أسميته أحمد 🍁

" 14 "

          
وبفتكر صوت هشام الجخ وهو بيقول:
" كانت لما بتجرح قلبى ، تحلى لقلبى قولة آه "
بس أنا مبقتش مستحملة الوجع منك ، وجع إنه وجع ووجع إنه منك إنت بالذات
- بحبك
- لأ ، إحلف إنك مش هتوجعنى ومش هتسبنى وهتفضل تحبنى وعمرك ما...
- إيه يااحنان ده ؟ براحة مش كده
- ما أنا هعمل إيه بحبك لو وجعتنى !
- هو أنا لو وجعتك هتمشى ؟
- هعمل الأصعب ، هنساك
- هتنسينى يااحنان ؟
- لو دوست عـ قلبى هدوسك والله
المفروض أبكى قسم حلفانى كذب ولا أبكى إنى هونت عليك ؟
نسيت إنك محلفتش ، نسيت إنى أنا بس اللى حلفت
- مشكلتك إنك متطلبة
- مشاعر بس ، مش عاوزة غيرها
- لأ اطلبى غيرها ، اطلبى إننا نخرج ، اطلبى حاجة نفسك فيها ، متحمليش كله عـ حاجة واحدة
- مش قادر تحبنى ؟
- مش قادر أكون مبهر ليكى طول الوقت
ابتسمت - تقريبا فاضلك طريق طويل عـ مااتفهم
- أنا فعلًا مش فاهم ، أوقات بحس إنك مش شايفة غيرى ، وفـ لحظة بتنسى وكإن مفيش بينا موقف ، بحس إنى الراجل الوحيد اللى اتخلق من كلامك وفـ لحظة بتحولينى نكرة ، انتى مُتعبة وصعبة
- كان اختيارك وجودك هنا
- لأ ، قلبى اللى سحبنى
- يبقى يتحمل
- بتحبينى ؟ وبلاش تردى بكلام مش هفهمه زى كل مرة ، إجابتها بسيطة مش مستاهلة تعقيد
- السؤال نفسه تعقيد ياأحمد ، عاوز الإجابة تبقى بسيطة ازاي ؟
إتنهد وسكت
حبك نفسه تعقيد ، زارع خُطى قلبك فـ روحى وبتسألنى بتحبينى ؟ آه عايشة على كلمة قولتها فـ لحظة صفا ، وضحكة خرجت من قلبك وعاشت فيا ، ورفعة حاجب نفض قلبى يوم ماارتفع ، وبتسألنى بحبك ؟!
- الدنيا بتبقى حلوة أوى دلوقت
- بتحبى الليل ليه ؟
- اسمها بتحبى ليل الشتا ليه !
- بتحبينى ليه ؟
- إنت بتخم
-  انتى ليه بترفضى تقوليها ؟
- أسئلتك كترت
- عاوز إجابة عـ سؤال واحد بس
- وهو ؟
- بتحبينى ؟
- حاسة ببرد أوى
آه متطلبة وصعبة ومش أى راجل هيتحمل سكوتى ، مش أى راجل هيرضى يمشى طريق روحى وهو كله تعرجات ، بس الطريق كان اتخلق ليك ، لخطاويك وبس ، أقصد مش أى راجل غيرك يليق أمسك إيده
- خايف تبعدى
- يبقى متسبنيش أبعد
- هو ممكن أهون عليكى وتمشى ؟
- لو هونت عليك ووجعتنى
- انتى متخيلة إنى أعرفك من سنين ولحد النهاردة مقدرش أقول بكل ثقة إذا كنتى بتحبينى ولا لأ
- علشان قلبك مش مركز
- بقيت أخاف أسألك
- حس الإجابة ياأحمد ، متستناش تسمعها
- يعنى أغمض وأمشى ورا قلبى ؟
- غمض وحبنى
سيبت إيدك ؟ علشان وجعت إيدى
علشان معافرة قلبى تعبت ومبقتش قادرة أمسك ، آه بحبك بس إيه علاقة حبى ليك بإنى أتحمل وجع منك ؟
- ياابنتى إجرى بتمطر
- ماتمطر
- هناخد برد كده
- مااناخد
وقف متحير مش قادر يمسك إيدى علشان أتحرك معاه ولا قادر يمشى
- خايف تتعب ؟
- مبحبش البرد
- أنا برد ، لازم تحب التعب علشان أنا تعب
- بخاف منك
- حبنى أسهل
- حنان !
