ငါ့တပည့်တွေ အကုန် ဗီလိန်တွေချည်းပဲ

အခန်း (၁၈) မင်ရှစ်ရင်၏ စူးစမ်းမှု

Burmese Translation of {我的徒弟都是大反派} by author 谋生任转蓬

Translator - ME 
......
အခန်း (၁၈)  မင်ရှစ်ရင်၏ စူးစမ်းမှု

လုကျိုးက မင်ရှစ်ရင်ကို မြင်လိုက်သည့်အခါ မျက်မှောင်ကျုတ်မိသွားသည်။ သူ့စတုတ္ထမြောက် တပည့်ဖြစ်သူ၏ သစ္စာရှိမှုကား ၅၈ ရာခိုင်နှုန်းသို့ ကျဆင်းသွားလေပြီ။ ဤသည်မှာ ပြဿနာ ရှိနေမှန်း သိသာလှ၏။

သို့သော်လည်း သူက ခပ်တည်တည် မျက်နှာထားဖြင့် မသိသလို စောင့်ဆိုင်းနေလိုက်သည်။

ထိုစဉ် မင်ရှစ်ရင်က ဆက်ပြောလိုက်လေ၏

“အဲဒီဓားပြတွေကို သတ်ပြီးတော့ ကျွန်တော် စာပို့ငှက်နဲ့ တန်းအကြောင်းကြားခဲ့ပါတယ်။ ပြီးတာနဲ့ ကျားတောင်ရိုးဂိုဏ်းဆီ သွားပြီး ပါ့ရှစ်တိနဲ့ .. အဲလေ သစ္စာဖောက် ကျူးဟုန်ကုန်းနဲ့ သွားတွေ့ခဲ့ပြီးတော့ သင်ခန်းစာပေးခဲ့လိုက်တယ် ”

သူက အကုန်တင်ပြပြီးပြီ ဖြစ်၍ လုကျိုး၏ တုံ့ပြန်မှုကို စောင့်နေလိုက်သည်။ လုကျိုး၏ မပြောင်းမလဲ မျက်နှာထားကို မြင်လိုက်ရသည့်အခါ တစ်ခုခုကို တွေးမိသွားဟန်ဖြင့် ထပ်ပြောလိုက်လေ၏။  

“ ကျွန်တော် ပြောသမျှ အားလုံးက အမှန်တွေချည်းပါ။ ရှစ်စွင်းကို မလိမ်ရဲပါဘူး ”

“ မင်း ကောင်းကောင်း လုပ်ခဲ့တယ် ”

“ ကျေးဇူးတင်ပါတယ် ရှစ်စွင်း ”

“ ဒါပေမဲ့ … ”

‘ဒါပေမဲ့’ ဆိုသော စကားက မင်ရှစ်ရင်အား ရင်တုန်ပန်းတုန် ဖြစ်လာစေသည်။ သူ့ရှစ်စွင်းကို ကြည့်နေစဉ် နှလုံးခုန် မြန်လာမိ၏။

လုကျိုးက ပြောလိုက်သည်။

“ မင်းရဲ့ ရှစ်မေ့ မိသားစုကို ပြန်ပေးဆွဲတဲ့ လူတွေကို စုံစမ်းစစ်ဆေးတာရော ဘယ်လိုရှိလဲ ”

“စုံစမ်းနေဆဲပါ ရှစ်စွင်း။ ကျူးဟုန်ကုန်းက သူနဲ့ ဘာမှမပတ်သတ်ဘူးလို့တော့ ပြောပါတယ်။ သေချာတွေးကြည့်လိုက်တော့ သူ့အနေနဲ့ အဲလို လုပ်စရာအကြောင်း မရှိဘူးလားလို့ တပည့်လဲ တွေးမိလိုက်တယ်။ ပြီးတော့ ဒီလူတွေက ရှစ်မေ့ရဲ့ မိသားစုဝင်တွေလေ … သူက ရှစ်စွင်းကို သစ္စာဖောက်သွားပေမဲ့ ဒီလောက် ရက်ရက်စက်စက်တော့ လုပ်မယ်လို့တော့ မထင်ဘူး ”