مودة بعد سمعت صوت العياط عزقت السندويتش وصبت تجري تمت تصنت كويس بالك تهيالها بس تأكدت ان الصوت صوت تهاني ،ماعرفتش شن اتدير عدت لدار مروان ،دقت وخشت لقاته مزال واعي ع النت وحاط السماعات في وذانه
موده:مروان مروان
مروان:كنك ، كنه وجك منصفر
موده:صوت اعياط برا ، صوت تهاني
مروان :شن في
موده:مروان مش وقت غباء وين نندري انا صبي شوف بسرعه ، علي مانوضت امي ، ها أسمع مزالت اتعيط
مروان:اها حي ع امه ، حولي خليني نطلع
طلع مروان وعدت موده نوضت امها ناصت مفجوعه وحالتها حاله ، لبسن محارم الصلاه وعدن يجارن شور حوش تهاني ، ع طلعة حاتم حتى خو مفجوع
حاتم:شن في
موده:مش عارفه تهاني تعيط
مروان:حلي حلي ياتهاني
حاتم:دانا افتحو الباب كنكم
شويه وانفتح الباب
دنيا:الحقو ماما مش عارفه كنها
نجيه:كنها امك
دنيا :مش عارفه
خشو يجارو لقو تهاني طايحه وتعيط ومش واعيه
موده:اسمالله كنها
دنيا تمت تشهق ببكاها :متعودين لما نرقدو تحطلنا ع قرآن ، أول ماولعت القرأن قعدت مش طايقه حد يدويلها وتقولي راسي ،رقدت امجد وقعدنا ساهرين انا ودانا اشويه طاحت وتمت تعيط
نجيه:اعوذ بالله من الشيطان ، اقرا عليها يامروان
مروان:نقرا حنكم هذك ، انا كنت نسمع في اغاني شي حاجه تطلع منها اتخش فيا مش شوري توا نمشي انوض باتي
نجيه:عدي ياهمي بسرعه المرا في حاله
حاتم:توا نقرا عليها نا وكلمو باتي ومنعم
بدا حاتم يقرا وتهاني عياطات وحاله لين شويه وجاها محمود ومنعم
محمود:كنها كنكم شن في
نجيه : شكلها راكبها مس المرا
محمود:لا حول ولا قوة الا بالله ، تصيرلها ديمه الحاله هذي ، عدي ياموده جبيلي اميه نقرالها عليها
موده:حاضر ياباتي
عدت موده جابت اميه ، وقعمز باتها يقرا ع الميه
دنيا :ماما ديمه يصيرلها هكي وبابا يقعد يقرا عليها
دانا :اها والله لين انخاف مرات
موده :ماتخافنش ماما مافيها شي
محمود :روحو انتم ، انا توا نصرف مش اول مره هذي تصيرلها
حاتم :تبي حاجه ياباتي نقعد معاك
محمود:لالا غير روحو ، عشان حتى لما تفوق ما توجعهش روحها
نجيه :صح صدقت هيا انروحو ، ربي يشفيها ان شاء الله
طلعو نجيه وموده والشباب ، ع طلعة كلثوم بتجيهم
كلثوم :كنها تهاني
حاتم :شكله مس
كلثوم :اسمالله الكريم منين جاها
موده :البنات قالنلي ديمه تصيرلها
منعم :وحق الله طلعت بلا وعي حتى وجي ماغسلته
كلثوم :ياناري مسكينه
حاتم :من كان واعي فيكم سمعها
موده :انا ، وحتى مروان واعي غير حاط السماعات
منعم :وين حل هو خطرها ، نوضني انا وباتي رن علينا ومعش حقيته
موده :توا اتشوفو حنروحو نلقوه ايركع ويصلي
حاتم :ههههههه وحق الله مافيه عقل
كلثوم :ياناري ع تهاني والله وجعتني
نجيه :ربي يشفيها
موده :باتي بايت عندكم هو اليوم
كلثوم :لا ماهو عندنل
موده :ريتي الحيوانه انتصلر ولا طلعت لاشفت ضرتها كنها
كلثوم :هيا تصبحو ع خير
عدو كل واحد لحوشه وفعلا خشن نجيه وموده لقو مروان ايصلي
موده :هههههههههه مش قتلكم
نجيه :ماشالله ، مايذكر ربه الا ف الزر
موده :جهنم وبئس المصير
مروان :الله اكبببر
