نجية (ام موده ) :مووووده انتي يامصيبه نوضي را انجيك انقج عليك اميه
محمود ( بات موده) كنك صوتك عالي انتي
نجية :هالفرخه ماتبيش اتنوض العيله اليوم ملتمين ووقت نبيها تنوض اتعاونني
محمود:كنك ما قلتي لوحده من ضرايرك اتجي اتعاونك
نجيه :نا مانكلم حد كان بيجن ايجن
محمود:مووده يابت الكلب نوضي
موده :الصبر ياربي ع العيله المتخلفه الي بليتني بيها ، هيا حاضر ياباتي
نجيه:ماتجي الا بالهزيبه
محمود:نا بنطلع تبو حاجه من برا
نجيه :لا عطيت مروان ايجيب الحاجه الي نبوها
محمود:امتى بيجو هما
نجيه:ماهو اليوم القنديل اكيد ع العشاء يجو ع المغرب
محمود:باهي شن بتديري عشاء
نجيه :والله ماني عارفه
محمود: ديري كسكسو ولا اي شي مبوخ و محشي
موده:صباح الخير
نجيه :صح النوم الساعه 10 ياحنه
موده :مزال بدري والله حرام ماصدقت عطلة
محمود:اسبوعين وجايتك المدرسه
موده:نسمع فيكم تقولو عشاء وجايين من هضوما الي جايين
نجيه:صبايا باتك وخوتك وخواتك واحتمال عمامك ايجو
موده قلبت وجها وخدت منشفها وخشت الحمام
محمود:هياالسلام عليكم نا طالع
نجيه : مربوحه
خشت نجيه للمطبخ ، شويه وطلعت موده صلت وجت ولعت ع الشاهي بتفطر
نجيه:كنك قالبه وجك
موده:توا نا شن ذنبي ،هن التيسات بديجن ع الواتي بفروخهم وانا الي يجي الكيد عليا ياامي تعبت حرام عليكم ، شن لزمته العشاء اليوم ، و ياريت حتى وحده فيهن عبرتني بلبسه ولا قنديل كي بناتها ،لا وانتي مشيتي جبتيلهم كلهم قناديل وبتعطيهم اليوم ،لا ويحوسن ويروحن كل وحده حوشها ، توانحنا في لايده وحده كنهنمايقعدن ويلمن حوستهن
نجيه:تي حي عليك كان سمعك باتك ، تي تحشمي هضوما خوتك وصبايا باتك
موده:صبايا الهده فالحات غير ف النقير والنقير والتفشيك ، شايله هم انتصار الي لسانها متبري منها
نجيه:افطري وامشي ابرمي ع الحوش وبطلي دوه زايده
موده:حاضر حاضرياامي حاضر ، ياربي صبرني خودني ولا ارزقني بمن ياخدني
نجيه:اقسم بالله انكان ماتسكتي نعزق فيك هالسباط
موده:سكتت وولله ماني فاطره ، ماهو همي اسود انا وبختي اشر جيت في عيله متخلفه
نجيه:اطلعي برا يابهيمه
موده:صبابيط الحوش كلهن عزقتيهن فيا ومايطبنش فيا نجيه :جيبي الصباط هنا ياحيوانه
موده :انجيبه لكي بيش تعزقيه فيا اخرى
نجيه :انتلفي تلفه انشاءالله
خشت موده بدت اتضم في دارها بعدها ضمت باقي الحوش وجت بتخش لدار مروان اتضمها لقتها مقلوبه ع بعضها
موده:الله ياخدك يامروان سراويلك خمسه وخمسين في كل تركينه ، ياااربي صبرني ، الله ياخدك باهي الحيوان هض خزي ، هيييء حي علي امك يامروان
نجيه:كنك يافرخه
موده:شي شي
موده وهي اتضم في دار مروان لقاته داس قرطاس دخان في جيب كبوطه ومعاه ولاعه ، وعارفه انه لو هلها عرفو حيخلو عيشته سوده مع انه كبير مش صغير بس عارفه هلها شن حيديرو ، فقررت انها تستغل الموضوع لصالحها
مروان :السلام عليكم
نجيه:وعليك السلام ها جبت الي وصيتك عليه
مروان:اها توا مسعود البواب يحطهن لكي هنا ع باب المطبخ افتحيه
موده:وكنك ماتخششهن انت ولا معش فيك حيل من الجبد
مروان :كنها هذي شن تخرف
نجيه:نايضه متحالفه مع الشيطان اليوم
مروان:عارف توا بيجيها كف ايخليها اتحالف مع عزرائيل
