14

11K 137 48

بواسطة riwaia2

بقلم riwaia2

كانت أصعب شهريّن مرت عليه بحياته ،لأن ثُوب الندم اللي لبسّه قلبه رفض ينخلع عنه ،رفض يتركه يعيّش حياته بحرية مثلما أعتاد ما يدري وش السبّب،وليه يعيش هالمُعاناة الي مازادت حياته إلا مرارة لكن الي يعرفه ،إنه خذى هالحمِل على ظهره زود عن أحماله !
لذلك من لمح موافقة وهّاج على حضُور ضِرار وأهله زارت أطَراف الطمأنينة صدره ،لعل ضِرار هالمرة ينتصر على عنادها ويقنعه تحضّر ،لأنه بآخر مرة ألتقى فيها من ضِرار كانت واضحة معاناته لهم
حتى إنه ما أخفى سبّب ضيقته لما سألوه عنها جاوب إنه منكسر قلبه عليها !
لذلّك بُرهان حاول بشتى الطُرق لإيجاد حل ،والحل الي لقاها هالمُخيم !
—

اليُوم الجدِيد،ببّيت البُهور
كان واقِف بوسّط الحُوش وهو يثبّت جكيته الأسود على أطراف كتفه ،واللي أطراف الغُترة الحمراء مرميّة بإهمال على ظهره،إلتفت بإبّتسامة عرِيضة للخُطوات الخافِتة اللي تقترب منه ،لصوت الضِحكة العاليّة واللي تركض ببهجة له ولسانها يلهج بِـ "وش رأيكم لبسَت أحلى فستان "
كايّد اللي رفضت رفض كاسِح غُصن بأنه يختار لها هو لبسّها أو يلبسها كان مِتكي على أطراف الشَجرة وجنبه لافي ،اللي من الصبّح وهو جالس عندهم
إلتفتو لها ومن لمحو ضحِكتها كايّد صفق بحماس
ولافي صفّر وهو يأشر لها بطفولية،أما وهَاج ميّل شفايفه بخفُوت وهو ينحني لها لما وقفت قدامه ،وقال بإبّتسامة هاديّة وهو يمرر يدينه على معصمها : بس يا غُصن الجو ماهو بجو هاللبّس ماودك ...
قطّع كلامه لما عبّست وجهها ونزلت رأسها بضيَق لافي كشَر وقال : عدو السّعادة مو قلت لكم؟
كايَد ضرب لافي على كتفه بخفة وقال : مهيَب عداوة مع السَعادة هذي ،هذي خوف من المرض أنت وش عرفك
سكت لافي بفشَلة ووهّاج تأملها للحظات ثم أبتسم وقال : لا تزعل عليّنا غُصن أبوها،وخلاص إلبسي الي تبينه أهم شيء رِضاك !
رفعت رأسها بإبتسامة وهو تنّهد بخفوت وأشر على كايَد يجيب لها جاكيت وهو ما أعترض راح على طول للغرفة
أما وهَاج وقف وهو يرتب شعرها بكفه ويثبّته بخفة
ولافِي يتأملهم بخفوت،كان مقهور بعض الشيء من وهَاج لأنه أبداً ما يتطرق لموضوع الملكة أبداً
حتى لما صارح فهد بهالشيء،سكّته فهد وهو يقول له "للظروف أحكام ،وهو الي مشتري القُرب مهب حنا الي تعنينا "
ولو إن في قلبه بعض العّتب إلا إنه عاذِره ،لأنه واضح إنه يحاول يبّني الحياة الي يبيها بكل قُوته
هذا غير حرصه الشَديد على مبّناه اللي أحترق والي أعاد إنشأه من جديد بمساعدة ضِرار لذلك ماكان لافي يتطرق أبداً لموضوع الملكة مع وهَاج ،بس مع دُجى كان هالموضوع عبارة عن نكتة وسخرية
من حضّر كايد قال وهَاج " يالله مشيّنا لا نتأخر "
ركضت غُصن بكل حماس تمكلها وهي تتخطى الأرض وتنقز بفَرحة تملك قلّب وهاج الخوف من تعثُرها فقال : بالهُون ياغصّن بالهُون ،لا تتعثرين
كملت غُصن خطواتها وهي تخرج من البّاب بحماس ،ولافي تنهد بإحباط : أترك البنت تعيّش طفُولتها يا نكدي
