أسميته أحمد 🍁

" 33 "

- أنا معنديش مشكلة أطبخ
- لا والله !
- أيوة والله، بس مش كل يوم، بمل من الروتين أنا
- علشان الملل ولا علشان مبتعرفيش تطبخي
- هو انا مش بعرف أطبخ ايوة، بس هجيب الوصفات من على النت عادي، اتجوزني بقى
- يابنتي مش هينفع
- وممكن أغسل المواعين مرة في الأسبوع والله
- ياه، مرة في الاسبوع ! إنتي بتضحي كده ليه !
- شوفت بقى، اتجوزني يلا
- حنان ياحبيبتي، انا شايفك زي مُصطفى أخويا، واحد صاحبي جدع يعني
شهقت - أنا واحد صاحبك ياأحمد !
- مش حاسس فيكي رقة البنات دي
- أنا !
- صوتك عالي على طول، وانا مراتي لازم تكون كيوت وهادية
عليت صوتي - مين قالك ان صوتي بيعلى !
- تقولي حاضر ياسي أحمد، عيوني ياسي أحمد
- مش عاوز DVD بالمرة ؟
أنا مش أنثى ! مش كيوت ؟ ايه يعني صوتي عالي ! دا انا ضحيت وقررت اغسل الموعين مرة في الاسبوع وفي الآخر يقولي مش كيوت !
- أخوك بيقول عليا مش أنثى
- عنده حق
- مُصطفى !!
- قصدي ملهوش حق، هربيهولك
- ممكن تتكلم بجد وتبطل هزارك ده
- ماهو انا كراجل لو واحدة قالتلي هغسل المواعين مرة في الأسبوع دي هديها كف خماسي والله
- نعاااااااام !
- هقولها انا هغسلها طول الاسبوع يعني
- تصدق اني غلطانة اني بكلمك عن مشاعري واحاسيسي وعواطفي
- يابنتي انتي اليوم اللي بتلبسي فيه فساتين وخلاص هنصدق انك بنت، بتقفي زي حمو بيكا
- متكسرش خاطري بقى
- بوعيكي ياهبلة، فاكرة لما خبطت فيكي غصب عني والعصير وقع؟ عملتي ايه يومها ؟
- مش فاكرة
- لأ فاكرة ومتتهربيش
- مش فاكرة يامصطفى انا اصلا مكنتش ماسكة صنية يومها اصلا
- ايوة الصنية اللي ضربتيني بيها على دماغي
- يوه بقى
- الأنثى كانت هتعمل ايه ؟ كانت هتقف تبص للعصير اللي وقع بإنكسار لحد مانا أتأسف، فهي تبتسم وتقولي حصل خير
- دي خالتك اللي تعمل كده يالا
- لا لا انتي حالتك ميئوس منها، قومي روحي بيتكم
- إنت مش ابن عمي لأ
- قومي يابنتي
- ولا بتحبني لأ
- تبقى معدية، لأ لأ
- هتقف جمبي وتساعدني ولا هتبقى ابن .. وتسيبني ؟
- طب علشان شتمتي عمك مش هعملك حاجة
- والله ماشتمت
- ولو مساعدتكيش ؟
- هشتم
اتنهد - هساعدك بس تسمعي الكلام، تقوليلي حاضر ونعم ياسي مصطفي، وت..
- مش عاوز شيبكون بالمرة يالا ؟
- قومي يابت من هنا، قومي كرهتيني في البنات.
باااااس، انا هساعد نفسي وهعتمد على نفسي، ومن النهاردة مش هطلب مساعدة من حد أبداً
- بالله يامُصطفي ساعدني
- هتقوليلي حاضر ونعم
- آه يازفت هقولك
- ها !!
- حاضر ونعم
- القاعدة رقم 1، تبصي في الأرض اول ماتشوفيه
- ليه ؟
- ياصبر أيوب، إسمعي الكلام وبس
- حاضر
ابتسم - بداية حلوة، صوتك يا ماما، انا شخصياً بخاف لما بتعلي صوتك، صوتك هادي، ناعم، كيوت، الأنثى لازم تكون هادية
- سهلة دي، غيره
- مفيش بناطيل تتلبس تاني، كله دريسات، كله كله كله
- سهلة برضو، أنا ممكن أعمل شعري سشوار واظبط نفسي
- سشوار !! انتي محجبة ياغبية أصلاً
- نسيت، خلاص هعمل الطرحة سشوار
- ايييخراصي خالص
- كمل يا مُصطفي كمل، كل اللي بتقوله سهل
- ربنا يستر، بكرة العصر ألاقيكي قدامي هنا
خرجت كل الهدوم اللي في الدولاب، استعنا على الشقى بالله، خرجت الفساتين الموجودة، خلاص الفساتين المحترمة بقت وسيلة إغراء ! مش اغراء ياغبية، دي إثبات اني أنثى، لإن الولد بيلبس بناطيل هو كمان، بالله ماتشغلي عقلك ياحنان، متفكريش خالص
لبست دريس زهري وطرحة لونها أبيض، كان عندي عُقد من فصوص بتلمع كده، لبسته هو كمان، فضلت اتدرب ربع ساعة قدام المراية وانا باصة في الأرض وبتكلم وحرفيا الموضوع كان صعب جداً، اكلم حد من غير ما ابصله ازاي !