موده:بعيد السو
نجيه :خلك منها ، فطرت
مروان:اها عديت لمصطفى وسعيد فطرت معاهم في المحل
موده :تليفونك ايرن ياامي
نجيه:جيبيه ليا من الشحن
عدت موده جابت تليفون امها لقتها منى اختها الي ترن
موده:ايوا
منى :اهلا شنجوكم
موده :تمام الحمدلله ، كيف حال رافع والبنات
منى :تمام الحمدلله وين ماما
موده:هاكي هي معاك
نجيه :ايوا كيف حالك
منى : الحمدلله تمام ، كيف حال بابا ومروان
نجيه:كويسين الحمدلله ، وين قاعده في السياره امالا
منى:اها قتلك توا بنجي انحط البنات عندكم وبنعدي عندي حالات ف الاطفال انكمل ع المغرب
نجيه:باهي جيبيهن
مروان موودددده
موده:نعم
مروان تعالي هنا
موده :ها كنك
مروان :انتي شلتي الكبوط من هنا
موده:اها كني شن درتله يبكي ولا شنو
مروان:بطلي حناطه مفتشه فيه انتي صح
موده:كنك رايحه منك حاجه ؟
مروان :ياربي صبرني انكان مانكفخك توا
موده:تي عليش اها عليش شن درتلك
مروان :وين الي كان في جيب الكبوط
موده:تي شنو كنك انت
مروان:شي خلاص اطلعي برا
موده:قصدك على هضا
اول ماشاف مروان الدخان في يدها كرها وسكر الباب وخداه منها
موده:عليش سكرت الباب من شن خايف اها !
مروان:شن قربك فيه اها ؟
موده:انضم شمرت الكبوط طاح منه ، انقول لامي توا
مروان:وحق الله انكان نسمعها عند امي انوريك
موده:ياااامييييي
مروان جا يجري سكرلها فمها
مروان :اسكتي تي كنك انتي
موده:عطيني باسوورد النت الي غيرته امس ع سبا مانفتحش نسكت
مروان :رقمي
موده :باه تعرف تطلع كذاب والله انحرش امي
مروان:اقلبي وجك واحترمي نفسك
موده:ههههههه حااااضر
طلعت موده وهي ع وجها علامات الانتصار ، شويه ودق الباب طلعت فتحت
منى :هلا
موده مصدومه :اهلين كنك
منى :غير سلمي بس ، شن كني امي ماقالتلكش بنخلي البنات هنا
موده:يااهلا وسهلا 😢😒
منى : هاك شنطتهن فيها دبشهن ، تعالن ياماما خشن 😌
منيا :موده حبيبتي 😍
موده:اهلا اهلا 😡 خشن تعالن
منى :مستعجله انا سلميلي ع امي بنعدي
عدت منى وخشن بناتها
نجيه:من يا دوده
موده:منى جابت البنات وعدت
اماني :حنينه
نجيه:مرحب حبيباتي مرحب
امنيه:حي ياحنينه حدينا عطله اتنين اسبوع
منيا:اها هكي عطونا عطله واااجد
اماني :موده نبي عثير
نجيه:جيبيلهن عصير وشوكلاطه من جوا
موده:اسمعن اتخشن تقعمزن ع التليفزيون وتسكتن باهي تحوسن حاجه نهاركن اسود
مروان:تي كنك معاهن الزح ، تعالن سلمن حبيبات خالو
موده:انت بالذات اسكت
نجيه:تحشمي ع وجك خوك اكبر منك
موده:بنعدي انسيق الحمامات انا
عدت موده تكمل باقي حوستها ، ومروان طلع ونجيه حايسه ف المطبخ وبنات منى ع التليفزيون
شويه ودق باب المطبخ الي ع الجنان فتحت نجيه لقتها كلثوم ضرتها وبناتها وجدان ورنده
نجيه :جابكن ربي حايسه حوسه سوده
كلثوم:والله دوبك فطرنا وجيناك ، محمود طلع امالا
نجيه:اها ماجاكش
كلثوم :لالا ، عدا للمحل
نجيه:شكله والله ماني عارفه قالي طالع وماقالش وين ماشي
وجدان:دودي وينك
رنده:اعميمه شن اندير معاك
نجيه:اتديري سلاطه مقليه
رنده:باهي هي
كلثوم :المحشي واتي نحشيه مايبي شي ؟
نجيه:لا موتيته ع الحشو
موده:هلا
وجدان:كنك باله ادبشك هكي
موده:كنت نلعب
