ငါ့တပည့်တွေ အကုန် ဗီလိန်တွေချည်းပဲ

အခန်း (၃၅) ရှစ်စွင်း ထောင်ချောက်ထဲ ကျသွားပြီ

Burmese Translation of {我的徒弟都是大反派} by author 谋生任转蓬
Translator - ME

အခန်း (၃၅) ရှစ်စွင်း ထောင်ချောက်ထဲ ကျသွားပြီ

“သူတို့ လာကြပြီ ” လုကျိုးက ပြောပြီးနောက် ကြေးသွေးရောင် ယာဉ်ပျံကို ကြည့်လိုက်သည်။

ထိုစဉ် ထိုရထားလုံးပျံကို မြင်သောအခါ ရှောင်ယွမ်အာ၏ လွတ်လွတ်လပ်လပ် ပေါ့ပေါ့ပါးပါး အကြည့်က ပျောက်ကွယ်သွားပြီး သူမက တွန့်ဆုတ်စွာ ပြောလိုက်၏။ “အဲဒါက ရှစ်ကျဲရဲ့ စီးတော်ယာဉ်ပဲ ” ထိုသို့ ပြောပြီးနောက် လုကျိုးဘက်သို့ လျှောက်သွားကာ သူ့ တံတောင်ဆစ်နားတွင် ရပ်ပြီး လက်မောင်းကို ကိုင်ထားလိုက်၏။

“မကြောက်နဲ့ ” လုကျိုးက လက်ယမ်း ပြလိုက်သည်။

“အွန်း ” ယွမ်အာလေးက သူပြောတာ မှန်သည်ဟု တွေးမိလိုက်သည်။ ဒီမှာ ရှစ်စွင်းရှိနေတာ ငါ ဘာကြောင့် ကြောက်ရမှာလဲ။

သူမ၏ အဖေကို ပြန်ခေါ်ခဲ့ပြီး ဖြစ်သည်။ သူက သတိလစ်နေပြီး မြင်ကွင်းကို မတွေ့နိုင်တာ နှမြောစရာ ကောင်းပေ၏။ ဖန်ကျုံးအဖို့မူ သူသည် စိတ်ရှုပ်ထွေးသည်ထက် အံ့ဩတာ ပိုနေကာ သူ ဘာတွေးနေမှန်း မည်သူမှ မသိပေ။

တစ်ဖက်တွင်မူ မုရုန်ဟိုင်က အိပ်မက်မက်နေသလို ခံစားနေရ၏။ “ထင်ယောင်ထင်မှား ဖြစ်တာ၊ ဒါ ထင်ယောင်ထင်မှား ဖြစ်တာပဲ ဖြစ်ရမယ် ” သူ၏ပါးကို ပြင်းပြင်းထန်ထန်ဆိတ်ဆွဲပြီး တွေးလိုက်၏။

ဤလောကထဲတွင် ကျင့်ကြံသူများစွာရှိပြီး ဗြဟ္မာ့ပင်လယ်နယ်ပယ်၏ ချီသွေးကြောရှစ်ကြောကို ဖွင့်နိုင်သည့်သူက ကျွမ်းကျင်သူတစ်ဦး ဖြစ်နေပြီးသားပင်။ ကျင့်ကြံသူတစ်ဦးက ထိုနယ်ပယ်သို့ ခြေချသည့် အချိန်တွင် သူက လေထဲတွင် ကိုယ်ဖော့နိုင်ပြီး သွေးကြောရှစ်ကြောကို ဖွင့်နိုင်သည့်အချိန် ကောင်းကင်ထဲတွင် ပျံသန်းနိုင်ပြီ ဖြစ်သည်။

ထို့ကြောင့် ကောင်းကင်ထဲတွင် ကျွမ်းကျင်သူများစွာ ပျံသန်းနေတာကို မြင်သောအခါ သူမည်ကဲ့သို့ မထိတ်လန့်ဘဲ နေမည်နည်း။ ဗြဟ္မာ့ပင်လယ်ကျွမ်းကျင်သူတွေက ဒီလောက်တောင် တန်ဖိုးမရှိတော့ဘူးလား။