أسميته أحمد 🍁

" 46 "

- وبيقولوا كمان الواد الحليوة جاي من بره.
رميت ضفيرتي ورايا - واد حليوة مين ؟
- انتي مش عارفة ! دا بنات الكفر كلهم مستنينه
- ياسلام ؟ وهو حليوة بجد ؟
- مش فاكراه ياحنان ؟ كنا بنلعب سوا واحنا صغيرين
- لأ مش فكراه، وبعدين عرفتوا منين انه حليوة وهو مسافر وهو صغير
- وطالما مش فكراه، افتكرتي انه مسافر وهو صغير ازاي ؟
- مش انتي اللي بتقولي كنا بنلعب سوا واحنا صغيرين، وانا مش فكراه، يبقى حتماً سافر وهو صغير
خلعت طرحتها - أيوة، وبيقولوا جاي كمان، وبيتكلم زي الخوجات
- أيوة أيوة، علشان كده بيقولوا حليوة، وهو الراجل يبقى حلو إلا لو لابس جلابية وبيتكلم زي ..
- أيوة بيبقى حلو عادي
- الله يهديكي، افتحي الكتاب خلينا نذاكر ونخلص.
من يوم ماعيني فتحت وأنا مبشوفش غير شكل رجالة واحد، لابس جلابية وهنا معتبرين الجلابية هيبتهم، وبيتكلم وهو ساند على عكاز بإيديه الاتنين، زي أبويا العمدة كده.
- من فضلك ألاقي فين الدوار القديم ؟
بصيت بسرعة الناحية التانية، فأسماء ردت وشاورتله، أمي بتقول ان البنت اللي عندها حياء متبصش لراجل وهو بيكلمها، وأنا يعني متنورة وعارفة انها ملهاش علاقة بالحياء بس معرفش بخاف ليه اتكلم مع حد.
اول مامشي أسماء خبطتني فبصتلها - الحقي لابس ايه ؟ دا لابس بنطلون !
- هو مين ده ؟
أنا وهي شهقنا واتكلمنا في نفس واحد - الواد الحليوة !
ياريتني ماكنت بصيت الناحية التانية، كنت عاوزة اشوفه أوي
- يلا ياأسماء نمشى
- ماتخلينا شوية
- لو اتأخرنا أ..
- عارفة عارفة، يلا نمشي.
لبسه مش حلو ولا حاجة، وبعدين قولنا مرة الراجل لازم يكون لابس جلابية تسند هيبته، ويكون بيتكلم زي الرجالة مش يقول من فضلك وكلام البنات ده.
- دا طلع حلو أوي
- لو أبويا العمدة سمعك هيقطع رقبتك
- دا ميتقالش عليه حلو، دا يتعشق
روحت قفلت الباب بسرعة - ايه الكلمة دي ؟ انتي عاوزة تودينا في داهية ؟
- ايه هو العشق حرام ولا حرام !
- ايوة طبعاً حرام، والكلمة دي مبيقولهاش غير البنات الوحشة
سندت على السرير - مبتشوفيهمش في التلفزيون بيقولوا لبعض ايه ؟
سرحت معاها - بيقولوا ايه ؟
- يالهوي، دا بيقرب منها اوي و..
خبطت بإيدي على قلبي - لو حد سمعنا هنتقتل احنا الاتنين
سكتت فسألتها بصوت واطي - بيقرب منها وايه تاني ؟
ضحكت - وبيقولها أنا حياتي نورت من أول ماشوفتك
ضفرت شعري وأنا سرحانة - وإيه تاني ؟
- وبيقولها بحبك كمان
قلبي دق أوي وحسيت نار خارجة من وشي - هو في حد بيقول الكلام ده بجد ؟
- ماانا بقولك مش حرام أبداً
- بس أنا عمري ماسمعت أبويا العمدة بيقول كده
بصت الناحية التانية بقرف - ياحبيبتي لو خرجنا من الكفر ده هنلاقي رجالة كده، مش زي أبوكي العمدة
اتعصبت - احترمي نفسك ياأسماء، دا سيد رجالة الكفر، ولو..
