ثاني يوم...
نجيه:موده نوضي هيا وقت ع المستشفى
موده:ماعندش نيه انوض
مروان:نوضي را انجي انشيلك من فراشك
موده تمت تكح :باهي هيا نضت
نجيه:ريتي كيف اتكحي
موده:ريماس بتمشي معانا ؟
مروان:كلمتها انتصار قالتلي لا ماتبيش تمشي عدت للمدرسه
نجيه:وعليش وهي مريضه هكي
مروان:هي حره شن دخلني بيها انا
نجيه:اختك حتى هي شن تفكيرك هضا
مروان: تي مادخنيش بيها انا
موده:باهي صباح الخير
نجيه:صباح النور
موده:امي نبي حليب
نجيه:باهي البسي علي ماصبيتلك
خشت موده لبست وصلت بعدها فطرت وطلعت هي ومروان بيمشو للمستشفى
مروان:ارجي انسخن السياره ماطلعتش بيها اليوم
موده: باهي انعدي لخواتي انشوفهن وبيبلي غادي
مروان:باهي عدي
في حوش كلثوم ..
انتصار:صباح الخير
كلثوم:صباح النور ، انشالله غير تريحتي في ابنوم
انتصار:وين نتريح وناحوشي محروق يقهر
كلثوم:الله غالب نصيب ، الحاج قال بيعدي ايجيب عمال يبدو فيه
انتصار:باهي الحمدلله
كلثوم:نوضي وجدان ورنده الله يربحك
انتصار:كيف جامعتهن مابدتش
كلثوم:مايبنش يسجلن السمستر هضا ع سبا عرس حاتم
انتصار:اها خير يعاوننك
وجدان:صباح الخير
كلثوم:صباح النور
وجدان:وين خواتي
انتصار :ف المدرسه
وجدان:ريماس عدت وهي تعبانه
انتصار:قالتلي اكويسه مافيا شي
رنده:صباح الخير
كلثوم:شن في نايضات بدري
رنده:مارقدتش اصلا انا من تجخير ريماس وبعدها نوضتهن للمدرسه
كلثوم تمت اتفنص في رنده تبيها تسكت خافت انتصار تزعل
انتصار:قالتها الي ماتجخرش
رنده:باهي ماعندش نيه اناقش ع الصبح عدن قعمزن توا انديرلكن فطور وانجي
كلثوم:افتحي الباب يدق
طلعت وجدان تفتح :اووو دودي شن دايره توا
موده:الحمدلله تمام ، شنجوكم مع الي عندكم
وجدان:توا قريب تكت بينها هي ورنده بس ربي ستر
موده:لا متوقعتها شد شعر انا
وجدان:هههههه الخير جاي
موده:بنعدي للمستشفى توا
وجدان:ارجي خودوني معاكم انفك هضا
موده:باهي هيا البسي بسرعه
خشت وجدان تجري ووراها موده
وجدان:امي بنمشي مع مروان وموده انفك الجبس
كلثوم:شن خطر عليك اسمالله
موده:صباح الخير
كلثوم:مرحب شن دايره توا
موده:اهو الحمدلله خير من امس
وجدان:ها وتيت
انتصار:باسم الله لحقتي
وجدان:ريت هالعربي الي بنلبسه
موده:هيا انتي مروان يبيب
رنده:ماتطولوش
موده:ماشيين ملاهي نحنا 😒
وجدان:هيا هيا
طلعن موده ووجدان
موده:الحيوان مدرس برا مش قادر يخششها يعني
وجدان:هيا سباق من هنا للسياره
موده:لا صدري مش ناقصه نا
وجدان:هيا بس توا تعدي يديرولك بخار ، اسمعي الي توصل الاول تركب قدام
موده:هههههن هيا ، خساره ماك بتزوجي
وجدان:عادي توا يعلمني السواقه ونديروها الي يوصل الاول يسوق
موده:ههههنن حي ع امك هيا شكله انفصل هضا
طلعن يجارن لين وصلن وطبعا فازت وجدان وركبت قدام ، وتمت موده تكحكح وحالتها حاله
مروان:ينعن جد الشيطان ، توا شن جراك وانتي مريضه
موده:هي هبعتني
مروان:شن جيبك انتي
