💎مكتملة💎
🌙🌙🌙مرجـــــــــــانة🌙🌙🌙
✨كان يا مكان في قديم الزمان! ✨
جملة سحرية فتحات البيبان وخلات الأنس يتزوج بالجن والغول حتى هو ليه مكان..
كاين السلطان وكاين الخدم والحشم...وكيفما كاينة الفهيمة كاينا الدميمة..
كان يا مكان جملة تقالت فكل مكا...
▪️مرجـــــــــــــــانة▪️ ▫️من كتابة هيرا▫️ ▪️الجزء الواحد والأربعون▪️
وخا تكون مكلخة غتفهم أش قصد بهضرته..قبل ما يخرج من الحمام ولا يوصل للبيت ويحصلها..هربات من تما والحشمة بانت فيها!
قدام باها ولا خوتها ولا غير عمها..كتحشم قدامهم..ومتقدرش ترفع الصوت عليهم..أو لا توقف حداهم..ودبا قدامه ولحد الآن باقة مولفات!
كلمة ولا لمسة كتخلي لسانها يتسرط ليها..كانت خايفة من اليوم وهاهوا جا!
شحال من مرة شامة وصاتها وعلماتها..وكلشي دبا تنسا لها..بحالة كانت كتكب الماء فالرملة..وبقات فبلاصتها كتركل من هنا لهنا!
كتقول تمشي تسول نجوى وخا غير بشوية تفيدها..حتى كتوصل لنص وترجع لطريقها..قايلة حد ما خاصه يعرف بينها وبين راجلها!
الليل وصل وهي باقة سارحة..غير شافت الظلمة وزادت شداتها الرعدة.
ناضت غادة وكتسرفق فراسها وتقول رجوع لله حتى حصلتها نجوى..مدات يدها شداها وحبستها..والآخرى تسحابه غير هو وضارت شادة فقلبها.
نجوى: نتي فعار الله ابنتي..مالك أش وقع ليك!
سولتها ولكن غير زادت كملات لي بقا وفكرتها..وحدرات راسها حشمانة منها..وما قدرت تقول لها.
نجوى: غير حسبيني يماك وقولي ليا لي كاين..ما عرفتي على يدي تلقاي الحل.
حورية حطات يدها على يد نجوى..كتلفت هنى ولهيه تقول كتسرق شي حاجة. حورية: ليوم واقلة لغالي غيدخل عليا!
كتوشوش لها وتقول كلمة وتعطل عاد تبعها ختها..ضحكات نجوى ليها..وما بغات تسولها علاش باقي ما دخل عليها..وفضلات غير تنصحها.
نجوى: متخلعيش غيوقع غير الخير..سيري تحمحي..وحوايجك بدلي..ولراسك رتاحي..كولي دبا إلا بغيتي..وماتبقايش غير تفتفي وترعدي..هادشي راه عادي..كل مرة وراجلها دايزين وغايدوزو منو..الا كنتي خايفة منه ما عنده ما يدير ليك..واش مكتعرفيهش؟ عمره هز عليك اليد ولا خصر خاطرك..وحتى نتي مترديهش كيفما مكبر بيك كبري بيه وشدي معاه الخاطر..الا كنتي خافية من هضرة سمعتيها ولا شفتي شي وحده عاودت على ليلتها..راه نتي ماشي هي وراجلها ماشي راجلك..وكل واحد وطبعه وكل واحد وشنو عنده!
هضرة ولكن نفعات..يمكن حورية غير الواد لي جا يديها..وساهل تخفف عليها..سمعات ليها..ومشات للحمام تحمحات وتعطرات..وحوايجها فلبيت بدلات..وقفطان فلون حناكها لبسات!
جلسات فسرير كتسنا وقرب النعاس يغلبها!
ناضت للبيت لي فيه المنسج تلاهي راسها بينما جا..شعلات الشمع وگلسات تما..يد فالخيط لي قدامها..وعقلها فالغالي لي داه لها.
الحال تعطل..وهو باقي ما وصل..ناضت جامعة جلايلها..قايلة كيف ديما كل ليلة كيغبر عليها!
بقات هكاك واقفة حتى يهدى الحال..ولكن وخا هكاك الشمعة طفات..رجعات غادة ولاصقة فالحيط..لا تعود تطيح..حتى يد تحطات عليها جاراها..تفكرات لي كانو هجمو عليها..ويلاه بغات تحميها غوات حتى همس لها مهدنها..بـ "غير أنا هذا" عاد رتاحت تابعاه!