▪️مرجـــــــــــــــانة▪️
▫️من كتابة هيرا▫️
▪️الجزء السادس عشر▪️
تسمع حس راجل والهضرة والتوشويش فالبيت كثر..بصدمة حل عياط الورقة..عينيه خرجو ومن يده طاحت..ورقة بيضة وفيها ختم واحد!
عياط: ختم السلطان !
راجل كيوشوش لراجل..اش واقع واش طاري..اش جاب ختم السلطان ليهم..ومرجانة إنا دار كاينة! الليلة خاص لخبار تكون بين يديهم!
خرج عياط مكمش على الورقة بين يديه والحارس ما لقى اش يدير من غير يتبعو..مشاو الرجال حيث ميقدروش يبقاو فدار بلا حضورو..كلها وزاد لدارو..يعاود لمرتو!
شامة وصلتها الخبار من الخدم..حگا ما حگا مرجانة عند السلطان..وسيفط ختمو لدارهم كدليل وبرهان!
كل واحد وكيف نواها..وكل واحد وكيف فهمها..شامة ما عرفت تفرح ولا تصدم..بنتها..مع السلطان !
كمشات على جلايلها ومشات عنط عياط تجيب منو لخبار..لقاته واقف على باب دار..موجد باش يمشي ولحارس غيوريه طريق فين كاينين..شافها واقفه عليه..وكلمها باش تهنينه.
عياط: ما عرفنا ولا فاهمين..نمشو لفين كاينين..وقبل النهار الجاي الخبار غتكون عندك.
شامة: طريق السلامة!
ركب على الخيل هو ولي معاه..وشد على لجامه وزاد مخليها وراه..فرحانة وكتطلب يكون السلطان..حط على بنتها العين!
الهضرة من دار القاضي بدات على لي وقع هاد ليلة..الخدم مجموعين..وعلى مرزوقة ضايرين..ها لي شاد بنتها ملاهيها على البكا..ها لي ضاير على رجلها يحني.
هضرات صفية وحدة من الخدم..قديمة فالدار!
-نهار لالة مرجانة كانت كتقول غادي نتزوج غير بحاكم البلاد..كنا كنضحكو..إوا هاهيا دارتها بصح.
جاوبتها تورية..صاحبتها وقديمة بحالها!
-أنا ما بغا يتسرط ليا لي وقع..كانت صغيرة وشافت موكب مرت السطان لقمان الثالثة الله يرحمهم بجوج هاد نهار..نيت هي لي ولدت السلطان لي شاد الحكم دابة..عجبها لي داير بيها..وكفاش كلشي محني ليها..وسولات عليها..غير قالو ليها مرت سلطان..قالت حتى أنا باغة نولي..شديناها فيها ضحك..وهضرة مورا الضهر..ساعة مشات حتى دارتها.
صفية عوجات صيفتها وهضرات: طميميعة من الصغر..وكتشوف غير فالحاجة الكبيرة..الأرض ما كتهزها..اش عندها گاع..غير وجها ونسبها!
تورية ضحكات عاجبها الحال: ولكن ما جاتش وولات هكا..من صغرها سي عياط كيشوف غير جيهت الولاد ونسا البنات..كانت كتدير أي حاجة باش يشوف جيهتها..ومن باها لي نقصها ولات كتسنا الشوفة من الناس..بغات كلشي يحط عليها العين "ضحكات مفكرة" تعقلو نهار ضربات يديها..باش يتسوقو ليها..فالأخير خرجات بيد مهرسة وحتى حد ما داها فيها.
كلس كلشي كيضحك عاجبه الحال..التعاويد على هادي وديك..ومرزوقة كيعجبها نهار يهضرو فتريكة شامة..وطالقة ليهم اللعب..ونسات لي يوصل الهضرة ليك..يوصلها عليك!
صفية: أجو بعدا تعقلو على داك البعلوك لي كانت تضل لاصقة فيه!
تورية: بعلوك؟ لا راه يكون كبر منها بشي 3 سنين فداك الوقت..يكون عنده 15 عام واقلة!
