الصمت الباكي

الفصل الرابع عشر

# بسم الله الرحمن الرحيم
# استغفروا الله
# لا تلهاكم القراءة عن الصلاه

●● إن الله لا يخذل عبدًا بكى، عبدًا شكى، عبدًا حنى رأسه ثم دعى ●●

....ضفية شرف البارت::: روز .....

الكل هيستغرب مين روز؟
=روز بقى هي بطلة الروايه إللي بعد القادمه إنشاء الله وهتظهر في موقف هنا مع الصمت الباكي
بصراحه أنا متحمسة جدًا للي جاي وجتلي فكرة ضيفة الشرف دي فقولت أنفذها فورًا ..
وهتحبوا شخصيه روز جدًا ...

وطبعًا مش هقول اسم الروايه 😉

"رواية الصمت الباكي"

"الفصل الرابع عشر"

..... بصباح يوم جديد أشرقت شمسه لتنشر أثوابها الذهبيه مُحدثه إزعاج للنائمون

استيقظت بنشاط وطاقة نادرة الحدوث، فماذا تريد بعد الآن مع وجود "يزيد" بجانبها
فالأمس لم تصدق نفسها عندما اخبرها بإمكانها أخذ "يزيد" معها للقصر ..
ولم يقل سوى ورحل على الفور، وكم أنبها ضميرها لقذف هذه الحجارة من فمها
فقد عامل "يزيد" برقه لم تصدقها عندما حكى لها ما حدث
فكم كانت مُخطئه بحقه
لكن هذا لا ينفي أنه ليس له الحق على حبسها هكذا وإجبارها لصنع هذا السُم.
وسوف تظل تجاهد وتحاربه ما دامت الروح تدب بجسدها...

: ماما أسوة
التفت بإبتسامة عريضة: صباح الخير يا عيوني
يزيد: صباح النور يا ماما
أخذت ترتب الأغراض والملابس: يلا بقى قوم علشان تاخد دش وتلبس ونفطر فطار جميل
تسآئل يزيد بتحمس: هو إحنا هنفضل هنا مع عمو مؤمن عالطول
تنهدت بتعب: لا يا يزيد؛ أنا عندي شغل هنا وهخلص ونمشي
دبدب أرجلة بأرض الغرفه: ليه نمشي، أنا عايز أفضل هنا مع عمو مؤمن
نفخت بنزق ثم تمتمت: عمو مؤمن...عمو مؤمن، هو عملك أيه مش فاهمه
ثم تابعت بصوت مرتفع: يلا يا زيدو علشان تلبس هدومك

وبعد ما يقارب النصف ساعة
كانت انتهت من كل شئ وأتى وقت المواجهه، فسوف تكثُر الأسئله حول يزيد

بداخل القصر
: صباح الخير
التفتوا إليها جميعًا
لتردف صفيه: صباح النور؛ أيه الإختفاء الطويل دا يا ويسو
همت سلوى للتحدث لكنها توقفت عندما لاحظت يزيد
نظرت بإستغراب لأسوة ثم تسائلت: مين دا يا أسوة؟

بينما تُسرع إليه صفيه مبتسمة: إنت مين يا حلو

تعلقت أنظار الجميع بها بترقب
لتسرع بإلقاء جملتها التى بسببها سيُغيرون وجهة نظرهم بها.. لكنها تحلت بالشجاعة
:دا يزيد .... ثم صمتت ... إبني
فور سماعهم لهذا، رفعت سلوى أنظارها بدهشة: إبنك!

تسائلت صفيه بالسؤال المعتاد لهذا الموقف: إنتي متجوزة؟
ابتلعت ريقها بتوتر وأجابت بالكلمة الفاصله: لا....

لينشر الصمت أثوابة بأنحاء المكان ويحتلها، لتتلقى نظرة من الجميع أصابتها بمقتل..
وتوارى الجميع عنها سريعًا كأنها فيروس معدي
نظر إليها "يزيد" ليقول ببرائه: هما مشيوا ليه يا ماما، هما مش بيحبوني
نزلت لمستواه واحتضنته: لا يا حبيبى طبعًا بيحبوك، وبعدين كفايه أنا بحبك ولا أيه
ليلتفت حوله ثم يقول: هو عمو مؤمن فين؟..؛ مش هوا هنا ودا بيته
لترد عليه بضيق مصطنع: هو أنا كل ما أكلمك يا زيدو تقولي عمو مؤمن، أنا مش ماليه عينك يعني

