في العشية بعد الغدا ، كملو حوستهم وطلعن قعمزن كلهن ع الشط ،وجاب محمود كرسي وجا قعمز معاهن يشرب قهوه والشباب ف البحر ماعدا مروان مابش يخش كان صدره مزال تعبان من الغرقه
نجيه:تعال يامروان هاك عطيهم قهوه
مروان:هاتي
عدا مروان تما يصفر :اوووي شباب ، قهوه
حاتم:شنو
مروان:قهووووه
طلعو الشباب قعمزو ع الشط وعدا مروان جاب فونه من الشحن وقعمز في السياره رن ع عزيزه
عزيزه:ايوه وينك انت مقفل
مروان:طافي شحن
عزيزه:عديت للبحر نسيتني
مروان:تي شن نسيتك يكون في معلومك اليوم قريب متت
عزيزه:هيييء كنك
مروان:فرقت وربي نجاني
عزيزه:يناعلي حبيبي الحمدلله ع سلامتك، معاكم بنات
مروان:مافي حد عليش
عزيزه:شي نسال ، باهي بيجيكم حد
مروان:كنك تسالي انتي
غزيزه:شي
مروان:اسمعي الحركات الشك هذن فيكيني منهن باهي
عزيزه:نغير عليك
مروان:فاهمه الغيره بالمقلوب انتي را
عزيزه:عليش
مروان:لما يبقى في حاجه تستدعي الغيره يغيرو الناس ، قتلك قريب غرقت قلتيلي في بنات ولالا ، تي انقولك حاجه ياريتني مافتحته التليفوت سلام
عزيزه:تي كنك شن قلت انا
مروان:سكري ياعزيزه خير
عزيزه:باه براحتك
سكر مروان ونزل من السياره راقيله ورد طفا تليفونه وحطه في الشحن
كانو حامد ومنعم وسليمان ومصطفى وسعيد مقعمزين ع الشط يهدرزو ويشربو ف القهوه
منعم:كنك راقيلك
مروان:فوتني توا
مصطفى:تعال قعمز
مروان'لا بنخش للبحر
مصطفى:تي تعبان انت ياراجل
مروان شايرله بيده متاع فوت وخش للبحر
عند البنات ..
موده'صقعت انا بنخش
وجدان:خلينا شويه بطلي نكد ماصدقنا البحر فضا
ريماس:بنات كلمت سعيد
رنده:كيف كلمتيه
ريماس:لقيت رقمه ع النت
موده:بدينا
ريماس:يهبل بكل مع اني ماهدرزتش معاه واجد
وجدان:الله بحتن الشمس
رنده:خلاص مغرب
مروان :شن تديرن
موده:ينعن جد وجك من وين طلعت انت
مروان:مافطنتنليش
رنده:سارحين ف الشمس
مروان:خشن خلاص مغرب
وجدان:شويه ونخشو ، بتشوو
مروان:اها بعدين شويه
موده:لنقني صقعت رسمي بنخش
ريماس:حتى نا هيا
مروان:موده اطلعي ونبيك في موضوع
موده استغربت :كنك
مروان:اطلعي بس وتوا نلحقك
موده:باهي تعال هي
طلعت موده وجا وراها مروان للشاليه خشت غيرت دبشها وطلعت لقاته مقعمز ع الانتري ف الصاله متاع الشاليه
موده:كنك
مروان:بنعطيك رقم عزيزه
موده:باهي
مروان:كلميها فهميها تغير طريقتها ف الحب مش هكي الزح قرفتني ف معيشتي
موده:بالشويه كنك بس شن في
مروان:تي مانعرفش حب امتلاك ولا شك ولا عباطه ولا شنو ، كانت هبله بعد خطبتها تمردت الزح ، وين كنت ومع من وشن تدير ، تي مبدري نقوللها غرقت تقوللي حمدلله ع سلامتك بعدها قالتلي في بنات معاكم ولالا ، توا هضا شنو بالله
