موده:احلفي😳😱
ميسون:والله كيف مانحكيلك ، عمي قالب الدنيا ع مروان ومنعم هزيبه ع سبا لزها منعم
موده:الحقيره ماتجي من وراها الا المصايب
نجيه:السلام عليكم ، ااااففففف الصبر ياربي وخلاص
موده:صباح الخير ، شن صار غادي
نجيه:لقوها المنجوهه ، مكلمه ولد خالها و طالعه قالت انتصار قاعده عندها
ميسون:امتى طلعت
نجيه:قال جاها ولد خالها وهو ماشي بخوته للمدرسه ، الحاج انقصل فصله سوده
موده:عليك فناصة العين هذي ، تي كنها هكي البنت هذي
نجيه:امها انتصار
موده:ماهو ريماس امها انتصار ومش هكي
نجيه:المهم توا لقوها وتريحنا ، خطرها عرب مروان ردو علينا بالموافقه
موده:والله ياخيا باهي الحمدلله حاجه تفرح
نجيه:كلمو باتك وهو شاطح ، بعدها هدا شويه
ميسون:مبروك ياعمتي انشالله ربي يتممله بالخير
نجيه:انشالله يارب
موده:باهي ونحنا ياامي
نجيه:عليك الي مااتحشم
موده:شنو ياامي من اول امس وهو يراجي ف الرد
نجيه:توا ندوي لباتك اسكتي
ميسون:باهي عمي توا شن بيدير مع ريهام
نجيه:قال توا بيرد ع الراجل الي جايها بالموافقه ويزوجها ويفتك من الهرجه والمشاكل
موده:خزي رايحه كيف الوباء
نجيه:وانتي معقوله تضربيها امس
موده:بالله ياامي فكيني من المثاليات واصلتلي منها لهن
مروان:احم السلام عليكم
موده:ارجى ماتخشش
ميسون:خليه يخش خلاص خشيت للدار
موده:خش تعال ، مبروك ياثور
مروان:عليك اسلوب
موده:ماهو من فرحتي معش عرفت انعبر
مروان:عقبالك يابقره ، تزوجي وجو اها 😉
موده:تحشم سكر فمك ☺
نجيه:تعرف لو نلقى انديرلك فرحك قبل الصيام
مروان:امي الصيام مزال عليه شهر ،وميسون مزالت ف العده
نجيه:ماهو هذي الي مانعتني انا
موده:بس ميسون تفك رباطها قبل الصيام مزاللها اسبوعين بس
مروان:الصيام شهر الزح
نجيه:خليه بعد العيد الكبيره
مروان:وبعدين انا مزلت مش واتي
نجيه:قطعتك والفلوس في ، ف شهر تكون باني
مروان:ساهل ، توا فكريلي ف الدفع والبيان
نجيه:معناها في الصيام نديرو الدفع والبيان
مروان:بإذن الله
موده:عارفين فيش خاطري
نجيه:وانتي ديمه خاطرك ، فيش خاطرك
موده:زردة بحر ، كلللنا بلا انتصار ومشاكلها يومين في امشرق الله عليك جو
مروان:هيا والله انديروها ، كان عليا نحجز في شاليه من توا ، نحز في اثنين واحد للرجاله وواحد للصبايا ، ونقول لاصحابي يجو معايا
نجيه:اصحابك ماناقص غير تسجلهم في الكتيب
مروان:نساباتنا ياامي ، شفتي اخ ديموقراطي هكي ، يخلي خطيب اخته يمشي معاها للبحر
موده:مش لما يبقى خطيبي
نجيه:والله مااتحشمو
موده:بس ميسون حرام
مروان:الله غالب تقعد عند هلها الفتره هذي ، نمشو زرده اسبوع وانروحو
موده:الله باهي باهي ياامي
نجيه:والله قولة لباتكم وماعندي مشكله ماحب عليا
مروان:باتي توا هدا بعد لقينا البهيمه ريهام عند امها ، نمشي انقولله
نجيه:كانهو مش رايق ماتدويلش حيقول لا
مروان:لا ماعليك
موده:ارجى نمشي معاك
مروان:الحقيني
طلع مروان وموده خدت وشاحها ومشت وراه ، صبت نجيه بتدير الغذا جتها ميسون
ميسون:عمتي نستأذنك في شي
نجيه:خير ان شاء الله
ميسون:مزال اسبوعين ع فكة رباطي ، نبي نمشي انكملهن عند هلي ، امي تعبانه وماحد فاضي يعاونها نبي نمشيلها بدال ماانا قاعده مقيده مروان هنا وخلاص ، ولامخليتكم لاتطلعو ولا تاخدو راحتكم
نجيه:نحنا ماعليك فينا بكل ،والله مانك غريبه بيش تقيدينا بس كان بتمشي ع سبا امك ،هي اولى بيك مننا ، امشيلها وشوفيها
ميسون:بيجي خويا ف العشيه ياخذني
نجيه:انتي سمعتينا ونحنا ندو ع البحر ، عادي والله مانقصدو
ميسون:لا والله انا مش ع هكي ،انا مرايفه ع امي حتى نهارتها قتلك بنمشي وصارن قصص مامشيتش ، نبي نقعد عندها لين نفك رباطي ونرد لحوشي
نجيه:خلاص الي تبيه يصير ، خليهم يجوك بعد الغذا طول بيش مايأذنش عليك المغرب ،وعدي توا وتي دبشك وحاجتك
ميسون:خلاص توا انوتي ادبشي ونكلم واحد من خوتي يجوني
نجيه:باهي عدي هي
في حوش كلثوم ...