يزيد: أنا بحبه يا ماما، ومتزعليش .. بحبك إنتي كمان
لتتحدث بجديه: نقول الكلام الجد بقى؛ أنا دلوقتي هبدأ شغلي، وانت هتقعد هنا تفطر وتشرب اللبن وأنا كل شويه هاجي اشوفك وو...
وكادت تنهي حديثها لكن صراخه بأسمه جعلها تتوقف مُرغمه وداخلها سينفجر من الغضب
يزيد: عمو مؤمن..... عمو مؤمن

كان قد وصل إلى الردهه الواسعه للقصر ليتوقف عند سماعه نداء بأسمه..
ويستدير له..
ليأتي الأخر له ويحتضنه على حين غرة: عمو مؤمن، أنا بقالي كتير بسأل عليك

بينما هو فقد تفاجئ من فعلت الطفل، وقف مشدوهًا لا يعلم كيف يتصرف بحب ومودة، ليكتفي بوضع يده على رأسه ماسحًا على شعرة
لتسحبه أسوة على الفور: تعالى هنا يا زيدو
ثم وجهت حديثها إليه قائله: هو طفل ميعرفش حاجه
وتابعت أيضًا: أنا هنزل أشوف شغلي؛ وبعد إذنك هسيب يزيد هنا فى القصر علشان ميبقاش لواحدة فى الملحق

وظلت تترقب رفضه إلا أنه فاجئها بندائه: صفيه .. صفيه
أتت إليه مسرعه: أمرك يا مؤمن باشا
نظر ليزيد ثم تحدث: خدي بالك منه ومتسبهوش طول ما الدكتورة فى شغلها

نظرت صفيه للطفل بحب مجبرة فهى لا تستطيع كره الأطفال، وفي الأخير ليس عليه ذنب فيما حدث
: أمرك يا باشا

إستدار ليذهب لكنه توقف عندما قال يزيد: سلام يا عمو مؤمن
نظر إليه بأعين مليئه بالألغاز: سلام يا بطل.

•°•°•°•°•°•°•°•°•°•°•°•°•°

نذهب إلى حيث سارة ..

رفعت رأسها بتثاقل وتنظر حولها بإستغراب لتسرع إليها سميرة متسائله بلهفه: سارة يا بنتي، إنتي كويسه؟

أومأت رأسها بنعم ونظرت إليها بإستفهام وظلت تشير بيدها سائله بالإشارة.. ماذا حدث؟

فهمت سميرة ما تريد لتخبرها: صالح لقاكي مغمى عليكي في المكتب وشالك وجابك على هنا والدكتور اطمن عليكي وداكي مُهدء ودا إللى نيمك كتير..

هزت رأسها بصمت..
ليقطع خلوتهم دلوف صالح للغرفه..
ليوجة حديثه لسميرة: لو سمحتي يا سميرة سبينا لوحدنا شويه

وبدون تعقيب تركت سميرة الغرفه وذهبت للخارج..

جلس على أحد المقاعد المجاورة للفراش بينما هي لم ترفع أنظارها إليه فالأمس كان رجل غريب بالنسبه لها واليوم أصبح زوجها ..
باتت غارقه لا تفهم شئ..

نظف حلقه ثم نطق بهدوء: أظن إنتي شوفتي إمبارح قسيمة جوازنا مش محتاجه أشرحلك وعرفتي إنك مراتي شرعًا..
لترفع إليه أنظارها بهدوء وتحاول الحديث لكنها لم تستطيع النطق
بينما هو ينتظر حديثها ناسيًا أنها لم تعد تستطيع الحديث، ليتأمل تلك الأعين المليئة بالحزن يُغشيها طبقه شفافه من الدموع
فهدوئها هذا يُثير بداخله مشاعر قويه لا يستطيع تجاهلها .. فليترك نفسه يغرق بداخل عالمها وليحدث ما يحدث ..
خفضت أنظارها وهذه الفعله جعلته يستفيق من هذا الهُراء الذى يفكر به
تحدث مرة أخرى: أكيد عندك دلوقتي مية سؤال، عمومًا إنتي داخله البيت دا وإنتي مراتي وكاتب كتابي عليكي وطبعًا بموافقة أمك

نكست رأسها بخزى، فها هى والدتها مره أخرى، حتى هذا الشئ كسرتها به ايضًا ولم تستطيع إختيار من سيكون زوجها كما تفعل أي أنثى، فقد سلبت والدتها هذا الحق منها بل وجميع حقوقها

وقف من جِلسته ثم وجه أنظاره إليها: عمومًا بكرا هتبدئي فى العلاج بتاعك علشان ترجعي زى الأول

وتابع حديثه بنبره تحذيريه: أوعي تفكري ولا يجي فى عقلك إن عفيت عنك ونسيت عملتك؛ أمي فاقت وهي إللى شهدت وتعرف حادثة آدم بالتفصيل وهتأكد إذا كنتي إنتي ولا لا ..