وجدان:حناطه ع الصبح ، من جوا ؟
موده:منى مخليه بناتها عندنا
وجدان:عيت مؤيد ماجوش
موده:لا مدسوسين جوا لعند المغرب
وجدان:يييييه عليا
موده:الزح تسألي في أسئلة غبيه
وجدان :شن اندير معاك
موده:هيا نطلعو انسيقو الجنان
وجدان:هيا باهي
رنده:خير ياحيوانه
موده:هلا ، حي ع الي جايه ناشطه
رنده:حواسه ياحنه
وجدان:بطلن دوه زايده هيا انكملو قبل يجن العقارب الاخرات
رنده:باب الجنان يدق
وجدان :توا البواب ايحل ، هيا نطلعو انسيقو
رنده:نحب ع بنات منى ونجي معاكن
موده:لا خليك مع امي واعميمه
طلعن وجدان وموده بدن ايسيقن
موده:شنج منجوهك انتي
وجدان :تاكتها معاه
موده:كنك ياهمي
وجدان:تي مايبيش يحذف بنت عمته من الفيس وانا البنت هذي مصبيتلي في بلعوم اتلوعب عليه تحسابني مش فاطنتلها ، كم مره انقوله ياعماد كان في حد بيفرق بيننا هي بنت عمتك يقولي انتي الي مدايره للذبان كراسي
موده:خليها شوري وحق الله انهكرلها ايميلها وانخليها تحذفه
وجدان:قصدك تعرفي اتهكري
موده:اها تعلمت من منعم نهارتها
وجدان:مانيش عارفه العيل هضا ليش ايفضل فيك علينا كلنا
موده:من مايفضلنيش انا ، خطرها شريتي قنديل
وجدان:شريت ، وشرينالك
موده:حتى نا شريت وشريتلكن
وجدان:ماكحلنش
موده:بعدين توا انمكيجو مش انكحلو بس
وجدان :ههههه باه
موده:حي متقتلكش كبست مروان يدخن ههههه
وجدان :هههههههه تدوي جد
موده:وحق الله ووووه
وجدان :حي ع امك ههههههه وووههههه يارنده موده طاحت تعالي صوريها لقطه تاريخيه
موده :ياحقيره تعالي صبيني
وجدان:ههههههه صبي صبي حسيتيها
موده:بعد شنو يابقره
منيا : اخويله انسيق معاكم
موده:توا تميت خويله مش امبدري كنت موده ، خشي جوا را نلطك بهالسياقه
منيا:والله انقول لاحنينه باهي
موده:خشي جوا يابنت الهبله وحق الله انكفخك را
مرام :السلام عليكم ، البسن وشاحاتكن عبدابسلام بيخش
موده:هاتي عمران ، حبيبي نجك اجديقاتي ياقلبوشي
وجدان :وريني وريني اللبسه
عبدالسلام :السلام عليكم
موده:خير ياسلومه كيف حالك
عبدالسلام :الحمدلله تمام ، هاكي يامرام بنعدي انا باهي
مرام : مربوحه
خشت مرام سلمت ع خواتها
مرام :من جوا
وجدان :ماحد ماما واعميمه كلثوم ورنده وبنات منى
مرام :ناخده هضا ولا تبنه
موده:لا هاكي خليني نكمل
وجدان :اسمعي انتي عماد ايرن بنخش دارك انكلم
موده:عدي عدي يابقره
خشت وجدان وكملت حوستها وبخرت الحوش بعدها خشت اتعاون الي ف المطبخ ، وع الساعه 1روح باتها ، ومروان وحطو تغدو بعدها خشن موده ووجدان ورنده ايضمن المطبخ
رنده:هيا انت كملي الماعين ملحقه عليه النت
موده:الحسوان مروان اليوم كيف عطاني الباسوورد
وجدان :في حد جا ،ييييه انتصار وفرخاتها
رنده:مرات بات سندريلا هههههه
مزده:ههههه صح والله تشبهلها وحتى هي عندها بنتين ههههه
ريماس:وووه مزلتن في المطبخ يابايرات
موده:لمي لسانك را نقطعه لكي ، تحشمي خواتك اكبر منك
ريماس :بصاره ووووه عليا كنك انتي
وجدان :وين ريهام
ريماس مريضه ماجتش
رنده:مريضه ولا جونا مايعجبهش
ريماس :لا والله مريضه
وجدان :اهااا باه بنضمي ولا بتصبي ، كان بتصبي تلكلكي اطلعي وتوا نلحقوك
ريماس:لالا بنطلع بنة طعام هنا
طلعت ريماس ..