- براحة براحة متتعصبيش أنا قصدي ان رجالة الكفر كلهم مبيعرفوش يحبوا، أومال بنات الكفر بيحبوا الواد الحليوة ليه، علشان أكيد بيتكلم زي التلفزيون
وقفت وأنا متعصبة - طب قومي نذاكر ولو سمعتك بتتكلمي في الكلام اللي مفيهوش حياء ده والله لأقول ل ..
- لأبوكي العمدة، لأ وعلى ايه يلا نذاكر.
كلام ملهوش قيمة، أنا أبويا بيقول لأمي انه بيحبها في اهتمامه، في خوفه، في انها لما بتشتكي مني يزعقلي قدامها علشان ترضى وبعدين يراضيني بعد مابتمشى، هو عمره ماقالها كلمة من اللي أسماء بتقوله ده، بس بشوفه بيبصلها وهو بيبتسم، وكمان بيقولها انتي الخير والبركة، يعني بيحبها، مش الكلام اللي أسماء بتقوله وملهوش معنى ده.
تاني يوم صحيت على خبط الباب جامد، فصحيت مفزوعة، قومت فتحت لاقيتها أسماء
- انتي معندكيش بيت يابنتي !
قالت وهي بتحاول تاخد نفسها - الحقي الواد الحليوة عندكم تحت
- يالهوي بيعمل ايه ؟
- أبوكي هو اللي نداله، وعاوز يكلمه
حطيت طرحة على راسي بسرعة ووقفنا نبص من فوق، كان قاعد قصادنا بالظبط، لابس بنطلون وقميص أبيض فوقه، بس كان قاعد وكإنه مش خايف، دا حلو أوي بجد.
أول ماأبويا العمدة خرج وقفله وباس إيده، مكنتش سامعة بيقولوا ايه بس شوفته طبطب عليه وضحكله وأنا قلبي ضحك على ضحكة أبويا، قليل لما بيضحك لحد.
دخلت الأوضة تاني وسحبت أسماء غصب عنها - سبيني واقفة
- انتي مبتختشيش !
- شوفتيه حلو ازاي ؟
بصيت في الأرض علشان فعلا كان حلو أوي، بس برضو معندهوش هيبة زي رجالتنا هنا.
شوية والباب خبط وسمعت نحنحة أبويا بره
خبطت أسماء علشان تلبس طرحتها
فتحت بسرعة فابتسملي أول ماشافني - صباح الخير
بوست إيده - صباح النور
بعدت عن الباب علشان يدخل - ابن خالتك ستيرة كان عندنا دلوقت، متعلم بره ومتنور، وقولتله يبقى يجي يذاكرلك انتي وأسماء
حسيت وشي بيطلع نار - اللي تشوفه
- عاملين ايه في المذاكرة ؟
أسماء اتكلمت - بنذاكر كل يوم وكل ساعة، أنا بذاكر وأنا نايمة
ضحك - أما نشوف هتجيبي باللماضة دي ايه
وقف وبصلي - جاي بكرة العصر.
أول ماخرج أسماء وقفت وفضلت تقول كلام أهبل زيها، ماهو مينفعش الهزار يزيد ياحنان، حتى لو كنت غالية عندهم هنا، بس مش هيغفرولي لو حبيت.
لبست يومها أحلى فستان عندي، مش علشان حاجة، بس هو أكيد شاف بنات حلوين بره من اللي بيحطوا ألوان على وشهم علشان يسحروا الرجالة، ومكانش ينفع أطلع وحشة، ضفرت شعري وحطيت الطرحة عليه من غير مالفها، واستنيته تحت، عند أسماء رفضوا انها تيجي ورفضوا يكون ليها كلام مع الولد ده أصلا، خايفين يفسد عقلها، معرفش عقل ايه هي عندها عقل أصلا.