ألتفت له وهَاج نِصف إلتفاتة وناظره بنظرة مُضطربة وهو يقول : أنا وش الله حادِني عليك ؟ ماعندكم سيّارة تروح عليها وتفكني من شرك،ناشب في حلقي ليه ؟ ماباقي شيء إلا وتسّجل إسمك بكرت العائلة
ناظره لافِي بطرف عينه وهو يلف يدينه حول ذراع كايّد ويقول بإمتغاظ شديد : أنت وش عليك مني ،وبعدين ياكبّرك بعين نفسك من اللي قال إني متعني عشانك؟ أنا جاي أسايّر خويي ولا أنت وش علي منك
تأفف وهّاج وهو يمشي ويتخطاهم ،وكايّد كان كاتم ضحكته بسببهم ناظر للافي وقال : لاتحاول تستفزه ،والله ياويلك
ميّل شفايفه لافِي ثم أبتسم بحماس : والله ياخي أعصابه محروقة هالرجل،بسرعة يشّب نار
عشان كذا الوضع ممتع لأن عندي وهاجيّن بحياتي
مشى كايّد وهو مبتسم وقال : كنا نقول إنهم مختلفين عن بعض،وش اللي حصل
أبتسم بخفوت : كنا نظن ،ميّر الظن يخيب
ركبو السيَارة بحماس شديد ،منطلقيّن لأقصى جبّل بالشمال بعدما أصّر وشدد وهّاج عليهم كلهم يحضُرون ولا يخيبون بُرهان ورغم إن الإصرار كان من نصيَب حليمة اللي كان بنية وهّاج بهالطلعة يليَن قلبها ويحاول يخليها تتقرب من دُجى
إلا إنها رفضت رفض قاطع حتى إنها بنفس اللحظة جهزت لها ملابس وراحت للبّهاء بدون ما تتكلم
تضايَق وهاج للحظات ولكنه أحترم رغبتها لذلك ما أبدأ ردة فعل على تصرفها !
ولافِي من قاله كايَد بعدما صُلو الفجر جماعة بالمسجد إنه أمه مارح تجي معهم ترك أهله يروحون لوحدهم وقرر يروح مع وهّاج لأنه يدري إن الطلعة مع أهله بتكون هواش هم بصف بعض كلهم لأنهم بنات وفهد بيكون بصفهم لأنه يحبهم
وهو بيبقى يهاوش لوحده لذلك إختار يهاوش وهّاج هالمرة
-
بسيَارة فهد ،كان السُكون يحوفها ،رغم عدم رغبة فهد بالروحة إلا إن إصرار وهّاج وإلحاح لافي الشديد عليه أجبره يوافق وأجبره يقنع خواته ودُجى بهالجيّة ورغم عدم حماسهم إلا إنها من تسللت نسمة هواء باردة أنعشتهم وتركت الحماسّة الشديدة تسلل لقلوبهم
معاني كانت متكتفة وتناظر بضيّق للمكان وخيَال ضربت كتفها بعدم إعجاب : معاني زودتيها ترى ،خلاص لما نرجع كملي شغلك
تنهدت معاني بقهر : تعرفيني ما أحب أخلف وعدي
خيَال ميلت شفايفها وناظرت لمعاني الي جادّة فعلا : بس هي قالت عادي وحتى قالت لا تسلميني إياه "بعد إسبوعين وباقي لك يومين وكله على بعضه شماغ يعني مثل اللعبَة بين يدينك لا تكبرين الموضوع"
تنهدت معاني وسكتت وهي تناظر من الشبّاك
وبالها طوال الفترة الماضيَة حول الكيّس اللي كان بيدينها باليوم خطت فيه خطاويها للمقهى ورجعت البيت من دونه ،ولا خطَر على بالها إلا باليوم الثاني ومن رجعت للمقهى لقته مقفل وكلما حاولت تتذكر مكان نسيانه له ما يخطر على بالها !
أما عن دُجى فكانت مستندة برأسها المُثقل بالأفكار على حدود الشبّاك ويدينها تضغط على بعض بكل خفُوت شعور غريّب بقلبها يشبّه نسمة باردة
ما تدري وش سبّبه ولكن الي تعرفه إنها مستلطفته وبشدة !