ثم خرج تاركاً خلفه غبار من الألم كعادته..

بينما هى قفز الأمل بقلبها عندما قال أن والدته تعرف من فعل هذا ..
ومن المؤكد أنها ستُنكر بأنها الفاعله وسيُخلى سراحها من هذا السجن.

لكن ليس كل ما يتمناه المرء يدركه.....

•°•°•°•°•°•°•°•°•°•°•°•°

وصلت الطائرة أرض الوطن مُعلنه عن وصول "محمد الفارس" وزوجته "سهام"

بعد ما يقارب ساعة...
كانوا يقفون أمام أحد الشقق العصريه منتظرين فتح الباب والإجابة من الداخل.

ولم يطول إنتظارهم ليُفتح الباب وتظهر "بتول" من خلفه..
وبمجرد رؤيتها لهم توسعت عينيها بصدمه ونطقت مباشره: أنتوا أيه إللي جابكم؟
ليتحدث بسخرية: أيه يا بتول هانم مش هترحبي بإبنك ولا أيه؟
بتول: إنت لسه فاكر إن عندك أم
لتتحدث سهام: طب هنتكلم على الباب كدا كتير
تشدقت بسخرية: لا إزاى، إدخلي يا مرات إبني

ثم وجلوا جميعهم للداخل وتتحدثت بتول بعد جلوسهم: أيه إللى جابك وحدفك عليا يا ننوس عين أمك

تحدث بهدوء كأنه يخبرها بأحوال الطقس: الشركه وقعت؛ وشركة الصياد اشترت الأسهم

ضربت على صدرها بصدمه: إنت بتقول أيه!..، عايز تقولي إنك فلست
وضعت سهام قدماً فوق الأخرى وتحدثت بغرور: إحنا فلسنا هناك يا حماتي العزيزة، بس معانا هنا كنز كبير ولا إنتي ناسيه بنتنا أسوة

أجابتها بتول بنبره يملؤها الأستهزاء: بنتنا!! .. عمومًا يا أمها بنتك العزيرة بقالها شهر مختفيه وأنا مبلغه إبني الغالي بكدا
بس الجديد بقى إحنا لقينا جثتها غرقانه فى البحر

تحدثا الأثنين بصوت واحد مرتفع: نعم ... إنتى بتقولي أيه، دا مستحيل

جلست ببرود: والله دا إللى حصل

ظل يدور هنا وهناك بجنون ويحطم ما تطوله يده، تحدث بجنون وقد فقد السيطرة على ذاته: إنتي بتهرجي ولا أيه، طب معرفتنيش ليه
ولا دي لعبه منك علشان تاخدي الورق وتكوشي عليه

تحدثت بوجه ثلجي: طب أقعد وإهدى على نفسك شويه، البت دي أصلًا مكانش معاها حاجه
وعمومًا دي شهادة الوفاه بتاعتها

زاغت أنظاره بجميع الأرجاء وتحدث بتِيهه: هو أيه إللى مش معاها حاجه، أنا متأكد إن الورق دا معاها

بتول: أنا إللى كنت عايشه معاها وفضلت معاها عشرين سنه ومتأكدة إن الورق دا مكانش معاها

لتتحدث سهام اخيرًا بعد إصغائها للحديث جيدًا: في كل الأحوال أنا هدور فى الموضوع دا ومش هسكت، أنا كدا كدا ميهمنيش البت أنا يهمني إللى معاها

بتول: إعملي إللي تعمليه وابقي وريني شطارتك؛ ومتنسوش العمليه إللي جايه وميعدها قرب، ودي أكبر عمليه هنعملها
كفايه الخسارة إللي خسرناها المره إللي فاتت مش عايزينها تتكرر تاني

محمد: هو أيه إللى تتكرر؛ دا أنا حاطط كل الفلوس إللي معانا في العملية دي، وهي تبقى تعويض للخسارة

أيدت سهام حديثه قائله: كلامك صح، لو حصل أي غلطه هنروح في ستين داهيه

- وظلوا يخططون لأعمالهم القذرة متناسين كل شئ وأي شئ...

