▪️مرجـــــــــــــــانة▪️
▫️من كتابة هيرا▫️
▪️الجزء السابع والعشرون▪️
ناضت كيف وقتها المعتاد..معطلة فالنعاس..يمكن على قبل النعاس لي ما شافتو..ولا الجو لي باقي مولفاتو.
كانت فالبيت بحدها..كيف ديما تفيق وما تلقى حد حداها!
لصندوق حوايجها تمشات..وقفطان زرق من الحرير لبسات..ومن لبيت خرجات..لجيهت الكشينة عند نجوى مشات..ولصوت السيف قريب سمعات!
محساتش حتى لقات راسها تابعة الصوت حال الساحة..ساحة القتال.
تفرح حيتاش هاد صباح ممشاش لشي بلاصة ولقاته..ولا تحشم وتحدر الراس من منظره؟
كان كيتدرب على السيف..بسروال توب خفيف..صدره عريان وعرقان ونفسه بحال الحفيف!
والخيار الثاني لي كان..حدرات راسها..وتمات راجعة بحالها..حتى وقفها صوت كيعيط بسميتها.
جبد قميصه من الأرض كيلبس فيه..حط السيف وجا جيهتها..متمرد وحط يديه على خصرها جارها!
نفسه قريبة..ونبرة صوته خفيفة!
الغالي: صباح الخير..كنت كنتسناك اجي نفطرو!
" اء اء وخـ.. " هادشي لي قضرات تخرج من فمها جواب ليه!
ضحك مقرب ليها..نفسه تخالطت مع نفسها..وطلع عيونو كيشوف فيها.
كتدورها هنا ولهيه..لمهم متشوفش فيه..قرب فمه لخدها..باسها وجرها من يديها!
داها للگلسة ديال ديما..وطبلة الفطور موجودة ليها..فينما تمد يدها تهز من شي حاجة يجيب الطبسيل حتال حداها.
داها لبيت من البيوت..وخا الدار باقي ما حفضتها..لكن عقلات على الطريق لي داها منها..البيت كان ديال التدراز! البيت خاوي وفيه كلسة صغيرة قدام الدراز..الخيوط والسحيفة وكل ما تحتاج!
البيت كان داخلة الضوء وكتبان السماء والبلاصة لي عجباتها البارح!
ضحكات طالقة من يديه..غادة وكتقلب كل حاجة فرحانة!
حط يديه على كتافها..مدورها ليه..وجايبها جيهته..حاط يديه على حنكها!
الغالي: قلتي ليا بلي فداركم..بلي كنت كتلاهاي فهاد شي!
تبسمات ليه..وبعفوية متشكرة قالت ليه
حورية: شكرا بزاف.. على كلشي والله!
الغالي: ديري لي بغيتي فالرياض..أنا خارج.
قبل ما يمشي ويبعد عليها..طبع قبلة طويلة فوق جبينها!
تاحد ما قرب ليها..وخا الغالي وصى نجوى تجيب ليها الغدا لكن جرات عليها!
الحال ظلمات..والشمس توالات..وهي باقة غير النسيج مقابلة..وخا ظلمة شعلات شمع خدامة.
دخلات وحدة من خدم الرياض لعندها مكلماها
-لآلة حورية وصلك مرسول من داركم..راهو واقف قدام لباب.
سمعات لها..والخدامة مشات وهي تبعاتها..فرحانة بالمرسول لي جاها!
مهلة من لبيت للخرجة..غادة وبرجلها زربانة..متشوقة للي غيكون فالرسالة.
لقاته واقف كيتسنها..غير جات وعاطها الرسالة ديالها..ورجع بحاله بلا كلام.
فتحاتها تما كتقرا فيها..والصدمة على وجها..عرس السلطان بمرجانة ختها!
قفزات..وعينها خرجات..فاش سيف على عنقها تحطات!
الرعدة والبكية شداتها..فاش ناس ملثمين داروها!
الصوت مشى..والفشلة فركابي شداتها..ولات تقفق حداهم..من صغرها خوافة!
بزز باش خرجات لها غوتة مخلوعة مخلطة بالدموع..غير هي خرجاتها وسيف تزير على على عنقها كثر!
بغات تسخف تما فاش واحد منهم بغا يقرب لها..موجه خرقة بيضة قديمة لنيفها!
قفزات فاش لي كان جاي جيهتها..طاح قبالتها..مقتول والغالي لي جا هو لي دارها!
محساتس كفاش بعين غضبانة وفم مقبوط بالعصاب بالسيف قتلهم كاملين!
لي حاط سيف عليها بدا غادي وجارها معاه..كيشوف فالغالي بتحدي ليه!
تبسم الغالي نص تبسيمة وعينه محطوطة على يد لاخر فين حاطها..قرب ليه وهو جار سيف افلأرض حتى كيتسمع صوته..بجرة خفيفة..وشوفة مظلمة!
هز الغالي سيفه وبزربة جرح عنق لآخر حتى دم طار لحورية فوجهها..وطلقها مبعد منها.
شاد فعنقه وكيزحف فالأرض هارب على القايد الغالي!
قرب ليه وجلس قفازي مقابل معاه..لاح سيف لي فيديه..ومن تحت سلهامه جبد خنجره.
حط راس الخنجر على صباع لي فالأرض..كيدوزو عليه خفيف بلا ما يجرحه..ونطق بصوت بارد ومظلم كيخلع
-هادي هي اليد لي تحطات عليها؟
خشا الجنجر وسط كف يده..وكيحرك فيه..حتى تقبها ليه!
خلى الاخر شاد فيده..كارز علبها وكيغوت لحر لي طرى ليه!
عاود جاب الخنجر مدوزه على صباعه..وهضر بنفس نبرته..وبشوفة باردة عليه!
-هدو صباع لي قاصوها؟
هز الخنجر حتى هزه..وبضربة قطع ليه صباعه..خلى دمه مطوش جاي على وجهه.
-هدي العين لي شافتها؟
رجع الخنجر غارسه فعينه حتى غوت لاخر غوتة حارة..ومن بعد تقطعات فيه نفس!
مد يديه لجيهت صدره..مبعد حوايجه.. كيشوف فيه..عينيه رجعت ظلام فاش شاف وشم الوردة فصدره..وكل الملثمين لي معاه..عندهم نفس الوشم!
ناض الغالي من الأرض..ماسح على وجهه من الدم ومقابل يده معاه..كيشوف فيها ومبسم نص شوفة عليها!
عينه جات فحورية كتشوف فيه مصدومة..وگاع الهضرة لي تدكرات عليه بانت قدام عينيها!
قرب ليها..وهي رجعات لور بخطواتها..محركة لاسها بحركة لا والدموع فعينيها واحلة..مصدومة!
شافها اش دارت ورجع خطواته وراه مبعد عليها..لايح الخنجر من يديه وهو كيقول "ها علاش مكانش خاص نتزوجك!"
خلاها تما ومشى خارج من الباب!
▪️توقعاتكم وأرائكم ▪️
اخوتي شعندي ما نقول من غير الله يستر بقيتو تابعينهم بزوينين حتى غرت🙄.
YOU ARE READING
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
