▪️مرجـــــــــــــــانة▪️
▫️من كتابة هيرا▫️
▪️الجزء التاسع والخمسون▪️
سكتات فاش عاقت بلا كانت غتفضح راسها..عاد رجعات كملات مصححة.
مرجانة: وا قلت لك ماشي أنا !!
حط يديه المرخية كيحيد الشعر لي طاح على وجهها.
شمس الدين: طبيعي بعد ما تجي كلشي يمشي؟ وصداقك كان حد ما يدخل من بعدك لا مرة لا جارية..بمعنى لي مشا مغاديش يرجع ولا يدخل شي حد جديد..هادشي طبيعي؟
ضارت لعنده..كتقاد بلاصت نعاسها وتحرك فوق صدره.
مرجانة: إيوا شنو ندير إلا ربي بغا هادشي!
قرب ليها..حيد كاع الشعر لي كان فجنبها..وهمس فودنها.
شمس الدين: حدك هنا أبنت القاضي!
زادت حتا هي مقربة ليه..حتا نفس وحدة تشركات معاه..كتسبل فعيونها وتلحلح صوتها.
مرجانة: وقلت لك ما درت والو أمولاي!
بقاو ليل كامل هكاك..حتى النعاس طاب..هي تغنج وتفتن فيه..وهو مسايرها وخا كلشي ليه!
الصباح صَبح..وقصر السلطان بعبيده وخدمه صحصح.
فاقت ناشطة وماشطة..والگانة نايضة..فاش لقاته باقي ناعس حداها..قربات عاود ليه حتال وجهو..نعسات مربعة يديها فوق صدرو..وكتشوف فيه وتحققو.
رموش عينيه الناعسين..وكيبانو من بعيد هانيين..حجبانه الكثاف الكحلين..وفمه الثامر والحمر!
قربات فمها حتال حنكو..طلات عليه بنص عين ورجعات باستو..ما حسش بيها وتسحلاتها وعاوداتو.
غادة تكمل الثالثة حتى يده كرزات على خصرها..وعينيه العسلية حلهم فعينها.
زاد كرز عليها..وضورها حتا ولا ناعس فوق منها.
شمس الدين: أش كنت كديري؟
مرجانة: كنت كندوق بنة راجلي!
كتضحك قالتها..وهو تحنى حتال ودنها..وبدا يهضر ونفسه كتطيح عليها.
شمس الدين: باغة تدوقيها؟
قبل ما توصلها باقي هضرته..حسات بنعقها مستقبل فمه..باسها خفيف تما..وعاود طلع جيهت وجهها.
جمع بيديه حنكها..وحط فمه على فمها..مكيتحركش لكن غير حاطه..حتى دفعاته وناضت من تحت منه.
مرجانة: أنا خاص نمشي.
كترعد قالت كلامها..وناضت خارجة كتجري بحالها!
خرجات من تما غادة فطريق جناحها..حتى يونس مرة خرى وقفها.
يونس: حي هربي قفرتيها غيقلوك!
بلا متفهم مستغربة سولاته.
مرجانة: أش واقع!!
ضحك ومشا كيجيري جيهت الحريم..مخليها تابعاه حتى شداته..والصداع من الحريم جاي!
يونس: كانو غادين يتقبو يد عود الروح "كمل كيضحك" غتولي عندها تقبة فيدها تهزها تشوف بيها الشمس..بغيت بحالها باش نشوف الشمس!
مخلاهاش تفهم مشا عاود كيجري حفيان ويلعب بيديه!
أول خدامة بانت لمرجانة وقفاتها..وعلى لي واقع سولاتها..والخدامة جاوبتها
-مولاتي راه شي حد حط الماء القاطع فالحناء ديال عود الروح..وكانت غتحطها فيدها كون ما الخدامة دارتها لولة.
مشات وخلات مرجانة على شوي وتطيح فبلاصتها..دخلات تما ومشات جارة رحيمو..حتى من الحقلة بعدو.
مرجانة: أش واقع المزغوبة..عنداك هادشي يكون داخل فيه حسنا.
رحيمو: فاش عرفت لي وقع خبيت الماء القاطع لي جبت لك..ولكن الخدامة لي عطاتني يمكن تعقل عليا..اش كنتي بغيتيه!
مرجانة: شكون الخدامة لي هزيتي من عندها الماء قاطع!
رحيمو: معقلتش..مخديتش بالي..يسحاب ليا بغيتي غير تحكي ركاني.
ولات الاخرى كتضرب ففخاضها..وتكمل بحناكها.
مرجانة: ويلي ويل الشيطان..الركاني هما لي غادي ندورك فيهم..اويلي وحدي!
قربات رحيمو طيح فالأرض بالخلعة..ومرجانة هزاتها من تما.
رحيمو: سيري غبري من حدايا نشوف كيف غنفك هادشي.
مشات رحيمو طايرة من حداها..ومرجانة بقات تما كتدورها فمخها.
مرجانة: علاش جا الماء القاطع فالحناء..فالوقت لي بغيته أنا..تاحد معارف بلي بغيته من غير..
هزات راسها كتشوف بعيد فرحيمو..لي واقفة مع خدامة من خدامات عود الروح!
▪️إلى الغد إنشاء الله ▪️
توقعاتكم..واش كانت بغات الماء القاطع؟ مرجانة دارتها وكتبوهل عاود ولا!!
مرجانة عارفة سر عود الروح كيف قالت..اش كتضنو يكون؟ (لمحت عليه بطريقة غير مباشرة).
كتضنو غير هادشي لي فالقصر ولا باقي الخير!!
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