محمود:انتي عليش ضاربه اختك
موده:يابلتي ماشفتهش امس ياباتي انقلبت لشيطان ، تي تقول علينا مش مترابيين وقالتلي ياشوارعيه وتقول لخوتي مش رجاله ، ساد الكلام الي طلعوه علينا وع اميره المسكينه شن ذنبها ياباتي
محمود:انا كلمت محسن وقتله موافقين ، وحكيتله انه يتفق ع كل شي مع امها هي المسؤوله عليها توا
منعم كيف ياباتي شن يقولو علينا ماعندهش رجاله
محمود:امس لازها وتوا درت راجل عليها
مروان:الي داره باتي صح ، خلينا انعيشو حياتنا طول ماهي فيها وحياتنا مدمره ، سادنا مشاكل
محمود:اسمعو من يدوي ع المشاكل
وجدان:هههههههه بيزوج خلاص بيعقل
محمود:انشالله
كلثوم:شن ياحاج تهاني مزالت تعبانه
محمود:تهاني هذي قصتها قصه بروحها حتى هي ،قالت معش تبي الحوش ،بعد الي صار حسيتها ركبتها حاله نفسيه المرا تمت مش طبيعيه
كلثوم:هيييء كنها
محمود:معش تبيني ونازله ضرب في عيالها وديمه بكا وحابسه روحها في دار وخلاص
كلثوم:ياناعلي ، وماجبتلهش شيخ
محمود: كلشويه شيخ ، اخر واحد خو مصطفى صاحب مروان ،قالي ياحاج هذي حالتها صعبه جايها مس عاشق ، تبي جلسات وانا مانقدرش عليها يروحي ، وقالي ان السحر مجددلها قريب
رنده:طيح سعدك ياانتصار
محمود:مش عارف شن اندير ، المشكله اني عارفمن الي ضارني وللاسف أم بناتي ومش قادر اندير شي
مروان:ياباتي لو حد اخرى را قتلها بس نحنا طيبين في كل شي متساهلين ،وحق الله لو حد غيرنا اخته دارت الي دارراته ريهام راهو قتلها
منعم:نحنا مش متربيين ع هكي في رب يحاسب
موده:بس حرام هكي شن ذنب امجد ودانا ودنيا
مروان:ياباتي نقترح عليك اقتراح باهي
محمود:اقترح ياابو الاقترااحات
مروان:نلمو العيله ونمشو اسبوع ف مشرق نأجرو شليهات وننسو الدنيا اسبوع
وجدان:الله ياريت
موده:باهي ياباتي والله تعبنا من المشاكل ، نرفهو ع روحنا شويه
رنده:اها وقولو حتى لعمامي يجو معانا
محمود:لاعمامك لاخوالك ، بتمشو انتم بس
موده:باه المهم نمشو
مروان:نا بنأجر شاليه نا واصحابي بعيد عليكم شويه ، ونقول لحامد وسليمان يجو معانا
محمود:خلاص امتى تمشو ، ها ياكلثوم امتى
كلثوم:باهي وميسون
موده:تمشي لهلها وناخدو محمود ونجيه وكريمه
كلثوم:والاه حتى من بكره ماعندي مانع
وجدان:الله بكره باهي باهي
مروان:معناها نسقد نا توا نمشي نا والشباب نحجزولكم
منعم:تحسابوه ساهل الحجز تي ياخد باسبوع قدام
مروان:ارشيهم بفلوس يعطوك الي تبيه ، ماعليك بس
محمود:باهي ماتستعجلوش خلوها الخميس
وجدان:لالا باهي ياباتي بكره
محمود:ريماس وين
كلثوم:كالعاده ف الدار وتبكي وخلاص
محمود:نا بنطلع نمشي لتهاني بلكي تابا تمشي معانا موده:وكان مابتش جيب خواتي وامجد
وجدان:متحمسه بكل ، انعدي انكلم ريما انقوللها اتوتي روحها
مودع:حتى نا انروح ندوي لأمي انوتو ارواحنا ، وانشوف خواتي بلكي يمشن
رنده:الله امتى يجي بكره
مروان:نا بنسقد توا
منعم:ونا اكتبولي الي تبوه انجيبه لكم
كلثوم:نقوللكم حاجه ، هيا انشيلو غدانا ونمشو لنجيه نتفقو معاها
محمود:باهي انا بنطلع ، تبو حاجه اهو منعم وكلمو حاتم والبنات قولولهم
