خشت موده وعدا منعم ركب سيارته ورن ع باته
منعم :ايوا احويج قاعد في المحل ؟
محمود:اها ، كنك شن في
منعم:لا نبيك في موضوع ، انجيك ؟
محمود:تعال انراجي فيك
سكر من باته وعدا شور المحل ، ةصل نزل من السياره وخش لمحل باته
منعم : السلام عليكم
امين (عامل في محل باتها ) : وعليكم السلام ، اهلا يامنعم
منعم :شنجك امين
امين :الحمدلله ، انت عامل ايش
منعم :الحمدلله وين الحاج
امين :الحج قاعد جوه في المخزن اناديلك عليه
منعم :لا توا انخشله
امين :ماشي ، انجيبلك قهوه ولا تشرب ايش
منعم : لا مانبي شي ، جاي لباتي في موضوع بس
امين :اوكي
خش منعم لباته ..
منعم :احويج كيف حالك
محمود :مرحب ، كنك شن في ، تبي فلوس ولا شنو
منعم :لا لا لا جايك في موضوع اخر
محمود :بتخطب
منعم :ههههن تي وسع بالك ياباتي ، جايك في الموضوع
محمود :احكي نسمع
منعم :الموضوع ع وجدان
محمود :بت الكلب هذي كنها
منعم : الشاب الي تكلم فيه وجدان كلمني وقالي يبي يتقدملها
محمود:ومن وين جاب رقمك
منعم :دورني ع الفيس ودزلي وعطيته رقمي وحكالي انه يبيها ويبي يتقدملها
محمود:وهو شن عنده
منعم :ماحكيتش معاه في تفاصيل بس الي عرفته انه يقرا معاها في الجامعه في نفس الكليه
محمود:اهاااا وماقالكش امتى بيجي
منعم :قالي امتى ما يناسبكم قولي
محمود: خليه يجيب هله الخميس الجاي
منعم :ووجدان ياباتي
محمود :كنها
منعم :بتقعد محبوسه لامتى
محمود :هاك المفتاح افتح عليها ، انا اليوم ساهر ع الكارطه مع الرجاله ، وبنروح انبات عند انتصار مش جايكم ، ماعندش نيه انشوفها الكلبه هذي
منعم :وسع بالك ياباتي ، الراجل طلع ولد ناس وناوي الخير
محمود :توا انشوفو الخميس الجاي
منعم :باهي تبي حاجه توا
محمود :وين ماشي
منعم :بنعدي للحوش نفتح ع وجدان وانشوف امي بعدها بنطلع مع الشباب
محمود :باهي ، مربوحه ، وكلم مروان طلع من الحوش زعلان امبدري ادويله يرد
منعم :حاضر ، سلام
محمود:في امان الله
طلع منعم عدا للحوش
رنده :من
منعم :افتحي
رنده :كويشك ياهمي
منعم :سكري فمك
رنده :ياامي قوليله هضا خش بكويشه ملبز
منعم :امسحي اخرى شن اتديري انتي
رنده :خزي باهي
منعم :وجدان اطلعت
رنده :لا خششتلها وكال من روشن الي ع الجنان ومابتش تاكل باهي الي عندنا حمام في الدار كان هضا راهي ماتت
منعم :اسكتي وانتي دوتك واجده
رنده:حي بتفتح عليها ، قول والله
منعم : تي اسكتي اسكتي شويه الزح نفختيهن
رنده :باهي من وين جبت المفتاح
منعم :رنده جديات سكري فمك
فتح منعم ع وجدان لقاها راقده وتشهق بالعبره خشولها يجاري
رنده :ياامي منعم فتح ع رنده
جت تجري كلثوم (ام رنده ووجدان) : الحمدلله ياربي الحمدلله
منعم : وجدان ، وجدان
وجدان :ااااه ياامي جسمي ياامي
منعم :صبي دونه بحتي فيا هنا
وجدان :اااه يامنعم باتي ضربني ، يدي يدي انحس فيها مكسوره
كلثوم :يناعلي شكلها مكسوره صح ، حق كيف منفوخه ومنزرقه
رنده تمت تبكي ع منظر وجدان : ياامي شيلوها ياامي
منعم :لبسنها هيا انشيلها للمستشفى
كلثوم :ياربي صبرني ياربي ، ماهو كان تخافي من باتك ومدايرتيلنا احساب ماصار هضا كله
منعم :ياامي الزح مش وقته الكلام هضا
كلثوم :ماهو ماحد مخرب خواتك غيرك ديمه اتدلع فيهن ومغير شن يبن لين خربتهن
منعم :ياحول الله ياربي ، صبي ياوجدان ، لبسيها يارندة
