طبعا مصطفى قرا مسج سعيد ومابش يعدل عليه ولا كأنه شافه ، ف الوقت هضا كاين مقعمز مع ملاك ويهدرزو
اها مصطفى بعد سيب موده رد يحكي مع ملاك يمشي بيها وقته عشان ينسى موده ، سيب فونه وقعد يهدرز مع ملاك ، وفي وقتها كانت موده مستكه مش فاهمه شي ،مش عارفه تلقاها من اختها الي دمرتها ولا من هلها الي اطرطشو ، ولا من بوفا الي ظلمها
كانت معاها ف الدار رنده تكلم في حامد وحكالها انه قال لسعيد ع كل شي ووعد موده انه يرد الامور كيف قبل ، ووجدان روحت وموده فاتحه النت
حقت مصطفى منزل بوست ع إنه نسى الماضي وحيبدأ من جديد حياته بعيد عن كل حد خانه ودمرله حياته ، والصدمه الأكبر ان ملاك معلقتله ع انها احلى شي في حياتها انه ردلها
حست كلامه كأنه موس بلا اي تفكير ، وانصدمت من تعليق ملاك ، خشت ع الماسنجر ودزتله وهي تبكي بالشهقه (حابه انقولك قبل ماتبدا حياتك بعيد عن الي دمروك وخانوك ، ماحد خانك ولا حد دمرك ، اليوم نبيك تعرف كل شي ،وع فكره مش دازتلك نبيك تردلي ، لا والله دازتلك نبي نفهمك من الظالم ومن المظلوم ، عارف من الضحيه ف الموضوع هضا كله ، سعيد المسكين الي انضحك عليه ، عارف ليش لأن ريهام هي السبب في كل الي صار ، ريهام هي الي كانت تحكي مع سعيد ع اساس انا ، تصدق اختي اتدير فيا هكي ، واها هي سارقه صوري من فوني ودازتهن له ، اليوم كيف عرفنا الكلام هضا كله ، راجع روحك شوف من الخاين توا ، انا ماخنتكش بس انت سافرت للمغرب ورديت لوجيجك القديم ، انت الي ظلمتني وظلمت سعيد ودمرت الدنيا بلا ماتفهم شي ، انت الاناني ف الموضوع ، ربي ياخذ الحق يامصطفى ، خساره والله كنت انحبك ، بس ربي يهنيك ، ولو مش مصدق كلامي امشي اسأل حامد ولد عمي وهو حيقولك ع كل شي )
سمع مصطفى صوت المسج مسك تليفونه ولما لقى الملسنجر صورة بروفايل موده حس بشعور غريب ركباته رعشه ودموعه كانت ع وشك تنزل ، فتح المسج وقعد يقرا فيه ،وهو مش مستوعب يقرا ويرد يعاود ، تذكر مسج سعيد لما قاله نبيك ضروري وماردش عليه ، عرف ان موده ماتكذبش ، سيب ملاك وسيب كل شي وطلع قدام الحوش رن ع سعيد ع الماسنجر
مصطفى:الو
سعيد:ايوا
مصطفى:كيف الحال
سعيد:بخير الحمدلله ، قريت مسجي ومارديتش نحسابك فتتني بكل
مصطفى:شن قصة ريهام
سعيد:من قالك ؟
مصطفى:مش مهم من قالي شن القصه ؟
سعيد:هه صاحبك مضحكه طلع ضحية لعبه من بنت ال.. اعوذ بالله من الشيطان ، المهم ريهام دارت هضا كله فيا والسبب مانيش عارفه هي ليش دارت هكي
مصطفى:وشن غرضها من هضضا كله
سعيد:انا انقول انها تبي تنتقم من موده بحكم المشاكل الي صايره بينهم وتذكر زمان قصة ضرب مروان لها ف المدرسه ولما قال انها حلفت توريه تما هازي عليها انها فرخه وتهدد فيه ، شفت شن دارت الفرخه
