# بسم الله الرحمن الرحيم
# استغفروا الله
# لا تلهاكم القراءة عن الصلاه
《 عثرات الحياه ليست ضدك، بل هي لأجلك لتعي ما هي الحياه، لتفهم مواقف لم تكن تفهمها، لترى أشياء لم تكن تراها 》...☘
"الصمت الباكي"
.."الفصل السادس عشر"..
ظلت تشق الأرض ذهابًا وإيابًا وداخلها يرتعش من الخوف، فقد أدركت أنه سيتم القضاء عليها لا محاله وهذه المره ليست كسابقيها، فقد صكت والدته على فرمان عذابها وجحيمها...
لن يرحمها هذه المره؛ وقد يأس عقلها لإيجاد خطه للهروب منه ولم تجد حل أسلم من مواجهته
لكن السؤال الأهم ...
كيف ستواجهه بلسانها العاجز هذا..؟!
انفتح باب الغرفه بقوه أفزعتها... فهو لا يكون بصالح إذا تركها أكثر من هذا..
ليُشرف عليها بجسده وقد اجتمعت شرور العالم داخل عينيه وعروق رقبته تنفر من الغضب بسسب الدماء التي تغلي بداخلها ...
منظره هذا كفيل ببث الرعب بداخلها وإنهائها..
ظلت تتراجع للخلف وتهز رأسها ب"لا" بهستريه وقد أخذت الدموع مجراها ..
لتشير إليه بيدها وتضغط على صدرها وتهمهم بكلمات غير مفهومه ..
ليتحدث بلهجه يملؤها الغضب: أعمل فيكي أيه دلوقتي؟ .. كان عندي أمل إن أمي تنكر إن إنتي إللي عملتي كدا ... لكن دلوقتي معدتش لاقي ليكي حجه تنقذك من بين إيديا ..
لترد عليه هي بالمقابل بهز رأسها وهمهماتها المُعجمه، فلا تملك شيء غير هذا ...
لكن ما جعل قلبه يقع صريعًا وينشطر من الحزن....
حينما إنزوت بزاوية الغرفه وتكومت على نفسها ووضعت يديها على وجهها تاره وعلى أذنيها تارة أخرى برعب جام... فقد جعلها مريضه بالخوف
ليأتي بمخيلتها فورًا الظلام الدامس التي وُضِعت به وخُيلَ إليها أنه سيأخذها ليتركها بالظلام إلى أن تبرح روحها من جسدها
هي لا تخاف من الأذى الجسدي بقدر رُعبها وزعرها من الظلام
تتمنى أن لو يوجد بجانبها أحد يُطمئنها ويأخذها بداخل أحضانه ويا حبذا لو كان والدها الحبيب، فمن بعده لا أحد ..
لو كان متواجد لما سمح بحدوث هذا كله، لكن هذا الوحش الكاسر الذي أمامها سيرسلها إلى والدها، ولم يستطع عقلها تصوير ما سيفعله بها ..
لكن ما حدث بعد هذا جعل الموازين تنقلب رأسًا على عقب وجعلها في حالة صدمه أشد لا تستطيع إستيعاب ما يحدث...!
فقد جذبها صالح داخل أحضانه ليحتضنها بقوه وحمايه، ظلت متجمده لكنها لم تنظر كثيرًا ورفعت زراعيها لتشتد بهما عليه لتحتضنه بقوه وتغرق بين أحضانه باكيه بشده، فلا مفر منه إلا إليه، لتحتمي منه به...
ليظل يربت على ظهرها ويمسد على رأسها بحنان لا يعلم من أين تفجر..! ولا يعلم سببه
فهو لم يستطع رؤيتها بهذا الضعف ابدًا، وهمهماتها التي وقعت على قلبه لتذبحه وتكشف له حقيقه كان عقله يُخبره بها دائمًا لكنه كان يُغلق أسماعه، فهذه الفتاه ليست إلا فتاه ضعيفه لا تستطيع فعل شيء
أوقعها حظها العاثر معه بطريقة ما، فمن المستحيل أن يُخدع ببرائتها ... ومن المستحيل أن تتصنع كم البراءه هذه ... فلا أحد يستطيع أن يُتقن هذا الدور بهذه البراعه..
حاول إخراج صوته جامدًا حاد لكن رغمًا عنه خرج حانيًا: إهدي... مفيش حاجه هتحصل، متخافيش أنا مش هعمل فيكي حاجه
ثم حاول إبعادها لرؤية وجهها لكنها فجرت صدمته وقضت على الباقي من عقله عندما ظلت متمسكه به بقوه متشبثه تأبى الإبتعاد..