شوية وطل كيف البدر، وريحته وصلتلي قبل مايقرب مني، مد إيده وهو بيقولي - أنا أحمد
بصيت لإيده - مبنسلمش.
قعد - ولا أنا.
وطلع إسمه أحمد كمان ؟ البت أسماء بتقولي ان أبطال الأفلام اللي أسمهم أحمد بيقولوا كلام بيدوخ بس كلهم بيطلعوا خاينين، احنا أيوة الرجالة عندنا مبتعرفش تقول كلام حلو، بس الراجل اللي بيخون هنا كل الكفر بيقلب عليه، حتى الراجل اللي بيتجوز على مراته رغم انه شرع ربنا ومن حقه بس بيبقى نكتة وكله بيتريق عليه.
- قوليلي بقى إسمك إيه ؟
- وهتعمل إيه بإسمي !
- أومال اناديلك بإيه ؟
- وتناديلي ليه !
ضحك - يعني أروح بيتنا ؟.
أول مرة أبويا العمدة يعمل حاجة وتطلع غلط، مكانش يصح يجيبه هنا، ماهو شافه وعارف إنه قمر منور، وعارف اني صبية ومش قوية إني اثبت قصاد ضحكة جدع زيه.
- ودي حاجة لما تدخلي الكلية بإذن الله هتاخديها في مادة إسمها فيسيولوجي، و..
ضحكت - إسمها إيه ؟
فضل باصصلي شوية ومتكلمش
سألته - في إيه ؟
- في فراشات بتطير من ضحكتك.
معرفش بصتله قد ايه، معرفش ازاي اتجرأت ورفعت عيني أصلا، بس بيقولوا النور بيلفت وخصوصاً لو جه بعد ضلمة سنين، عيونه حلوة زي طلة أمي كل صبحية تصحيني، وضحكة تدوخ وتخوف وتخطف، طب ويقولوا ايه ؟ يقولوا جدع يشبه أبطال السيما جه يخطف قلب الصبية ! 
فوقت على صوت أمي وهي بتقدمله حاجة يشربها، النص ساعة اللي قعدها بعد كده كان بيحكيلي عن كليته وبعدين مشي، دا أكيد خالة ستيرة بتبخره كل يوم الصبح، وكمان تلاقيها بتفاخر بيه قدام الناس، وليهم حق البنات كل واحدة ترسم حلم بيه.
بقى يجي كل يوم تقريباً، وكل مرة قبل ماأنزل بحلف على نفسي إني اركز بس غصب عني بتوه في صوته
- حلو الفستان ده عليكي
يا كنت هرتبك وابص في الأرض، يا كنت هشتمه علشان لسانه طول، وفي الحالتين كنت هبقى رخمة جدا
بصتله - شكراً، وانت شكلك مش حلو في اللبس ده
بص للبسه وبعدين سألني - ماله لبسي !
- مش لايق على الرجالة
- يعني إيه ؟
- يعني اللي أعرفه الراجل بيلبس جلابية
- وآجي بعكاز المرة الجاية !
كان بيتريق عليا شكله - لأ متجيش لا بجلابية ولا بعكاز، مش هيليقوا عليك أصلاً.
تاني يوم لاقيته لابس جلابية، وتقريباً كنت بجيب وجع القلب لنفسي وأنا بقوله بطريقة غير مباشرة يلبس كده، كان بيبصلي بإنتصار علشان زي الغبية فضلت متنحة لحلاوته
- بتبصيلي كده ليه ؟
- مفيش شكلك وحش جداً
ضحك - ماهو باين على ملامحك ان شكلي وحش
ارتبكت - باين ايه ؟ باين على ملامحي إيه ؟
- أقولك بجد ؟
- لأ متقولش مش عاوزة أعرف حاجة
- طب قوليلي شكلي مش حلو بجد ؟
فكرت شوية وبعدين هزيت راسي لأ
اتكلم - لأ قوليها
- شكلك مش وحش
- أيوة يعني شكلي حلو
هزيت راسي برضو، فقالي بسرعة - هو عيب تقوليلي شكلك حلو جدا في اللبس ده وأنا حبيتك فيه !
