سكرت موده ع مصطفى وتمت تبكي معش عرفت شن اتدير ، وجعها مصطفى الي صارحها بشعوره وهي صداته ، وواجعها انها حتى ف الوقت الي مالت لشخص كان الشخص الخطأ ، فتحت النت لقت خواتها اون لاين
موده:بنات انا مضااايقه بكل
رنده : كنك شن صار 😳
موده:مصطفى كلمني
وجدان:😱😱😱 من وين جاب رقمك
موده :ماباش ايقولي ، وقالي انه مكبد عليا
رنده:وانتي شن قلتيله
موده:رفضت ، وقتله معش ترن عليا وسكرت
وجدان :غبيه وتبقي طول عمرك غبيه
موده :عليش الزح
وجدان :وشن فيها لو حبيتو بعضكم
رنده :هضا صاحب مروان كيف اتحبه تي والله يعدمها
موده :هضا الي خفت منه ، لولا هكي را والله ارتبطت بيه
وجدان :انتي اتحبيه؟
موده :مش عارفه مش فاهمه شن معنى هو ، واجدين حاولو انهم يرتبطو بيا وماعدلتش ، بس مصطفى حاسه اني ضعفت قدامه ، شي في قلبي يبيه ، وحاجه اتقولي هضا مش لكي ، مش عارفه شن اندير
وجدان:موده اسمعي انا انحس فيه كويس ويبيك جديات عرفته من نظراته لكي يوم حرقتك وخوفه عليك وهو يقول لمروان ماتهزبهش ، الراجل يحبك وشن فيها يعني لو صاحب خوك يبقى محظور عليك ولا محرم يعني ، عطيه فرصه
موده :لالا انخاف انخاف
رنده :اسمعي ديري الي يقولك عليه ضميرك
موده :ماهو المصيبه في ضميري
وجدان :قصتك قصه انتي
موده :خلنها ع الايام 😢
وجدان :ياحول الله 😣
موده :يدي تحرق مش عارفه كنها
وجدان :حتى نا الجبس يوجع فيا بكل
رنده :ياريتكن عاتقات ارواحكن سيبن النت وارقدن
موده :انا بنرقد تصبحن ع خير
وجدان :بدري
موده :لا راسي من البكا يوجع ، بنطلع نشوف باتي ونرقد ، تصبحن
سكرت موده النت وقعدت اتفكر في مصطفى والي قاله لين رقدت
تاني يوم ..
نجيه :موده نوضي الساعه 1
موده :صباح الخير
نجيه :صباح النور ، نوضي ابرمي ع الحوش قبل ايجي باتك ومروان من الجامع
موده : حاضر هي
ناضت موده توضت وصلت وخشت لامها ف المطبخ
نجيه :الشاهي ساخن كان بتفطري
موده :شن الغدا
نجيه :رز بالخلطه وبطاطا امبطنه
موده :نبيش نفطر توا نتغدا بالمره
نجيه :باهي عدي ابرمي ع الحوش قبل باتك يجي
موده :حاضر
عدت موده برمت ع الحوش ، خشت لدار مروان
موده :الهمجي هض مش عارفه امتى بيقعد بنآدم ، الصبر ياربي وخلاص
نجيه :موده افتحي الباب يدق
موده :يحسابوني عنكبوت فيا عرم ايدين ياربي فرجها ، منننن
ريهام (بنت انتصار ) :افتحي
موده : اهلا
ريهام :خير
موده :خشي تعالي
ريهام :باتي جا
موده :لا مزال ف الصلاه
ريهام :وين امك
موده :ف المطبخ خشيلها
ريهام :خير ياعمتي
نجيه :خير ، كيف حال امك وريماس
ريهام :الحمدلله ، قالتلك امي كان عندك حب شربه عطيني نست توصي باتي
نجيه :عندي ، عدي ياموده جيبيه من المخزن
موده :تعالي معايا ريهام
ريهام :كنك انتي حزينه هكي
موده :لا ماني حزينه اسمالله كني
ريهام :مش عارفه كنك
موده :مافي شي ، هاكي هو حب الشربه
ريهام :طالعين اليوم
موده :اها ماشيين لعيت عمي
ريهام :بتحددو العرس ؟
موده:لا مانظنيش كان هضا را اعميمه كلثوم قالتلكم
ريهام :قتلك اصحاب مروان ايجوكم
موده :من الميلود معش جو عليش تسألي!!