رنده:خزي العقربه هد
وجدان :خلاص هيا انكملو
قعدن يضمن لين كملن حوستهن ، طلعن خشن لدار موده وبدلن دبشهن وكحلن بعدها اطلعن
شويه وجو عيت مؤيد ،وبعدهم عيت عمهم سالم ،وعيت عمهم عبدالرحيم ، والحوش تما معبي تعبايه سمحه
ريما (بنت عمهم خطيبة حاتم ) : حاتم ماجش قصدكن
موده:جو تغدو وطلعو
رنده: كلمناهم قالو جايين هو ومروان ومنعم قالو جايين
موده:اكيد مروان ايجيب معاه التنائي الغبي معاه
ريما :من ؟
وجدان:هههههه سعيد ومصطفى صحابه ، ديما عندهم مدرهينلها كبدها
نجيه: ناجيه كلمي عبدالرحيم وحامد ، وانتي يامروه كلمي سالم يجيب سليمان ويجو ع العشاء
انتصار :كنها تهاني ماجت
كلثوم :عند هلها
انتصار :وكنا نحنا مانملوش عينها ، حتى نا كان نلقى نمشي لهلي غير الله غالب
موده :ومن ماسككم تمشو كان ماتبونش
نجيه وجعتها كلمة انتصار وانقهرت من موده لانها ردت عليها قدام الصبايا
نجيه:صبي اغسلي طواسي الشاهي
محمود :السلام عليكم ، موده
موده :نعم ياباتي
محمود:تعالي ديري قهوه لعمامك وخوتك واشقولنا بالعشا
موده:هيا حاضر
صبت دارت قهوه ووتن العشا علي ماجت منى وراجلها والتمو كلهم حطو 7مقاعد وقعمزو يتعشو كانت الساعه قريب 8
تعشو ولمو حوستهم وقعمزن وجدان ورنده وريما وموده وريماس وتغريد يهدرزن ف المطبخ ، والصبايا في الدار ، والرجاله برا ف المربوعه ، والفروخ يلعبو ف الجنان
ريما : حاتم قالي يبي العرس قريب
وجدان :اها خلاص حوشه وتى
ريماس :حي الاه عليك جو عرس قريب
نجيه :هاكن ياحناتي قناديلكن
تغريد :نجك ليا يااعميمه شكرا
موده:هيا نلبسو وشاحاتنا ونطلعو برا ف الجنان نديرو جو
وجدان :ارجي الشكاره امتاعتنا فيها العاب ناريه
ريما :خوتك مايهزبوش ؟
رنده :هنا من لاوره مش شور الرجاله
لبسن وطلعن ولعن العاب ناريه وهدرزن وضحك وهرجه وفروخ وجو يهبل
شويه موده وهي تولع في الالعاب الناريه تولع في يدها و انقلبت الدنيا اعياطات ، ويد موده انحرقت لأن انوع الالعاب الناريه كبير شويه وطلعو الرجاله يجارو
مروان :كنكن شن في
رنده :موده يدها انحرقت
محمود:مروان خودها انت ومصطفى ووحده من البنات شيلوها للمستشفى
نجيه:يناعلي كنها
موده :ااااه تحرق ياماما تحححرق
مروان:مصطفى اطلع ولع السياره
مؤيد:خشي البسي حاجه مسقمه
كلثوم :وقته توا ، تي لابسه وشاحها خليها تطلع هكي
طلع مروان خدا موده ووجدان وعدو للمستشفى و .....
تقييمكم