•°•°•°•°•°•°•°•°•°•°•°•°•°

ظلت تدور بداخل الحرم الجامعي تسأل هذا وذاك، فالجميع أجمعوا على أن أسوة متغيبه منذ ما يقارب شهر كامل
فأين أختفت هكذا...
فأسوة بالرغم من ظروفها وأحوالها لا تُهمل الجامعه أبدًا
ستذهب إليها بعد إنتهائها من العمل.

وبعد ما يقارب العشرون دقيقة كانت تدخل إلى المطعم الذي ستباشر به عملها..

: السلام عليكم
:وعليكم السلام

ليلى: لو سمحت أنا جايه على الشغل هنا فى المطبخ واستلمت الشغل إمبارح، ممكن تدليني على مكان المطبخ
أشار العامل إليها: تمشي على أخر الممر وهتنزلي من السلم إللى على شمالك
والمطبخ فى الدور الأرضي
المدام "إيمان" هتوزع الشغل عليكم
ليلى: شكرًا جدًا..

وذهبت للمطبخ وياليتها ما ذهبت فالمكان شاهق الإتساع، لم ترى بحياتها شئ هكذا
رأت تجمع العمال فذهبت إليهم على الفور

وبدأت المسئولة بتوزيع أدوار الجميع

: دا الجزء الخاص بالغسيل، وأشارت إلى ليلى وأربعة آخرون ثم أكملت
: إنتوا إللى هتبقوا مسئولين على الغسيل وتنضيف المطبخ وأدوات الشيفات، ومش عايزة تقصير يا بنات

ودا الزي الخاص لكل واحدة فيكم بمواصافتها 

أخذت زيَّها الخاص وذهبت لترتديه ووجدت أنهم اختاروا ملابس محتشمه كملابسها بالإضافه إلى حجاب

وأثناء خروجها اصتدمت بأحدهم..

رفعت رأسها ثم ..

ليلى: أنا آسفه.. ما أخدتش بالي
: ولا يهمك يا قمر... أنا كمان ما أخدتش بالي

أبتسمت إليها ليلى بهدوء فمن الواضح على ملامحها الطيبه..
لتُكمل الأخرى ومدت يدها بإبتسامه: نتعرف بقى، شكلك جديد
مدت إليها يدها أيضًا: ايواا ...أنا لسه أول يوم
: واسمك أيه بقى
: أنا ليلى .. وإنتي؟
: وانا روز، اتشرفت بمعرفتك يا ليلو

إندهشت ليلى من مرحها هكذا وإعتيادها السريع وهى لا تعرفها: أنا أكتر يا روز؛ بس إنتي اسمك الحقيقى روز ولا دا دلع، أول مرة أسمع عنه

ابتسمت روز بهدوء: لا يا ست ليلو أنا مش اسمي روز في الحقيقة، بس قوليي روز أنا مشهورة بيه، والكل بيناديني بيه وبحبه جدًا
أندمجت ليلى فى الحديث معها سريعًا فكتلة اللطافه هذه تحتل القلب سريعًا
لتسألها ليلى بفضول: طب إشمعنا، أيه السبب؟
روز: حكايه طويله، هبقى أحكيلك عليها بعدين... المهم قوليلى.. إنتى شيف؟

ليلى: لا، أنا عامله هنا مش شيف، إنتى شيف؟
روز: أيوااا يا ستي أنا شيف صغنن كدا على قدي
ليلى: باين عليكي شطورة رغم إنك صغيره

روز بزعل مصطنع: أنا صغيرة أخس عليكي يا ليلو دا أنا حتى في أخر سنه في الكليه وخلاص هبقى خريجه وكمان عندي واحد وعشرين سنه

ليلى: مشاء الله عليكي متزعليش يا صغنن.. وإنتي بقى فى كليه أيه
رفعت أنفها بفخر: إقتصاد منزلي قسم طبيخ

إنفجرت ليلى بالضحك بسبب طريقه حديثها وتعابير وجهها ..

