💎مكتملة💎
🌙🌙🌙مرجـــــــــــانة🌙🌙🌙
✨كان يا مكان في قديم الزمان! ✨
جملة سحرية فتحات البيبان وخلات الأنس يتزوج بالجن والغول حتى هو ليه مكان..
كاين السلطان وكاين الخدم والحشم...وكيفما كاينة الفهيمة كاينا الدميمة..
كان يا مكان جملة تقالت فكل مكا...
▪️مرجـــــــــــــــانة▪️ ▫️من كتابة هيرا▫️ ▪️الجزء السادس▪️
داخلة مرجانة لقبيلة علال هي لولة سابقاهم..كانت مبدلة السلهام لي تقطع..الحراس لي وراها كانو جارين دوك جوج بالقنب مع دخلات تجمعو ناس وهوما كيقولو شوفو حمد شوفو محمد!!
نزلات من الخيل ووقفات على الأرض..جامعة قفطانها من التراب مبينة بلغة الصم لي تبينها بنت الأصل والمفصل..بان ليها راجل جاي يجري جيهتها شاد سلهامو بيدو كرشو سابقاه ووصلات قبل منو..والشيب غطا لحيتو قبل راسو..من كفاش حدر كلشي الراس تعرفو هو قايد الدوار...سي موسى.
مشا كيجري جيهت دوك جوج وشوفاتو تبين أش غيدوز عليهم..شد فمحمد من عنقو وهو كيغوت القايد موسى: فين رزقي يا الكفار!! حصلتو وليوم ندوزكم من راس الإبرة حتا تدوو وتگرو. مرجانة: الشريف دير فيهم ما بغيتي ولكن حتى ناخد حقي أنا لولة "بدات كتغوت" فين القاضي فين لي يفصل بينا بالعدل والحكام!! القايد موسى: حقك! إنا حق تكسابيه مع هاد شلاهبية السراقين. مرجانة كتبكي وتبوحط: كانو بغاو يرزوني وفشبابي يضيعوني..ويتعداو عليا..لقاوني فالغابة بوحدي وقالو هذا الله. وطاحت معنقة رحيمو تنخسس وتطلع النفس.
القايد موسى: الله ينعلكم يا الكفار!! دوهم عند القاضي المختار دبا نيت!! غير سالا كلامو ورجال القبيلة طارو جارينهم..وفالتراب مرمدينهم..مرجانة ورحيمو كانو تابعينهم..باقة تبكي وتنخصص ومعاهم جوج من الحراس والباقي كيحرصو الخيل والحوايج.
قدام راجل شريف..من عينيه يبان حكيم..ما هو طاعن فسن ما هو صغير..قول داخل فالثلاثين..لحيتو خفيفة وملامحو شديدة..شديدة بالزين لي يخليك تالف هالف. كان جالس فوق الكرسي وفجنو لي يكتب حكامو وعلى الأرض قريب ليه كاينة مرجانة ولي جا معاها..والقايد حتا هو والخوت الصگعين وناس دوار لي مدخلوش كيطلو من الباب!! كانو جالسين فبيت ما هو كبير ما هو متوسط..مفرش ومتول..ومغطي بزربية من لباب لتحت وداير بالمخاد ملونين ومنقوشين وضوء الله مخلي عليه العين
القايد موسى: لي دار الذنب يستاهل العقوبة..هاد جوج التهمة عليهم ثابثة وگاع ناس دوار شهدو عليهم سارقين ليا الرزق ونتا منهم اسي القاضي!! ولكن راه ما بغاو ينطقو ولا يقولو رزقي فين هوا!
همهم المختار ورد عليه: آييه عارفين ولحكام السرقة فاهمين..ولكن مال لوخرين؟ هنا عينو من القايد موسى تهزات ضارت فالمكان وعلى مرجانة تحطات..ويدو لي كتحك فلحيتو تلات.. شافت فيه وخرجات عينها حتا هي بلا حشمة ولا حيا..
مرجانة شدات على سلهامها ونطقات: هوما…هوما.. ما قدات تكمل الجملة وبكل كلمة تطلع تنخسيسة لي شافها يتقطع لو القلب!! خلات القايد يعاود ليه ما جرى والخوت الصگعين ينكرو ما طرى.