موده :لو تأذن من هنا للصبح مانيش ساكته ، ياوويييلك من ربي خليك انشالله يسلط عليك مملكة الجن كلها
نجيه :اسمالله الكريم ، كنك تدعي ع خوك انتي
موده :عارفته قريب يديرها ع روحه من الخوف هههههههه
نجيه :بنرقد انا تصبحو ع خير ، وارقدو حتى انتم سادكم الساعه قريب اتخش ع 4
مروان :ياكلبه تدعي عليا
موده :قوليله ياامي قوليله ، يدي يدي محروقه
مروان :ماعندش نيه نضربك بس
موده :انشالله وانت راقد يطلعلك واحد من الروشن ، عارفها سماره متاع الفيلم
مروان :ينعن ولدين هلك باهي يابهيمه مانيش راقد في امها الدار
موده :ههههههههههههه وووووو خواف
مروان :بترقدي ولا تحصلي كف توا
موده :حول باهب ماتمدش يدك ، خليني ناخد قشاشي ونخش داري
خشت موده لدار التليفزيون ، خدت باقي سندويتشها والعصير وفونها
مروان :عطيني قرمه من نصك
موده :روح
مروان :عطيني الزح
موده :امسكه كله يامفجوع
مروان :خير من وجك
موده.:تصبح ع خير
خشت موده لدارها وهي تفكر في تهاني ومنظرها وهي تعيط وتقول في كلام مش مفهوم وگأنها شخص واحد اخر بكل ، مش تهاني الي يعرفوها الي فارضه احترمها وشخصيتها ع الكل
فتحت النت لقت مسج من مصطفى
مصطفى :عدنا
موده وينك
سامحيني طولت عليك شكلك رقدتي تصبحي ع خير
موده :لا مارقدتش غير كنت مشغوله اشويه
مصطفى : اها ،قلت هذي رقدت
موده :لا انا نصلي الفجر ونرقد عادة ف العطله
مصطفى :خلاص السمستر التاني قريب يبدا
موده :اها انشالله خير
مصطفى : طبعا انا وسعيد ومروان فشل لا قرايه لا شي
موده :اها مريحين روسكم ، انت امبدري كنت بتقولي حاجه شنو
مصطفى :نسيت والله
موده :اممم ، باه ، خلاص توا بنسكر انا
مصطفى :بدري
موده :لا بنحاول نرقد
مصطفى :باهي انخليك ع راحتك
موده :تصبح ع خير
مصطفى :وانت من اهله
سكرت موده وكان خاطرها تعرف مصطفى شن بيقول ، وفي نفس الوقت كان مصطفى ايفكر فيها وخاطره يقوللها انه معجب بيها بس ضميره يأنب فيه عشان مروان
فكره ورا فكره لين رقدو هما الاثنين في نفس التفكير ونفس الوقت بس المكان يختلف ، وما وصلوش لأي حل موده كانت تراجي في مصطفى شن بيقول ، ومصطفى يقول في نفسه خليها ع الايام
تاني يوم الصبح ...
مروان :موده موده موده
موده :عطك ايوالله هده ع الصبح ، ها ياهم موده الاسود شن تبي 😩
مروان :ساعتي امس سيبتها ع مراية الحمام وينهي☺
موده :ياربي صبرني توا منوضني ع سبا ساعه يامروان ، حسبي الله ونعم الوكيل فيك ع الصبح 😠
مروان : قوليلي وينهي بعدها تحسبي كيف ماتبي 😒
موده :قاعده في درجك يامروان ، ماهو كان اتدور اكويس تلقاها يامروان 😡
مروان :ماهو انا عارف واهي لابسها 😁
موده :ياحيوان ووووه ياامي عليك قهر ياربي صبرني ياربي ، انشالله اتموت باهي ثقل دم ع الصبح ، منوضني بيش يمروجلي كبدي زعم كبدك ع الصبح ، انشالله الجل متاعك يخرب ، وسيارتك تعطل ، وموبايلك يطيح منك في خرارة المجاري ، ويطلعولك مملكة الچن باهي 😲😢😣😤
مروان وهو طالع من باب الحوش :ولك مثلما قلتي هههههه 😜✌ ، بعدها طلع وهو يضحك وهبد الباب بالقوه
موده :هبده انشالله