: ماشي يا ستي إضحكي عليا اضحكي
قوليلي بقى يا كبيرة عندك كام سنه وبتدرسي أيه

ثم أكملت بمزاح: سبيني أخمن، شكلك عجوزة أصلًا

ابتسمت ليلى بمرح: لا يا حبيبتي أنا لسه عشرين سنه أصغر منك بسنه وفي تالته صيدله

أردفت روز بزهول: واو يعني دكتوره
ليلى: أمال أيه يا ست روز، كنتي مفكراني أيه

روز بمرح: قفشتي ولا أيه يا ليلو... عمومًا أنا أصلا مش هصالحك وبعدين أنا الكبيرة ومسكاني من الصبح يا صغنن .. دا انا كدا إللى هقول يا صغنن

ليلى: لا يا حبيبتي أنا مبقفيش، وإنتي مشاء الله عليكي شكلك صغنن مش باين عليكي سنك
روز بطريقه مسرحيه: أرزاااااق يا أمااااا
ليلى: طب يلا يا أختي علشان أشوف شغلي، شكلي هنتطرد من أول يوم
روز: ايواا يلا... بس لنا قاعدة سواا
ليلى: دا أكيد علشان أعرف حكايه اسمك وإحنا مع بعض اهو.

•°•°•°•°•°•°•°•°•°•°•°•°•°•°

ترجل من سيارته أمام معمل لصنع الرخام والفخار ..

نظر بأرجاء المكان ليجد مجموعه من الرجال الواقفين فعرفه من بينهم على الفور لكن من المؤكد أنه لن يعرفه
فقد مضى زمن.

: اهلًا يا رجاله
سُلطت الأنظار عليه من جميعهم وتحدث واحدًا من بينهم: اهلًا يا باشا، أي خدمات
مؤمن: أنا عايز أتكلم مع المعلم فؤاد
ثم أشار إليه: مش إنت المعلم فؤاد ولا أنا غلطان
فؤاد بإستغراب: أيوااا أنا .. مين أنت
مؤمن: نتكلم على إنفراد وأنت أكيد هتعرف مين أنا

صفق فؤاد على يده: يلا يا رجاله كل واحد على شغله ...
وتفرقت الجماعات..

أشار فؤاد على أحد المقاعد القديمه وتحدث: تعالى نقعد..
ليتحدث مؤمن فور جلوسه: أنا مؤمن... ثم صمت وأكمل بتنهد: العيل إللي كنت معاك في الزنزانة
وقف فؤاد بفرحه تنجلي على ملامح وجهه: إنت مؤمن، دا أنا سألت عليك كتير أوووى يا بني .. لسه فاكرني والله فيك الخير يا بني الله لا يعودها أيام

وقف مؤمن من مكانه إثر إقبال فؤاد عليه ويقترب منه بُغته ويحتضنه.

ظل في حيرة من أمره لا يعلم ماذا يفعل، لكنه تدارك الموقف سريعًا وربت على ظهره

فؤاد: وأنت عامل أيه يا ابني وأخبارك كدا..
وأكمل حديثه بمرح: وداخل تقولي المعلم فؤاد، فين عمي فؤاد يا ولد ولا إنت كبرت عليا

مؤمن: أنا بخير يا عمي، وعمري ما أكبر عليك أبدًا، دا أنت عارف أصلي حتى ...

فؤاد: ماله أصلك،.... أصلك طيب وكل إللي حصل لعبه أكبر من طفل عمرة عشر سنين .. حسبي الله ونعم الوكيل
مؤمن بجمود فهو لا يحب التطرق لهذا الموضوع أبدًا فيكفيه ما هو فيه: دا كله فات وملوش لازمه ذكره تانى، أنا عايزك فى موضوع مهم وعايزك تركز معايا

فؤاد: سامعك يا بني .. خير

لينطق مؤمن بكلمه واحدة فقط: النمر
عقد فؤاد حاجبيه بإستغراب: أيه إللى فكرك بيه.
مؤمن: أنا عايز أعرف مين هو؟... أنا دورت عليه كتير وملوش أى أثر
غير كدا سجلات السجن فى الفترة دي بتثبت إن محدش كان موجود بالأسم ده ..
يعني السجلات بتنكر وجودة
 
فؤاد: إزاى كدا وهو كان موجود وسطنا... أكيد في غلط مش معقول

مؤمن: لا.. أنا أخباري موثقة، انت كنت قريب منه وأكيد تعرف عنه كل حاجه على الأقل اسمه الحقيقى ..