مليكة خدامة باقة جديدة..هضرات معجبة.
-كفاش هادشي..عاودو لي..نفهم حتى انا !
صفية كتنش على لحنة وتدوي: كان واحد كيضل يكلس قدام هاد القصبة المهجورة لي ورانا..لي سوله مالك يقول كنتسنا مي تخرج..كان ديك الساع القصبة ساكن فيها وزير لسلطان لقمان..ومت الولد لي قال كيتسنا..دخلات عبدة تما..مرجانة كانت كتسلت من دارهم وتشوفه..ليوم من بعيد..غدا من قريب..بعده ولاو الراس على الراس..كانت كتهز دجاج تخبية وتصيفطه يتباع تشد فلوسه وتعطيه..ونهار يسولوها كتلسقها فالخدم وتقول سرقوه وداوه..ولكن هو بات ما صبح..ماتت أمه بسباب التعذاب لي عذبها الوزير..إوا النهار لول ما رجع والثاني والثالث حتى هو..حتى سلات الحرب الكبيرة لي تقامت ففترة غيابه..وتعدم الوزير وعائلته تنفات بسباب الخيانة..ومن تما القصبة خاوية!
تورية: فاش فكرتيني..كانت شبعات لالة مرجانة بكى!
مليكة: باينة لالة ولفاته..ويمكن بغاته.
صفية: تبغيه ! "ضحكات مسمعة صوتها" نوضي الله يجيبك على خير..هي تبغي واحد يتيم لا دار لا أصل! داك الوقت قلت لك كانت بغات تولي مرت السلطان..ما همها حد من غير هاد شي..سمعت رحيمو كتقول خلات عنده شي صندوق فيه شي فلوس داكشي علاش شبعات بكى.
مليكة: لهاد الدرجة طماعة! زعما عائلتها كبيرة وغنية..وباها ما خصصها من حاجة.
صفية: لهاد الدرجة وفوتيها لهيه..إوا الله يرزقنا حسن القناعة!
كلها وبدا كيجمع نوضة..شي تحجج بالكشينة..شي بالبنت لي نعسات..وهادشي غير فاش شافو شامة جاية..كتعوج بمشيتها..جلسات حدا مرزوقة مسرحة رجليها..كتكب ليها أتاي وطالقة زينها عليها!
شامة كتشرب أتاي: إوا أمرزوقة..سميتك ما بحالك من نهار عرفناك..الدار مدخلتها رزق..ولكن لهلا يخطي عليا بناتي..مرزوقات كقر منك..وحجة دات قايد ووحجة دات السلطان "جبداتها كلمة سلطان فاللخر"
مرزوقة مسممة: إوا حتى لسلطان حجا مرجانة نشوفو..عاد ديك ساعة نحكمو.
شامة: السلطان مسالي ليك بعدا..خليه غير لمرجانة ونسيبته "كتجبدها..وتقلي ليها السم بعينيها"
جغمات لي بقا فالكاس وناضت..جات تلوح لها غير جوج كلمات..وتعلمها بلا ولات نسيبت السلطان! مسبقة الختانة على الولادة!
▪️أرائكم وتوقعاتكم؟ ▪️
باش ما تلفوش...السلطان لقمان..هو سلطان لي قبل من هادا (البطل) يعني باه..الموكب لي شافت مرجانة كان ديال مت السطان هدا( البطل)..قلت فالجزء الله يرحمهم بجوج يعني بجوج ماتو..ذكرت بلي هي المرة الثالثة يعني باقين جوج..اش طاري ليهم؟ غتعرفوه من بعد حتى هو..فاش غادي نشرح شنو هاد الحرب الكبيرة!
كنضن من كلام الخدامات بان شكون هضرات عليه رحيمو وشكون بغات تسحر ليه مرجانة!
الهضرة كتبقا غير الهضرة ومعاودة ما حدهم ما حضرو ما عارفين اش طرى بينهم..ولي طرى غنبينه بلسان مرجانة فالأجزاء الجاية..واش هاد الشخصية باقة غتبان؟ اه حيث عمود من أعمدة القصة.
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