لبست رندة وجدان وطلعت هي ووجدان ومنعم ، ومن بختهم الاسود كانت ريهام (اختهم من باتهم بنت انتصار) طالعه اتطلع الكناسه وشافتهم
ريهام :وجداان 😱 كنها ، حي كنه وجها هكي من ضاربها
رنده :طايحه من تلدروج ، حولي خليني انركبها للسياره
منعم :خشي جوا انتي شن طلعك توا
ريهام :انطلع ف الكناسه
منعم :خلاص خشي جوا
ريهام :باهي 😒
ركبو للسياره وعدو للمستشفى ، وخشت ريهام لامها تجري
ريهام :امي امي امي
انتصار :كنك اسمالله
ريهام :وجدان طالعين بيها للمستشفى ، وشكلها مضروبه
انتصار :وكنك ماقصقصتي
ريهام :حاولت انقصقص منعم هزبني وقالي خشي جول
انتصار :ريماس مديلي محرمة الصلاة
ريماس :وين بتمشي
انتصار :بنمشي لكلثوم انشوف كنهم
ريهام :نمشي معاك
انتصار :قعمزن واسكتن
لبست انتصار وطلعت عدت لحوش كلثوم
كلثوم :منو
انتصار :حلي انتصار
كلثوم :مرحب تفضلي
انتصار :كنكم ريهام قالتلي شايلين وجدان للمستشفى كلثوم : اها والله
انتصار :كنها
كلثوم :لا شي تعبانه بس
انتصار :احكيلي شكلك مضايقه ، شن في
طبعا كلثوم لأنها هبله وع نياتها وصدقت برائتها وحكتلها كل شي
انتصار :ياناعلي معقوله الححاج يضربها ماعندش حق الصراحه
كلثوم :االله غالب
انتصار :انشاءالله لاباس عليها ، توا انجيك الصبح نطمن عليها
كلثوم :سلمك جيايه ، بس بالله عليك الي قتلك عليه بيني وبينك
انتصار :اكيد ، هي تصبحي ع خير توا
طلعت انتصار من كلثوم ، وبدا شغل الجزيره عند انتصار
عدت دقت ع تهاني (ضرتها الرابعه) لقتها مش قاعده ، مشت لنجيه (ام موده)
موده :ممممن
انتصار :حلي انتصار
موده :يييه هالسلعوه ، باااهي
انتصار :خير امك قاعده
موده :اها خشي تعالي
انتصار :نجيه
نجيه:تعالي ياانتصار
انتصار :يناعلي شفتي وجدان شن دايره ، ومحمود شن دار فيها
نجيه:اها عندي علم
انتصار :توا عديت لكلثوم قالتلي ومنعم خدا وجدان وشالها للمستشفى ،يدها شكلها مكسوره
موده: يدها مكسوره
انتصار :اها عدو بيها للمستشفى توا
نجيه: ياحول الله ياربي
انتصار :بس بالله عليك ماتقوليلها حكيتلك
نجيه :انشالله
موده:هاكي عصير هدي اعصابك بس
نجيه:ايوالله والله وجعتني
موده:وين البنات
انتصار :سيبتهن ف الحوش ، هاكي الحمدلله ، هيا بنصبي نمشي نشوف البنات ، تصبحن ع خير
نجيه:وانتي من اهله
طلعت انتصار
موده:توا هذي جايه عشان تبث سمومها وتعدي
نجيه:ربي يهديها هالمرا وخلاص، ارجي نتصل بباتك بيش نمشو لكلثوم
موده:ومن امتى نستأذنوه بيش نمشولهم
نجيه:ماهو قال ماتمشوش
موده:اها ياماما باهي كلميه
نجيه :مايردش
موده:توا انرن ع اعميمه كلثوم انشوفها
نجيه:اهو باتك رن ، ايوا ياحاج
محمود:ايوا كنك
نجيه:حاج بنمشو لكلثوم باهي
محمود:باهي عدي
نجيه :باهي الله يربحك
موده: ها قالك امشو ؟
نجيه :اها هيا
لبست نجيه محرمة الصلاه ، وموده وشاحها وطلعن ، هن وصلن لحوش كلثوم وع جية منعم وحواته من المستشفى
موده:لاباس حبيبتي لاباس، يناعلي جبسوك
منعم :خشن ادون جوا
رنده :تعالي هيا
وجدان :ااااه يدي
كلثوم : شن صار فيكم ، يناعلي جبسوك
رنده:اها عندها شعب
نجيه :لا باس احبيبه
منعم :خشي تريحي جوا ، وانشالله غير تشعفي بس
خشن موده ورنده ووجدان لدارها ، ومنعم خش للحمام ، وكلثوم ونجيه خشن لدار التليفزيون
موده :توجع فيك
وجدان :جسمي كله يوجع فيا
موده : يناعلي ربي يسامحك ياباتي
رنده :خش يالي اتدق
