▪️مرجـــــــــــــــانة▪️
▫️من كتابة هيرا▫️
▪️الجزء الخامس والأربعون▪️
هكاك خرجوها من البيت..كاملة مطلية بالحنا وحمرا والرجل محروقة..كتطلب وتزاوگ وتقول غير لراسي كنت تنبخر!
غير شافتها مرجانة..صحات وجلسات تشرب فالماء..يد شادة بيها فمنى..ويد فجارية حداها!
مرجانة: الله ياربي الله..رضات الولدين كتنفع..حسدوني وبالسحور بغاو يحمقوني!
ناضت فخرية كتجري ولسلطان مشات..وفالأرض تسرحات..تبكي وتزاوگ ودموعها على وجها تنشرات.
من بيتها خرجو قفطان مرجانة المقطع..وكلشي تفضح!
هنية: أويلي على السحارة "ضربات على حناكها" دايرة سحور وسط قصر السلطان..يعلم الله شحال من مرة ولمن! مرت السلطان خاصها تكون حكيمة ولبيبة..ونتي سحارة!
تلاحت فخرية حدا رجل هنية..تبكي وتطلب غير لزيفة تجي.
فخرية: أنا غير كنت تنخربق مكنعرفش لسحور..لعار ستريتي..ولعندك حزيني.
بعدات هنية من حداها..كان خاصها غير السبة باش تري عليها.
هنية: قفطان البنت عليك شاهد..باقي مكملات حتى الشهر.. ومني دخلات وهي غير الفراش..لقيتيها سكوتية وبغيتي تلعبي عليها!
مشات عوتاني جيهت السلطان زاحفة..والخناين دايزة.
شمس الدين: آخر مرة حصلتي شاعلة داك لمجمر أش قلت لك؟
شدات على عنقها بيدها..و على شكل لا ضورات راسها.
فخرية: عفاك متقطعش ليا الراس..متقتلنيش..ندير لي بغيتي..طلقني وما تقتلني!
شمس الدين: مبغيت نحط الفاس على الراس..نتي مطلقة بالثلاث ولدار باك منفية..ومن داري غتبقاي مجلية.
الفام شهقو..والعينين تحلو وتبلقو..ومرجانة حطات عينيها على عينو!
كتشوف فيه..وفخاطرها مبسمة ليه..وحتى هو شاف فيها..وعطاها شوفة ماتسرطاتش ليها..خلات لسانها يتعقد ليها!
شاف هنا ولهيه وزاد مخليهم طايحين..وحدة تبكي وتنوح على الطلاق لي طلقت..ووحدة..غير خلوها على الله!
ناضت مرجانة من الأرض شادة فلي حداها..غادة بشوي وشادة فراسها..تدور حتى تدور..وتجي حدا ودن فخرية وتقول
-الله ياربي الله..سحورك دقة ببطلة..فشلتي ليا الركابي!
الخبار فالقصر ضارت..غادة مرجانة لبيتها ولي شافها يقول فخاطره مسكينة..وحد ما عرف بلي هي ديبة!
غير دخلات لبيتها..بقات مشي وتجي فبلاصتها..ورحيم معاها.
مرجانة: لا لا لا هادشي ما مسلكش..واحد الشوفة دار فيا..حسيته عايق بيا!
رحيمو: ونتي الآلة كتبغي تكلخي لواحد..مولاي غادي تدوز عليه هاد جوج سخفات لي درتي!
جلسات فسريرها..وحطات رجل على رجلها..ويدها فوجها.
مرجانة: لا القضية ماشي فسخفات..أي حاجة كندير كنحسه عايق بيا..ومني هكا علاش كيسايرني بحالة حتا حاجة مكاينة!
رحيمو: أنا كيبان ليا ألالة غير تركني..ولسانك ربطي..وغادي تهناي وتهنيني.
طلعات الشوفة فيها..وضرباتها لها بتخنزيرة.
مرجانة: كيبان ليا طوال لك لسان ارحيمو.
رجعات عوتاني لبلاصتها..وبحال الحمقة عاودت ما قالت رحيمو لها.
مرجانة: أنا خاصني نغبر..منباقش نبان حتى ينساوني..غادي نعتاكف فبيتي..ومابقيت نشوف حد!
قبل ما ترد رحيمو عليها..تسمع الدقان فباب بيتها..ومنى دخلات مبسمة وتحنات ليها.
منى: مولاي السلطان..بغاك هاد ليلة فجناحو.
ولات مرجانة تشوف فرحيمو..ورحيمو تشوف فيها..شي يشوف فشي..وربي هو هو كلشي!
مرجانة: ويلي ويل الشيطان..أنا والله ما بغاوني نتوب..قوليه مجاياش..بغا يتبعني لدوك جوج يجري عليا فهاد ليلة على قبل الخرجة لي خرجت..والله لا كانت ليه!
مشات لسريرها تكتات..وبغطاها تغطات.
مرجانة: قوليه مريضة..فيا السخانة وفيا الجدام!
رحيمو لي جاتها البكية: عار الله ألالة ليوم يقطعو لينا الراس..باركة من البهلان..ونوضي تكلمي للسلطان.
حيدات الغطى عليها..وناضت غادة وجاية فبلاصتها..وكتاكل ظفارها..حتى مشات لرحيمو جارها.
مرجانة: العشوب لي كنت قلت لك حطي ليهم! غادي نمشي عنده ودخلي أتاي حطيهم فيهم.. ولا عرفتي شنو! ختاري كاس مزوق بالخضر وحكي العشبة عليه..وأنا غنكب أتاي فيه..غادي ينعس وأنا نخرج!
رحيمو: اش داني نقرب للسلطان!
مرجانة كتحلف: والله وما دريها تا نبيتك معلقة فالسطاح.
مع منى مشات..لبسات وتزوقات..وفالحمام تحمحمات..ولجناح السلطان مشات!
▪️توقعاتكم وأرائكم ▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