فؤاد: ايواا يا بني أنا اااه كنت قريب منه بس معرفة سجن مش معرفه شخصيه ولا معرفه قديمه
فمش هيقولي معلومه غويطه زى دي، وبعد ما طلعنا أخبارنا انقطعت، ومحدش كان بيناديه ألا بالنمر..
... بس السؤال.. إنت بدور عليه ليه؟ وعايزه في أيه؟

مؤمن: إزاي بدور عليه ليه! ... إنت مش فاكر إللي عمله معايا ووقفته ومساندته ليا

فؤاد: النمر كدا جمايله مغرقانه كلنا، ميقدرش يشوف حد محتاج مساعده وميساعدش .. ما بالك بقى بعيل عنده خمستاشر سنه وإللي ساعده قوة شخصيته والكل كان بيخاف منه فقدر يحميك من كلاب السجن

بدأ مؤمن بتوضيح وجهة نظره وبث ما بجعبته:
إنت عارف قصتي كلها يا عمي فؤاد، في حاجه مش مظبوطه
عيل عنده عشر سنين يدخل الأحداث وأصلًا في الطبيعي دا ملوش دخول أحداث ومن غير أى إثبات ولا بحث عن الجريمه ولا حد سأل وقبل ما تتكلم عارف أنها بفعل فاعل أنا موافقك، بس بعد كدا أتنقل على السجن بعد ست سنين
طب أيه السبب دا أنا كان سني خمستاشر سنه يعني تحت السن القانوني ونقلي السجن متأكد إنه مش سببه هو إللي اتسبب في دخولي الأحداث في إيد تانيه في الموضوع
والأغرب من كدا، خلال السنين دي كلها أكمل تعليمي بكل سهوله؛ وأكيد إنت فاكر كل الكتب كان بتوصلي على أعلى مستوى وبعض المواد المواد كان بيجيلي فيها مدرسين في الأحداث والسجن كمان ودا شئ ما بيحصلش

استأنف حديثه بعض إلتقاطته بعض الأنفاس: في حد بيدعمني ويساندني في الخفى وهو السبب في إني أتنقل من الأحداث للسجن
ودا إللى بحاول أعرفه.

استمع فؤاد لحديثه بدقه عاليه ويسجل استنتاجاته لتنجلي على صفحة وجهه آمارات التفكير ليتحدث:
يا بني إللي حصل حصل، إرمي ورا ضهرك واحمد ربنا إن ده إللي حصل
واسم الله عليك بقيت حد نضيف ودي نادره جدًا، حد يطلع من السجن كدا!
بقيت مهندس قد الدنيا وشركاتك من أكبر الشركات في العالم.

ضيق مؤمن عينيه بإستغراب وتسائل: وإنت عرفت منين إن بقيت مهندس وشركاتي من أكبر الشركات؟!

توتر فؤاد على الفور لكنه تدارك الموقف وأخفى هذا التوتر ببراعه: إنت فاكرني جاهل ولا أيه
ما انت عارف إن بحب أتابع الإخبار
والأخبار مش وراها ألا امبراطوريه الصياد
ومبتظهِرش اسم مؤمن خالص ومستعمل اسم الصياد عالطول أو الإعصار ومتنساش إحنا إللى طلعنا عليك الأسم دة

إجابته الركيكه لم تُقنع "مؤمن" فالصياد لا تفوته هذه التلكؤات بالحديث، وعلم أنه يُخبئ أمرًا ما وورائه لغز كبير لكنه لم يُعقب: تمام يا عمي فؤاد، ولو عرفت جديد كلمني.
ثم وقف من جلسته للرحيل وضبط سترته

فؤاد: هتمشي عالطول كدا
مؤمن بنبره جافه: معلش ورايا شغل، هبقى أجي تانى... سلام
فؤاد: مع السلامه يا بني
تذكر أمرًا ما ليُسرع قائلًا: إنت معرفتنيش أرقامك علشان أتواصل معاك

وقف مؤمن مكانه دون أن يستدر وإبتسامه ماكره شقت الطريق إلى ثغره مرتسمه عليه ويُتبعها بكلمات مُشَفَّره تحتاج لدهياء لفك رموزها:
عرفت إن الصياد هو مؤمن وعرفت إن مؤمن الإعصار، هتوصل للأرقام... أكيد هتوصلها.. سلام يا عمي

