▪️مرجـــــــــــــــانة▪️
▫️من كتابة هيرا▫️
▪️الجزء الثامن عشر▪️
قالت كلامها وناضت من الشق كتطل..وحتى حاجة ما بانت..قفزها الباب لي كان كيتخبط وعليهم تحل!
دخل منه وجه عامر دم..مسح على وجهه حتى بانو عينيه..وحدر راسه ما هز العين..فور ما تذكر كلام سلطلانه!
سلطانه لي فور ما سلات الحرب بفوزه..ووسط احتفال جنوده..شير ليه ميسر ليه طريق..يدير ما قال ليه!
الجوج لي تما شافوه بدمه وسيفه..تخلعو..رحيمو بانت فيها..ومرجانة دفعات صنطيحتها!
شافت لبسه وبان نفس لبس جنود الغابة لي تبعوها..تهنا بالها..أحسن ما يدخل عليهم إنس جديد!
شير ناحية الباب حتى بانو ثلاثة الخيول القدام..وقال
-موصيني نوصلكم بأمان لداركم..حتال دار القاضي عياط!
عكس رحيمو لي تصدامت..مرجانة مبانت عليها! عارفاهم عارفين شكون هي..داكشي علاش بقات متبتة..طوال الزمان ولا قصار غادي يخرجوها!
تقدامت وللخيل ركبات..ورحيمو تبعاتها كيف ديما..غتمشي معاه ماشي حيث ثايقة فيه..ولكن غير بغات تخرج من هنا وكان!
وهدا ما كان غير ركب حتى هو..وتقدم قايد ليهم الطريق بلا هضرة ولا كلام..حتى قربات رحيمو كتوشوش لمرجانة!
رحيمو: لالة معرفتش فين..ولكن فايتة شايفاه.
مرجانة رجات عليها بنفس الصوت: تفكري وقولي ليا..ضروري..اليوم قبل غدا!
من تما العيا طاح عليهم..والسكات جا عليهم..وكلها وراسه فين خدام كيفكر..واحد موحش عائلته وعارفهم خايفين لا يفقدوه فالحرب..ووحدة كتفكر غير فهاد شي لي طرى ليها فهاد وشكون لي كان حابسها..أما الثالثة فعقلها غا سطل الحلوة لي مشى..فطور حورية..والعصى لي غتاكل من عند شامة..ومسكيينة هاد رحيمو.
غافلين على الهضرة لي ضارت من قصبة لقاضي للي ساكن حداهم..كل راجل وصلها لمراته..وكل مرة وصلتها لجارتها..وقبل ما يصبح الصباح..طلعو العيالات لسطاح..مع الفجر..كل واحد كيقول أش عارف شي كيحلف حتى شاف مرجانة مع السطان.
شي قالك والله حتى السلطان جا برجليه لقصبة القاضي..شي كيقول قصبة القاضي كانو فيها جوج عراسات حورية ومرجانة لي تزوجات بالسلطان..شي قال مكاين زواج..راه خداها غا جارية ليه..شي قال راهم تزوجو فالسر..شي قال رآها طلقات منه گاع!
صباح الصباح..على نور الفتاح..نوضو نوضو البارح كان عرس السلطان ومرجانة…لا لا راه غا سلطان جا زارهم وحدد نهار العرس..انا والله حتى شفت السلطان بعيني داخل عندهم!
هدي هي الهضرة لي صبحات ضايرة! لي باتو عليه صبحو عليه..والهضرة داعت من الدراز للخماس للفران للحمام للسوق!
هضرة ناس سامة..وبحال العاصفة لي ما تهدا..لا دواو أش جا ما يسكتهم..وكل واحد يزيد من عنده..ولي وصلاته خبار يعوجها..ولا يقادها..على حساب كانته.
الهضرة لي داعت على برا صبحات واصلة حتال القصر..وفمسامع الخدم والعبيد!
وحتى هوما شكلوها وعكلوها كيف بغاو..إوا فكها يا من وحلتيها دبا.