مصطفى:ومروان وين توا
سعيد:مروان مختفي مانندرش عليه
مصطفى:تي ينعن امها الزح من شن طينتها هذي دمرتنا كلنا ، تأتو انتم انها هي
سعيد:متأكدين يامصطفى ،وتوا انا وحق الله ماني مسيبها لين انطلعه من عيونها الي داراته فينا
مصطفى:استكيت انا ، تي خوتها الزح
سعيد:يعني فهمت القصه توا ، فهمت انك ظلمتنا كلنا
مصطفى:تي الزح حتى نا كيفي كيفكم
سعيد:المهم توا شن الحل
مصطفى:اول شي سامحني يارفيقي
سعيد:تي مش وقته توا ، خلينا انفكرو في مروان كيف بنلقاه وشن اندير
مصطفى:ماتدير شي ، انا توا حنشوف كان في حجز طيران بكره لليبيا ونروح ،انشالله حتى نقعد احتياطي بلكي حد يلغي سفرته ونمشي انا ، بعدها نصرفو
سعيد:يعني اتحاول بكره تجي بنغازي؟
مصطفى:اها توا سكر ونخش انشوف المطار فيه حجز ولالا
سعيد:تم خلاص وبعدها قوللي
مصطفى:تي مش عارف كيف انوري وجي لموده شن نقوللها ،تي انا خنتها اخرى ، بيش ننتقم منها طلعت انا ننتقم من روحي وانا ظالمها ،كيف اندير بس
سعيد:القصه هذي صارت وكانا مالنش يد فيها بس وراس الي ربتني انوري امها ريهام هذي انتعبها انكرهها في معيشتها انخليها تبكي دم
مصطفى:ماتنسش حتى هي اخت مروان
سعيد:اخت عينها وحق الله مانسيبها لو اخت من
مصطفى: انا شن ندير مع موده توا
سعيد:انت اتسكر توا مني وتكلمها
مصطفى:خلاص توا بنسكر معناها انكلمها ونشوف المطار
سعيد:تم وتوا انا انكلم منعم نسأله ع مروان
سكر مصطفى وخش شاف الحجز بس مالقش مكان فاضي لكن حجز احتياطي ع امل حد مايجيش وياخذ مكانه ،بعدها عدا لحوش جده الي ف المغرب وخش للدار الي يرقد فيها قعد يفكر ف الي صار وكيف حيدير مع موده ، نسا ملاك الي سيبها وطلع ،نسا كل شي وتفكيره بس في مروان وموده كيف بيسامحوه وكيف بيرقع الي صار خيانته لموده مع حبيبته الاولى ، وخيانته لمروان مع اخته
مسك التليفون فتح الماسنجر لقى موده اون لاين رن عليها
كانت موده وقتها تبكي وحالتها حاله
موده:رنده رنده
رنده:تي ها
موده:مصطفى يرن
رنده:تدوي من جدك
موده:مش وقت بصاره بكل تهيالي
رنده:شويه حبيبي توا انرن عليك
حامد:شن في
رنده:شويه بس توا انكلمك انقولك
حامد:باهي نرجى فيك
سكرت رنده وصبت لموده
موده:سكر
رنده:كان رن اخرى ردي
موده:مانيش راده واهو التليفون قفلته ،مش بجو امه هو تي حقيته رد ضاف ملاگ شفتها معلقه عليه والله ماعاد مكلمته
رنده:تي كنك انتي افتحيه بلكي في حاجه مهمه
موده:والله ماني فاتحته ،بنتمرقد انا
رنده:عليك تسكير راس وخلاص
موده:طفي الضي وردي للي كنتي اتديري فيه انا بنرقد
دارت روحها رقدت بس كأنت دموعها معبيه مخدتها ،حست روحها تعبانه من كل شي ،من الظلم والخيانه وألتعب والفراق
تاني يوم ..