شهقت - طبعاً عيب، ولو حد سمعني هيقطع رقبتي كمان
اتكلم بهدوء وكإنه مش واخد باله من خضتي - لأ مش عيب ومش غلط
- أنا مبحبش الكلام ده ومبحبش الكلام في الكلام ده ومبحبش أسمع الكلام ده والكلام ده أصلا ميصحش يتقال
- دا كلام ايه ده ؟
خطفت الكلمة بسرعة علشان ميسمعهاش - الحب والكلام ده
ضحك، قال يعني كنت ناقصة خضة علشان يخضني بضحكته أكتر
- الحب أحلى حاجة ربنا خلقها، مينفعش يتقال عنه انه عيب وميصحش، قلوبنا اتخلقت علشان تحب
- دا انت زي مابيقولوا عنك بقى
- وبيقولوا إيه عني بقى ؟
- بيقولوا إنك علشان اتعلمت بره، بتعرف تقول كلام من اللي بيدوخ ده
- انتي دوختي ؟
- لأ طبعاً
- شوفتي ؟ علشان تعرفي اني مش زي مابيقولوا.
بس أنا دوخت ووقعت ومحدش سمى عليا والله، ماأنا لازم أقولهم انه ميجيش تاني، أنا كده هروح في داهية.
- وبيقولوا ايه ياأسماء تاني ؟
- انتي تيجي عندنا وتشوفي فيلم من اللي بشوفهم، يالهوي لو شوفتي البطلة والبطل بيمسك ايدها وشها بيكون عامل ازاي
- وبيسبوكي تشوفي أفلام من دي عادي !
- بشوفها من وراهم ياأختي
- وبعد مابيمسك ايدها ؟
- انتي مالك اليومين دول ؟
لعبت في ضفيرتي - مش عارفة ياأسماء، شكلي هودي نفسي في داهية
- أهوه انتي الوحيدة اللي متوقعتش انها تحب الواد الحليوة ده
- استني دا مين قال اني بحبه ! لو قلتي كده تاني هتيجي بزعل ومش هقولك على اي حاجة تاني.
اتضايقت اوي انها جمعتني مع البنات اللي ملهمش عقل دول، انا مينفعش اتجمع مع حد، بس صح انا كده زيي زيهم، لأ انا مش زي حد، ومينفعش أكون زي حد.
- ذاكرتي امبارح ؟
- أيوة
- أسأل يعني ولا أشرح حاجة تانية ؟
- اشرح حاجة تانية
- يبقى مذاكرتيش
قولت وانا متعصبة - قولت اني ذاكرت، مش ههزر معاك أنا
تقريباً اتصدم من اسلوبي فسكت ومردش، اتكلمت - أنا آسفة، أنا بس متضايقة شوية
- ولا يهمك، ومتضايقة ليه ؟
- خليك في أمورك انت
سند بإيده قدامه - وإيه هي أموري اللي أخليني فيها ؟ عامة أنا عارف انتي متضايقة ليه ؟
- عارف إيه ؟
- ماهو أسباب الزعل بتبان، ولولا انك عاقلة كنت هقول انك بتحبي.
اتعصبت - ليه شايفني زي البنات اللي ملهمش عقل وبيحبوك دول ولا ايه !
- بس أنا مقولتش إنك بتحبيني.
- ومتقدرش تقول، أنا أيوة عاقلة ومبفكرش في الحاجات دي
- هو اللي بيفكر في الحاجات دي بيبقى أهبل ؟
- طبعاً، وخصوصاً لو مبيحسبهاش، يعني بنات الكفر اللي بيفكروا فيك دول مش عارفين انك كل يوم بتشوف بنات من اللي بيحطوا ألوان على وشهم، هتبصلهم هما بتاع ايه !