وشدد على آخر جملتين كأنه يبعث من خلالهما رساله خاصه مُزينه بغموضه الخاص
وذهب تاركًا إياه يتنفس براحه بعد حبس أنفاسه فكان يشعر وكأنه يَعُد أنفاسه فأعيونه مُولِمه بجميع التفاصيل..

~~~~~~~

أخرج هاتفه على الفور وتغطت على بعض الأزار بعدما تأكد من خلو المكان من حوله..

أجاب الطرف الأخر فورًا كأنه كان يجلس على رأس الهاتف: ايواا يا فؤاد
فؤاد: مش هتصدق مين كان هنا!
: مين... أتكلم يا ابني عالطول أيه شغل التشويق ده
_ مؤمن الصياد

: توقف الطرف الأخر عن الحديث بصدمه عقب سماعه لهذا الأسم الرعدي

ليُكمل فؤاد حديثه: إللي إنت اتوقعته حصل

: وأيه إللي حصل، كان جاي ليه؟
فؤاد: أنا يا عم زي ما أكون محطوط تحت ميكروسكوب، عيونه بتلقط ابسط الحركات والتعابير

تحدث الطرف الآخر بنفاذ صبر: أنا عارف الكلام ده يا فؤاد، قولي حاجه مفيده يا أخي، كان عايز أيه أنا هسحب الكلام منك

ليبدأ فؤاد بسرد ما حدث بأدق التفاصيل

لينطق الأخر عقب إنتهائه: مش قولتلك هيربط الأحداث ببعضها وهيدور ورا الموضوع ومش هيسكت، مؤمن مش غبي ابدًا

فؤاد: دا أنا كنت على أخري وبدعي فى سري يمشي، دا عصرني
: المهم دلوقتي يا فؤاد .. أنا عرفت إن الحكومه بدور وراه وفي إشاعات كتيره بتقول إنه بيتاجر في المخدرات، والأكتر من كدا إن هو بيصنعها في معامل خاصه
ومفيش حد قادر يدخل القصر من خلال الغابه ابدًا محاولات كتير والكل فشل

فؤاد: سر الغابه وتحَفُظُه عليها إحنا عارفينه بس معتقدش أنه يعمل كدا، أيه إللي يخليه يتاجر في المخدرات وهو رجل أعمال كبير ومش محتاج

: هو وراه سر ومخبي حاجه أنا مش عارفها ولا عارف أوصلها في حلقه مفقودة
بس المهم عندي إنه ميتأذاش ولا يمسه أي ضرر
وصدقني إللي هيمس شعره منه هفرمه ومش هرحم حد .
فؤاد: متقلقش، بس قولي هتِظهر نفسك ليه إمتى

إكتفى بجمله واحده وافيه: في الوقت المناسب
ثم استطرد حديثه: وصحيح قبل ما أنسى؛ أنا وصلت لأسماء كل إللي ولدوا في المستشفى اليوم دا مع مراتك

إنجلت اللهفه والحماسه على قسمات وجهه: بجد! دا أميره مراتي هتطير من الفرحه

تسائل الأخر: حالتها متحسنتش؟

نطق بنبره يملؤها الحزن: للأسف لسه، صعبه عليها بردوه يوم ما تولد نلاقي البنت ميته وهي نازله بتتنفس وصحتها كويسه واللي يصدم أكتر لما نعرف إنها مش بنتنا وإنها اتبدلت..... دي حاجه تجنن

: هتلاقيها لو عايشه متخافش، وعلى الأقل معاكم "مصطفى" هيصبركم
فؤاد: مصطفى كبر وبقى راجل ودكتور بس معرفش عنه أي حاجه ولا عن شغله وبيغيب عن البيت كتير
ومش عاجبني حاله وشكله مخبي سر هو كمان..وأنا زهقت من الألغاز إللي في حياتنا دي

: صدقني كل حاجه هترجع أحسن يا فؤاد ..
والنهايه سعيده.........

تبتل بنبره ضعيفه: يااارب..

يُتبع..
وما زال للحكايه بقيه...

توقعاتكم يا حلوين ...🌷
متحمسين للي جاى .. الأحداث هتبقى ناريه
والألغاز هتبدأ تنفك ..🤭
ولو استمتعتوا بالبارت متنسوش أختكم من الفوت والكومنت.👍

لا زالت هناك قصص لم تُروى بعد...⚘

بقلمى/ ساره نيل
ملكه السروررر