ريهام :اممم لا شي ، سلام توا امي تراجي فيا
طلعت ريهام وموده ع وجهها علامات تعجب :نهارها اسود كان تطلع مكبده ع مصطفى التيسه تحسابهن يمشن عليا الطروح هذن ،حي ع امك ياريهام كان تطلعي حاطه عينك عليه ، حي عليا كني غرت ولا شنو ، لالالالالا مانحبش انا ، موده ردي بالك انتي ماتحبيشي ماتحطيشي في عقلك ، بس والله هو يهبل ، ياربي صبرني شن اندير
مروان :موده
موده :ياحيوان فجعتني
مروان :كنك متنحه ف المخزن هكي
موده :اها لا شي ، امتى جيت انت
مروان :توا كيف جينا
موده :باتي جا
مروان :اها وجوه رايق كان بتطلبي منه حاجه
موده :ههههههه لا مانبي شي ، عندك رصيد
مروان :عندي اها
موده :دزلي
مروان :تحلمي
موده :باهي باهي
مروان :حلي يارا
موده :تي بطل بخل
مروان :اطلعي من راسي ، توا جايين سعيد ومصطفى يتغدو معايا
موده : 😳😞
مروان :كنك انتي
موده :لا شي
مروان :رايحه تخوفي انتي را افطني لروحك
موده خافت من كلام مروان :عليش شن درت
مروان :رايحه تسرحي واجد
موده :تهيالك بس
مروان :اسكتي شويه ، ايوا بوفا ، اها ف الحوش ، هيا توا نفتحلك
موده :جوك الدراه
مروان :احترمي نفسك
موده :عطك كسره في يدك ، اااه والله حسيتها وحق ربي نقول لباتي
مروان :امشي حطي الغدا مع امي امشي
طلعت موده من المخزن لقت باتها مع امها ف المطبخ
موده :خير ياباتي
محمود :خير خير
نجيه :تعالي ديري امسير
موده :هيا حاضر
نجيه :باهي ياحاج ماكملتليش
محمود :عديت صليت ، ولقيت شايب شكله كويس سألته قالي والله ناس اتناسبهم وانت مغمض كلهم محترمين ومن عيله اكويسه وعمرنا ما شفنا عليهم حاجه شينه
نجيه :باهي ماشالله ، وتوا شن بتدير
محمود :ان شاء الله بنتغدى ونعدي لكلثوم انخليها اترد عليهم بالموافقه وخلاص ، خليني نعطيها ونفتك من الهرجه ، انخاف نرفض اندير حاجه من ورايا نندم ،
نجيه :مدامه هو كويس وهله اكويسين وافق وتوكل ع الله
محمود:هضا الي حيصير ان شاء الله
موده :درت المسير ياامي شويه توا انجي
عدت موده تجري رنت ع وجدان
موده :ياحيوانه مبروك باتي بيرد ع عماد بالموافقه
وجدان :احلفي قولي والله
موده :وحق الله باهي توا قالها
وجدان :يناعلي بنزغرت ، بيغمى عليا
موده :مبروك ياقرده ، وجك توا
وجدان : اسمعي خطرها البسي حاجه سمحه اليوم بنمشو انحددو عرس حاتم
موده :حي عليك فرحه وحي ، تي الرصيد يصفر وجك ، انحايل ع مروان اخرى ايدزلي
وجدان :توا نسرقلك من امي وجك
....
موده :ينعن جده صفر بكل، ياامي
نجيه :ها
موده:نبي رصيد
محمود:شن اتديري بيه
موده:ياباتي صفر عندي ، وبنكلم صحباتي انشوفهن بيمشن للمدرسه ولالا
مخمود:قولي لمروان يجيبلك كرت بعدين
موده :قوله انت انا كان قتله مش حيابى ، حي خلاص هو جاني اجنهين
محمود:من من ؟
موده :منعم يرن اكيده هو ، ايوا ياغالي
منعم :ها وصلن
موده :نجك ليا انعني مانفقدك ، وجدان قالتلك
منعم :اها توا قالتلي
موده:منور ياغالي
منعم :وجك خلاص
محمود:منعم دزلك
موده:اها
نجيه :هاكي شيلي الميه و ضبحي ع مروان ياخد السفره
طلعت موده ف السقيفه :مروان
مصطفى وهو ف المربوعه :طلع للسياره توا ايجي
موده اول ماسمعت صوته حست بحاجه غريبه كانت اتمنى انها تحكي معاه بس مستحيل
ردت للمطبخ
نجيه :كنك ماعطتيه
موده:طلع للسياره
محمود:هاتي انشيله
نجيه :لا ياحاج معقوله خليه توا يجي المنجوه هضا
محمود:غير هاتي بس
نجيه :هاكي حطيلنا ف الدار
حطو الغدا تغدو وضمت موده المطبخ
نجيه :بنخش انقيل انتي ، بعد توتي نوضيني
موده:وانتي ماتبيش تلبسي
نجيه :ريت هالعربي الي بنلبسه غير اوتي انتي بس
موده :باهي حاضر
نجيه :وردي بالك اتخبطي حاجه باتك راقد
موده : 😒 باهي
