طبعا كلكم متحمسين تعرفو شن دار مروان وتوا حنقوللكم شن الي داره مروان وخلاه يرد لأصحابه ومايلقش غيرهم بيش يطلعوه من الكارثه الي هو فيها 👇
كان سعيد هو الي يسوق ومصطفى مقعمز يلاه ومروان لاوره ومطبس راسه لييين طلعو من طبرق
مصطفى:تي ارفع راسك طلعنا من طبرق
مروان:اوووف قريب عديت فيها الزح
سعيد:تقدر تفهمنا شن داير انت الي جايين وراك وجاي تمرعش فينا من نومنا
مروان:تي متخلفين الزح مافيش نقاش وتفاهم على طول طلعولي يجرو بالسلاح
مصطفى:فهمنا شن داير باهي
مروان:طلعت غيرت جوي في كافي وانا مروح درست قدام حوش بنت مداير معاها جو من اول ماجيت لطبرق تسكن ف الشارع الي ورا حوش ناصر
المهم طلعتلي البنت من الروشن وقعدنا نشايرو لبعضنا وهداريز ع طلعت واحد من خوتها يدخن ف البلكوني فطنلنا ، سمعته يسب ويقوله ياعلييي جيب الكلاشن وتعال ، ولعت السياره وطلعت نجري وصلت لأول الشارع طفيت السياره خذيت المفتاح والاوراق.المهمه متاعي ونزلت نجري لحوش ناصر ونوضتكم
سعيد:ههههههههخخهخخ تي ياريتهم قتلوك
مصطفى:تفو عليك وع الي يسمع كلامك، وعليش جيتنا مش ع أساس معش تبي خلطتنا
مروان:سكر فمك
سعيد:والبنت مسكينه بعتها في 5دقايق
مروان:انا بعت ناس لهم سنين معايا مش حنبيع وحده ليا كم يوم بس نعرفها
مصطفى:حقير ماهو ، بنت وثقت فيك وطالعتلك من الروشن عقاب الليل وانظر خوتها توا شن دارولها
مروان:هذي موهبتي انا مقدره قويه عندي ع اني نسيب الناس الي يوثقو فيا في نص الطريق
سعيد:تقول فيها وانت فرحان ، طلعت في عينها مش راجل وفي عين خوتها حقير وفرحان بموهبتك المتخلفه هذي
مروان:سوق وانت ساكت
مصطفى:توا ياواطي مالقيتنا الا نحنا ومداير روحك بعتنا ومعش تبيلنا خلطه، لا وهضوما جايينك انت ياعمي ناصر
مروان:بتسكت ولاشنو
سعيد:ماواجعتني الا البنت الي بتاخد طرايح ع سباك
مروان:تعرفو انا شن واجعني في الموضوع ، سيارتي الزح وحق الله تسوا البنت وهلها
مصطفى:سعيد شوفله حل هضا بيجيبلي جلطه
سعيد:انا لساني عجز معاه مش عارف شن انقول
مصطفى:ماهو حقير مداير روحه خايف منا ع خواته وعادي يبهدل بنات الناس
مروان:خواتي مش كيف هذي افطن لكلامك
مصطفى:وليش يعني هذي ماعندهش هل ولا ماتخافش ع سمعتها ، حتى هي وثقت فيك وحباتك ولا كان هضا شن طلعها من الروشن الساعه 2ف الليل وخوتها قاعدين ،شن خلاها تخلي خوتها بقرون ع سباك ، مش متحشم ع وجك
مروان:انت بالذات اسكت حتى انت درت في اختي نفس الي درته انا بالضبط ، وقت حصلت طريحه لقاتك تدافع عليها ؟؟، لا درت فيها الرجل الشرقي وحليت شور المغرب والله اعلم ف المغرب شن درت ، والدليل ملاك الي رديت ضفتها وتعليقاتها تحسابني مش زارق عليك
سعيد:باهي ياشباب مش طريقه هكي تعايرو في بعضكم بفلايطكم
مصطفى:تي شوفه هو شن يقول
مروان:ماهو كلام الحق ديمه يوجع
سعيد:وحق الله انزلكم توا في وسط الطريق تي شن نظام الفروخ هضا
مصطفى:خليه توا نوصلو بنغازي ويتلقى مايجيه من باته
مروان:تي وانت شن دخلك
مصطفى:صح عندك الحق
سعيد:تي خلاص الزح زحق الله نقلب بيكم السياره توا مروان حط سماعات ف وذانه ببرود ولا كأنه دار شي ومصطفى رقد الكرسي وحط يده ع عيونه ودار روحه بيرقد وسعيد يسوق
ف الوقت هضا كانو هل موده كلهم راقدين ، كلثوم وبناتها وريما روحن ونجيه وموده وميسون رقدو
ثاني يوم الصبح ..