تشبُثها به بهذه الطريقه جعله يرمي بتنبيهات عقله عرض الحائط ويجذبها إليه بقوه ليضع يدًا أسفل قدميها وأخرى أسفل ظهرها ويحملها برفق ليسير بها نحو الفراش ويضعها برفق عليه
لتتمسك بيده ظنًا منها أنه سيتركها..
نظر إليها بحنان ويقول: متخافيش مش همشي أنا معاكي..
ثم جذب غطاء ووضعه فوقها وتسطح هو الأخر بجانبها وهي بين أحضانه وظل يمسد على زراعها لتنعمس سريعًا بنوم عميق بعد فتره وجيزه
بينما هو ظل يفترس ملامحها عن كسب ويتأملها عن قُرب..
حتى ذهب بنوم عميق هو الأخر تاركًا الجميع وراء ظهره وليحدث ما يحدث...
•°•°•°•°•°•°•°•°•°•°•°•°•°
يجلس بعقل شارد يتذكر ما حدث بالتفصيل الممل، يحاول إستنتاج أي طرف خيط يوصله لأي شيء .. لكن بدون فائده
ف"فؤاد" كان حذر جدًا بحديثه معه ولم يُخطئ بالحديث ابدًا
لكن توتره وأمارات وجهه جعلته يجزم أن ورائه أمر ما
يُخبئه ولايريده أن يصل إليه ...
لكن صبرًا فلن أكون "مؤمن الصياد" إن لم أصل لهذا الأمر ... ولن أعجز ابدًا
انتبه لرنين هاتفه ليجيب على الفور ..
ويكون الحوار كالتالي.......
_ ايواا يا مؤمن .. مطمنتنيش ليه على إللي حصل معاك
_ أجاب مؤمن بضيق: لأن مفيش حاجه حصلت ومعرفتش أوصل لحاجه
_ يعني هو قالك أيه .. مفيش أي معلومه مفيده
_ لا... قال إن ميعرفش ألا إن أسمه النمر، وشايف إللي كان بيحصل عادي وإن النمر طول عمره كدا بيحب يساعد
_ تسائل الطرف الأخر: طب وبعدين هنعمل أيه
_ أنا متأكد إن وراه حاجه مخبيها
_ وأيه إللي خلاك تتأكد كدا
ليبدأ مؤمن بسرد ما حدث له بالتفصيل
_ تحدث الطرف الأخر بعد إنتهائه: أيوااا فى أمر مريب فى الموضوع ده ... هو زي ما يكون كان عارف إنك هتروحله ومجهز لكل حاجه ..
_ صدقني هوصل لكل حاجه عن قريب .. متقلقش..
_ إنشاء الله...... تغير مجرى حديثهم وتحدث الطرف الأخر قائلًا: بس زي ما أنت اتوقعت محمد الخطيب "الفارس" نزل مصر كعب داير، وجاي مفلس ومعتمد على العمليه إللي هتم في مصر
_ مؤمن: أنا كنت عارف إن دا هيحصل .. هو كان مفكر اما يفتتح شركات جديده ويشهر نفسه بالفارس ومينزلش مصر عشرين سنه إن هو كدا بقى شخصيه تانيه ومعدش حد هيعرفه... أما نشوف هيعمل أيه
_ طب البنت إللي عندك دي تبقى بنته... ناوي معاها على أيه
_ تحدث بهدوء وغموض: كل خير....
_ أنا مش مطمنلك والله ... بس مش قادر أقولك الست إللي اسمها بتول قامت بالواجب وزياده وفهمت الدنيا كلها إن هي ماتت منتحره، وغير كدا مش فارق مع أمها وأبوها ولا في بالهم أصلًا، يعني البنت دي كارت محروق مش هتفدنا بحاجه..
_ اصبر عليا وشوف هتفدنا ولا لا، وبالمناسبه الكميه كلها جاهزه و العمليه في ميعادها..
_ أنا هعمل اللازم متقلقش ..
ثم أكمل حديثه بسخريه تحمل المرح: هبعد عنك عيون ليث وأعوانه
_ لم يكن رد مؤمن سوى إبتسامه ماكرة واتبعها بحديثه: يعني مش هنلجأ لإستخدام الدكتور سليم
_ ابتسم الطرف الأخر وتحدث بمرح: لا متقلقش، بس احنا لازم نتقابل فى أقرب فرصه علشان نظبط أمورنا
_ مؤمن: خلاص نتقابل مفيش مشاكل
_ ليك واحشه يا راجل والله، كفايه لعبة القط والفار دي
_ رفع مؤمن حاجبه بدهشه: يا راجل
_ ااه يا راجل
_ طب يلا سلام علشان صدعتيني
_ خلاص هقفل .. هترش مايه...