ناضت موده ع امها تكلم في كلثوم
نجيه:طيح سعده وشن مشاه لطبرق
كلثوم:توا قالها ليا منعم ، وقالي مابش يكلمني وقال للراجل قوللهم مروان معش يبيلكم خلطه
نجيه:ياربي صبرني عليه هالعيل
كلثوم:حي شكله الحاج جا ، خليني نسكر نشوفه
نجيه:روح من مصر
كلثوم:اها هو ينزل في شنطته ،خليني نطلعله،اسمعي قولي لرنده تروح
نجيه:توا انقوللها هي مع السلامه
سكرت نجيه:رنده روحي بسرعه باتك جا ، را يلقاك عندي يهزبك
رنده:حي عليا ،دوده بنروح انا
موده:صباح الخير ، باهي سلام
نجيه:صباح الخير
موده:ياامي لامتى بتقعدي تعاملي فيا هكي
نجيه:موده خطيني را انطلع الي فيا فيك
موده:سكتت ياامي سكتت
ميسون:عمتي كلمت مرام قالت جايه اليوم
نجيه:مرحبتين بيها ، هيا صبن ع الحوش وتوا نا انخش اندير الغذا
عند كلثوم :
محمود:وين كنتي انتي
رنده:مشيت نشيل في تبسي متاع اعميمه نجيه
محمود:كيف حالهم
كلثوم:كويسين الحمدلله
ريماس:خير يابتتي
محمود:انتي شن جيبك هنا
ريماس:اها
منعم:السلام عليكم خير ياباتي
ريماس اول ماحقت منعم تريحت كانت خايفه من زرة باتها لها
محمود:مرحب
منعم:الحمدلله ع سلامتك امتى روحت
محمود:توا من المطار ع هنا
منعم:باهي صلي وتريح ونبيك في موضوع
محمود:خير انڜالله ، وانتي ماقلتيليش كنك هنا امك وين
ريماس:عند عيت جدي من اول امس
محمود:كيف ،وعليش ماروحت
منعم:انا ماخليتهس اتروح
محمود:وعليش
كلهم تمو يفنصو في بعضهم مش فاهمين شي ،ماكانش في حد فاهم الا منعم وريماس الي تمت تبكي وخايفه
محمود:كنها اتبكبك هذي شن في
منعم وقتها طلع التليفون متاعه تمى يبربش فيه بعدها مدهلباته
منعم:خشو جوا سيبوني انا وباتي
محمود تما مستك ويرجى شن الي بيصير ومش فاهم اصلا منعم ع شن يحكي
خشن موده وخواتها للدار ،وكلثوم للدارها تفضي في شناطي محمود
وجدان:شن في انتي كنكم
ريماس تمت تخبط ع وجها :حي ع امي حي ع امي ياريتني مادويتلك يامنعم ياناعلي شن اندير
رنده:تي شن في
ريماس:سجللي وانا ندويله سجللي صوتي بيش يسمعه لباتي
رنده:تي شن سجللك ادوي شن درتي انتي
وجدان:اسكتن خللنني نسمع
جن كلهن حطن ودانهن ع الباب يصنطن في منعم وباتهن في الصاله وريماس ترعش وخايفه ودموعها ماوقفتش
ماخطرش ع ريماس ان منعم لما جا وتمت تدويله يكون قاعد يسجللها ، ومنعم كاين يبي يسجل بيش كل شي يكون واضح وحاط في عقله ان ريماس تحت حمايته ومافيش حد حيقدر يقربها ، تما محمود يسمع ووجه يتغير الوان ومصدوم من الي يسمع فيه
ف الوقت هضا كاين مصطفى حصل مكان فاضي وجاي ف المطار لبنغازي
اما سعيد فكل تفكيره انه يرد كل شي كيف قبل ، وينتقم من ريها م
ومروان كاين يتناسى في حياته ف بننغازي مع الشباب الي يعرفهم في طبرق
كان كل شي ، قاعد يزيد يتعقد في نظرهم بس مايعلموش ان كب شي قاعد ينحل
كانت موده تضم ف الحوش وتفكر في مصطفى الي انتهى بالنسبه لها وكيف ماتظن بعد الي داره فيها ، كانت وهي اتضضم اعادة مسلسل كسر الخواطر ع التليفزيون ،واول مره تسمع اغنيتها الي حستها دمرتها زياده قعدت تسمع فيها وتكنس في الدار ودموعها ينزلن :
كسر الخواطر لو يجيك من غريب مو غريب
لكن تموت من القهر لو يجيلك من حبيب
ماعليك عيش وسوي الي عليك ،
والي راح راح ولا تنطر يجيك
الله فوق ورحمته اكثر كثير
من حنان امك عليك .