معرفش دمي كان محروق كده ليه وأنا بتكلم، دا أنا عمري ماشوفت بنت أحلى مني، بقارن نفسي ببنات مصر ليه !
- يمكن أشوف هنا اللي مش موجود هناك، ألاقي نور خارج من روحها فينورها من بره، وش جماله في ضحكته مش في الألوان اللي بتتحط، البنات هنا بتعرف امتى تكون رجالة ياحنان، وأنا عاوز واحدة بتعرف تسند، مش بتعرف تتجمل، فهمتي ؟.
- أنا.. مكانش قصدي.. قصدي اني.. و..
- في رعشة بتحصل في قلبك غصب عنك، ممكن تحصل لما تشوفي وزير، أو تحصل لما تشوفي واحد بيشتغل عندك، قلبك مش بإرادتك، مش بمزاجه يدق للحلو ولا يدق للوحش حتى، شخص بيجي من السما علشانك انتي، فلازم قلبك يدقله
- يعني إيه ؟
- يعني لو تكرمتي وبطلتي عصبية وصارحتيني، هكلم أبويا العمدة
- تكلمه في إيه ؟
- في إن قلبي دق لبنته
- انت قليل الأدب ومعندكش حيا كمان
- لأ ماهو مش معنى اني خرجت بره اني هتساهل وهسمح للي هتبقى مراتي انها تشتمني يعني، دا أنا اجيبك من شعرك
وقفت - دا أنا أبويا العمدة عمره ماعملها، هتيجي انت وتهددني !.
جه دوري أنا اني أبخره واني أفاخر بيه، واني أحطه في قلبي علشان مفيش بنت تشوفه غيري، واللي تفكر بس انها تفكر فيه هقتلها.
- قولتيلي بقى هتعملي ايه لو جبتك من شعرك ؟
- مش هعمل حاجة
- شاطرة، البنت الشاطرة، مبتعليش صوتها على جوزها، مبتعملش ايه ؟
- مبتعليش صوتها
- على جوزها، كملي الجملة.
بصيتله، شوية وسألني - شعرك طويل الأول ولا لأ ؟
- إيه ؟
ضحك - علشان أعرف أشدك منه والله، مقصدش
وقف ورايا - يالهوي ! انتي مضفراه ! في واحدة بتضفر شعرها يوم فرحها !
ضحكت وبصيتله - شرف البنت عندنا في ضفيرتها.
- طب أقعدي ياستي نفك اللي انتي مهبباه ده.
- مهبباه ! لأ بقولك ايه ؟ دا أنا زينة صبايا الكفر، ولو فاكر يعني علشان انت حلو شويتين تلاتة انك هتتريق عليا واسكتلك تبقى غلطان
- علشان أنا إيه ؟
- حلو شويتين تلاتة
- حلو إزاي ؟
كان باصصلي وبيبتسم فهديت غصب عني - ضحكتك بتودي القلب وبتجيبه، عنيك عالم لوحدها، وأنا يعني من يوم ماأتولدت وأنا فاكرة الدنيا في حضن أبويا وضحكة أمي، طلع في عالم تاني معرفهوش ومسمعتش عني وآديني عايشة فيه، افهم بس إن صبية زيي مبتتهزش غير للقوي.
إبتسم وبعدين رفع حاجبه بسرعة ومسكني من شعري - بتعلي صوتها برضو، لسه قايلك من شوية البنت الشاطرة بتعمل إيه ؟.
- مبتعليش صوتها.
- كملي.
- على جوزها، مبتعليش صوتها على جوزها.

" حتى قبل أن التقيك، لم نكن أغراباً "

#أسميته_أحمد
#حنان_سعيد