وجدان:😁😁
مروان:ماده وجك تي عليش ماشيه
وجدان:تي كنك راقيلك ع الصبح انخاف منك وانت اتهزب هكي
مروان:باهي كنك
وجدان:تي بنفك هضا الزح
مروان:قرصها من ودنها :شنو شنو
وجدان:اسفه اسفه والله زرقت مني
مروان:انتي بنت معش تقوليها
موده:هههههههه انتي بنت عيب فليكن لديك انوثه
وجدان:قالتها جويل كاملة الانوثه
موده بلا ماتفطن بتنادي ع مروان قالتله :مصطفى
مروان :شن قلتي
وجدان:😱😱😱😱
موده:😳قتلك ولعلنا الاغنيه الي ولعتها انت ومصطفى نهارتها
وجدان :اغنية شنو
مروان:الدسكه متاع مصطفى وخداها ، مش متحشمه ع وجك وانتي اتقوليلي هكي
وجدان بتغير الموضوع:انتي مدامك ماتبيش تمشي للمدرسه الاسبوع هضا تعالي عندنا
مروان:مش ساد الي عندكم
وجدان:تخفف علينا شويه من ثقل الدم
مروان:ههههههه واجعني حالكم والله
موده:حتى نا هضا الي ناويته ، غير خايفه من الطحنات ماعنديش وسعة بال لهن
وجدان:لا ماعليك تعالي انديرو عليهن صبايا الحج متولي
مروان:ههههههه تي خواتكن الزح
وجدان:عمري ماحسيت بيهن خواتي ، عمرك حسيتي ياموده
مروان:قصدك موده اتحس هي
موده:ها ها ها ماتضحكش را
مروان:ينعن جد الشيطان زحمه بكل وين بندرس توت
وجدان:اهو مكان فاضي
مروان:وين ، اها صح اب اب ع عيونك
وجدان : قول ماشالله 😏
مروان:بطلي دوه زايده ، انزلن هيا
نزلن ونزل معاهن مروان خشت موده تضرب المضاد وتدير البخار وعلي ماتكمل موده عدو مروان ووجدان يفكو الجبس
في حوش كلثوم ...
انتصار:كان هضا انقول لمروان ايروح بالبنات من المدرسه مدامه برا
كلثوم:من يروح فيهن قبل
انتصار:يروحن مع بنات خالهن
كلثوم:باهي كويس ، رنده
رنده:نعم ياامي
كلثوم:جيبيلي رز من المخزن
رنده :حاضر هي
محمود:السلام عليكم
انتصار طلعت تجري :مرحب ياحاج
محمود:خير خير ، وين كلثوم
انتصار : 😠قاعده جوا
محمود:كلثوم
كلثوم :خير ياحاج
محمود:هاك هذينا الحاج ات الي وصيتي عليهن من المحل
كلثوم : سلمك جياب ، قتلك بنعدي لمروه مرات سالم نحجز عندها في موالح وحلويات للدفع وللعرس
انتصار:نمشي معاك بالمره نحجزو في الطباخه شوري
كلثوم:واجد عليك
انتصار:لا ياحنه نحنا عيله وحده
كلثوم انصدمت من طيبة انتصار وهدوءها قدام محمود:عقبال بناتك انشالله
انتصار :والخلوط والحاجت الاخرى
كلثوم:قالتلي نجيه شورها الخلوط والبكلاوه
محمود:تهاني ماعندها شي ، خليها تشيلكن
كلثوم:لل ماهي بدت مدرسه
محمود:لالا وقفت مش حتبدى السمستر هضا
كلثوم:خلاص توا انقوللها وناخدو نجسه ونمشو اليوم انجيبو حاجتنا كلها ع المهل وبوسعة البال
محمود:خلاص كم تبي
كلثوم:توا ناخد الي في الخزينه
محمود:باهي ولو تبي زياده قولي
كلثوم:انشالله ربي يطول في عمرك وتفرح بيهم كلهم
انتصار :امين يارب
نجيه:خير عليكم
كلثوم:مرحب تعالي
محمود:وين موده ووجدان
انتصار:عدن للمستشفى شالهن مروان
محمود:وكنهن مايقولن
كلثوم:قالنلك من امس ياحاج
