▪️مرجـــــــــــــــانة▪️
▫️من كتابة هيرا▫️
▪️الجزء الرابع والسبعون▪️
كانت الحكيمة لي قلبات حورية وعرفات بحملها دايزة وهازة رحيلها..غادة لمدينة تقدا الدوى ولي يخصها!
بان لها القايد فوق خليه غادي لرياضه..وبيدها وقفاته..وهو عرفها ونزل عندها عاطيها مساحتها وموقرها.
الحكيمة: نسيت ما قلت لخالتك قول لمراتك اسي القايد تبعد من اليازير متشربوش هادشي غيضرها فصحتها..لا هي لا لي فكرشها.
بلا ما يفهم هز راسه فيها..وبتسائل سولها.
الغالي: لي فكرشها؟
حكيمة: اييه غير البارح لي شفتها..ومبروك عليكم طلعات حاملة وهازة بكرشها!
مجات تغمض عينها وتحلها..حتى طلع فخيله طاير من حداها!
وصل لرياض وبلا ما يشعر غير سد لباب وطلق خيله..غادي بزربة وكيقلب على حورية بعينه.
مشا للبيت وما لقاها..البيت لي كتصايب فيه الزرابي وحتى الكشينة مكيناش فيها!
مشا للگلسة لي وسط الرياض عاد سمع صوت الضحك منها جاي..لقا خالته كاينة ولي زاد عجبه هو دريسية لي حداها.
سلم وغمز خالته من بعيد..وهي فهماته وجات عنده..قبل ما يدوي بدات تشرح ليه.
دريسية: غير نسيمة جات تونسني..الا كتاب راه معايا غتمشي.
مداهاش فهضرتها..ومبغاش يسمعها..كيسول غير عليها..وهادشي زاد فقسها!
الغالي: فين حورية ملقيتهاش؟
دريسية: كاينة فالسطاح مع نجـ..
قبل ما تكمل كلامها..زاد وخلاها فاقسها..ضربات على حنكها وتلفتات لنسيمة لي وقفات عليها.
دريسية: فقيها صحيح! الولد من نهار عرفها تبدل عليا..ما بقا عطاني الوجه..سرقات ليا الولد..سرقات ليا الولد!
طالع فالدروج..الخطوة فيها جوج..حتى وصل للسطاح دور عينيه وحطها على گلسة تما فيها حورية ونجوى.
نجوى كتنقي فالزرع وحورية گالسة مكمشة حداها..مجايبة خبار لحملها..وكتنفخ على الكاس لي فيدها.
حتى حد فيهم ما حس بيه..وهو واقف بعيد كيطل براسه..حاضيها وعابرها..مرة عينيه فوجهها مرة فكرشها!
رفعات نجوى عينها فيها..و فالكاس لي شاداه بين يدها..تبسمات وكلماتها.
نجوى: غير شربي راه زوين..فيه الحلبة والعشوب غادي يسخنو ليك كرشك..وكلشي بيد لي خلقك!
ملامحه تبدلات فاش شافها غتشرب حاجة سخونة..واستغرب فاش شافها غادة بيه لفمها..حتى وقفها وهو كيعيط ليها..وجا حداها!
الغالي: أش كنت كديري ونتي..
حورية مقاطعاه: أنا اش؟
الغالي: إمتى جات لحكيمة فاش مكنتش؟
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
