▪️مرجـــــــــــــــانة▪️
▫️من كتابة هيرا▫️
▪️الجزء التاسع▪️
مشات رحيمو سامعة لكلامها..وهي تلفتات ليه لقاتو وصل لعندها..الشوفة تبدلات..ورجعات حادرة الراس وعينها كيف الملاك..مرة مرة تهزهم فيه وترجع تهبطهم بالزربة!
المختار: الصباح باين من الشمس لي نورات علينا!
مجاوباتش غير زادت حدرات راس مبسمة وحشمانة.
المختار: فين هادي لي كانت لبارح مخرجة لعينين وسط الرجال!! "سكت شوية وكمل كلامو" شوفي أبنت المرة أنا غادي نجيك بلا كثرت الهضرة..شفتك ونويت معاك الحلال..عندي مرة وغتكوني عليها ضرة..هي ضريفة وباينة نتي كثر منها..إوا أشنو جوابك؟
ضارت وضهرها عطاتو ليه..وصوت ضحكة حشمانة وصلات ليه..رجعت تقابلت معاه ويديها كتلعب فحوايجها القدام!
مرجانة: موافقة..وخطبني اليوم قبل غدا.
كتنطق كلمة وختها تكلس تسنا..وبان عليها بلا حشمانة..هدشي لي بان ليه هو لي مقداتو فرحة..أما هي تفكرات الدار لي فيها العرس ولي دازت من حداها والحمقة لي كانت كتلعب قدامها..خيطاتها وفصلاتها فراسها..وحطات هاد القاضي فقبضتها.
المختار: الطريق لداركم مساهلاش..وخاصها الوقت باش نوصل كيف ندير لهاد لخطبة ليوم؟
مرجانة: خطبني من عند خالتي..أنا جيت نحضر للعرس لي تما..وهي فمقام مي..بلا شك عرفتي الدار ديال العرس.
المختار ضحك فرحان: يكون خير..علميهم ليوم غادي نجي.
مرجانة: خلي حتال مع العصر يلاه يسالي العرس.
هز ليها راسو بمعنى وخا..غير تم غادي وقفاتو عاود.
مرجانة: بغيت نقول ليك واحد الحاجة..أنا راه من دبا حسبتك راجلي"ضحكات ليه كتخبي وجها بين يدها" نخاف لا تزوجنا صداقي يطمعو ليا فيه كيف دارو لخواتاتي..قلت سبق ليا هنا..ومنها نشوف مقامي فين واصل عندك.
شاف فيها مستغرب..واش يعطيها ولا لا..خاف ينطق بالرفض وحتا هي تقابلو بيه..مبغاش يبين لها بلا راه بخيل..وداكشي علاش يسر وجبد كمسة فيها فلوسو وبلا ميحل ولا يحسب عطاها ليها..وهي خطفاتها..كتشوف فيها..ودعها ومشا جيهت خدمته كيدعي ويعاود باش الله يسر ليه..خلاها وراه..حالة الكمسة كتحسب بالقرش على خوه..تحقق فيه مزيان وتقابلو مع الشمس..حتى تحققات مزيان وزادتو على لي عندها وخباتو تحت جلايلها..ومشات غادة لدار القايد موسى.
بانت لها رحيمو واقفة حدا الباب كتسناها..مرجانة بغات تعيط لها..ولكن كانت حديدة قدامها..خلاتها كانت غتجي على وجهها لكن شدات فراسها.
مرجانة: تفو على دوار منحوس من نهار حطيت فيه رجلي..وانا نكمد فالضرابي..أكيد شافو حوايجي وزيني وحسدوني الكفرة..مني صبحت على داك الكلب المسعور باين كيف غيدوز النهار.
رحيمو: ألالة لكلب راه جيت لقيتو مات..بقا صابر ولكن كتاب ليه يشوفك ويودع.
نزلات مرجانة تهز البلغة لي فرجلها..تضربها بيها..لقات رحيمو طارت من قدامها.
مجموعين على الطبلة كلهم..وكيف ديما مرجانة كالسة على مخدة ومتكية على ختها..ماكلتها معزولة عليهم ومن يد رحيمو تصايبت..موسى عيا ميصبر وفلخر نطق.
موسى: أمضرا قالت الشريفة شي حاجة..فين رزقي!