- يوم مااتفهم إن المطر اتخلق علشان نقف تحته ، والشتا اتخلق علشان نحس حلاوة برده ، هتعرف تحبنى ياأحمد
- بس أنا بحبك
- إنت بتخاف منى
- خوف إنى أقع من قلبك والله ، أو خوف إنى مكونش فيه
- غمض عيونك
غمضها - حاسس بالبرد ؟
- أيوه
- المطر بيتشم ، بيتحس ، بيتعاش
- حاسس بخوف
- هترتاح لما تحس إنه لمس قلبك
- شايفك انتى
- وحاسس بإيه ؟
- قلبى بيدق
ضحكت - طب فتح عيونك ، حلو المطر ؟
- ضحكتك أحلى
كان نفسى وقتها تقولى شوفتنى ازاي ، كنت حلوة ؟ كنت بضحك ؟ كنت ازاي وأنا فيك ؟
- ووقتها أسماء ضحكت عليك
ضحكت جامد - نفسى أوى تسمعها وهى بتتكلم عنك ، مش هتبطل ضحك
كان سرحان فـ حاجة فيا وساكت
- عاوزة أوى أعرفكم ببعض ، وتتكلموا ونبقى صحاب كلنا وكده
- ...
- هو إنت ساكت ليه ؟
- بحاول أعرف ازاي بتتحولى لطفلة كده فجأة ، أنا طول الوقت بكون منبهر من كلامك ودلوقت حاسس إنى لو حضنتك هقدر أساعك
- المفروض إنى أتكسف ووشى يحمر بس للأسف أنا مبحسش
- بحبك أوى وانتى رايقة وبتضحكى كده
ضحكت - هو أنا نكدية ياأحمد ؟
- مش قصدى ، بس فـ الوقت ده مبكونش خايف منك
- وتخاف منى ليه ؟
- علشان مستبيعة
- أنا مببيعش ، بس بتعب
- بتحبينى ؟
- بخاف
- بتخافى تحبينى ؟
- بخاف أتعب
وحشتنى عـ فكرة ، قد حبى ليك اللى متعرفهوش ، ووجعى منك اللى أنا السبب فيه ، قد خوفى من بكره ومن الناس ومن الدنيا ، قد ترددى وأنا واقفة عـ باب قلبك ، بحبك قد مابحبك ووحشتنى قد مابحبك
- سبتيه ليه ؟
- علشان بحبه
- مش فاهمة
- ولا أنا
- طب فهمينى
- أفهمك ايه ؟
- سبتيه ليه ؟
- سابنى أسيبه
ف وقت ما ، هتكتشف إن فـ أنواع من البشر مينفعش تحب ، مينفعش تعيش ، علشان خوفها غير المبرر هيقف بينها وبين الحياة
أنا بس كنت عاوزة أتطمن
- معرفش ليه بحس بوجع فـ عيونك دايمًا ، لو فـِ حاجة قولى وهنقسمها
- خايفة عليك منى
- مش هتئذينى
- أبعد
- انتى جواكى ألف شخص غير حنان ، ومش قادر أحبهم كلهم
- يبقى تبعد
- بس بحب حنان
- أنا خايفة
- أنا مش قادر أكفيكى ؟
- مش قادر تطمنى ، أو أنا اللى صعب أتطمن
- أنا بحبك
- حاجة فيا خايفة تصدق
- انى بحبك ؟
- لأ ، إنى أتحب
أنا بحلم من زمان بفارس يشبه لأبطال الأفلام ، اول حاجة هعملها اول ماايجى انى هقعد ف حضنه واعيط ، اعيط كل حاجة زعلتنى ، أمسح ف قلبه وجع روحى وميخافش منى لو شاف تجاعيد قلبى ، انا بحلم ومعنديش القدرة احقق
وفجأة ظهر ، خبيت عيون قلبى علشان ميشفهوش بس للأسف دق ، دق وكان بيحبى علشان يطول كفه ، كل مرة ببص لإيده بكون عاوزة أسأله " إيدك إزاى حلوة وكبيرة كده ؟ " واقوله كمان " هتساعنى ؟ احضنى بيها أشوف هتساعنى ولا لأ "
قلبى بيوجعنى لما بيقولى " بتحبينى ؟" ومبقدرش ارد ، قلبى بيوجعنى لإنى سبب وجع ليه
آنا بدخل ف إكتئاب من اقل حاجة ومش بكون ضامنة انى هخرج منه ، آخر مرة الدنيا قفلت على قلبى وجعته هو بالكلام ، وجعته وبعدته وكرهته وكرهتنى علشان فكرت اكرهه ، انا بحبه ومينفعش يتوجع بسببى
- كل مااقرأ لنزار " علمنى حبك أن أحزن " بفتكرك
- عاوزة احط ايدى ع قلبك واعتذرله ياأحمد
- حبيه وهو هيسامح
- لو حبيته هأذيه
- يااستى انا وهو راضين
- انا خايفة من اليوم اللى هوقعك فيه من ايدى ، وعارفة ان اليوم دا هيجى حتى لو قفلت علينا خطاوى الاياام
- طب وافقى نتجوز ، علشان اعرف اطمنك ، انا مش عارف احضنك
- نتجوز !!