موده:وسع بالك بس ، عطيني الرقم وتوا ندوي معاها
مروان:ياتتغير يامعش نبي امها بكل
موده:تي اهدى كنك انت
مروان:خطرها باتي رد ع سعيد ومصطفى بالموافقه
موده:والله امتى
مروان:امبدري بعد الغدا وهو يشرب في الشاهي فتح الموضوع
منعم:كنكم قاعدين هنا
موده :شي نهدرزو
منعم:ايوا يا باتي وافق وبتنخطبي
موده:بطل يابارد نتحشم ☺
منعم:بحت كيف انحمرت ههههههه
مروان:طلعت تعرف اتحشم ههههه
موده:بطلو صماطه المغرب اذن صح
منعم:اها الشمس طاحت ، صبي انت انصلو جماعه
مروان:هي
طلعو مروان ومنعم ، كان منظرهم يهبل فردو صلاياتهم ع الرمله وكان محمود يصلي بيهم ، خشن الصبايا بالوحده تصلي لين كملن
محمود:منعم هيا ولعلنا الشوايه
سعيد:خليك توا انولعها نا
محمود:اي واحد المهم ولعوها
حاتم:توا انعدي انجيب اللحم والدجاج من جوا
منعم:جيب حاجة الشرموله والشاهي بالمره
مصطفى:مروان
مروان:ها
مصطفى:المنظومه حطيتها في السياره وين شلتها
مروان:جوا يارا مش امبدري ولعناها
مصطفى:اها صاح صاح
محمود:ماتعلوش واجد الاغاني
منعم:تي ياباتي الشليهات كلهم مولعين
محمود:ياراجل ديرها هكي
مروان وشوش مصطفى وهو يولع ف المنظومه :خايف سعيد يرقاله من اوامر باتي يشويه بدال اللحم 😂😂
مصطفى:لنقنه سكن من لاخير
مروان:ديمه هك هو تهياله ماحد يعرف يدير شي
مصطفى:جت ع باتك كلهم هك 😂😂
حاتم هيا هو اللحم واتي
محمود:هات انحط لحم الاسياخ
منعم:المفروم وين متاع الكباب
حاتم:هو هنا
مروان:راكم تنسو الكبده اهم شي
مصطفى:وين الفلاش انت
مروام:شوفه ف السياره
ف الوقت هضا كانن البنات يتمشن ع الشط ويهدرزن ، سرحن تباعدن شويه وكان في شاليه مأاجرينه شباب حقو البنات طلعو تمو ينابشو فيهم ، طبعا البنات خافن وردن لأن ليل وهما تمو يمشو وراهم ، كاين مصطفى عينه عليهم حقهم
مصطفى:شويه شويه
مروان:كنك وين ماشي
مصطفى:تعال تعال بسرعه
مروان:كنك
مصطفى:تما معش يحق في شي قدامه وعدا يجري شور البنات
مصطفى:كنك ياشاب تفضل
الشاب :شن بحر بوك هو
مصطفى:ردن انتن غادي
مروان'كنك
الشاب :انتم الي كنكم
مصطفى:عيني عينك معاهن هلهن وتنابش فيهن
الشاب:كان هن محترمات شن جيبهن جيهة شاليه شباب الا وهن يبن يتنابشن
مصطفى:قول والله ، مصطفى خلاه هكي ويعطيه راس يطيحه في الوطا ع جية الشباب الي معاه
تمو مصطفى والشاب يضاربو ومروان شاطح
موده:منعم الحق مروان ومصطفى دايرين عركه غادي
منعم:وين
موده:غادي مش حتحقهم من هنا ظلام عديلهم بسرعه
منعم :عدي انتي ، سعيد حامد الحقوني
حامد:كنك
حاتم:شن في
طلعو كلهم يجارو ع جية الامن متاع المصيف والشباب يضاربو لين حزوها بطلقة رصاص وجا محمود لمهم وردو للمصيف وهما يتوعدو لبعضهم
مروان:بنفهم شن مشاكن غادي
