▪️مرجـــــــــــــــانة▪️
▫️من كتابة هيرا▫️
▪️الجزء الرابع والأربعون▪️
قبل ما تحل يدها..لقاته طار من حداها..واش الظلمة ولا وجهه كان حمر وحشمان!!
غير حلت يدها وتبسمات فرحانة..هزات السنسلة وتقابلت مع المراية مجرباها!
خرجات ومشات للكشينة..العشاء قاداتو..وللبيت داتو..بالشمع ضوراتو.
گلسات كتسناه..حتى دخل مبدل وكيتصرف بحالة مدار والو..والشوفة فالسنسلة محطها..غير كتغفل عليه وكيطلع عيونو يشوفها!
كيضحك فخاطره فرحان..بالذهب لي مع عنقها البيض جا!
ـــــــــــــــ
كانت مرجانة جالسة..رجل مطوية ورجل مسرحة..ويديها كتحرك مع أنغام الجواري لي كيغنو بصوت خفيف فهاد السهرة.
هنية وعائشة لي حداها..ولطيفة حلفات ما تجي..قايلة لهم راه دايرة السهرة حيث بنتي غتمشي!
مرة مرة كترفع مرجانة الشوفة فمنى تخنزر فيها على السلطان لي باقي ما جا..اوا غير تديرها ومنى تخنزر فرحيمو لي واقفة حدا بيت فخرية حاضية!
رحيمو كطل على فخرية وخدامتها من الشق..البيت بيض بالدخان!
غير شافت هكاك ولدات تشير لمنى..ومنى تشير لمرجانة!
إيوا الباهية مغاتكمل حتى يحضر هاد سيد سلطان ويشوف بعينه!
غير تسمع النفار عالم بوصول السلطان..تبسيمت مرجانة بانت..وحتى هي بحال الباقي ناضت!
غير جلس السلطان مكالي بمخدة فمجمعهم..إيوا لا مرجانة طاحت شادة فراسها!
الخدم ضارو بيها..ومنى شداتها..جارها وتبكي حداها!
هنية كحلات بالعمى..والسلطان ناض حتى هو.
حلات مرجانة عينيها..وقلباتهم حتى بياضو ليها..وشدات فقلبها.
مرجانة: قلبي أعباد الله..الماس كيدخلو فيه الماس!
كتبكي وتنوح وتقلب فبلاصتها وتعوج..شي كيعيط على الحكيمة شي كيغوت معاها مفاهم والو!
السيدة مني دخلات للقصر..والمصائب سبحان الله كيجو غير لعندها!
كلشي حبس وضار فاش رحيمو من الفوق طاحت وكتجدب!
رحيمو: داروها الكفرة بالله داروها..قالت غتعوجها ومتيفناهاش..قالت غتسحر لبها وتركب جنون فيها..لالة باقة صغيرة..تغصبات فشبابها..الكفرة بالله خرجو عليها.
كتبكي وتنعت فبيت فخرية..تحيرات فديك الأرض بحال العزا..وحدة كتنوح لتحت وتعوج ووحدة لفوق!
السلطان بعينيه شير لخدم يشوفو أش كاين..ويكلمو فخرية !
وفبيت هاد صگعة كانت حاطة الراس على راس خدامتها ومدخلين راسهم فداك المجمر!
قفطان مرجانة الجديد گاع مقطع وملبوح حداها..هي غير كتخربق وتلوح من هنا وهنا..گاع معارفة اش طاري لتحت!
نطقات خدامتها نصيرة وهي مبعدة عليها.
-أنا هادشي مبانش ليا منو ألالة..خليك غير فالتفوسيخ..وحتال غدا ونصيفطو للي علماتك هادشي..فطوش إلا جات دقة ببطلة!
البخور لي جا قدامها كترميه..وغير كتخربق..وجاوبتها.
فخرية: فطوش من السحور لي دارت لسلطان لقمان حتى مات ما بقات بغات تعلمني ولا تدير ليا شي حاجة..كون كان..كون دبا انا حاملة بالتوام..والسلطان عليا يحماق!
قالت كلامها والبخور لي جا كتلوحه فداك المجمر..المهم شي حاجة تصدق لها وترد دقتها!
بجوجهم ناضو قافزات..فاش الباب عليهم تحلات..ولات نصيرة تلوح فلبخور وفخرية كتلوح القفطان..بغات نصيرة تدفع المجمر حتا تخوا عليهم وشد فرجلهم..وگاع حرقهم !
هكاك خرجوها من البيت..كاملة مطلية بالحنا وحمرا والرجل محروقة..كتطلب وتزاوگ وتقول غير لراسي كنت تنبخر!
غير شافتها مرجانة..صحات وجلسات تشرب فالماء..يد شادة بيها فمنى..ويد فجارية حداها!
مرجانة: الله ياربي الله..رضات الولدين كتنفع..حسدوني وبالسحور بغاو بحمقوني!
▪️تصبحون على خير▪️
أنباء كتقول ان مرجانة كتطل على الزاهية لي غادة بحالها.. وكتحلف وتقول لها لا والله حتى دي معاك فخرية😂
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