القاضي المختار : كفاش نتبتو صحة كلامك وصدق أقوالك ونتيقو بلا ما نتي نصابة ولا دجالة؟ العينين خرجو وعليه قرمو..ضارت لعند واحد من الحراس الشوفة فيه غززات..ونطق بعد ما تفكر عقلو لي عمراتو ليه فهمات. الحارس: خمم قبل ما تتكلم..راه بنت القاضي عياط لي قدامك..فهم راسك باش يعلى شانك. مع ختم كلامه تقدم لقدامه..مد ليه رسالة فيديه من القاضي عياط وعليها ختامو وكيقول بلا مرجانة بنتو..باش إلى وقعت ليهم زالة فالطريق يلقاو ما يفكو
كل قاضي فالبلاد عارف القاضي عياط ولا ما شافو يسمع بيه..تبسمات مرجانة وعينيها ما فضحوها مع الغطى..مع هبطات اللثام مع تحلو الفام..شوفو الزين شوفو العين..شوفو بنت الأصل شوفو بنت الجود والكرم هذا ما بغات توصل!! خلات المختار يحل عينيه كثر وكثر..عينيه فضحوه وهي فهمات وهادشي لي بغات..الهضرة فالبيت غير مازادت كثرت عليها وعلى باها وعلى كل من فالقاعة..
المختار: شويت السكات!! التهمة لولة ثابتة وحكامها حتا هو ولكن لقالو فين خبو داكشي لي سرقو غادي نخفف حكامي..والثانية حتا نخمم لها مزيان. الخوت جلسو ينكرو ما كيقول..معرفو بلاصت لي سرقو وما قربو لمرجانة ما شافو القايد موسى: لي سرقو ونهبو راه يديرو ما كثر..كلشي بان والبنت عليها الأمان..كنا حاطين هدية للي يجيب الساراقين..وهي جابتهم ومن الفوق خاص يتعاقبو مرتين على الفعلتين. ناضت مرجانة من بلاصتها..جامعة سلهامها..شافت فالقايد وتبعاتها للقاضي مرجانة: لي عندي قلتو ولي ما بغا يتيق لهلا يفكو..ما بغيت هدية وخا كلشي بالنية..وحتى حقي سامحت فيه وما بغيت عليهم حكام ولا خطية..ولكن لعند الله يبان الحق ولي يخلي النفوس تزهق.
Oops! This image does not follow our content guidelines. To continue publishing, please remove it or upload a different image.
تتمة الجزء السادس
كملات كلامها وتمات ماشية..شافت فرحيمو باش تفهم راسها..رحيمو لي مني دخلو وهي كتدور غا فراسها تفكرات كلام مرجانة ليها وكفاش تحلفات عليها..قالت لها مني تحط رجلها فالقبيلة ما تدوي ولا تتكلم وخا يحطو لها سيف على الرقبة صوتها ما يتسمع.. وإلا دخلوا عند القاضي فاش تنوض مرجانة تبغي تمشي تبعها بلا كلمة وهذا ما كان..غير خرجو بقات مرجانة بشوي تمشي وتمسكن غير سمعات وراها صوت كيقول "بنت القاضي عياط تسناي" تبسمات حيث عرفات شكون وتلفتات..وعلى الحراس لي حداها بعدات..بقات غير رحيمو لي ليها زادت قربات.
القايد موسى: القاضي هكا داير..يا يشوف بعينيه يا الدليل ولا شهود..مبغيتش لداركم ترجعي وبدوارنا تعاودي مرجانة: وقع غير الخير..ونسيت ما جرى وحتى نتى متبقاش تفضح ما طرى" سكتات وضارت تمات غادية وهي توقف تلفتت ليه" ولكن حيث أنا بنت لخير غادي نديرو فيك..با كان على كل لسان على قبل حكامو وها سرو قدامك..هادي لي حداية راها شريفة زيزونة ولكن نهار كتنطق كتقول غير ما طرى وجرى..الا سمعات ولا حضرات لشي واقعة بليل كتنطق بحكامها واش جرى فيها..حنا غنمشو نكملو الطريق وحيث هي كتهضر من ليل لليل الا دوات راه غنصيفط لك مرسول ونوريك لي تسرق ليك فينا بلاصة مخبي.
كلامها كملاتو ورحيمو فمها حلاتو.. معرفات باش تبلات ولا علاش دوات..هي ولات شريفة!! جراتها مرجانة وتمو غاديين وخا رحيمو عينيها مصدومين..حتا وقفو ومرجانة تلفتات كترمش ليه مني سمعاتو قال
القايد موسى: تسناو فين غاديين..على قلة ديور ليلة راكم غاتكونو بايتين فداري مع مراتي وولادي.
▪️أرائكم وتوقعاتكم؟ ▪️
مرجانة مرة ترد رحيمو جنية مرة شريفة😂 فنظركم علاش دارت هكا؟