وجدان'شن فيها لو تمشينا مانحسابوش في حد مانبحتو غير في اشكالاتهم نحنا
حاتم:اسمعنني هنا ، تبن بحر قدام الشاليه ماتحركنش رنده:هو الغالط مش نحنا
محمود:سكري فمك ماتلاطعيش
منعم:امي في مطهر جروح
كلثوم:ارجى انشوفلك
مروان:توا مصطفى حصلها في وجه بسباكن
حامد:خلاص صار خير مشو الجو
محمود:اسمعني هنا طلوع من هنا تطلعن حدكن للشط ، وماتخشنش للبحر الا بواحد من خوتكن، هيا انتم كان بتشوو
طلعو الشباب ومحمود مشو يشوفو مصطفى وسعيد
موده:عليك هم اسود
نجيه:سكري فمك احمدن ربكن ماقاللنا لمو وهيا انروح كلثوم:شن مشاكن غادي
وجدان:انهدرزو سرحنا مافطناله الا وهو يدحنس علينا وبعدها جا مصطفى يجري ووراه مروان
نجيه:فكنني من الهرجه را ينكد عليكن ويروحكن
موده:نحنا اصلا امتى ماتنكدنش
كانت رنده ساكته لأنها عارفه حتحضل هزيبه من حامد ، شويه وفعلا لقاته يرن عليها
طلعت ف الشاليه من لاوره ادرقت ع خوتها وردت عليه
حامد:انتي رايحه مكثره ع ماوصوك را
رنده:التاس تقول خير
حامد:شن مشاك غادي
رنده:يعني اتت مصدق اني مشيت بالعاني
حامد:ماترديش عليا بسؤال
رنده:سؤالك عبيط وماليشي اجابه ، مش ملاحظ ان عرايكنا رايحه زايده ياحامد
حامد:ماهو انا وجه نكد
رنده:يعني انت مصدق اني مشيت غادي بالعاني
حامد:زي ماقال عمي معش اتحركي من قدام الشاليه رنده:حاضر ياحامد ياريتني ماجيت بكل
حامد:عليش تبكي توا
رنده:من قالك نبكي
حامد:اهن نحق في دموعك
رنده تمت تلفت تشوف فيه وين لقاته مصبي مقابلها مافطنتلش بكل لأن ظلام
رنده:بارد
حامد:انحبك يابكايا
رنده:حتى نا
حامد:ادني انجي انقعمز احداك
رنده:والله يفطنولك خوتي
حامد:اسمعي الاغنيه هذي ، شنو منو شنو منو ياقنين ، شنو منو شنو منو ياقنين ،
رنده:صوتك ششين
حامد:شنو منو ياقنينه ،ياحبيب القلب يانا، خوذ واعطي معانا ، شنو منو ياقنين
رنده:تواضع وحس بيا، ياما صار صار فيا، هلبا نبكي عليا ،شنو منو ياقنين
حامد:يناعلي من الضوت السمح وخلاص
رنده:بارد
حامد:انحبك انا خلاص وجك بنعدي مع الشباب
رنده:حتى نا انحبك ، عدي هي
حامد:اسمعي ديريلنا سلاطة باذنجان سمحه
رنده:عيوني
حامد:مانبيش عييونك نبي سلاطه
رنده:خزي باهي ، وجك امشي
حامد:ناعلي من الي رقالها
رنده:امشي خلاص
حامد:خلاص توا نمشي ماتدفيش
رنده:باي
سكرت رنده وعدا حامد مع الشباب
مروان:حي حي شنو منو ياقنين
سليمان:غيرها يارا الاغنيه
حامد:خليها يارا
محمود:هذي ياسعيد قلبها را تنحرق
سعيد:قلبتها توا ياعمي
مصطفى:عليك تغليظه باهي ههههههه
مروان:قالك
سعيد:تي اسكت يارا راه يسمعك