كل مرة بيقول الكلمة دى قلبى بيتقبض ! ، هو مش فاهم انه ممكن يصحى ف يوم على صوت عياطى وصراخى ، مش فاهم انه ف اوقات هيلاقينى طايرة من الفرح من غير سبب زى مااوقات هقعد ف ركن صغير انتفض من الوجع برضو من غير سبب ، مش قادر يستوعب إنى مش قادرة اكسر قوقعة الحزن اللى عايشة فيها ، مش انا بحبه ؟ يبقى لازم افهمه ، اقصد لازم ابعده ،ومش هرجع ف قرارى
- ارحم قلبك وامشى
- تانى يااحنان ؟
- تانى وآخر مرة
- مش بمزاجك
- ومش هتغصبنى
- انتى ليه بتعملى كده ؟
- يوم ماالاقى إجابة ع السؤال ده ، نص مشاكلى هتتحل
- طب احنا ممكن نوصل لحل ون..
- انت مبتتعبش ؟ بقولك مش عاوزة حد معايا ، امشى يااحمد ، انا مش عاوزة حد يشوفنى وانا كده ، انا ببقى وحشة وانت الوحيد اللى مينفعش يشوفنى وحشة ، لو بتحبنى امشى ، وجودك ف ايدى مش هيسببلك غير التعب
- اتجوزينى ون ..
- ليه ؟
- علشان .. ، علشان انا بحبك
- انا لو كملت الطريق واتكسرت منك هموت ، وانا مش عاوزة اموت فاابعد
خايفة ؟ ابدا والله ، انا من كتر مااقلبى بيموتنى وجع مبقتش اخاف اتوجع ، انا بس مش عاوزة اخسر املى ف ان الحب حلو بكسره ليا ، عاوزة دايما اعيش ع امل ان ف حاجة حلوة زى الحب موجودة ف الدنيا ومحلياها
كنت بعرف اخباره من أسماء ، وبيزيد وجعى لما بعرف انه تعبان ، حتى ف بعدى عنك مسببالك وجع !
بعد شهر اتصل من رقم غريب ، عرفت انه هو والله رغم انى مش مسجلة الرقم
فتحت وسكت وهو كمان كان ساكت ، سامعة صوته وهو بيتنفس ، بينهج وكإنه بيجرى ، حاسة بقلبه بيدق ف قلبى انا ، بروحه وهى حاضنة روحى
- أحمد
سمعت صوت عياطه ، قلبى إتقسم ! ، حسيت مية مغلية وقعت ع قلبى ، لأ وجع اكبر ، كإن مكوة حضنته  ، لأ كان وجع اكبر
- أحمد ! انا آسفة ، حقك عليا والله ، انا مستاهلش ، والله مااستاهل ، شوف انت تعبان ازاى ، انا مش عاوزة كده ، مش عاوزاك تتعب
- تعبان من بعدك يااغبية
- طب اهدى ونتكلم ف الموضوع دا بعدين ، إنت فين دلوقت ؟
- إنتى مالك ؟ هامك ؟ انا هامك يااحنان ؟
يااغبى انا مش هاممنى غيرك ، تولع الدنيا وترضى انت
- تعالى قطعى رسايلك علشان مش قادر اقطعها ، وولعى ف الكلاك اللى كتبناه سوا لبعدين ، الشقة اللى عملتها زى ماانتى حابة وسايبها مفاجأة ليكى ، انا عملت مكتبة كتب كنا هنملاها سوا ، ركن للصلاة زى ماانتى عاوزة ، ولونتها ابيض وازرق ، ف جدار ف اوضة المكتبة كتبت عليه كلامك ، وإسمك محفور ع المكتبة ،ادخل واحدة تانية بيتى ازاى وهو مكتوب ف اسمك ؟
التليفون وقع من ايدى وانهارت ، انا ليه مينفعش اعيش الحياة دى ؟ انا حابة اكون معاه ف الاحلام الحلوة اللى حلمناها من غير قصد سوا ، انا ليه كده !