بيييببب بيييببب
نجيه:موده بحتي من الروشن من يبيب
صبت موده خشت لدار المعيشه بحتت من الروشن ماعرفتش روحها فرحانه ولا بتبكي ولا مقهوره
شافت مروان نازل من السياره وسعيد ومصطفى معاه
موده:امي مروان
نجيه:وييين
موده جا بره
نجيه:محرمة الصلاه وين
موده:ع الصالون
خدت نجيه المحرمه وطلعت
نجيه:يناعلي الحمدلله ع سلامتكم
مروان:رايفت عليك.ياغاليه
جا مروان حب ع راس امه
نجيه مسكاته من وذنه:مداير علينا راجل ياحيوان ، شن طروح الفروخ الي تدير فيهن
مروان:تي ياامي الزح معيلتي بيا قدام الشباب
سعيد:زيديه يستاهل
نجيه:ربي يحفظكم وينجيكم ، خشو تفضلو
مصطفى:لا والله واصلين حدنا بنروحو
نجيه والله مافي مرواح خشو تغدو معانا وبعدها ف العشيه روحو
خشو مروان واصحابه نزلو الحاجات وخشو للمربوعه
مصطفى:مزلت بايع رفقتنا
مروان بحت فيه برفعة حاجب وسكت
مصطفى:تي ندويلك انا
مروان:ها
سعيد:خلاص الزح فكوني من جو الابتداذي ، تي انسو الي فات
مروان:ننسو !!
سعيد:الي هناك صار يامروان ، ووعد من يوم وغادي خواتك هن خواتي
مصطفى:يامروان انت عارفني مش متاع وجيج وحق الله ناوي الخير مع اختك ، وياسيدي توا يجي باتك وحق الله نطلب اختك منه
مروان:كيف تطلبها
مصطفى:نخطب موده من باتك وننهو هالمشاكل ، وحق ربي مانلقى رفقه كيفكم
مروان بحت فيهم والضحكه غلباته
سعيد:اييييوا هضا المطلوب
مروان:صبو ديرو حمامات وبنصبي انخش انشوف امي مرايف عليها بكل
محمود :مروواااان
سعيد:حي علي امك وحي
مروان:خير ياباتي
محمود:الخير من امتى يجي من وجك
مروان:تي كنك ياباتي عليك استقبال
محمود:صدقت روحك انك مروح ع سبانا ، شن درت في طبرق خلاك تروح ؟؟
مروان:😳 تي شن درت جوني الشباب روحت معاهم محمود :في حد يسقد من طبرق الساعه 2 ف الليل ووين سيارتك
مروان:في طبرق
محمود:الله يحشم بيك كيف ماحشمت بيا ، يرن عليا ناصر يقولي ولدك داير عمل اسود ليش ليش اسود وجي قدام الناس
نجيه:كنك ياحاج شن في
محمود:ولدك ماسكينه مع وحده ف طبرق وهرب منهم
نجيه 😱😱:طيح سعدك وانعمت عينك
مروان:تي هييي شن تكبير الشورخ هضا من قالهزلك الكلام هضا ، تي هي صبت ف الروشن وانا لوطه كبسنا خوها طلعولي بسلاح هربت منهم
محمود:وانتم كيف تخلوه يهرب كان شلتوه للعرب ادبوه
مصطفى وسعيد اول ماسمعو محمود يدويلهم انجمطو في مكانهم
محمود:علي الطلاق من الثلاثه الي علي دمتي مانك واخد غيرها هذي الي تنابش فيها في طبرق ، وبكره نسقد نا وخوتك وامك نخطبوها لك
مروان:تي لااا ياباتي وسع بالك ، شن تخطبوها ليا نا مانبيهش
محمود:تبي امك تطلق
نجيه:يناعلي السو بعيد بكره نمشي معاك نخطبوها له مروان:تي ياامي شن تخطبوها اسمعوني بس
كاين مروان مصدوم ويحايل ع باته وامه ومصطفى وسعيد ماسكين ضحكتهم بالسيف
سعيد وشوش مصطفى:جاك الموت ياتارك الصلاه
مصطفى:محلاها فيه يستاهلها ، هههههه حق حق قريب يبكي
محمود:هي كلمه قلتها ، بنعدي للمحل انا وبنكلم ناصر يقول للعرب بكره بنجو نخطبو
