💎مكتملة💎
🌙🌙🌙مرجـــــــــــانة🌙🌙🌙
✨كان يا مكان في قديم الزمان! ✨
جملة سحرية فتحات البيبان وخلات الأنس يتزوج بالجن والغول حتى هو ليه مكان..
كاين السلطان وكاين الخدم والحشم...وكيفما كاينة الفهيمة كاينا الدميمة..
كان يا مكان جملة تقالت فكل مكا...
▪️مرجـــــــــــــــانة▪️ ▫️من كتابة هيرا▫️ ▪️الجزء الثاني عشر▪️
-مراتي ماشي لي توقف حدى الرجال..وتعطي الحكام.
دخل لرياض بعد ما رمى عليها هاد الكلام..وخلاها واقفة بلى زمام..من الصدمة ما عرفات توقف ولا تفهم.
خلات لي معاها كيدخلو الحوايج ويحطو فجنان لي حدى الباب..وهي هزات قفطانها من الأرض ودخلات تابعاه..وخا بعيدة عليه معافرة توصله..ومن بعيد حاضياه وحاضية مشيته..مشافت لا فرياض لا فجنابها غير هو وكان!
دخل لبيت وخلى الباب مرضوض..واش على قبلها حيث عرفها تابعاه..ولا غير صدفة جات فطريق! مفكراتش دفعاته ودخلات.
لقاته جالس كيحيد الدرع لي علا كتافه..كيحيد ويحط فالسرير..حتى بقى بقميص وسروال..بدا يفك حزام القميص من القدام..وهي بدات تفتف وضارت بغات تخرج..حتى وقفها صوته. -وقفي. سمعات للي قال..وقفات ما تحركات ولا تململات..سمعات خطواته لي ليها قربو..وقلبها غير زادت دقاتو..مد يديه وحطها على كتافها ودورها لعندو..اليد لي كانت فالكتف مشات لوجه وعلى اللثام تحطات وجراتو حيداتو..بقا كيشوف ويدقق فيها..من فمها لعينيها.
-أش سماك الله!! عارف سميتها..حافظها..ولكن بغا يسمعها كتخرجها من فمها..وهي دارت لي قال..ودارت ما طلب..وخا خرجات لها الهضرة مزعكلة..ومخربقة. -سميتي.. حورية.
عينيها لي ماطلعت لوجهو..جات لصدرو..ولقميص لي تحل بينو..ودوك العنين خرجو وبحلقو..بزربة هبطات وجها حتا ولات تشوف فالأرض..شاف أش دارت..وخرجات نص تبسيمة من فمو!
-حورية ردد موراها..كيعاود بالحرف لحرف..بهمس خفيف..بحال الحفِيف..غير سمعات كيف سميتها خرجات..زادت حدرات الراس هي وتزنيگتها وعلى قفطانها كمشات..يديه مشاو لجيهت دقنها ورفعو حتى تقابلت العين مع العين..وقال -خرجي وبقاي غادة طول..غتلقاي گلسة فيها كبيرة الخدم..هي غتوريك..وتقريك.
لي تمنات هاهو قالو..بغات غير كيف تفك منو..وداكشي لي كان، قبل ما يكمل هضرتو..مشات تجري لباب هربانة منو.
عيون كيف المشة كتحلو..غير هي كتحلهم والوجه كيتكمش..خرجات صوت هامس ومرخي بسباب الرجل الليمنية لي مفدوعة من الطيحة ديال البارح..جات رحيمو كتجري لعندها بدموعها..ومع الضلمة غير خبطات فالحيط حتا وصلات ليها! كانو فالضس..بلا فراش ولا ساس..فالحبس!
ضورات مرجانة عينيها بحلة خفيفة..معقلات ولا فهمات..آخر حاجة كتفكرها..هو داك لي بغا يقتلها!
مرجانة بصوت مريض: عاودي ليا أش جرى وطرى..أش وقع لينا وأش دارو فينا! رحيمو كتنخسس مع كل كلمة: حنا فالحبس..أنا فاش شفتهم تابعينك مشيت نجري نعيط على الحراس..فاش جاو هزو السيف عليهم يفكو لي يتفك..ساعة دارو عليهم وبضربة قتلوهم بقا غير واحد هاهوا مليوح فالحبس لي حدانا..معرفتش علاش شدونا هكا "كتبكي وتنخسس" واش شافو لخنجر فيدك وقالو راها قتالة!
مرجانة صحات ديك الساعة: ويلي ويل الشيطان..واش غادي نقتل..باش بخنجر !! سكتات وعاودت كملات: ونتي يا الدحشة "قرصاتها للفخض" فالحة غا فالبكى..متعرفيش تقولي لهم شكون أنا..ولا تفهميمهم دغيا هربتي وخلتيني..ولكن غا بلاتي والله لا بقات فك.
مرجانة كتقرص ورحيمو تغوت..حتى وقفهم خبيط العساس على الباب. العساس: انتي وياها باركة من صداع..ولا ما يعجبكم حال. مرجانة خرجات عينيها..وجرات رحيمو تشوش ليها
-شكون هذا لي برى..وفين حنى !!
Ups! Ten obraz nie jest zgodny z naszymi wytycznymi. Aby kontynuować, spróbuj go usunąć lub użyć innego.