ثم أغلق كلاهما وارتفع صوت مؤمن مناديًا على السكرتير الخاص بمكتبه
: أمرك يا باشا..
مؤمن: ورق الصفقه جاهز
السكرتير: ايواا يا باشا والعقود جاهزه كمان، وجهزت المقابله مع العملاء برا
مؤمن: تمام... صالح باشا هو إللي هيروح المقابله
أخفض الآخر رأسه بأسف: للأسف يا باشمهندس مقدرتش أوصل للمهندس صالح .. موبايله مغلق وهو معندوش خبر بالميعاد ..
أدار رأسه بغضب ثم تحدث: أيه التهريج ولعب العيال ده ... ازاي مش عارف توصله
السكرتير: هو مختفي من امبارح يا باشا وقافل تليفونه.
تنفس بهدوء: خلاص جهز العقود وادي خبر للمحامي والفريق وأنا إللي هكون معاهم
نظر له بدهشه: حضرتك إنت إللي هتروح ... إزاي يعني
تنفس مؤمن بنفاذ صبر: هو أيه إللي إزاي يا بني .. زي الناس أيه إللي فيها
السكرتير: أنا أسف حضرتك ... أنا بس استغربت لأن حضرتك مش بتطلع المقابلات دي
مؤمن: وقولت هطلع .. فيها مشكله
: أبدًا يا باشا
•°•°•°•°•°•°•°•°•°•°•°•°•°
بعد معاناه وصلت للمطعم تجر أزيالها بخيبه وإحباط، فقد فشلت في البحث عن أسوه ولا تستطيع تصديق ما حدث..
ولجت لداخل المطبخ لتبدأ بعملها... لكنها بحثت عن روز أولًا عَلها تروي لها ما حدث فهي ترتاح بالحديث معها كثيرًا وقد توطأت علاقتهم بطريقه سريعه
شعرت بإحباط عندما لم تجدها في الوسط
لتسأل إحدى الزميلات ...
ليلى: لو سمحتي .. هي الشيف روز فين، أنا بدور عليها مش لقياها ..
: للأسف الشيف روز حصل عندها أمر طارئ وسابت الشغل .. حتى مأخدتش الأدوات بتاعتها ...
حزنت ليلى كثيرًا لهذا الخبر، فقد أصبحوا أصدقاء، وليس لديها أي معلومه لتوصلها بها مرة أخرى..
فيبدوا أن كُتب عليها فراق أحبائها...
لكنها تلتمس العذر ل "روز" فقد علمت قصتها وليكن الله بعونها أيضًا...
وحتمًا ستلتقي بها مره أخرى إن قدر الله ذالك ..
: ربنا يعينك ويقويكي يا روز ويوفقك في حياتك ..
انتبهت لنداء المسئوله عن المطبخ...
: انتبهوا يا بنات... النهارده على الساعه سابعه في مقابلة عمل هنا، وطبعًا مش أي حد.. دي أكبر الشركات وعايزه كل حاجه تكون على أتم وجه .. نضافة المكان والأدوات..
والشيفات يكونوا منتبهين على جودة الطعام إللي هنقدمه.... يعني من الأخر مش عايزه غلطه...
وليكم مكافئه زياده على راتبكم ... ويلا الكل يشوف شغله ...
سعدت ليلى كثيرًا من أجل الزياده على راتبها فهذا سيساعدها على دفع إيجار منزلها وتيسير أمورها ...
وتهُم بعملها بنشاط وإتقان لئلا يحدث أي تقصير أو أخطاء..
•°•°•°•°•°•°•°•°•°•°•°•°•°
بعد حديثها معه ذهبت مسرعه للخارج لتأخذ أنفاسها وكأنها لم تكن تتنفس فقد كانت تحبس أنفاسها طوال فترة حديثها معه..
:ليه دا كله..
صرخت بفزع عندما سمعت صوت من ورائها: عااا.. سلاٌم قولًا من رب رحيم..
: ليه شوفتي عفريت يا أختي..
وضعت يدها على قلبها وتنفست براحه ..