منعم :ها شن دايره يدك
وجدان :توجع بكل
منعم :تستاهليها الطريحه بس عمادطلع راجل ، ولا كان هضا راك مزلتي محبوسه
تمت وجدان متنحه ومش فاهمه شن يقصد منعم ، ولا شن عرفه بعماد
منعم :عماد كلمني ودويت لباتي وقال بيجيب هله الخميس
وجدان 😍 : كيف كيف
رنده :يناعلييي ياخيا احلى خبر
وجدان : استنى بس كيف يعني
منعم :اسألي المدبره الي حداك الي حصلت طريحه بسباك ومافيش فايده دارت الي في رلسها ورنت ع عماد وعطاته رقمي بيش يكلمني ، وكلمني وانا مشيت لباتي دويتله وهو الي قاللي خليهم يجو الخميس
وجدان :يناعلي ربي يخليكم ليا والله ماننسالكم هالموقف ، ربي يخليك ليا يااحسن اخ
منعم:بنعدي انا توا ؛ وردي بالك ياوجدان نسمع عليك مكلمتيه انا الي حنضربك ، تسمعي فيا
وجدان :حاضر
طلع منعم
موده :ياخيا يابقيره حتنخطبي
وجدان :يناعلي مش مصدقه انا
موده :ارجي
وجدان :كنك
موده :ارجي بس ، ايوا
عماد :ايوا موده ، شن صار في وجدان
موده :قولي الو
وجدان :تي من شنو
عماد :ياقلبي انتي سامحيني
وجدان:حبيبي ، شفت شن صار فيا
عماد:كله مني ، والله ماتستاهلي ، بس والله حنسكتهم كلهم وحنجيب هلي الخميس
وجدان:نجك ليا ، ربي يخليك ليا
عماد:بس والله خوك منعم هضا اصلي صبا معايا وماعصش
وجدان:هضا خويا ياعماد ، خويا الي وقت نطيح هو يصبيني
عماد:ربي يخليك ليا ، وانشالله نقعد نسيبه
حاتم :رنددده
وجدان :اوكي اوكي توا حاتم جا
رنده :خش ياحاتم
حاتم :كنها يدك انتي
وجدان :انكسرت
حاتم :تستاهلي
وجدان :شكرا ع المشاركه
حاتم :صبي يارنده ديريلي عشا
رنده :حاضر هيا
طلعو رنده وحاتم للمطبخ
موده :الحقيره انتصار حتنشرها توا
وجدان :اكيده بذرتها المعفنه ريهام قالتها لها
نجيه :هيا ياموده
وجدان :خليك
موده :باتي ماحوتك خلاني انجي
وجدان :خلاص عدي
موده :سلام
وجدان :انعني مانفقدك
موده :شكرا ع اللقاقه
وجدان :حيوان
طلعت موده سلمت هي وامها وروحن
خشن للحوش ، وخشت امها بتصلي العشا شويه وجا مروان
مروان :حي علي ظلمني حي علي ظلمني ..سبع ايام وماكلمني
موده :حي علي رخيته ، حي علي رخيته في الاسود يلبس خليته .
مروان :ياعيني ع البلالو هضا وين الجو احلو
نجيه :ياربي متوحمه ع مستشفى المجانين انا
موده :خويايا ياخويا ياخويا
نجيه :طفي هالبلا وخشو صلو العشاء
موده:صليته من بدري
مروان :توا انصليه بعدين
موده:قصدك مع عشاء بكرا
مروان :سكري فمك انتي
موده :اختك يدها مكسوره
مروان :تستاهل
موده:محقرك
مروان :بنرقد انا
نجيه :حتى نا تصبحو ع خير
خشو مروان وموده رقدو وقعدت موده ع النت والتليفزيون
لقت مصطفى دازلها :كيف حالك توا
موده :الحمدلله بخير كيف حالك انت
مصطفى :الحمدلله تمام ، يدك شن دايره
موده :لا الحمدلله احسن بواجد
مصطفى :انقولك ع حاجه
موده :خير ان شاء الله
مصطفى :عارف بتهدريزي معاك انخون في ثقة صاحبي ، وعارف انها نذاله مني ، بس والله يابنت الناس ماني عارف شن قصتي معاك
موده :كيف يعني
مصطفى :توا انقولك ، بس نستأذنك توا خويا يبيني شويه وانجي
موده :خوذ راحتك
قعدت موده مكسده ، بعدها صبت دارت سندويتش وعصير وقعمزت تاكل ، كانت الساعه حوالي 1ونص ، تمت اتراجي في مصطفى ومكسده ع الانستا ، ساعه مرت ومصطفى ماردش فتح ، سكرت وتمت اتقلب ع التليفزيون لين قريب الساعه 3 تمت تسمع في عياط برا و .......
تقييمكم 😍