▪️مرجـــــــــــــــانة▪️
▫️من كتابة هيرا▫️
▪️الجزء الواحد والستون▪️
جالسة كتفطر وسط الرياض بحدها..فرحانة بعد ما صحات وديك الجارية مشات عليها!
كتاكل والفرحة مضاعفة بالغالي لي واعدها..غيجي دبا ولسوق يخرجها.
حطات المسمنة لي فيدها..على صوت نجوى لي جاية وكتعيط عليها.
نجوى: خالت الغالي الدريسية جات لهنا..وراهي داخلة !
قبل ما تكمل كلامها..الدريسية كانت قدامها..ومحملة بحوايجها.
ناضت حورية بزربة من بلاصتها مسلمة عليها..ومخليلاها تگلس قبالتها!
دريسية: إيوا الله يرضي عليك..كبي شي كاس ناكل حتى أنا.
نجوى مشات وخلات حورية..أتاي كتكتبو وليها عطاتو.
دريسية: الرياض تبدل بزاف..قبل كان على دوقي وحسن..نتي لي بدلتيه؟
هزات لها راسها بمعنى لا وبالفعل هي مني جات حتى حاجة مقاساتها..عاودت دورات دريسية عينيها حدا بلاصتها..وقربات ليها.
دريسية: قولي ليا ابنتي..قلتي للغالي على داكشي لي سمعتي؟ متفرقيش لخو على خوه وتجبدي صداع..ايه قلت لك ما تخبي والو على راجلك..ولكن من عائلته خليك بعيدة.
تبسمات حورية مسايراها..وخا قالت ليه ولي جرى جرى المهم راجلها!
دريسية: قولي ليا بعدا فين هو صباحك؟
رجعات حورية حدرات راسها.. حشمانة منها..وما عرفات ما تقول ليها.
حورية: معنديش هو مخبيه..اخالتي قوليها ليه.
رجعات دريسية كتهضر..محصرة على لي دارت.
دريسية: منصيبش ابنتي نقول ليه..شحال من مرسول صيفط ليه..هزيتي الغالي وليدي وحطيتي واحد آخر لهلا يوفق لي كان حيلة وسباب "كتشوف فيها بنص عين" مبقاش بغا يشرك معايا الكلمة من نهار مشا..أنا جيت عندو برجلي..نتي مراتو قوليه يهضر مع مو وصالحينا!
طبطبات حورية على ضهرها..منهدة وكتقول هادشي بسبابها..وخا الغالي قال لها راه مدارات بيدها ولا برجليها.
على ذكره تم داخل مبسم جيهتها..لكن شاف لي حداها!
مشا باس يد حورية قدامها..عاد مشا باس لدريسية راسها..مع رضاتها.
غير گلس و دريسية بدات تنغز فيها..وناضت من بلاصتها.
دريسية: غير نمشي ندخل حوايجي..ونقادهم ونجي.
غادة وكتشوف فحورية بعينها..والاخرى فهمات راسها..وضارت على الغالي حطات عينها.
حورية: حشومة جات تال عندك..تصالح معاها!
قرب لها ماسح على راسها وبايس جبهتها.
الغالي: خليك بعيدة على هادشي..حتى وقته يجي.
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