مروان:تي وحق الله حرام عليك ياباتي
نجيه:ومش حرام عليك انت تلعب ببنات الناس
محمود:خليه حتى يبكي هي كلمه وحده، تبو حاجه من بره
نجيه طلعت مع محمود للجنان وسيبت مروان قريب ينتش شعره
نجيه:شن صار في تهاني
محمود:شلتها لهلها نفسيتهت تعبانه
نجيه:ياحول الله
محمود:ندوي جديات ع موضوع مروان شوفي من بيمشي وبكره نطلبو البنت
نجيه:احسن بيش يتأدب بلكي يزوج يعقل
محمود:خلاص شوفي كلثوم والبنات كان بيمشن
موده جت من باب الكوجينه :باتي تليفونك
محمود:تليفوني معايا
موده:المدار من بدري وهو يرن ناسيه انت
محمود:منو
موده:رقم
محمود:ايوا السلام عليكم
فتحي:خير ياحاج
محمود:منو
فتحي:انا فتحي
محمود:نعم شن تبي
فتحيي:ياحاج ولد اختي جاي متقدم لريهام بنتك اليوم بيجو العرب يعني قلت انقولك مهما كان انت باتها
محمود:امها انتصار خليها تزوجها ، نا ماعندش بنت اسمها ريهام ، هي السلام عليكم
سكر محمود في وجه فتحي:اسسسغفر الله
نجيه:خير انشالله
محمود:عرب ماعرب جايين لريهام ، خلي امها تزوجها
نجيه:تعود من الشيطان مهما كان هذي بنتك
محمود:ياسبحان الله توا انتي الي تقولي الكلام هضا
نجيه:هذي بنتك ياحاج
محمود:انا مانمشيش يبو يطلبوها يجوني
نجيه:باهي كلم فتحي قوله خليهم يجوك
محمود:توا نمشي للمحل نصرف ، تبو حاجه
نجيه:اها نبو حليب محمد
محمود:باهي وافطني لمروان ماتخليشي يطلع
نجيه:حاضر
محمود:هي السلام عليكم
نجيه:مربوحه
خشت نجيه للحوش لقت مروان مقعمز ف الصاله
مروان:ياامي شن الي قاله باتي هضا مانبيش نزوج انا
نجيه:بيش اتربى كويس
مروان:ياامي مانبيهش
نجيه:ولدي ونعرفك كان ماهي عاجبتك را مانابشتها ، ولا تعجبك تنابشها لكن ماتزوجهش
موده طلعت من المطبخ :امي قالتلك ميسون كلمي باتي يجيبلنا ملح كمل
نجيه:في ف المخزن استيكه داستها توا انطلعها
مروان:بايت معاك نا ، كنك ماتسلمي
موده:اهلا
مروان:تعالي هنا ندويلك
موده:شن تبي
مروات:من امتى تدويلي هكي انتي
موده:كان انت جوك اصحاب صالحوك ونسوك هما شن دارو ، نا مانسيتش الظلم الي نحطيت فيه والطريحه الي خديتها من خويا بسبا اختي ، عمري مانسامحكم كلكم ع الي درتوه فيا ، نمشي فيكم بس عمري مانسامحكم
تعبت عيونها دموع وخشت تجري لدارها
مروان:ناقصك نا وناقص درامتك لانك اول وحده ولا اخر وحده ندتاخد طريحه وعارفه كان ماتسقمي تاخدي وحده اخرى كيفها
نجيه:مستحيل تسقم ، امشي اطلع مع اصحابك انوتي الغذاا ونضبحلك تاخده
رد مروان للحوش بصدفه ماحد توقعها ، ورد علاقته بأصحابه بطريقه غبيه ومضحكه ماحد توقعها ، وردت العيله من جديد وبدا الفرح يخش حياتهم بعد انتصار طلعت منها
بس الشي الوحيد الي ماردش هي موده البشوشه الي ماتعدلش وديمه تضحك
طلعت انتصار من حياتهم بس افعالها مزالت ماطلعت
هل ريهام حتنخطب ولالا ؟ وهل مروان حينفذ كلام باته ويخطب البنت ولالا ؟ وشن حيصير لمنعم من ورا انتصار؟ وهل مصطفى حيرد لموده ويخطبها من باتها ولالا ؟ وشن حيدير سعيد بيش ينتقم من ريهام ؟