▪️مرجـــــــــــــــانة▪️
▫️من كتابة هيرا▫️
▪️الجزء التاسع والسبعون▪️
مرة مرة تمشي حتال الباب تلصق عليه وتبدا تبكي باش يسمع صوتها.
وكيف كيقولو ضربني وبكى سبقني وشكى!
غير خرج من تما عريان من صدره وحادر راسه..تلاحت عليه معنقاه ومخشية فيه..تبكي وتشق!
مرجانة: مشيتي وخليتهم يحگروني!
مخلاته يعرف اش وقع..كيبغي يبعدها ويفهم منها..ساعة غير كتزيد تلصقه فيها.
كان عوال يصيفط لي يجيبها فاش يرتاح..وهاهي جات حتال عنده برجليها!
بزز حتا تفك منها ولسرير جرها..بعينيه كيقلبها ويشوفها..عاد تهدنات..وشعرها فكات وجمعات.
شافته كالس فالسرير وبقات كتكحز لعنده..حتى ولات مخشية فيه!
مرجانة: كنت بغيت نشوفك وخا الشوف ما يبرد الجوف..والناقة ما ترضع الخروف!
ضحك مدوز بيديه على شعرها وضهرها..وفعنقها باسها.
شمس الدين: ها رمضان قرب..وللحرب غنخليك ونهرب.
مرجانة: أش طرى فاش مشيتي تما.
شمس الدين: حرقنا گاع المناجم وعمي حتا هو حدا ولده تشد..ويونس لدولة لي معاديين معاها هرب.
مرجانة: بقات غير هاد لحرب؟
همهم ليها وهي بين يديه لي ضامينها ليه..يديه عليها كيتسراو وغير ما زادو يتعلاو..حطهم على خدودها الموردين..لي بانو مع ضوء المشع وبينو عينيها الكحلين المجبدين.
راسها تحدر وفمها لجم..گاع لي بغات تقول وتشكي عليه نساتو..ورحيقها بلعاتو..ومن شوفتو ما سلمات ما تهنات..نطق بداك الصوت لي كيطيح عليها بحال الهوى دافي ويخليك هاني.
شمس الدين: أشنو وقع؟
هكا سولها حيت عارفها وقاريها وحافضها..نهار كتديرها كتجي عندو تخبى..ولا تقلبها بكى وشكى..هزات راسها وجاوباتو
مرجانة: نورية عايراتني وقالت عليا سحارة..وساحرة ليك.
شمس الدين: وعلاش ما جاوبتيها!!
شافت فيه ورجعت هبطات عينها كي المشة..وجاوبت
مرجانة: مبقيتش كنعاير تاوحدة من نهار قلتي ليا براكة..أنا غير نتفتها ومطلقتها..حتى شعرها طاح فيدي.
ضحك وما بقا له جهد..معاها ما عرف ما يدير..وما يقدم ولا يوخر.
شافت كيف كيضحك..الضحكة لي كتشوفها مرة فالشهر.
جا لها مشهد النتفة لي عطات لنورية فعينها وحتا هي ضحكات حتى حبس وهي حبسات..بقا كيشوف فيها شوفاتو الملفين حتى نطقات.
مرجانة: متبقاش تشوف فيا أمولاي كتحشمني!
عارف بلى الحشمة بعيدة عليها كيف بعيدة السماء عن الأرض..داكشي علاش جاته غريبة وعجبية.
لكن لي معارف هو أنه من نهار تلاقاتو..غرايبها وعاويدها تبدلو..شاف من التراس فالسماء لي بدات تصب منها الشتاء فداك الليل..رجع عينو عليها…وقال
شمس الدين: الأرض ما كتقنع من المطر..والعين ما كتقنع من النظر.
على كلامه رفعات عينيها فيه..وزادت تخشات فيه..ضحك ومد يديه لقميصه لي على السرير يلبسه على قبل البرد..لكن بيدها وقفاته!
تفكات منه كطلع ونتزل فيه..وحطات عينها على عينه.
مرجانة: ماشي قته أمولاي!
قبل ما يفهم لقاها جارة فمها وسط فمه..حيد من عليها..حاط يديه على خدودها..وتبسم راجع لفمها!
▪️توقعاتكم وأرائكم▪️
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