نجيه :نوضي ياللي اتعددي ع عمرك ع الصبح ، بنعدو لتهاني انشوفوها بعدها بنمشو لكلثوم انشوفو وجدان
موده :مالت علي وعلى حظي الاسود ، انا وجه نوم انا ، منك لله يامروان
صبت موده صلت وضمت دارها بعدها خشت للمطبخ لقت امها اتدير في الفطور فطرت معاها ، وعلي ماامها دارت الغدا ضمت الحوش بعدها لبسن وعدن لتهاني
نجيه :كنك شن صارلك امس
تهاني :والله ماني عارفه ، اهو الحمدلله ع كل حال
نجيه:ياحول الله
تهاني :الي فيا هضا سحر صارلي.بعد ماجبت امجد بحوالي سنه ،، قعدت انعاني منه ، مافي شيخ الا ومشيتله وما في شي وما درته ، مديورلي بيش يفرق بيني وبين محمود ، تعرفي مرات انحق محمود قدامي كيف العفريت نقعد مش طايقته ، ولولا ان بيني وبينه عيال ومتحمله وصابره وهو متحملني وصابر عليا وع الي فيا ، راني مطلقه من زمان
، بس بالله عليكن حتى موده كبيره توا مش صغيره مانبي حد يعلم بالي صار امس ، بالذات انتصار
نجيه :ياخيتي الي صار امس مانك مسؤوله عليه هضا ابتلاء من ربي ، وربي يضر الي ضرك
تهاني : امين ياربي ، قالتلي دنيا ع الي صار امس ، تحشمت ان حاتم ومنعم ومروان شافوني هكي
نجيه :هضوما كيف عيالك عليش اتحشمي منهم يابتي
تهاني :ربي يكملك بعقاك يانجيه ، يعلم الاه قديش تعزي عليا
موده :وينهن البنات
نجيه :حاطتهن في منتدى صيفي هن وامجد يمشن وقتهن خيرلهن من الحوش
نجيه :صح والله احسن حاجه درتيها ، باهي مانعطلكش ع حوستك اكيد الحاج اليوم بايت عندك ، تبي اي حاجه كلميني
تهاني :بارك الله فيك
نجيه :هيا موده ، هي بالسلامه
طلعن من تهاني
موده :وجعتني والله
نجيه : ردي بالك تدوي لحد ع الي قالاته حتى خواتك
موده :حاضر ، وين ماشيه انتي
نجيه :انعدو انشوفو وجدان
موده :رايحات اشر من الدايه ام زكي وفريال ، اندوحو من حوش لحوش
نجيه :سكري فمك
رنده :مننن
نجيه :حلي
رنده :هلا هلا
موده :خير حيوانه
رنده :اهلا بهيمه ، خشو تفضلو
نجيه :خليتن فيها تفضلو انتن بعد هالشتيمه
رنده :ههههههه اسفه اعميمه ، تعالن خشن
كلثوم :تعالي يانجيه خشي هنا في المنور
نجيه :خير ، كيف حالك اليوم
كلثوم :الحمدلله ، نحشي في هالبراك ماعاد كمل
نجيه :هاتي نحشي معاك
كلثوم :اليوم تغدن معانا الحاج مغير سو لا عندي لاعندك
نجيه :مدايره كسكسو ع حطة الخضره
كلثوم :جيبيه ونتغدو مع بعضنا ، قبل بندير مكرونه مع البراك ، بااش منها ونتغدو بكسكسيك هههه
رنده :صح اعميمه خليكن
نجيه :خلاص عدن انت الاثنين ، جيبن الغدا من الحوش
موده :هيا باهي ، خطرها عندي اخت هبله اسمها وجدان وينهي
رنده :همي الاسود مسبله بالكسر وراقده، هيا نمشو نجيبو الغدا
طلعن رنده وموده
رنده :كنتي واعيه امس لما اتعبت تهاني
موده :اها انا الي سمعتها وهي تعيط
رنده :ياناري وجعتني
موده :حتى نا والله ،ارجي نفتح الباب
رنده :سيارة من هذي الي خشت
موده :ييييه عيت مؤيد(خو موده شقيقها اكبر واحد مزوج ميسون)
رنده :خشي خشي بيش يحقونا طالعين بالغدا بسرعه
خشن يجارن جابن الغدا وطلعن قبل مايوصلو عيت مؤيد ف الحوش
شويه وصلو وهما طالعين
مؤيد:وين وين شايلات قشاشكن
رنده :تعالو في حوشنا
