيري حتى وقفاته شادة فراسها..لي طاب لها.
مرجانة: أش واقع!
يونس: نتي زوينة.
مرجانة:إوا هاد الزين محروس ما تديه لا بهدية ولا فلوس
ضحكات كتشوف فيه..حتى رجعات هضرات معاه.
مرجانة: واش كتعرفني..عمرك مشيتي حدا دار لقاضي؟
مجاوبهاش وجلس فوق تراب كيقطع فربيع ويلوحو فالسماء حتى يرجع يطيح عليه.
مرجانة: كفاش ماتت يماك واش كنت معاها؟
سمع اسم مو وتلفت مخنز فيها..جمع گاع داك الربيع لي كان فيديه ولاحو عليها!
يونس: نتي خايبة!
قالها ومشا كيجيري طاير من حداها..مخليها مغمضة عينيها..وكتحيد الربيع لي فوجهها.
مرجانة: الله على نهار..مرجانة خايبة وكلشي زين.
كملات طريقها..حتال لدار منى وجلسات تدق عليها..وهي خرجات لها..غير شافت مرجانة وحدرات راسها مفاهمة والو ومرحبة بيها.
خوات الطريق ومرجانة لدارها دخلات..وعينها فالدار تحطات.
كتقلب هنا ولهيه وكيف ديما حتى حاجة معمرات لها العين..وراتها منى الطريق ودخلات للبيت.
منى: لالة داري ولات مباركة!
مرجانة: باركة من الهضرة..وسيري جيبي لي كاس الماء.
مشات طايرة وجات طايرة..وكاس الماء مداتو ليها والاخرى طاحت عليه عمية.
مرجانة: بغيت غير نعرف اش كتضلي تديري هنا مخشية فهاد الدار..واش بحدك؟
منى: غير انا وراجلي وجوج وليدات..بنتي نعمة مشات مصخرة وولدي فالجيش..والراجل راه مقابل الجنان ألالة.
ميعات وجها..قارمة على فمها..مبعدة الكاس عليها.
مرجانة: إيوا شلا!
منى: مالك الالة طالعة ليك القردة.
مرجانة: رحيمو حصلتها كتخوي مزيودتي لخدامة عويد الروح..ضارت عليا ضورة الرحى خلاتني ندگ الماء..أنا فهيمة ودارت بيا كيف البهيمة..درت فيها نية وعليا ما كانت هنية..دعيتها لربي بسعدي المسكي!
منى: اويلي رحيمو! معاشرة معاك اعوام.
مرجانة: متخافش من لي بعيد خاف غير من القريب!
منى: وا زعما كيفاش وعلاش..لراسي مدخلاتشي!
مرجانة: قولي بعدا كفاش هاد زواج عائشة؟
منى: قبل ما تجي..كان عارفه كلشي..و شحال هدي لالة الاميرة عائشة مرشومة.
مرجانة: هاد لجد لي غيجي مع العريس كبير بزاف؟
منى: باقة شاد فصحته بحاله بحال لالة هنية.
مرجانة: إوا صافي العرس غيولي جوج..زواج عائسة وجداها!
منى: اويلي واش كتهضر على لالة هنية!
مرجانة: سيري باركة من اللغا وجيبي لي ما ناكل من صباح ونعمة ماطاحت ففمي.
ناضت من حداها..كتجر فرجلها وتقول قفارت عليها..عارفة لي صايباته مغادي يعجب مرجانة وهادشي لي كان..لي تحطو مرجانة تردو!
كملات بالكشيفة من داك الفطور عادت ناضت تخرج ومنى مشات معاها..غادة والخدم الراس حناوه ليها.
كانت عود الروح جاية هي وخدمها..مرجانة كحلات بالعمى زعما تلاقا بيها نهار حالتها ما مصايباها!
كل وحدة هزات خنفرها فالسماء ومعدوبش راسهم..باش يسلمو على بعضياتهم..عود روح كملات الطريق لبيتها ومرجانة بقات غادة غير وسط الحريم.
منى: دبا واش بصح تخاصمتي مع رحيمو؟
مرجانة: جبد الكلب ووجد العصى!
منى هزات راسها مفاهمة والو..وفهمات فاش شافت رحيمو جاية جيتهم..وطبگ الخبز لعود الروح دوزاته من حداهم.
هزات عينها كتشوف فيها..والآخرى حتا هي حطات العين عليها.
وحدة تشوف فالخرا حتى طلقوها بجوج بضحكة..خلاو منى كدور فعينها ما فاهمة گاع لي طرى!
▪️توقعاتكم وأرائكم▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