محمود:اها صاح انا الي ناسي شكلي ، باهي بنعدي انا ، وانتن (نجيه وانتصار ) اقعدن مع كلثوم عاوننها ، واليوم امشن معاها للسوق ، وتوا بنتكي ع تهاني ندويلها
نجيه:انشاالله ياحاج
رنده:باتي
محمود:كنك
رنده:نبو ملمع زليز
محمود:جبت ف الشكاير هنا
كلثوم:سلمك جياب
محمود:خلاص بنعدي نا توا
كلثوم:مربوحه
طلع محمود
انتصار:زعمك كنها تهاني معش تقري
نجيه:من قالك
كلثوم:توا الحاج قالها
نجيه:انشالله خير
كلثوم:اليوم بنمشو نشرو حاجة العرس
رنده:وامتى بنمشو لحوش حاتم وقت را
كلثوم:الاحدانشاءالله غير انكملو الدفع ونتهنو بعدها نبدو في حاجة حاتم ، اسمعي نجيه اتعدي لتهاني اتقوليلها اليوم اتشيلنا بسيارتها متحشمه انكلمها
نجيه:باهي غير يطلع الحاج من عندها توا نمشيلها
رنده:وكنهم خوتي مايشيلوكم
انتصار:لا ياخيتي الرجاله مافيش وسعة بال
نجيه:رنده اهو باتي طلع بالسياره
كلثوم:شن عرفك
رنده:شفته من الروشن ياامي
نجيه:خلاص خلنني انعدي لتهاني
طلعت نجيه عدت لتهاني
تهاني :من
نجيه:حلي
تهاني :مرحبتين قبل بنجيكن توا
نجيه:كنك هدوء قاعده بروحك امالا
تهاني :اها العيال اطلعو للمدرسه توا بوهم خداهم معاه ، خشي تعالي
نجيه:ياحنه كلثوم تبيك اتشيلينا اليوم للسوق اتجيب حاجتها
تهاني :قاللي توا الحاج قتله حاضر ، ماعندي ماندير مكسده ، انحط العيال عند البنات ونمشو
نجيه:كيف سيبتي المدرسه ولا شني
تهاني اول ما سئلتها نجيه بان ع وجها الحزن
نجيه:كنك من الحاج ؟
تهاني:لا والله انتي عارفه بالي فيا نهارتها مشيت للمدرسه المدرسات حاطات بخور انا نتعب منه من السحر طحت وجتني الحاله الي تجيني ديمه هذي ، الحاج قالي معش تقري لين تصحي
نجيه:ياحول الله ، ربي ينتقم من الي سبب في مرضك ، حسبي الله ونعم الوكيل
تهاني:بس بالله عليك بيني وبينك
نجيه:معقوله انتي خيتي الصغيره والي يضرك يضرني ، هيا انراجو فيك ، انسيبك توا تبرمي ع حوشك وبنعدي انشوف كلثوم اندير معاها شي حاجه
تهاني:باهي انكمل وانجيكن
طلعت نجيه عدت لحوش كلثوم
عند مروان وخواته في المستشفى
وجدان:الله يدي رايفت عليها
مروان:وحق الله عاهه ، هيا انعدو انشوفو موده كملت ولالا
عدو وجدان ومروان لموده لقوها كملت ، خدوها وطلعو ركبو للسياره
موده:حي يدك نقصت
وجدان :حسيت روحي مانعرفهش
مروان:انتصار ترن ، كنها
موده :في من وراها كبوه
وجدان :حتى وانتي تلقطي في نفسك تدوي ارحمي نفسك شويه
موده:ربي الي يرحم مش نا
مروان:ايوا ياانتصار
انتصار:قتلك ، طلعت من المستشفى ولا مزال
مروان:اها كنك
انتصار:روح معاك البنات الله يربحك ، خالهن سيارته عاطله
مروان:اممم باهي باهي اوكي
انتصار:الله يربحك
سكر مروان:خلطه قيسها
وجدان:كنها
مروان:تبيني انروح البنات
موده:ييييه عليك قصه
مروان:مش ناقص نا اسكتي
وجدان:الله غالب انت اخانا
مروان:ماهو من ميلة بختي
رن تليفون مروان : اسكتن اها ، ايوا بوفا