مؤيد:كنكم وين امي
موده :متغديين عند اعميمه كلثوم
ميسون :هلا
موده :تعالو توا انسلم عليكم جوا ، ساخن هضا معش نقدر نشمره
مؤيد :هيا تعالن
خشت موده :امممميي
نجيه :ها كنك ماتقوليليش انكب
موده :شن انكب تحسابيني فرخه ، عيت مؤيد جو
كلثوم :مرحبتين
ميسون :السلام عليكم
نجيه:تعالي ياحنه خشي ، اهلين
سلمو كلهم
كريمه (بنت مؤيد) : حير اعميمه
موده:اعميمه عينك قولي موده ، وين خوتك
كريمه:برا مع بابا
رنده:تعالي نطلعوله
موده:خير ، كيف حالك يااخي العزيز
مؤيد:كنها هذي مفطرينها مرقن باللحم وكاسن من الخمر ولا شنو
موده:ضغضغني بيش نضحك
رنده:ههههههههههههههههه والله اتضحك وحق ربي
موده : 😒😔
محمود الصغير (ولد مؤيد) : اعميمه بابا جابلكم حاجه سمحه
موده :شنو شنو
رنده :حاتم جا ، من الي معاه هضا
موده :حامد ولد عمي عبدالرحيم
حاتم :اوووو مؤيد عندنا ، مرحب
مؤيد :خير ياباشا ، حامد ، وين وين معش حقيتك
حاتم :خير غوالي عمو
حامد :خير يابنات
رنده :خير ياحامد
موده :اهلين
حاتم :خشن جوا انتن
موده :هيا خاشين عليك هم اسود
خشن موده ورنده صبن مع كلثوم ونجيه وميسون ف المطبخ شويه بعدها طلعن يصمطن ع وجدان
رنده:وجداااااهعنن
موده:ههههههههخ خطرتي عليا الي في الفيلم غبي منو فيه سلطاااااهعن
وجدان :صباح الخير
موده :صباح القايله ، موده بجلالة قدرها جايه متغديه عندك وانتي منخمده
وجدان :ماهو يدي
موده :يدك را ، مزلتي مانشليتي وخشيتي في غيبوبه
وجدان :اعوذ بالله ع الصبح
رنده :صبي صبي ، حتى ميسون برا
وجدان :هيا نضت
ناضت ميسون ، وعدن موده ورنده للكوجينه هدرزه ومنابشه وغسل اماعين لين طاب الغدا حطو تغدو وضمو حوستهم وقيلو بعد ناضو طلعن ميسون ورنده فرشن ف الجنان كان يومها جو سمح مش صقع ، ودارت موده قهوه ، ومحمود ومحمد (عيال مؤيد ) عدو دقو ع تهاني وانتصار وجو
محمد :تثار مث قاعده
موده :هههههههه لنقانها تثار ههههخه
نجيه :هههه تحشمي ياكلبه
محمود :واعميمه تهاني قالت توا انجي
نجيه الصغيره (بنت مؤيد) : ماما نبي الحمام
كلثوم :عدي يارنده خششيها
رنده : 😒 باهي ، تعالي هيا
تهاني :السلام عليكم
كلثوم :مرحبتين كيف حالك اليوم
تهاني :الحمدلله
نجيه :قعمزي تعالي
قعمزن شربن قهوه ، وموده حطت العداله لأمها وخودلك ياتهدريز
كلثوم :بكرا جايين عرب لوجدان ، بيش اتجو
تهاني :ماشالله ربي يتمم ع خير
ميسون :ربي يكمل عليها انشالله
كلثوم :انشالله
حاتم :امي طالع انا وحامد ومؤيد تبو حاجه
كلثوم :سلامتك ، جيب معاك خبزه بس
نجيه :ياخيتي بسلامتهم مايقعدو بكل
ميسون :محمد ياماما تعال هنا سيب الطين
موده :وين دندونات وامجد
تهاني :مزالو ف المنتدى ايروحن ع المغرب
موده :باهي تمام
قعدن تهدريز وضحك لين ادن المغرب صبن صلن ، وردن شربت شاهي لعند ادان العشاء روحت تهاني وخشن الباقيات لان الجو صقع وجا مؤيد
مؤيد:ميسون هيا لبسي العيال والبسي
نجيه :بدري
مؤيد :لا وقت ليل ، بكرا توا انشاءالله انجي
كلثوم :قالك باتك ع العرب الي جايين لوجدان
مؤيد:اها كلمني
كلثوم :راك تنسى بيش اتجي انت خوها الكبير
