أسميته أحمد 🍁

" 67 "

- لازم ياحلوتي صوتنا يكون هادي في الشارع، إنتي حورية والحورية يكون عندها حياء.
ابتسمت بسماجة علشان أم الليلة دي تعدي، أنا لا حورية ولا حاجة أنا حنان، حلوتك منين أنا يابت !
- الخمار بيربي يا نونو يا حبيبتي وانتي ماشاء الله الخمار حلو عليكِ خالص اللهم بارك، يبقى ناخد بالنا من مشيتنا ومن صوتنا، الحوريات بيعملوا كده.
- بس أنا اسمي حنان !
حطت طراطيف صوابعها على بؤها وهي بتضحك ضحكة مكتومة ويكأني أخطات في الخطة الموضوعة لقتل إرهاب العالم، ماذا حدث يا أختاه ! ما جُرمي !
- حبيبتي حورية دي تشبهًا بالحور العين، والمنتقبة أو المختمرة بنسميهم حوريات.
- وهل المحجبة حجاب عادي يا أختاه مُحرّم عليها اللقب؟ إنني استفسر ليس إلا.
- يا حلوتي الحجاب العادي لا يسمى بالحجاب، الحجاب يعني خمار، مش ده اللي اتذكر في سورة النور ؟
سلمت عليها علشان أخلع من أم الجلسة اللي بتفقعلي مرارتي دي - حصل.
- حنان ! سلمي زي الفتيات مابتسلم.
- بيسلموا إزاي !
- بهدوء، والقُبلة مش بيكون ليها صوت.
- القُبلة ! وفي المسجد ! استغفر الله.
- مش هتبطلي اسلوبك ده ؟
- لا أقصد يا أخت ريم ولكن من باب الفكاهة يعني.
- حماكِ الله.

ماهذا، لأ ريلي ما هذا، لماذا يتحدثون هكذا؟ ريلي يعني لماذا ؟ لماذا تناديني بحلوتي؟ يعني لما هي تناديلي بحلوتي حبيبي الغائب زي الأهبل في أرض الله هيناديني بإيه؟ أوليست الحوريات في الجنة؟ لماذا تناديني بالحورية، لست حورية يا أخت ريم، إنني حنااااان، ارحموا المرارة يرحمكم الله.

- عملتي ايه يا نونو؟
- كان يوم ليس له علامات يا أخت أسماء والله، ياربي لساني اتعوج يابت يا أسماء !
- حصل ايه !
- لن أحضر ندوات مرة أخرى.
- ماذا حدث في القبيلة في غيابي ؟
ضحكت - بس يابه.
- حصل ايه بجد.
- هما ليه معتقدين إن للخمار لسان معين، يعني ليه أول مابيلبسوه بيبدأو يقولوا يا حلوتي وياحورية، وبنوتاتي والكلام ده ؟ هل لا يجوز لبسه بدون هذه الميوعة ! حمدت ربنا إنك مجتيش معايا والله، كانت هتبقى مجزرة.
- عرفتيهم منين دول !!
- ياستي صفحة ظهرت قدامي اسمها "مش هتجوز إلا مريم، مش هتجوز إلا مُحمد" قولت لربما نستفيد وبدأت أقرأ في البوستس بتاعتها، لاقيتهم بيكتبوا قصص حب حلال، قولت مش عيب ولا غلط، لربما نتعظ، البطل بالع مايك في بؤه وفي كل قصة بيزعق ويقولها " مش قولتلك متخرجيش من غير البيشة !! إزاي تبتسمي في الشارع متعرفيش إني بغير ولا إيه ! "
- هي متعرفش إنها نور عينيه ولا إيه !
- وبعدين يقولها هاتي ايدك أسبح عليها كي نتقاسم الأجر، يعني هي لو سبحت هتتشل ؟ أو هو مثلًا عنده رعاش في صوابعه مبيعرفش يسبح عليهم ؟.
- يمكن عنده عذره.
- أنا برضو التمست ليه العذر، لقيته في قصة تانية بيطفي عيون البوتوجاز علشان غيران عليها منهم، فقولت مبدهاش بقى، رزعتلهم كومنت لطيف خفيف كده، قولتلهم ما هذا يا أخواتي في الله !  بس يا ستي وكانوا هياكلوني بس لما عرفوا إني مختمرة بدأوا يقولولي يا حلوتي ويا مانجتي، وحورية، وبعدين دبسوني في ندوة قريبة من البيت معرفتش اتحجج ومروحش.
- هما دول اللي قبل كل بوست بيقولوا ركزوا معايا يا بنوتاتي، وبنوتي وبنبونتي والكلام ده ؟
- هما بعينهم والله.
- تعتقدي هيرموني بالحجارة لو شافوني بالطرحة دي !
بصيتلها بقرف - اختي من فضلك هداكي الله ارتدي خمارًا مثلي.
- على وشك، والله بإيدي وعلى وشك.