▪️مرجـــــــــــــــانة▪️
▫️من كتابة هيرا▫️
▪️الجزء الواحد والخمسون▪️
قال هضرته وناض من حداها..غادي حتى وقفاته بيدها..وقالت بزربة وهي خاشية راسها فمخدتها.
حورية: فيا غير مرض لبنات.
ضحك من كفاش قالتها..وفهم أش وصلات ليه وعرف اش ضارها.
الغالي: اشنو نجيب ليك؟
عاود بصوت خفيف نطقات وحناكها بالحمورية مع الدموع والسخانة بغاو يطرطقو.
حورية: غير لويزة.
رجع غطاها مكركمها فالغطى..وزادها الغطى مزال..عاد خرج من البيت..عارف راسه مغاديش يعرف يدير ما بغات..وعيط على نجوى تصايب ليه لي قالت.
ورجع عندها هاز الكاس بين يديه..نوضها وقربها ليه..وماكرهش يشربها بيديه.
هي كتشرب وهو حاضيها..حتى كانت غتوحل ليها..غير كملات وشد الكاس من عندها.
مشى صلى صلاته هي الأولى..عاد رجع لها..لقاها كتحرك يدها على كرشها مغمضة عينيها..ومشى ثاني ناعس حداها ولاصق فيها.
عنقها ويده على كرشها حطها..حيد يديها وولى هو لي كيمسد ليها!
ومرة مرة كيحيد شعرها من على ودنها..وتما كيبوسها ويهمس ليها بـ "غير صبري دبا يفوتك الحال"
ــــــــــــ
من القصر خرجو..ومع طاح الضوء وصلو..ولدوار علال قربو.
مرجانة شافت الواد لي حداه كانت نصبات على دوك جوج خوت..وقبل ما تضحك سمعات الضحكة منه!
تلفتات مستغربة لكن ما داها فيها..ونزل كيورد الخيل من الواد..وحتى هي تبعاته.
حيدات اللثام..وحتى قب السلهام..غير تلفت شافها أش دارت ونطقات مفهماه.
مرجانة: كاين الحال سخون بزاف!
قبل ما يجاوب تحدرات للواد كتغسل يدها..وتشمه وتحقق فيه عاد تغسل وجهها.
كملو وفوق الخير ركبو..ومشاو ولدوار وصلو..غير تلفت ليها..لقاها دايرة السلهام والقب واللثام ومن لفوق حيك مكركمة بيه كلها..وكتبان غير وحدة من عينها!
مرجانة: تحرك البرد بزاف!
دارت هكا غير باش حد ما يعرفها..أما هي بغات تفكر غير من الصهد لي قتلها.
من دخلة للدوار وقف عليهم واحد..لباسه لباس جنود السلطان..حنى الراس ليه..ومرجانة فهمات بلي عارفه ولا موصيه.
نزل شمس الدين من خيله وهي تبعاته..وتكلم داك الجندي قدامه.
-شرفتينا فبلاصتنا أمولاي.
ضرب شمس دين على كتافه..وببحة رجولية جاوبه.
-غير ريح راسك أعَادل.
بيديه بدا كيوريه طريق داره..وهو ما تحرك حتا جر مرجانة حداه..وعادل ماهزش فيها العين حيث مني معاه باينة من حريمه!
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