- ولا يا مُصطفي
الموبايل وقع من ايده من الخضة - يالهوي عليا وعلى سنيني ! ايه يابت ده ! دا اللي اتفقنا عليه إمبارح
لفيت علشان يشوف الفستان - قمر صح ؟
- لأ شبح يابت
خبطته في كتفه - عم الناس والله
- ايه رأيك نسميكي سمير ؟ لا بلاش سمير، نسميكي خالد مثلاً
- بقى دي المعاملة اللي بتعاملهالي بعد ماظبطت نفسي كده يابرج الطور
- افتحي بؤك كده، انتي بالعة راجل جوه يابت !
زعلت وقتها اوي، وسيبته علشان أمشى. كنت متوقعة هيقولي اني حلوة كده، والله زعلت اوي
سمعت صوت أحمد - ولا ولا ماشي ليه يالا ؟
بصيت في الأرض علشان كنت حاسة اني لو رفعت عيني الدموع هتقع - مفيش
جه ناحيتي بسرعة - انتي زعلانة ليه !
- مفيش تعبانة وعاوزة أمشى
- طب ادخل..
- لأ همشى
ومشيت على طول، مكنتش عارفة أمشى في الفستان أصلاً، ومُصطفى زعلني وأحمد سابني أمشى زعلانة
- حنان
وقفت وابتسمت اول ماشوفته - ايه ده انت جاي علشاني ؟
- استني متروحيش، هنتمشى شوية طالما زعلانة
يالهوي عليا ! يا الفستان اللي عمل شغل، يا زعلي اللي عمل شغل، ازعل على طول ؟ هزعل على طول
همس - أقولك سر ؟
همست انا كمان - قولي سر
- انتي حلوة اوي النهاردة
تنحت وكنت لسه هقوله والله انت اللي قمر وحلو وقميصك حلو، فيسكوز ده ! ، بس افتكرت مصطفى وهو بيقولي بصي في الأرض، بصيت في الأرض وابتسمت متكلمتش
حسيته بيبتسم وهو بيحط ايده في جيوب الچاكيت
- مش هتقوليلي اتجوزني ياأحمد وكده ؟
- بهزر معاك، هو في بنت بتقول لولد اتجوزني !
بص ناحيتي بسرعة - يعني انتي مش عاوزاني اتجوزك !
- انت أخويا يا أحمد
- طب كويس، كنت فاكرك بتحبيني بجد
هو ايه ده اللي كويس !! هو فاكر علشان بصيت في الأرض هسكتله يعني !! هتضطر اسكت بصراحة
- يعني انت كنت فاكرني بتكلم بجد ؟
- ايوة، بس طمنتيني يعني
- واتطمنت ليه !
- علشان انا فعلاً شايفك صاحبي الجدع.
طب عليا الطلاق مالابسة دريسات تاني، يمين بعظيم ياأحمد الزفت انت لاوريك المعاملة بعد كده ! ارميلي يابني شوية الفساتين اللي عندي دول ارميهم
- قاعد لوحدك ليه ياصاحبي ؟
- مُصطفي يازفت انت، امشى من قدامي
- وزهقانة كمان ؟ حصل ايه
- ولا حاجة، اخوك شايفني راجل، فقررت اثبتله اني راجل بجد
شهق - بنطلون تاني ! ومقصرة الزفت اللي فوقه كده ليه !
- انت معتقد اني هبص في الارض واقولك مش هعمل كده تاني ؟ انا ممكن اديك بضهر ايدي على فكرة
- طب اهدي وفهميني حصل ايه
معرفش ليه عيطت وقتها بس كنت مخنوقة اوي - يا مُصطفى انا بحبه، والمفروض يحبني زي ما أنا، انا مش عاوزة اتغير وابقى كيوت زي مابيقول، انا كويسة وانا كده، هو نفسه بيقول اني حلوة علشان على طبيعتي، دلوقت بقيت وحشة !