مرجانة: واش كاين شي واد فالغابة؟ "حرك لها راسه بـ اه" اوا قالت فطريق الواد بين شجرة وشجرة تحت من الصخرة..نفخ على ورق الصفصاف ومسح التراب..وراك غتبعد على الخراب.
ناض قافز فرحان..عارف واد واحد وشجرة صفصاف وحدة..ومتيقن بلا رزقو غيرجع ليوم قبل غدا..سمح فالفطور ومشا لطريق الغابة مع بعض الرجالة.
غير المجمع تفك..قرب العصر وناضت مرجانة خارجة عاود..وقفات حدا دار بان ليها ولد صغير كيلعب عطيات عليه وجا عندها.
مرجانة: أجا نسولك هاد لقبيلة فيها شي سحارة سميتها فطوش؟
بقا كيشوف فيها ومجاوبش..زمات فمها وجبدات من تحتها خمس قروش حطاتهم فيديه..بقات شاداهم وقالت
مرجانة: شوف شحال غادي نعطيك..وقول ليا دارها فين هي!!
الولد بالفرحة نطق لها بكل ما كيعرف: دارها فهاد لغابة لي ورى الدوار ماشي لي لقدام..غير دخلي للغابة شوية راها فالبدية "كيدوي وينعت بيديه"
شافت فين كينعت وحفضات البلاصة..حلات يديه وجبدات قروشها مرجعاهم عندها.
مرجانة: قايل ليا جوج كلمات وباغي تنصب عليا..سير تلعب بقا لك غا لفلوس.
صيفطاتو كيبكي ويشهق..لي عطاتو ليه راها خطفاتو..بان لها موسى جاي فرحان..ووراه جوج رجال هازين صندوق..باين لقى لي بغا..ولكن ديك الفلوس ماشي لي تقدر تعمر صندوق! شافت هزة الصندوق خفيفة..وعرفت بلى القايد موسى جايب الفلوس هكا باش حتى حد ميعرف أش عنده!
دخل هو وياها هاز صندوقه يشكر ويعاود..ويعيط على المرة وبناتو يشوفو..باركو ليه وشكروها ورجعو للي كانو كيديرو..ها لي تنقي الزرع ها لي تطيب وتعجن..شاف موسى جيهت جنابه وطلع للسطاح..حل البيت لي كاين تما ولي نعسات فيه رحيمو ومرجانة..تحنى تحت على السرير حيد حديدة كانت تحت منه بان بحال الغار تما..حط رزمات الفلوس لي كانو فالصنوق..وجمع وطوى خارج فرحان مشافش مرجانة لي نزلات قبل منه وشافت ما طرى وجرى!
مشات عند رحيمو لي كانت جالسة..وصاتها تعلم الحراس لي معاها بلا ليلة غادي يكملو الطريق..وهي كتوصي وتعاود تسمع صوت القاضي المختار كيدق ويعيط!
خرج عنده موسى وبناته ومرته كيطلو من الشقة..ماشي بحال مرجانة لي خرجات مسنطحة.
موسى: أش واقع وطاري أسي القاضي؟
المختار: شوف هادي لي وراك لي جرجرات ليا راسي بين الناس..خلاتني غادي عند دار مليكة نخطب بنت ختها..صدقت واخد حمقة ولصقات فيا مكاين كيف نتفك منها..وفوق هادشي كامل شدات مني الصداق ونصبات عليا..خلاتني نعطي الصداق جوج مرات وانا عندي غا مره وحدة.
نقزات مرجانة من ورى موسى دافعاه ومخرجة عينيها.
مرجانة: الله أكبر..أنا ندير هادشي!! اللهم إن هذا لمنكر..واش عندك شهود..شي دليل ولا برهان يتبت صحة كلامك وبلا مافيه بهتان.
المختار: أنتي جنية وحسبتي حسابك..رجعي لي رزقي ولا ما يعجبك حال.
مرجانة: إيوا نهار مشيت نشكي عندك قلتي كلامك ناقص..خاص شهود ولا دليل..إيوا حتى دبا أرى ماعندك!
لي عطاها قبل رجعاتو ليه..كيف طلب شهود..هاهيا ولات طالباهم ليه..ومن لفوق مخرجة لعينين فيه.
▪️أرائكم وتوقعاتكم؟ ▪️
عبرات عليه..مخلي المرة واحلة فروحها وغادي لمرجانة😒..باقي غادي يبان راه لصقة😂.
ŞİMDİ OKUDUĞUN
مرجانة🌙مكتملة🌙
Romantizm💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
