▪️مرجـــــــــــــــانة▪️
▫️من كتابة هيرا▫️
▪️الجزء الرابع والثمانون▪️
جا الجيش يهاجم جيش السلطان مورا ضهرهم..وطاحو فالخندق لي كانو حفرو لهم!
ومعرفو كفاش جيش السلطان خرج لهم!
وأمنية شمس الدين كملات فاش يونس ماشي من لي طاحو..والجيش لي كان بالآلاف رجع غير بالمئات..وجيش السلطان غلبهم!
يونس كان محني بزز منه راكع على ركبته..وسط الأرض لي عامرة د م مخلط!
كان شمس الدين حاط سيفه على عنقه..كيشوف فيه ويستفز فيه.
يونس: اتلاقا السماء مع الأرض غتبقا هاديك البلاد من حقي..ونتا خاص الراس يكون ليا محني.
شمس الدين: مكنحني الراس ونقول مولاي غير لي كيستاهل..وماشي أي خليفة كيستاهل..كون جتيني من باب واسع وقلتي بغيت حقي والحكم لي شرعي..كنت غنعطيك لكن فضلتي لعب الداري وضريتي بالبلاد ونهبتي وسرقتي..وفوق كلشي مع العدو تحالفتي!
كمل كلامه..مدوز بسـ ـيفه على عنقه..وفا صل راسه على جسمه!
هادشي كامل تفكره شمس الدين وهو واقف على باب القصر..وعلى صوت النفار عالن بوصوله الباب تحل.
دخل منه وبعينيه كدور على مرجانة وسط الخدم لي مصافين..لكن ما لقاها!
مستغرب بقا كيقلب بعينيه..حتى جات حداه رحيمو حانية الراس وعالماه.
رحيمو: لالة فجناحك كتسناك.
قالتها وقبل ما تكمل كلامها..مشا لجناحه بالزربة مخليها!
أول ساگية بانت ليه..غسل وجهه فيها وكمل طريقه لجناحه.
غير دخل بعينيه بدا يقلبعليها..كان الجناح كله مبدل قلباته وشقلباته على دوقها!
تبسيمته علات فاش قدام المراية شافها..واقفة عاطياه بضهرها..وغير تلفتات ليه عينيه تحلو وتحطو على كرشها قبل وجهها!
بقات كتطلع وتنزل فيه..حاضية كل طرف منه وكتشوف الا تجرح ولا تقاص عينيها غرغرو ومشات ليه..وقبل ما يديرها عنقاته مخشية فيه.
على طراف رجليها..تهزات وفحنكه كتبوس فيه حتا جراته!
فرقها هابط لكرشها لي واصلة لفمها..كيقيسها ويعاود فيها.
شمس الدين: إمتى هادشي!
مرجانة: نفختيني وزدتي مخليني.
شمس الدين: ماحضرت لوالو..لا لوحمك لا لباقي شهورك..بغيت مرة خرى نشوفك كتولدي ونحضر لكل نهار معاك!
مرجانة: هاد لكرش عندها غير اصدار واحد..كتواد ومكتعاود!
ضحك وفخاطره كيقول غير حلمي..القصر بولادك غيعمر بلاصة لي عليهم جريتي!
رجعها عنده..معنقها وخا كرشها مخلاته.
مرجانة: علاش مقلتيش ليا كنت تنعرفك فالصغر.
شمس الدين: قايل ليك كل حاجة ووقتها!
ــــــ
واصل لرياض وبزربة داخل..مشا غير لجيهت لبيت..ولي فشله غير الخدامات لي كيتجاراو بالفوطات بيضين!
حد ما داها فيه كيسمع غير لالة غتولد!
كانو غيفشلو عليه الركابي..ومشا لبيته حاله عليهم!
لاقي الحكيمة گالسة كتولدها..وغواتها گاسر بيتها!
تحنى حتال يدها..شادها وكارز عليها..وهي شافته بعينها.
تخلطات لها بكية الوجع مع بكية الفرحة من شوفته!
كانت عرقانة وكلها بيضة وشعرها طايح على وجهها..كتزحم مكمشة عينها.
تسمع غوات ولد صغير والغالي هز فيه عينيه..والحكيمة حطاته ليه بين يديه!
مجات حورية تحقق الشوفة فيه..حتى كتسمع باقي الثاني!
ومكملات هضرتها حتى خرج الثاني كيف قالت..ولد وبنت توام والفرحة تضاعفت!
مسحات الحكيمة ليهم وغسلات ليهم..وحطاتهم حداهم..خارجة مخلياهم.
الغالي تكا على وجهها..كيبوس راسها وفمها..ويرجع شوفته لولاده معنقهم وعاطيهم حقهم.
هز بالواحد بالواحد أدن فودنهم..ورجعم حداها حطهم!
مرجانة: سميهم بسميت يماك وباك.
اللسان تسرط ليه وغير راجع كيبوس فيها ويعاود..توحشها وفوق قياسه!
الغالي: لهلا يخطيك ويطول بعمرك..وتبقاي فجنبي طيلة عمرك.
لأول مرة غتزعم تلوح ليه هاد لجملة بفمها..قالتها مفرقة كل كلمة على ختها..ودغيا رجعات حمرة من خدودها.
حورية: كيف سميتك نتا غالي عليا..بغيتك تبقا هكا وديما حدايا.
▪️توقعاتكم وأرائكم▪️
VOUS LISEZ
مرجانة🌙مكتملة🌙
Roman d'amour💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