صفيه: حرام عليكي يا أسوه .... خضتيني
رفعت كتفيها بإستغراب: خضيتك...! يا بنتي أنا قاعده هنا من ساعتها بس إنتي حالتك إللي غريبه وجايه تجري كدا ... حد بيجري وراكي ولا أيه
تحدثت بتوتر تحاول تجميع حروفها: لا ... لا هيكون في أيه .. مفيش أي حاجه أنا كويسه خالص
أشارت أسوه لها: تعالي اقعدي متقفيش كدا
إنصاعت لها على الفور وجلست بجانبها تفرق يديها بتوتر ..
رفعت أسوه حاجبيها بإستغراب لحالتها..
ف "صفيه" دائمًا هادئه، لكن حالتها تلك مثيره للدهشه حقًا...
قررت مشاكستها: أمال خدودك حمرا كدا ليه يا صفصف..!
وضعت كفها على وجنتيها بشكل تلقائي: لا أبدًا... هتلاقيها من حرارة المطبخ
ثم نظرت لأسوه فوجدها تكتم ضحكتها ..
لتتحدث بنزق: أوووف بقى ... عايزه أيه يا ست أسوه، بتبصلي كدا ليه ... وكاتمه الضحكه أوي ..
انفجرت أسوه ضاحكه: لا بصراحه مش قادره... أنا مش مصدقه... دي صفيه الصامته
يا ترى قلبت الحال دي سببها مين..؟
نطقت بتعجب: صفيه الصامته..!!
أسوه: أيواا، أنا ملقباكي ب"صفيه الصامته" علشان كلامك قليل ..
:براحتك خالص يا أسوه الغامضه
أسوه: ليه يا بنتي.. لا غموض ولا حاجه
صفيه: لا إنتي دايمًا غامضه ... وبحس دايمًا إن في حاجات كتير مخبياها
صمتت أسوه بُرهة تتأمل تلك الحديقه والزهور الأكثر من رائعه كأنها قطعه من الجنه..
ليخرج صوتها متسائله: إنتي عمرك ما اشتقتي تخرجي من هنا يا صفيه..؟
تنهدت الأخرى بحنين وامتلئت عينيها بالشوق:
تعرفي يا أسوه أنا مش بشتاق ألا لواحده بس وهي إللي تفرق معايا في الدنيا دي كلها ..
نظرت لها أسوه بفضول وإصغاء جيدًا كأنها ستُخبرها عن سر دوله، فهذه المره الأولى التي تخرج بها صفيه من قوقعة صمتها .. ربما لا تتكرر .
لتسألها بفضول عارم: ومين هي؟!..
لتبدأ تقص عليها بحنين: لما كنت في الملجأ وعمري خمس سنين هي جات وكانت لسه حديثة ولاده، حبيتها أول ما عيني وقعت عليها، .. وبعد كدا أنا إللي ربيتها وكنت مسئوله عنها وكنت كمان بمثابة الأم والأخت ليها وكل حاجه .. وهي اتعلقت بيا جامد .. لغاية أنا ما تميت التمنتاشر وجه وقت خروجي .. متعرفيش كان صعب عليا قد أيه .. حاولت كتير اخدها معايا بس مينفعش لازم هي تتم التمنتاشر علشان تقدر تخرج
قولتلها إني هفضل ازورها كل يوم في الخمس سنين إللي هتقعودهم لسه في الملجأ وخلال الخمس سنين دول أنا هشتغل وأعمل بيت علشان نقعد سوا ونفضل مع بعض بعد ما هي تخرج عشان أقدر أوفرلها الراحه التامه علشان تقدر تدخل جامعه ..
ثم صمتت وقد انحدرت تلك الماسات من مقلتيها السوداء الكاحله..
لتأخذها أسوه بداخل أحضانها على الفور كدعم صغير منها ..
وتُكمل صفيه: بس عرفت قد أيه دا صعب، والعالم الخارجي براا الملجأ قد أيه صعب ..
وقعدت فتره متشرده في الشوارع مش عارفه أروح فين ولا أجي منين .. والناس معندهاش رحمه..
لغايه ما قبلت مؤمن باشا بالصدفه وعرض عليا الشغل بشرط إني مخرجش خالص من القصر .. وأنا مكانش قدامي ألا حل وخيار واحد وهو إني أوافق عليه وإلا كلاب السكك هتنهش لحمي
وقولت هيجي يوم أدور عليها وأقبلها..
مكانش بإيدي خلال الخمس سنين ألا إني أدعلها بالستر والحفظ بقلب أم ...