ضايرين خدم القصر كيحكو فالزرابي..خدمة فاليد وخدمة بالفم في الهضرة!
لي كحيحكو فالزرابي..واقفة عليهم وحدة..تنگر وتعاود !
-سربونا خلاص..مولاي قرب يدخل!
جاوباتها وحدة لايحة الشيتة زعفانة.
-وراه ضهري تقسم..من الكشينة سيبتوني نحك الزرابي! ومولاي لا دخل ومعاه ديك بنت القاضي لي كيهضرو عليها..واش غيزيدوني نخدم عليها..حتى هي! كيقولو رآها شرانية وبغا يتزوجها!
نقزات وحدة كتهضر..هي ولي دوات شي مكيحمل شي!
-حتى الخدم تحل ليه اللسان..على مولاي وحريمه!
لي واقفة عليهم كانت هازة عصى ضرباتها فالأرض محمرة فيهم الشوفة!
-المدبوحة كتضحك على المسلوخة..والمكروضة تقول ليهم هزوني نشوف..كل واحد يديها فشغاله..وحيدو عليكم الهضرة الخاوية..لا بغيتو فهاد القصر تطولو ولا يتقطع ليكم الراس!
دايزة من حداهم عمة السلطان! لالة الأميرة فهرية..مرة كبيرة..والذهب طالع من يديها لراسها..غادة وتقرقب !
لابسة الحرير على الحرير..وهازة داك الراس..سمعاتهم اش قالو..وسمعات حس السلطان وزواجه من الخدم!
خرجات عينيها ومشات زربانة فالخطاوي خلات الخدم لي مرافقينها..حتى هوما زربانين يوصلوها..دخلات لبيتها..وعيطات على الخدامة لي كتبقا ديما معاها!
فهرية: نعيمة أجي لهنا "دخلات عندها حانية الراس" إنا زواج كيهضرو عليه الخدم؟
نعيمة: ألالة..قالو السلطان قبل ما يختم حربه..أول حاجة دارها مشا لدار بنت القاضي عياط..وقالو راها عاجباه وناوي يخطبها..وبلا راه كانت فداره لي فالغابة معاه.
فهرية الريح لي جات تديها..الراجل مات ولا ولاد بقاو..وحتى حد ما حاملها فالقصر! وحتى السلطان لي يعزز بلاصتها مكتشوفو گاع! إوا قالت تدير فيها فهيمة..وهادي هي الوجيبة!
فهرية: جيبي ليا الورقة والحبر والختم ديالي..يلاه تحركي.
دارت نعيمة ما بغات..وقدامها الورقة والحبر حطات..والورقة ليها سرحات..خلاتها تكتب وفكلامها زوقات..وبختمها ختمات!
فهرية مدات ليها الرسالة: عطي لخديم من الخدم يوصل الرسالة لدار القاضي عياط ومعاها هدية تليق بمقامهم وتبين مقامي!
نعيمة: أش فيها ألالة؟
فهرية هضرات هازة نيفها: حطيت راسي فمقام خويا لقمان..وصيفطت رسالة لدار القاضي عياط يوجدو خطبة تلقيق بمقام السلطان "كتقاد قفطانها فرحانة" فاش غيجي غيفرح بلي درت ويعزز ليا بلاثتي وسط القصر.
نعيمة: وإلا كانت غير هضرة كتدور..مافيها لاوصحة ولا برهان!
فهرية خرجات فيها العين: ديري لي قلت لك..دارهم قريبة وبغيتها توصل قبل ما يجي السلطان!
نعيمة حدرات الراس ما لقات ما تقول غير ناي تأمري ألالة!
أول خدام بان لها عطاته الرسالة يوصلها مع الهدية..وحتى هو ماشي من العاكزين..غير عطاتها ليه ومشى طاير على الخيل لدار مرجانة!
▪️أرائكم وتوقعاتكم؟ ▪️
قفراتها الزغبية..جات تكحلها عماتها😂😂
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