موده اول ماسمعت اسم بوفا تمت عيونها قلوب 😍😍😍
مروان:خلاص انحط خواتي وانجيك ، تم ياطيري ، تشاو
وصلو للمدرسه :
مروان:ننزل انكلمهن هذينا وانجي
نزل مروان
موده ؛اسمالله علينا هن في مدارس خاصات ونحنا نعانو
وجدان :بنات البرينسيس انتصار حتى هن
موده:مالت
شويه وقعدن يسمعن في هرجه البنات
وجدان :حي ع امه مش هضا صوت مروان
موده:مش عارفه ،هو جا ووراه البنات
طلع مروان حاااامق بكل ، ركب هبد الباب وركبن البنات ريهام تبكي وريماس لا كلمه ولا نص
موده:شن في
مروان:سكري فمك
موده:باهي شن درت انا
مروان:عقاب عمرنا ياحيوانه اتخلينا بقرون ،ماهو المدارس الخاصه ماتنفعش مع وحده كيفك ياحقيره ، وحق الله ندوي لباتي
تما مروان حامق بكل ويخبط ويهزب لين وصلو للحوش ووجدان وموده خايفات يسالن وريهام تبكي وحالتها حاله
خش مروان ووراه البنات
مروان:انتصار
انتصار:نعم كنك
مروان:وحق الله انكان ماتمسكيهن عندك نقتلهن تسمعي فيا
جت نجيه تجري:سكر فمك معش اتعلي صوتك ع مرات باتك
رنده جت لوجدان وموده :شن في كنه
موده:حتى نحنا مش فاهمين شي
كلثوم:كنك كنها تبكي
مروان:اسألنها كان عندها وجه تدوي اصلا
انتصار:شن في ادوي كنه خوك
وريهام لا كلمه لانص ساكته وتبكي وخلاص
نجيه:مروان ادوي شن في
مروان:اختي المحترمه خشيت للمدرسه بناخدها نلقاها محوله محرمتها ومصبيه هي وبنتين في شلة شباب ويسهوكن
نجيه:نهار الاسود
انتصار:ريهام تنخنق من المحرمه اتحول فيها قايلتلي من قبل ، وبعدين العيال هضوما زملاءها شن فيها لو صبت معاهم
مروان:الكلام هضا تقوليه لما مايبقش عندها خوت ، لما تمسحي من بطايقنا كلمة ذكر ، بس مدامنا حيين ماتمشيش لا انتي ولا غيرك كلامك علينا ، وحق الله مانتم الا مبطلها من المدرسه باهي وقولي مروان ماقالها
انتصار:لا والله ماشالله ع الراجل ايهزب في مرات باته ، بناتي مادخلكش بيهن
مروان:بناتك هذينا من ميلة بختنا جن خواتي ، لكن وحق الله انوريها ، مابيتش نضربها لان مش اسلوبي نضرب بنت وحق ربي انوريها
نجيه:مروان خلاص احترم نفسك
انتصار:لا والله عرفتي اتربي يانجيه
موده:عرفت تربي غصب عن الي يبي ومايبيش ، الرك ع الي اتدافع ع بناتها وهن دايرات العار ، امي معش تدوي عليها باهي
انتصار:اسمعن من تدوي
مروان:الدوة مش مع الصبايا الدوه مع باتي
طلع مروان وهبد الباب وحلف يمشي لباته يدويله
وانتصار لمت بناتها وخشت في دار
نجيه:موده هيا للحوش
موده:وحق الله ماتي مروحه مش وحده كيفها اتخليني نطلع من حوش باتي ، بعد يقعد حوشها تدوي
كلثوم:يانجيه انتي عارفه عقلها اصغير اقعدي ماتعدليش عليها
وجدان:والله ماتطلعن من هنا ، تمشي تملح كان عاجبها ، خزي غلطانه وتقاوح
صارت المشكله كله بسبا ريهام ومزال ياما حيصير من مشاكل بسباها ،
بكرا تعرفو شن حيدير فيهم محمود لما يدويله مروان ، وشن الي حيصير في انتصار وبناتها وشن حيديرن من مشاكل اخرى ...
تقييمكم 😍