كتير بتمنى اوافق ع جوازى منه علشان يحضنى بس وامشى ، يحضنى بس والله
بقالى ٣ اياام ف اوضتى ، بعيط وبنام وبصحى اعيط علشان اتعب وانام ، كل مالشمس تطلع افتكره وهو بيقولى لما بضحك
" طلع ف شموس بتضحك اهوه زى ماارسمنا واحنا صغيرين "
أسماء اتصلت بيا
- فرحانة دلوقت ؟
- انا مش مستحملة اسمع حاجة ع فكرة
- طب انتى ف الحالتين مكنتيش مرتاحة ، وهو كان مرتاح وهو معاكى ، بعدتيه علشان تتعبوا انتوا الاتنين !
- هيتعب شوية وبعدين يخف
- انتى انانية
- انا تعبانة
- أحمد هيسافر ع فكرة
قلبى اتنفض - يسافر ! ليه ؟ ويسافر فين ؟
- ملكيش حق تعرفى دلوقت ، هيمشى الساعة ٤ النهاردة ، وارتاحى بقى يااستى خالص
- اول مرة تعاملينى بقسوة كده
- ماانتى بتقسى ع نفسك ، جت عليا ؟
عيطت - كلميه وقوليله ميسافرش علشان خاطرى
- هو قاعد  ف المكان اللى بتقعدوا فيه سوا قدام البحر ، لو بتحبينى روحيله
- أنا..
- أنتى هتموتى لو مشى ، اقولك ع حاجة ؟ جربى ، سيبى قلبك يطير ، حرام تقصى جناحاته كده
- قلبى بيدق بخوف
- روحى علشان خاطرى
روحت علشان خاطرى انا ، مينفعش يسافر ، يبعد بس وهو هنا ، مش هينفع يسافر ، هوقفه وبس ، وهبعد برضو ، مش هرجع ، سابنى لوحدى كل ده ، سابنى وهو عارف انى محتاجاله ، انا بكرهه بس مش هسيبه يسافر
كان قاعد وساند بإيده ع الصخرة اللى قاعد عليها زى عادته ، وانا قلبى داب ، حسيته وقع من ضلوعى ، اول مرة اشوفه من ٣ شهور ، مكنتش عارفة اقرب ولا امشى وانا عارفة انى لو قربت هموت فيه
- هتسافر فين ؟
بصلى وسكت ، يالهوى ! تحت عيونه تعبان ليه كده ؟ انا مش بكرهه ، انا بكرهنى علشان تعبته
قعدت جمبه - لو ف لسه مساحة ف قلبك ، سامحنى بيها
- ..
- متسكتش ياأحمد ، يعنى انا راضية تشتمنى دلوقت او حتى تقولى امشى ، بص انت وحشتنى ، وحشتنى اوى  ، وحشتنى لدرجة واجعه قلبى  ، متسافرش 
- ..
- طب هتفضل ساكت ؟
- وحشنى صوتك
- هتسافر ؟
- هتسبينى ؟
سكت فاتكلم بسرعة - انا راضى نعيط سوا كل يوم ، راضى كمان تقوليلى ابعد كل شوية ، راضى والله بس متمشيش
- سبتنى اسيبك ليه ؟
- علشان مش قادر احدد اذا كنتى بتبعدينى كره فيا ولا خوف عليا
- علشان غبى
- بتحبينى ؟
قلبى دق ف ايده ، وكلمة أسماء بتتردد ف عقلى وهى بتقولى " سبيه يطير ، حرام تقصى جناحاته "
- انا عارف انك لو نطقتيها مش هتبعدى ، عارف إن لو قلبك نطقها هتمسكى ف قلبى ومش هتسبيه يموت كده تانى ، عارف كمان ان ..
- بحبك

" حتى قبل أن ألتقيك ، لم نكن أغراباً "

#أسميته_أحمد
#حنان_سعيد