مؤيد:لا انشاءالله توا انجي، هي تصبحو ع خير توا
ميسون :مع السلامه تصبحو ع خير
نجيه : وانتي من اهله ، هيا موده
كلثوم :خليكن
موده :بنبات هنا اليوم ، بنمشي انجيب توتي وانجي
نجيه :انتي حره نا بنروح
موده :انجيب توتتي وانجي خلي الباب مفتوح
رنده :رديه بكل توا القطاطيس يخشن
موده :باه
موده طالعه ومنعم خاش
منعم :ينعن ، الزح فجعتيني
موده :انت الي فجعتني
منعم :انصبيلك ولا تروحي
موده :لا امي سبقتني توا انعدي وبنرد خلي الباب مردود
منعم :باهي عدي
عدت موده جابت توته وردت
وجدان :مسرع
موده :بنجيب توته نا مش دولاب
رنده :موده موده
موده :ها ها ها كنك
رنده :باهي وراس دودي عدي ادوي لمنعم يعطيني فوني والنت
موده :باهي ارجي ، وينه هو
رنده :في المربوعه
موده :توا انعديله
طلعت موده لمنعم
موده :منعم 😌
منعم :البراءه هذي في من وراها كارثه شن في
موده :منعم عطي لخواتي فونهن والله حرام مكسدات بلا تليفون ولا نت ، وانا قدامهم معايا وهن لا
منعم :شن رايك عندي فكره احلى ، ناخده منك متاعك وتبقو كلكم سوا
موده :لاعاد ظلم هكي
منعم :اقلبي وجك
موده :بتهي باهي وراس نعومه
منعم :قتلك كم مره معش تقوليلي نعومه
موده :باهي هيا ، عارفته باتي عاطيهن لك
منعم :وكان درتن حاجه هكي ولا هكي
موده :لا والله لا
منعم :خوديهن من الدرج هنا
موده :يناعلي نجك ليا وخلاص
خدتهن موده وطلعت تجري عدت لخواتها
رنده :ها عطاهن لكي
موده :عيب يا موده حنى نا
رنده :ووووووه عطاهن لها يناعلي واخيرا
وجدان :علميني الزح كيف نقنعهم هكي ، شنو هضا
موده :خودي فونك واسكتي
خدن كل وحده فونها
وجدان :طافي شحن ، انشالله باتي مس لاعب فيه بس
موده :غباء غباؤ هو ، ماهو مسكر بباسوورد تلزح ، باتي مش ذكي لدرجة يفك الباسوورد
رنده :حيوانه ههههههههو
وجدان :الشحن وين
موده :هو
فتحت موده النت من متاع منعم ، ووجدان شحنت فونها شويه وكلمت عماد ماشعفتش ، ورنده خلاته ف الشحن ، بعدها نادت عليهن كلثوم بيش يتعشن ، تعشن وضمن المطبخ وقعدن شويه بعدها رنده فرشت لموده وكل وحده خشت فراشها
فجأه وجدان مسكت فونها تمت تبحت فيه :حبيبي انت والله انحبك ياتوأمي يانصي انت ، ياقلبي ربي يخليك ليا ونقعد مراتك يارب
موده : 😳 حي ع امه هذي تدوي لروحها وحق ربي تخوف
رنده :ماتخافيش ماتخافيش ، مش من النوع الي يخبش تدوي تدوي وترقد بروحها ههههه
موده :تي شنو هضا كنها
رنده :كل يوم قبل ماياخدو منها فونها ، تفتح ع صور عماد وتقعد تدويله هك
موده :ع قولة عبله كامل ، يشفي الكلاب ويضرك
رنده : هههههههههه قويه
وجدان : 😍 كنكن انتن
موده :لا شي سلامتك ، بنات
رنده :ها
وجدان :كنك
موده :مصطفى هضا مش حيسيبني لين نكبد عليه
رنده :اوووووو
موده :والله مش عارفه كني ، بصراحه من يوم الحرقه وهو في بالي وسبحان الله لقيته دازلي ، بس نقنع في روحي بإني نكرهه
وجدتم :معناها حتحبيه
موده :لا مانبيش
رنده :انخمدي انتي وياها ورانا حوسه بكرا
موده :هو دزلي ،، حي ع امي وحي
وجدان :كنك
موده :دازلي ، موده مروان كبس محادثتنا في فوني ، وتوا تعارك معايا ومروح😱