-
أما بسيَارة ضرار الي تغيرت حياته كُلياً بعد اليوم الي قبّض فيه على محمد ومن اللحظات الي مستحيل ينساها بحياته هي اللحظة اللي أسّترد فيها كرامته قدام الجمع الغفيّر نفسه !
بوسط ساحة المركز برأس مرفوعة وبهامة تعدت السُحب أنزرعت الرُتبة على كتفه مثلما تنزرع نبَتة وإنرسمت الضحكة على وجهه بكُل عنفوان
بالبداية عّزت عليه نفسه وكان بيرفض الترقية ورجوعه للوظيفة لأن إهانته ماكان بالشيءَ الهين ولكن إعتذار المُدير العام بنفسه واللي أقال الرائد اللي أخذ منه رتبته وخفض رتبَة البقية وطلب كتابة محضر لكل شخص كان له يد بطرد ضِرار جبَرت بعض من الصدُوع اللي بصدره وكأنه بهذه اللحظة أسترد بعض من كرامته اللي أُنهكت !
لذلك كان سعيَد جداً خلال هالأيام وسعيَد بكل عُنفوان لتغييَر بريّق الملحوظ والي خطت أول خطاويها لخارج البيّت وما أعترضت أبداً على موضوع الخُروج لبرى البيّت بالبداية كانت متخوفة وبشدة وللأمانة مازالت خايّفة ،خايّفة ينكسر بقلبها شيء من جديد بسبب النظرات الي بتتعرض لها ولكن شعُور المجابهة الي بصدرها أجبرها على القدُوم فقاعدتها الي مابعمرها تخلت عنها بالحياة هذي"واجه الي تخافه لأجل تتغلب عليه"لأجل كذا وافقت على الحضُور معهم لأنها تبي تتخلص من خوفها ولأنها" لو إنتظرت حتى تصير جاهزة للمواجهة فبتبّقى بقية عمرها منتظرة ! لابد تجازف"
ورغم إستغرابهم من موافقتها إلا إن إستغرابهم الأكبر كان بسبَب طلب فايَزة المُلح إنها تروح معهم بالبداية ضِرار تضايَق وكان بيرفض لأسباب كثير ولكن نظرات وديّع أجبرته يهز رأسه بإيجاب بشرط ما ينسمع لها حس ولا ينعرف إنها جاءت ،بينما وقاص ماكان ينَشاف أبداً طوال هذي الإسبوعين
وهذا هم بالسيَارة يترأسها بمقعد السايّق ضِرار وبجنبه وديّع اللي ملتفت بظهره كامل على بريَق ويسولف معها بحماس وهو يضحك ويحاول يغيّر عليها جووها بيّنما ضِرار كان مبسوط ويضحك معهم
وفايَزة تناظر بخفُوت .. رغبتها بالحضور لهالجيّة كانت بعد سماع ضِرار يقول إن الكل بيحُضر .. شيء بنفسها طوعّها إنها تتعرف على عائلة أمواج .. وتكتشف كيف عايّشين وكيف عاشو طوال السنيّن هذي .. ولو للحظة زارها شعور الرغبّة بمعرفة خليفة أمواج بالأرض .. الشخص الي سلبت منه جميع الأشياء الي يحبها بفعل الحقد
من بعد إنتشار خطبة وهّاج لدُجى إستقرت الراحة بصدرها من ناحية وقاص .. مع ذلك مازال بصدرها رغبة بحضور هالمناسبّة !
-
وبعد نصّ ساعة ،إستقرت سيَارة وهَاج قدام المخيم
لافي إستقرت أنظاره على المكان بتأمُل شديد ،أبتسم بكل رحابة وألتفت لكايّد وهو يقول : خلك خلك لاتنزل بجيك
أستغرب كايَد ولبّى طلبه، ولافي نزل على عجل من السيَارة وسحب زرعة الورد الكبير بكل قوة من على الأرض وهو يضحك من قلبه أستقام بجسده وألتفت بعجل وهو يتقدم بخطوات مستعجلة بإتجاه سيارة وهَاج ومن لمحه كايّد ضحك وهو يفتح الباب وأقترب لافي وهو يمد له الوردة : قليل بحقك