- حنان، كل شخص فينا حاطط صفات معينة في الشخص اللي بيتمنى يرتبط بيه، انتي بتحبي أحمد، وهو راسم صفات للبنت اللي عاوزها، مش عيب خالص تحاولي تتشبهي بيها
- تقصد اتغير وامحي نفسي
- لو التغيير ده في مصلحتك فايه المشكلة، ثم انك فعلا حلوة في الدريسات، وانا متضايق منك علشان لابسة قصير كده
- متضايق بجد ؟
- جدا جدا
- خلاص مش هلبس كده تاني
خرج الموبايل - خلاص اخلعي بقى علشان مش فاضيلك
- هتكلمها ياصاحبي ؟
- كلمة صاحبي دي ماتتقالش تاني
- ماخلاص بقى ياوحش، يعني مش عيب الصغير يخطب والكبير يقعد زي الاهبل كده.
- هنحقد ولا ايه !
- سيب الموبايل وكلمني يا مُصطفى، خطوبتكم بعد يومين وهتشبع بيها، خليك معايا أنا دلوقت
- خليتني معاكي ياست، بصي انا هفكرلك في خطة وربنا يقدم اللي في الخير وألف مبروك
- أخوك مبيحسش والله
- أقولك سر ؟ أحمد بقاله يومين بيكلمني عليكي
- يالهوي ! قول ان قالك انه بيحبني، قول وانا مش هتكسف والله
ضحك - لأ مقالش انه بيحبك، بس شكله هيحبك
- دا كله علشان الفستان !
- لأ ياهبلة، علشان اربكتيه، علشان هو متخيلك ولد فعلاً وانتي فجأة كسرتيله الإعتقاد ده
- انا مش فاهمة، كلمني عربي
اتنهد - مش لازم تفهمي، انا عاوزك يوم خطوبتي تكوني بتنوري في الضلمة، هنزل معاكي بكرة نختار الفستان اللي هتلبسيه، وعندي واحد صاحبي هخليه يتقدملك قدام أحمد، بصي هنخربها
ضحكت - وقوله يقولي بحبك ياحنان قدامه بالله، ويقولي كمان اني..
- اهدي احنا هنأجره دقيقة واحدة واحتمال يتضرب بعدها، مش عاوزين نضغط عليه كمان.
نزلنا اشترينا الفستان فعلاً، فضلت اليومين دول في البيت، هو انا قررت البس فساتين بعد كده لاني فعلا حسيت اني بنت مش علشان أحمد والله، اتصل بيا مرة واحدة يتطمن عليا وعملت زي مصطفى ماقالي كنت برد على قد الكلام وقفلت معاه لاني هنام ومش فاضية وهنقذ طبقة الاوزون وعندي شغل
يوم الخطوبة كنت قاصدة اروح متأخر، آخر شخص بيوصل الفرح هو اكتر شخص بيلفت الأنظار، كنت لابسة فستان أزرق سادة، وطرحة وردي، قصدت محطش ميكب، لبست خاتم واحد في ايدي وعقد بسيط، وايه القمر اللي انا فيه ده وسعولي كده
اول مادخلت سلمت على عمي وروحت سلمت على مصطفى وعروسته
همس - يالهوي ! قمر يابت
- اسكت علشان بقيت اتكسف من الكلام ده بجد مش تمثيل.
وقفت في مكان بعيد عن الدوشة، آسفة اقصد وقفت في مكان بعيد علشان اعرف اراقبه، وكنت فرحانة انه بيبصلي، يالهوي بيتحرك وجاي ناحيتي ! ، بيبتسم !
وقف جمبي - عقبالك
ابتسمت علشان عاوزة اضحك، او علشان كنت عاوزة اعيط معرفش
- هقولك حاجة واعملي نفسك مسمعتيش
- حاضر
- انتي حلوة اوي
شهقت  - أنا اتأخرت تقريباً
ضحك - اتأخرتي فين ياهبلة !
عمي ناداله ووقفت لوحدي، دقيقة وفي ولد جه وقف جمبي وهو بيبتسم، بصيت لمصطفي فشاولي بإيده، ففهمت انه صاحبه، علشان كده داخل تبتسم ! على اساس في اسرار وكده، ماعلينا مش بطال، كنت هزعل اوي لو مكنش حلو
- أنا بقول تعالي نقف بره علشان أحمد عصبي وممكن يضرب فعلاً، فبلاش قدام الناس هنا
ضحكت، كنت فرحانة اوي انه قال عنه كده، او فرحانة انه خايف منه، والله ما أعرف بس ضحكت بفرح
- لا خلينا هنا احسن.
- أحمد جاي اهوه نبدأ ؟
اتخضيت فجأة - نبدأ ايه !
- اضحكي
- نعم !
- مُصطفي قال انك ذكية متتعبنيش بقى
ضحكت بدون قصد - لسانك طويل زيه
مكنتش عارفة ابص لأحمد بس كنت شيفاه بطرف عيني وهو بيقرب، شايفة ملامحه وهي بتتغير، وقف جمب.. هو مُصطفي قالي اسمه ايه !
