لابد يا سود الليالي يضحك حجاجك

30

فتحت عيونها ومن لمحته صاحب المقهى رمشت بصدمة وناظرته بذهول وهي تقول متحاشية كل صدمتها بوقوفه وراها ، وبخطواته اللي أرعبتها: حسبي الله عليك يا كلب ، ماخاب ظني فيك يومني ظنيت إنك سراق ، من يوم شفت فستاني بيدك وأنت واضح فيك ملامح السرقة
حسبي الله فيك يا قليل المرجلة ، مكانك بالسجن ماهو بين خلق الله ، والله لأوريك
ما أنتظرته يتكلم ولا أنتظرته يتخطى صدمة الموقف ومشت بعجلة وهي تسارع خطواتها وتمشي للبيت ، بينما هو أسبّل أهدابه بصدمة وبذهول دمّر كل مفاهيم الإستيعاب عنده ، "وش صار قبل لحظات؟ ووش اللي ظنته فيني ؟ووش هالشيَرة الي تلطخ بها ثوبك يابنيّان ، خيب الله أفعالك اللي أستنقصت من قدرك ، هذي سوايا تسويّها بنفسك؟"
عض على شفايفه بقهر وهو يلمح طيفها يتلاشى من قدام أنظاره ونزل عيونه وهو يلمح البقلاوة الي تبعثرت على الأرض وهز رأسه بقهر : والله هذي مو بقلاوتك اللي تمرغدت بالتراب ، هذي موية وجهك يا أبو نص عقل ، تلحق بنت عشان تخطبها؟
تأفف بقهر وصد عن البقلاوة المبعثرة ومشى عنها وهو يرجع لمقهاه يجر خطوات القهر من نفسه ، ومن تحسس جيبه العلوي عقد حواجبه وهو يأخذ البقلاوة اللي تخبت بطرفه ، ومن لمحها عقد حواجبه للحظات ثم ضحك بقهر : آه يا بنييييان وش هاللي يصير معك ، أضحكت حتى نفسك عليك
—
—

وبوسّط فصل « ثالث ثانوي | علمي »
كان مِتكي بيدينه على طرف الطاولة الخضّراء
ويناظر لمجموعة الكتب حوله بهُدوء ، أول يوم بالدراسة كالعادة مُجرد إستلام كُتب يعرف هالعادة من لما كان بمكانهم يوم من الأيام ، ورغم إن صوت الإنزعاج خُفتت ، وعمّ الصمت أنحاء الفصل إلا إنه هالصمت ما أستثاره أبداً
كان غارق تماماً بتفكيره ، كان يغُوص بأمواج بحرها .. يغوص لين العمق ويطلع من هالموج وهو ناشف قلب وناشف عقل !
ماهو قادر يلقى حل لهالعقدة ، وأول مُعادلة صعبة يعجز عن فك رموزها ، كان يتباهى بأن المعادلات مجرد لعبة بيدينها من سهولته ، ولكن هالمعادلات تركت تباهيّه يتلاشى .. يااااهي صعبة هالدُجى !!
قبل ليالي بس من اليوم ، كان يقول مصير هالعلاقة تنفّك ومصير طاري الموادع يلوح ، ومن بعد إعلانها خوفه منه وهو عاقد النيّة على البُعد " ليه يبقى مع شخص يخاف منه رغم كل اللي سواه له؟" كان هذا السؤال اللي يدور بباله طوال الوقت ! ولكن من فجر هاليوم وهو يعيش شيء مُنافي تماماً للي عاشه من قبل ! قبل ليلة تقول خايّفة ، وفجر اليوم الجديد تتخلى عن دفء الحياة وتلتجىء للبرد لأجل تكون قريبة منه بس ! وش هالخوف الغريب يا دُجى؟
قبل ليالي تتهرب منه وأي درب ينتهي به تتوقف خطاويها عن السعي فيه ! واليوم تدور كل درب يبتدي فيه لأجل تسلكه !

دمّرت كل موازين فهمه ، وتركته أسير لعدم الفهم ، كلما قال " حليت هالمعادلة ، يلاقي إن حله كله خطأ ويعيّد ترتيبها من جد وجديد " وهذا اللي تركه يعيش هالشوشرة من جديد
هذا اللي تركه يبتعد بفكره كلياً عن اللي حوله وبرغم الإزعاج المفجع اللي كان بالفصل واللي أبتدأ بسبب لبسه للثوب الأبيض ، وبسبب زواجه وأسئلتهم اللي ما أنتهت إلا إنه كان بعيد تماماً عنهم .. تممماااماً
—
وهالهُدوء عمّ بسبب دخول وقاص عليهم ، الإستنكار أجبرهم على السكوت للحظة ماكانو بيعرفونهم بسبب تغيره الكبير ، إلا إن صوته الغليظ مازال نفسه وهو يناظر للطالب اللي جالس بمكانه : ماودك بقهوة بعد ؟
فز الطالب من مكانه بخوف بسبب نظرات وقاص الحادة ، وجلس بمكانه والمكان عمّه الصمت
جلس وقاص بكل هُدوء ، وكانو ينتظرونه يطلع جواله ويعيش بعالمه بعيد عنهم مثلما تعودو على إهماله طوال السنوات اللي درسهم فيها
ولكن هالمرة كان يناظرهم بنظرات ساخرة ، ومن بعدها قال : ودكم أقوم أفتح كتبكم أنا ؟
ناظره خالد بإستنكار وهو يعدل كبّكه اللي مصفوفة حبّات الفضة بكل أنحاء ويقول : عسى ماشر إستاذ وقاص ؟ من أول يوم ناوي تكسر ظهورنا
ميَل شفايفه وقاص بعدم إعجاب وناظره بطرف عينه وقال : إعتدل بجلستك أول شيء ، قبل لأقوم أكسر ظهرك صدق ، وإفتح كتابك وأنت ساكت ياخالد قبل أتوطى ببطنك
ماكان خالد المصدوم وبس ، كانو كل اللي بالفصل مذهولين وجداً ! العلاقة الي كانت بين خالد ووقاص كانت دائماً تدور على إحترام وقاص لخالد بسبب أبوه ، وحتى لو فكر يسخط عليه كان يوضح إنه يمثّل عشان ما تنكسر هيبته قدام طلابه
ولكن هالمرة كانت غير ، لا نظراته ولا أسلوبه يميلون للتمثيّل ، هذا حقيقية فعلاً
وهذا ماهو وقاص الأولي ، هذا تغير وشكله تغير للأسوء والله أعلم !
فتحو الكُتب بصمت تام ، وماكان الصوت المسموع إلا صوت الأكياس المائية اللي نزعوها من على جلد الكتُب ، وصوت تقليب الأوراق على صفحة أول درس
واللي من بعدها قال وقَاص وعيونه تناظر للافي بنظرات غريَبة : إقرأ يا ولد المدير أول فقرة
عقد حواجبه لافي من اللقلب الساخط ووقف من مكانه وهو يقول : إسمي لافي ، وأنا بهالمدرسة ماني ولد المدير ، أنا طالب وبس
إرتسمت ضحكة ساخرة على وجه وقاص وهز رأسه وقال : إسمع ولاتصدق يا طالب ، إقرا إقرا بس ولا تكثر حكي خارج الدرس
ميل شفايفه لافي بإستنكار ، وآرتخى حاجبه بسبب إستفزاز وقاص له بنظراته وبضحكته ومع ذلك رفع الكتاب وبدأ يقرأ بهدوء .. ولكن كان وقاص يوقف له على الكلمة ويزيد من إستفزازه له