قعدة تهدريز وضحك والبنات مقعمزات ع الشط يرجت في الشوايه ويلعبن بالرمله مع دانا ودنيا وامجد لين طابت الشوايه وتعشو وهدرزو وسهرو مع بعضهم لين ف الليل الساعه حوالي 3 اغلبيتهم ارقدو من التعب والبحر وسعيد ومروان اول وحدين ارقدو لانهم تعبانين ماقعدش الا حامد ومصطفى بس
كانن البنات مقعمزات في فرندة الشاليه وجدان اتكلم في عماد ورنده تحكئ مع حامد ع النت وموده مع مصطفى
مصطفى:من معاك انتي
موده:انا وخواتي بس
مصطفى:اطلعيلي
موده:شنو
مصطفى:ابرمي من لاوره وتوا انجيك
موده:وكان ينوضو
مصطفى:مش حينوضو بس اطلعي
موده:باهي ارجى ، بنات توا انجي
وجدان:وين ماشيه انتي توا
موده:بنشوف بوفا وانجي
رنده:را يفطنلك حد
طلعت موده تسلس من لاوره ع جية مصطفى
مصطفى:خير ياقلبي
موده:ووااو ع وجك عطهم ضربه
مصطفى:كله منكن مانبيش نهزب لان عمي مسحلي كبدي في الهزيبه
موده:خلاص فكني منه الموضوع هضا
مصطفى:باهي خلاص مانبيش نكد بس
موده:باهي انا انحبك
مصطفى:مستحيل يتكوني اكصر مني
موده:مش مصدقه ان باتي وافق
مصطفى:الخميس الجاي ان شاء الله بعد انروحو ، انجيب امي
موده:يناعلي حبيبي الحمدلله ربي يتمملنا ع خير
مصطفى:حامد يرن معناها في حد ناض ، خليني نعدي توا المهم شفتك
، عدي بسرعه هيا
موده:باي ، حبيبي انحبك
مصطفى:انموت فيك 😘
ردت موده للشاليه :يلي ظلمتوالحب وقلتو وعدتو عليه
وجدان:انعم سيدي ع ام كلثوم
موده:يهببببل انحبببه ياناس لو نلقى نزرطه
رنده:والله حتى نا نحبه
موده:من
رنده:حبيبي من غيره يعني
موده:هو الي رن ع مصطفى شكله متفق معاه بو حد ناض يرن عليه
رنده:نجيه ليا صباي العطيب
موده:ولد عمي هضا مستحيل ننسى تصباياته معايا
رنده:عارفه حبيبي اصلا عشان هكي نحبه ، حمش وصباي يخبل ياخيا
وجدان:مش ف الصبح كان يدره الكبد
رنده:اسكتي انتي خليني هايمه
نجيه:انتن
موده:وووه ياامي فجعتيني
نجيه:حشن جوا شن قعدكن برا لتوا نضت ع صوتكن
وجدان:حاضر هي توا انخشو
خشن البنات رقدن وثاني يوم عدت عادي وجوهم سمح كلهم
جا يوم الخميس ، ناضو الصبح دارو الفطور ووتن نجيه وريما الغدل وقعدو يراجو في عيت عبد الحليم وسالم يجو ومرام ومنى ابي قألن جايات كلهم طلعو في نفس الوقت ،
في الوقت هضا كاين محمود مقعمز فاتح النت شويه جاته مكالمه من فتحي خو انتصار
محمود:ايوا السلام عليكم
فتحي :خير ياحاج كيف حالك
محمود:مرحب الحمدلله بخير كيف حالك انت وحال الاهل
فتحي: بخيرالحمدلله كلهم يسلمو عليك ، قتلك ياحاج اتصلت انقولك ع حاجه مع ان انتصار رافضه اني انقولك لكن مهما كان انت باتها ع الاقل تجو تحضرو قدام الناس الغرب ، شن يقولو ماعندهم حد
محمود:خير انشالله
فتحي بكره بعد صلاة العصر فاتحة ريهام ، محسن يبيها بدري بيش يدير اوراقها ع اساس تسافر معاه برا .......