أبتسم بضحكة وهو يأخذها بيده وهز رأسه بإمتنان : تسلم تسلم ياولد الخالة
نزل بعدها كايّد وغُصن على عجل وإنتشرو بالمكان بحماس شديد
بينما وهّاج نزل وهو يبتسم بخفُوت لما تأمل الجنُوبي واقف على حدُود شبّة النار وبيدينه دلة القهوة والي يضبّطها وهو يدندن بحمَاس قرب وهاج وهو يقول : عز الله أخطيّت يالجنوبي يعني ثلاثة أيام من رجعت من الجنُوب ومخفي وجهك عننا فيها ولا نشوفك إلا من دعاك بُرهان
تعزه أكثر مننا يالجنوبي ؟
أرتسمت ضحكة خافِتة على ثُغر بنيَان وقال : والله أنهد حيلي من زواج بسّام يا وهّاج أعذرني وقلت بالمرة ألاقيك هنا وإن كان أخطيت بغيابي فمنّك السماح ماهقيت إنك تعزني هالقد
ناظره وهَاج بطرف عينه وبنيّان أبتسمت وهو يناظر لشبّة النار
وبهالوقت وصلت كل السّيارات للمكان وإنتشر كل من فيها بالمخيّمين الأول الي كانت فيه أم بُرهان
والي بقى يقنعها أسبوع كامل تحضُر وتفرغ له هاليوم وهي كانت رافضة لأن عندها عزيمة
ولكن من صالح حظ بُرهان إنها تكنسّلت هاليوم لأجل كذا حضّرت رغم عدم رغبتها .ولأن سببّها "ليه أجتمع مع ناس ما أعرفهم " وهو يقول " مصيّر القلوب تتآلف يايمة "
-
وبعدما أستقر كل من الحريم والرجال بالمُخيم كان لمخيم الرجال النصيّب الأكبر من السواليف والضحك بحكم معرفتهم السابِقة ببعض وبوسط حُضن وهّاج مستقرة غُصن اللي كل الأنظار متوجهة لها بسبّب بنيان اللي نشب لها طوال الجّلسة وكل شوي يمدحها وهي بطبيعتها تستحي وتدخل بحُضن وهّاج و تغطي وجهها بجاكيته بيّنما هو يبقى يضحك ،يضحك وبشدة
في ظِل إبتسامات الكُل لحاله الجديد اللي عرفوه هاللحظات والي أبداً .. أبببببداً ما لمحو هالضحكة على وجهه طول معرفتهم فيهم جاهلين إنه يتغير تماماً لاحضرت غُصن !
ولما شدت غُصن بيدينها على ظهر وهّاج .. أبتسم بخفة ومثّل العصبية وهو يقول : بابنا مقفل عليك يا الجنوبي إلتفت لغيرنا وأبّتعد عن بنتي ترى إن شدت بيدينها على ظهري أكثر عز الله لأدفنك
رجع بنيَان ظهره للخلف وهو يميّل شفايفه بعتب : أفا يا أبو غصن هذا وأنا ماباقي مدحة ما تركتها وسّم على جمالها
كايّد ضحك بخفة وناظر لغصن : البلاء إنك تمتحن حيَاء غُصن يا بنيّان لأجل كذا بتتعّنى
أشر بنيَان على فمه بمعنى"ماعادني بمتكلم"
وبُرهان أبتسم بخفة وهو يأشر على غترته : أظن هالمدح لأجل الغترة البنية اللي من وهَاج ولا ؟
وهَاج أستغرب وبنيّان أبتسم وهو يناظر لبُرهان اللي قال له إن هالغتّرة لقاها بكيّس بمقهاه ويظن إنها من وهّاج لأنها تشبّه حيل شماغاته لأجل كذا لبسّها
وهّاج قال بإستنكار : ميّر هالغترة ماهيَب مني !
عقد حواجبه بنيَان بإستغراب وماحضر بباله إن هالشماغ ماهو بله أبداً كونه لقاه بأطراف مقهاه بدون كرت والأهم بالوقت اللي ترك فيه وهَاج المقهى
كان يظنه هديَة منه أو من هالقبيّل ولكن هالشيء خاب !

لابد يا سود الليالي يضحك حجاجك

14

قصص مُروَّجة

قد يعجبك أيضاً