خشت موده تلبس بعدها طلعت بتمشي لحوش كلثوم علي ماناضت امها ووتت
وهي طالعه لقت مصطفى مقعمز في سيارته بيمشي ، مابتش اتدير اي شي وجت بتمشي نزل مصطفى من السياره
مصطفى :موده موده
موده :مصطفى اسكت را يحقنا مروان
مصطفى :مروان راقد هو وسعيد
موده :بنمشي انا يامصطفى بالله عليك
مصطفى :مانكش ماشيه لين اتقوليلي كنك
موده :ماكنيش يامصطفى
مصطفى :انتي اتحبيني ولالا
موده اول ما قاللها هكي انفجعت تمت ترعش اكثر :سيبني بس خليني انعدي
مصطفى :مانيش مخليك تمشي لين اتردي عليا
موده :انحبك والله انحبك غير خليني انعدي
مصطفى اول ما موده قالتله هكي تما متنح معش استوعب شي قعد مش مصدق الي سمعه ، اما موده في عدت تجري فتحت باب الجنان ومشت لحوش كلثوم وهي ترعش ع بعضها
وهي ماشيه تمت مش مصدقه الي قالاته مش فاهمه شن خلاها اتقولله هكي ، الخوف ولا هي صح اتحبه ، تمت اتدق ع الباب وهي متنحه مش مستوعبه الي داراته وكيف جت جراه لمصطفى يصبي قدامها ويسكر عليها الطريق ومايخليهش تمشي لين اتقولله انحبك
حاتم :كنك ترعشي هكي انتي
موده :لا غير قطوس فجعني
حاتم :خشي باهي
موده :خواتي وين
حاتم :في دارهن يلبسن
كلثوم :من ياحاتم
حاتم :موده ياامي
موده :خير يااعميمه
كلثوم :مرحب امك وتت ولالا
موده :اها نوضتها وانا طالعه بتوتى
رنده :تعالي يادوده
عدت موده لدار خواتها تجري قعمزت ع السرير وهي اتنهد واتنفس بالقوه وترعش
وجدان :باسم الله كنك
موده :سكري سكري الباب
رنده :تي شن في
موده :درت مصيبه
وجدان :شن درتي ياهمي 😱
حكتلهن موده ع الي صارلها مع مصطفى كله
رنده :نهارك اسود وكان شافكم باتي ولا مروان ، افرضي حاتم ولا منعم جايينكم للحوش شافوكم
موده :مش فاهمه انا شن صار ، هو سكر عليا الطريق وحق ربي ، المشكله اني قتله انحبك
وجدان :موده ماتكذبيش ع روحك انتي اتحبيه
موده 😭 :ياريتني مارديت عليه ع الفيس ، ياريتني ماشفته ولا شفت لهفته يوم انحرقت ،ياريتني ماحبيته وجدان :عليش تبكي توا حقي كيف خربتي كحلك ، خلاص دوده حبيبتي خلاص
رنده :خلاص حتى نا حنبكي ، لم ابكي لن ابكي
وجدان :توا انتي بحتي ف اختك المغوليه هذي وشوفي العاهه الي عندها توا يهون عليك همك ، في حد يقول لن ابكي لن ابكي ، نظام سبونج بوب هضا
كلثوم :هيا يابنات
رنده :خلاص هيا امسحي دموعك وواسي روحك وهيا نطلعو
موده :هيا
طلعن ركبن للسيارات وعدو لعيت عبدالرحيم عمهم بيش ايحددو فرح حاتم وريما ، في نفس الوقت عدا محمود زاد يسأل ع عماد ، ومروان واصحابه طلعو للكافي كالعاده
عند مروان وصحابه ف الكافي ...
مروان :انت يادرش كنك اليوم مش طبيعي بكل
سعيد :اها حتى نا ملاحظ
مصطفى وهو مانح :تي طلعت قدامي قالتلي انحبك
مروان :قالتك انحبك دارت فيك هكي ههههههههه
سعيد :الي قاهرني انه بريء ومصاحبنا الزح
مروان :ارجى بس ، وانت شن قلتلها
مصطفى :شي انصدمت ، استكيت
سعيد :حول ماتشدنيش يامروان بنعزق روحي بننتحر من ع الكرسي هضا
مروان :ههههههه تي الزح وكنك ماقلتلها انحبك
مصطفى :قلتلها من قبل ،وبعدها ماجتش فرصه انقوللها
سعيد: فرصه؛تي الزح الشباب يراجو الفرصه لحاجات اخرى مش لكلمة انحبك
مروان :هههههه تي هضا ع نياته مزال وبيجلطنا
مصطفى :يعني انقوللها انحبك بلا سبب هكي عادي
سعيد :هههههههههه لا بننتحر جديات انا
مروان :هضا يبيله دروس مزال
كان مروان وسعيد يضحكو ع مصطفى ، ومروان مايندريش ان الينت هذي هي اخته ، وسعيد مايندريش انها البنت الي في عقله بس مخليها للزواج كيف ماقاللهم
...
بكرا تعرفو شن حيصير مع موده ومصطفى ، وهل محمود حيوافق رسمي ع خطبة وجدان كيف ماقال ولالا..
تقييمكم 😍