▪️مرجـــــــــــــــانة▪️
▫️من كتابة هيرا▫️
▪️الجزء الخمسون▪️
مجاوباتوش وتجمع عليها كلشي..وجع كرشها..ولي وقع برى لها.
قرب ماسح على شعرها..وحط فمه على جبهتها..وطول البوسة تما ليها.
الغالي: عاطيك وعد حر..عمر المرة لداري من غيرك ما تدخل!
عاود عنقها وخاشيها فيه..وهي غير ما زادت كتبكي عليه.
الغالي: كل دمعة كتطيحي..كتضرني فقلبي..باركة عليا مبقيتش فيك!
حبسات بكاها..ومرة مرة كيتسمع تنخصيصها.
حورية: بغيت نمشي نشوف مي ونگلس مع الدار..توحشتهم.
بعدها عليه..شاد كتافها بين يديه..وعاد باس جبهتها ماسح عليها بيديه.
الغالي: فرمضان فاش نمشي للحرب..غادي نديك لدار القاضي عياط حتى نرجع ونرجعك..دبا خليني نشبع منك!
همهمات ليه ورجعات شادة فكرشها..وكرزات عليها..ونطقات بشوي عليها.
حورية: بغيت نعس.
سمع لها..وناض البلاصة قادها..و هزها حتى حطها تما وغطاها..جمع حناكها وباسهها ففمها..وتم غادي مخليها..حتى وقفاته بيدها.
حورية: بقا حدايا!
تبسم وجر الغطى ناعس حداها..جرها ليه..وعنقها بيديه..وفعنقها خاشي راسه.
وخا السخونية عاطيها ليها..ولكن بقات مكمشة ومخصرة وجهها وكتحرك فبلاصتها..حتى سولها.
الغالي: مالك من صباح ونتي شادة كرشك واش كتضرك؟
حورية كتهضر بشوي: غير مريضة.
ناض من حداها..وبنبرة قلقة سولها.
الغالي: نعيط على الحكيمة؟
شداته من يديه موقفاه..وكتضور راسها بلا.
حورية: لا عارفة اشنو فيا!
الغالي: لي هو؟
مقدراتش تقول ليه..كانت كتجيها حاجة عيب وحشومة من صغرها..ونهار كتكون فيها..كتكون فخبار النساء لي بحالها
الغالي: يا تقولي يا نعيط على الحكيمة تقول ليا.
قال هضرته وناض من حداها..غادي حتى وقفاته بيدها..وقالت بزربة وهي خاشية راسها فمخدتها.
حورية: فيا غير مرض لبنات.
ــــــــــــ
فگلسة وسط الحريم..وحداها جنان صغير..گالسة هنية وفجنبها حفيدها السلطان على براد أتاي..والخدم والعبيد ضايرين بيهم..وكيشوفو شنو خاصهم.
مرجانة وقفات بعيد مقابلاهم غير السلطان كيهز عينيه..كتبدا تشير ليه!
هنية: وكيف قلت لك هادشي لي خاصو يكون ونتا متـ
سكتات فاش شافت عينه ماشي معاها..تلفتات ولقات مرجانة واقفة موراها..بغات تفقس فاش شافت عينه معاها..ولي زاد كمل ما بقا فاش ودعها وناض لعندها!
جراته مرجانة هكاك من يديه..وكلشي حاضيها..وكين لي مشا يجري يوصل لي وقع للي ما حضرش..بحجة الحاضر يعلم الغايب!
جراته هكاك حتال جناحه..عاد طلقاته.
مرجانة: أنا وجدت أمولاي..يلاه باش نوصلو مع صباح!
مشات هزات جلابة وسلهام بعاد على لباسه لي كيلبس ولي من بعيد كيبيونه شكون.
مرجانة: لبس هاد شي..غادي نخرجو وحنا مغنبانوش شكون وحد ما غيعيق..ماشي غير جي وسلت..خاص تخطط "كتدور فعينها" واحد ختي شيطانة حورية لي تزوجات بالقايد نيت..مكانتش كتتبت فالدار وديما سالتة..وأنا كنت كنشوفها شكدير وكنتسنى امتى نطبق..عمري خرجت مكنزعمش!
هو غير كيشوف مطلع حاجب فيها..وهي جراته..حتال الحمام ودخلاته..وخرج لابس لي عطاته.
مرجانة: اه حگا "صفقات بيدها" تفكرت مغاديش نقدر نقول لك مولاي برا.
وقف كيتسناها تكمل..وهي حققات ما طلب.
مرجانة: غادي نقول ليك راجلي!
قالتها وهي كتسبل فعيونها وتتطول كلمتها لخرى!
ولي كيفقسها گاع لي كتقول ما كيديهاش فيها..عيونه على سريره تحطات..كتشوف فبزاف ديال الرزمات.
شمس الدين: هدو لاش؟
مرجانة:هدايا لمي فطوش لي قلت لك.
الرزمات دارتهم..غير باش تجمع فيهم فلوسها فاش تخرجهم!
شمس الدين: غير خليهم..مغاديش نمشو عندها دابة حتى نجيبوها لقصر.
الضحكة لي كانت فوجهها طارت..على السرير جلسات..وفراسها شدات.
مرجانة: وهو فالحقيقة من صباح وأنا حاسة براسي زاند عليا.
خنزر فيها..وتم غادي مقرب ليها..ولكن قفزات كتقول ليه وهو قبالتها.
مرجانة: ولكن غادي نمشي!
▪️توقعاتكم وأرائكم ▪️
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