ممكن تستغربي من حبي ليها ..لأنك مجربتيش عيشة الملجأ وإنك تكوني مقطوعه ملكيش لا سند ولا ضهر
فهي كانت المأوي بتاعي وأنا كنت مأواها
في هذه اللحظات كانت تود أسوه أن تصيح قائله
وأنا مثلك تمامًا لم أجد المأوي ولا السند...
لا أختلف عنكي أبدًا .. فأنا مثلك تمامًا بإختلاف القصه....
لكنها أكتفت بجمله واحده مواسيه: بجد يا بختها بيكي... وأكيد كل واحد هيقابل التاني عند خط النهايه .. وفي نقطه مشتركه هتجمع الكل .. متقلقيش..
•°•°•°•°•°•°•°•°•°•°•°
بداخل هذا السرح.... كانت الترتيبات على قدم وساق، الجميع يقدمون أفضل ما لديهم ..
فليس أي أحد هنا ..
إنما الصياد بذات نفسه وهذه المره الأولى التي يزور بها المطاعم ويظهر في الأرجاء ..
وهذا وسام شرف لهم بإختيارهم هم ..
وبهذه الجِلسه وبعد التهاني والمبادرات والسلام فيما بينهم ..
أول من تطرق للحديث المحامي الخاص بإمبراطوريه الصياد قائلًا: سيادتكم اتطلعته على البنود والشروط إللي في العقد وعرفتوا تفاصيل الإتفاقيه
رد المحامي الخاص بالشركة الأخرى: مع إن الشروط كلها بتصب في مصلحة شركتكم بس شرف لنا التعاقد معاكم وإحنا موافقين على شروطكم..
شرف كبير لنا يا مؤمن باشا .. وحضورك معانا وإنك شرفتنا بنفسك دا ليه معاني كتيره بالنسبة لنا
عقب على حديثه بنبره بارده خاليه من المشاعر: تمام.. يبقى نمضي العقود..
وبالفعل تم إمضاء العقود.. وإنتهى الشق الخاص بالعمل .. أما الباقي فلا يخصه فجو الإحتفال هذا والمحبه الزائفه والمجالات الكاذبه لا تحصه أبدًا..
ليستأذنهم بلباقه نادره الحدوث: عن إذنكم هخرج براا اشم هوا
: اتفضل يا باشا.. إذنك معاك
بينما هي بعد إنتهاء مهامها ظلت منتظره إنتهاء ضيوف المكان من الإنتهاء والإنصراف لتُكمل عملها وتنظف المكان ..
استغلت الفرصه لتخرج إلي الجزء الخلفي للمطعم والذي يُعَد مكان للأستجمام.. مليء بالزهور وأشجار الزينه الخضراء فالمكان بمثابة بستان صغير مليء بالإضائه الملونه الجميله التي تخطف العقول..
لكنها لم تنتبه أن بالمكان أحد أخر ..
ألتفت ونظرت بأرجاء المكان ليلفت إنتباهها هذا الواقف الذي لا يظهر منه إلا نصف وجهه والتي يحمل ملامح تألفها كثيرًا، تشعر بأنها رأتها من قبل..
وما أثار إستغرابها... قلبها الذي بدأ يتمرد عليها بالدقات المتسارعه النافره..
لتقترب منه أكثر لمعرفة هويته...
أما عنه فقد شعر أن هناك أنظار مسلطه عليه وتحت مراقبة أحٌد ما ...
إلتفت على الفور لتكون الصدمه للمره الثانية من نصيبه والمره الأولى من نصيبها.. وتنطلق ألسنتهما بنفس الكلمه بذات الوقت....
:إنت ....
:إنتي .....
يُتبع....
وما زال للحكايه بقيه...
يا ترى أيه إللي هيحصل في مقابلة مؤمن وليلى؟؟
ومين الشخص إللي مؤمن بيكلمه دايمًا وهيقابله؟؟ هيكون مفاجئه ليكم..؟؟
ودا كله هنعرفه البارت الجاي يوم السبت..إن شاء الله..
بقلمي/ ساره نيل
ملكة السروررر
.. أنا منزلتش الفصل إمبارح لأن التفاعل علي الروايه مزعلني جدًا ..
وفي بعض الصديقات اقترحت عليا أوقف نزول الروايه وأنزل بالروايه التانيه
بس زى ما قولت قبل كدا لو قاريء واحد بس هنزلها..
شوفوا أنا بقدركم إزاي بس للأسف محدش بيقدرني خالص 😥
دومتم سالمين..