كلثوم:المهم انت اقنع تهاني
وجدان:ياريماس نوضي ياريماس بنمشو للبحر 😍💃
مروان:هيا نحنا نسبقوكم وتعالو غادي
موده:هيا سلام توا
طلعو موده ومروان عدو للحوش
مروان:امي
نجيه:خش ف الكوجينه
موده:خير عليكم ، امي امي جايين يتغدو هنا بيش نتفقو ع مشية اليحر بكره
نجيه:بكره شن دوته
موده:باتي قال بكره الدنيا شالت كلهم فرحانين هنههه
نجيه:امس متنكدين وعرايك واليوم بيمشو للبحر ، ويارب يصبرني ع هالعيله
موده:اصلا المفروض تشكروني انا اقترحت عليكم
مروان طالع بساكوه
نجيه :هي انت وين ماشي لام قشاشك هكي
مروان:بنمشي ، نحجز ف الشاليهات بناخد اصحابي ونسبقوكم
موده:توا نحنا ماشفنش خطيبة مروان ولا هو داؤ مقابله شرعيه ، ليش مانمشولهم بكره وبعدها نمشو للبحر
نجيه:بطلي هبال
مروان:شن فيها ياامي
نجيه:نمشو للبحؤ بعدها ساهل ، ماتكثروش ع باتك را يحلف مافي مشي
موده وشوشت امها :وميسون
نجيه:بتمشي لهلها ف العشيه
موده:باهي
نجيه:خواتك جايين ع الغدا
موده:اها سيبتهم ايلمو في حوستهم وبيجو وباتي عدا يقنع تهاني تجي معانا
نجيه:ياناري مسكينه والله واجعتني
مروان:امي بنطلع اما
نجيه:بالشويه سوق فكني من الهبال
مروان:حاضر ، هي سلام
موده:احجزه قريب من البحر
مروان:انتم وحظكم
طبعا نسيت ماحكيتلكمش ان ناصر دز لمروان سيارته وان مروان رد يحكي مع عزيزه وبدا يتريحلها كيف مايقول لأصحابه
طلع ركب سيارته ورن ع مصطفى
مروان:ايوا درش ، قتلك وتي ساكو للبحر وجاي ناخدك مصطفى:تي شن يامتخلف ، بحر شنو
مروان:اسمع الكلام بس
مصطفى :وحق ربي حتودرني في جرتك انت
مروان:توا بنكلم سعيد وحامد وسليمان ولد عمي بيش مايديرش قصه مع انه فرخ علينا لكن معلش
مصطفى:باهي تم ، كلمهم وتعاللي تلقاني واتي
مروان كلم الشباب وقاللهم يوتو ، عدا للمحل هدا شوية حاجات للطريق وبعها مشالهم خداهم واسقدو واسقدو شور امشرق
كانو ف الحوش فرحانين بكل ويوتو وماغباكم ف الليبيين وزراديهم لو يلقو يشيلو الحوش كله معاهم ، كلمت موده خواتها وقالولها حيلحقوهم يوم الخميس ع سبا العمل والقرايه ، وحاتم قال بيمشي معاهم ، اما تهاني فسكرت راسها مابتش تمشي ، بس دزت عيالها ، ميسون عدت هي وعيالها لهلها وهي مكسوره بلا مؤيد ومحرومه من اللمه والعيله ، والي المفروض حتى سلوى تكون زيها بس سلوى باعت كل شي وعاشت حياتها وتتمنى تزوج اخرى ،
كانو فرحانين ومتحمسين بكل ويوتو ويهدرزو والضحكه من قلبهم في الوقت الي كانت انتصار متنكده في حوش هلها ع حالها وع محمود الي باعها وباع بنتها وحلف ماهو عطيها قرش وتصرف بروحها ومابش يمشي للمحكمه يطلقها رسمي ويعطيها حقها ،خلاها هكي وخلاص عقابا لها وحلفلها لو ماتسكر فمها يفضحها في كل مكان ويشوه سمعتها زي ماشوهت سمعة اعياله وبهدلتهم من كل ناحيه
كانو عياله في نظرهم ان محمود شخصيته ضعيفه قدام انتصار ، ومايندروش انه عاقبها عقاب خلاها تبكي دم وتحتاج للي يسوى ومايسوش بيش تزوج بنتها ، وخلا باقي عيلته يفرحو شويه بدال مايزرع فيهم الانتقام ....