سلم عليه وهو بيبتسم - اذيك ياأحمد عامل ايه ؟
أحمد كان باصصلي - الحمد لله، واقف هنا ليه !
- كنت بقول لحنان عقبالنا
لأ مقاليش والله، والله بيكذب، ثم اني اتفقت مع مصطفى انه يقولي بحبك مش يقولي عقبالنا، لا انا ميتضحكش عليا والله اكسرها على دماغكم، ها ! اهدي كده وارجعي انثى تاني، ايوة شهيق زفير
- عقبالكم ازاي يعني ! حنان مخطوبة أصلا !
اتكلمت - دا مين دي اللي مخطوبة ياأحمد !
شدني من ايدي وخرجنا بره - اول وآخر مرة صوتك يعلى عليا قدام حد
- وانت متمسكنيش كده قدام حد تاني
ابتسم - طب ولوحدنا ؟
هو انا معرفش ليه ابتسمت، علشان ابتسم ؟ ولا علشان بصته اللي اتغيرت ؟ ولا علشان قال اني مخطوبة ؟
- ليه قولتله اني مخطوبة ؟
- مش عارف، انا مفكرتش قبل مااتكلم، او..
حسيت بخيبة أمل فجأة، سقف أحلامي ارتفع بسرعة ووقع تاني بسرعة
اتحركت علشان أمشى فوقفني - أنا عاوز وقت
- وقت لإيه ؟
- برضو مش عارف، انا تايه، وهكون أناني اوي لو قولتلك اني محتاجك وانا مش عارف انا عايز ايه أصلا، بس..
سكت لما سكت، اول مرة اشوفه كده، وبسببي !
- طب أمشى ؟
- ممكن تفضلي؟
وقفنا ساكتين مش عارفة قد ايه، تاني حلم يتحقق في نفس الوقت، حلمي اني اقف جمبه سايبين العالم الاتجاه التاني، نكون في عالم لينا احنا بس، وكان نفسي أوي أهمس في ودنه وأقوله " دعك من عتمة هذا العالم وأسكن داخلي "
طول الشهرين بعد اليوم ده، معاملته اتغيرت، اقصد بصته اتغيرت، بقى يضايق لما بيشوفني بهزر مع مصطفى، رغم انه كان منطقي جدا اعانده بمصطفى بما انه بيضايق، بس معرفش ليه كنت بتجنب اي حاجة تضايقه.
- قاعدة لوحدك ليه ؟
- مستنية مُصطفى
وقف - ومستنياه ليه !
- قالي هيشتري هدية ل..
- ايوة برضو وانتي نازلة معاه ليه !
- ماهو أنا بنت، فالطبيعي ذوقي هيكون احسن
- متنزليش
- ليه !
- هننزل انا وانتي
- هنروح فين ؟
- عاوزة تروحي فين ؟
ومعرفش ليه ابتسمت، سيبت مُصطفى طبعاً يولع اكتر ماهو والع
-  أقولك حاجة ومتعلقيش عليها ؟
- قولي حاجة
- كنت شايف من شخصيتك جانب واحد بس، اول مرة اشوفك كاملة
ايه ده ! انا بيتقالي كلام حلو زي البنات وكده ! يعني ابص في الارض ولا احضنه ولا اعمل ايه !
- اقولك بقى حاجة وتعلقي عليها ؟
- حاضر
- أنا بحبك
- هاا !! أخيراً ! قصدي ايه قلة الادب دي !
- قلة أدب !
- ايوة لما تقول لبنت عمك كده وانت عارف اني انثى وضعيفة وممكن انهار دلوقت، تبقى قلة أدب
- يعني مقولش ؟
- دا كده قلة أدب اكتر
وقف فجأة وحط ايديه الاتنين في جيوب بنطلونه وهو بيتنهد - طب ماانتي بتحبيني
- دا مين الأهبل اللي قالك كده !
- يعني مبتحبنيش ؟
- مين الاهبل اللي قالك كده برضو ؟
- بت !
- ياأحمد خليك عنيف كده وقولي انا بحبك وهقول لعمك ونيجي وانتي هتوافقي غصب عنك ولو موافقتيش هخطفك، عارف العنف ؟ عاوزاك عنيف
- بحبك
يالهوي ! مش عنيف اوي يعني،  هيقولك دلوقت نيجي النهاردة قوليله لأ، انا مبفكرش في الحاجات دي ابدا، ولا هفكر ولا عاوزة افكر
- ها نيجي النهاردة ؟
- دا مين الأهبل اللي هيقولك لأ !

" حتى قبل أن التقيك، لم نكن أغراباً "

#أسميته_أحمد
#حنان_سعيد