#كاتم_ضمير
((( بقلم زينب ماجد )))
الحلقة_١
آلا بالله تخبرهم إن الصُبح قد بانَ
وأنا للأن لم ارهم اطال الدرب ام هانَ ؟
ايبخل من نحب أن يطمئننا ؟
ايبخل ان ترى عيناه اعيننا ؟
آلا يشتاق كما نشتاق يسمعنا ؟
فأن كان به رفضاً اريد عتابه الأنَ
لأخبره ان الوقت قد حانَ
لأما ان نكون معاً او نمضي مع ال كانِ
(الشاعرة زهراء عباس الدليمي)
بغداد_حي البنوك
(الساعة ١١ صباحا )
[الجلسة]
زينب ماجد : كاعدة بالتكسي واباوع من الجام .. الدنيا بارد جدا ، والجو مغيم تقريبا ، واتسائل إلا بهذا اليوم اجيت جان أجلتها على غير يوم ؟
الجو ابد ميتشاقى ...
بس اتناسى البرد واني افكر شلون راح يكون اللقاء ؟
خصوصا هذه أول مرة راح اكعد كبال اللي اكتب قصصهم اسجل الملاحظات واستمع ألهم واباوع كل تعابير وجهم وردات فعلهم على كل حدث هم يحجوه ويحسون بيه بكل مشاعر صادقة يسترجعوها بألم وبضحكة وفرح احيانا .
فاتت السيارة على مكان بيتي القديم ، واللي بيت القاصدتهم كانوا جيراني .. اجاني شعور ان اطلب من السايق يتوقف وانزل لحتى اتمشى بالافرع واسترجع ذكريات قديمة .
: بلا زحمة عندك
توقفت السيارة طلعت فلوس انطيت لسايق التكسي ونزلت، كمت اتمشى ، افرع واسعة وعطر نقي من كثرة الاشجار الموجودة ، دك تليفوني طلعته من الجنطة باوعت ( أيناس ) جاوبت : الو
:- هلو زينب بشري ، تجين لو لا ترا جمعت الكل على مودج ومسوية ثواب ابيت اهلي .
- ياااااا لج عيني شلون نسيت ، هسه هسه ع السربع ابدل واودي اطفالي لاهلي واجي
- صدك تحجين
- لج هسه شبيج ما اطول ، يلا يلا
- يا يلا بربج
سديت الخط بوجهه ودكيت باب البيت ، فتحت الباب هي وبيدها التليفون ابتسمت :يااااا والله دكاتج ناقصة
- مثلج بالضبط
ضحكنا بصوت مسموع وتحاضنا : حياااتي مشتاقتلج ،
- عمري والله احنا الاشوق
-ماما هنا
- ماما هسه راح تجي ، فوتي البنات موجودات .
فتت سلمت ع الموجودين ، وبلش تعارفنا بشكل تقليدي وابتديت بأول سؤال تقليدي ...
أسمائكم ؟
ايناس :اني اسمي ايناس وبالبيت ايو
مياس: واني اسمي مياس وبالبيت ميوسه
ميناس : اسمي مينا وبس
زينب : ههههه اوكي
ايناس : اني الهادئة العاقلة
مياس : واني الدلوووعة
ميناس : واني زلمتهن
زينب : هههههههههه اوكي
ايناس : احب الأكل وكلشي يتعلق بالمعدة .. وخاصة لو جان الأكل بمطعم وهاي من اهم اهم مميزاتي ، ولكل مشكلة اكله طيبة تحلها .. دولمة على كنتاكي على صينية مندي وفوكها لحم مشوي محمص ... انفكت حلت .
مياس : وييي عابت الجوعية ، لا لا حبي باعي الأكل اخر اهتماماتي ورشاقتي سر سعادتي معليج بجسمي المليان، اذا اشم ريحة الكص من بعيد اسمن ٦ كيلووووات
... بس باعي حبي لو سألتيني شتحبين راح اكولج الضبااااط ، لج عيني اموع اسيح اذوب انصهر ..خاصة لو جان هيج طويل والقيافة مالته تشك شك و يخزر بعيونه ... لا لا كمشوني عفية ع الوصف اني راح اتخربط ... من الأخير زوبه لو مُلازم لو مَلازم.
ضحكنا بصوت عالي وباوعت لمينا : وانت ؟
- اني احب العرك ، شكو طلابة وهوسة ذبيني بيها اذب زوك بنصهم
رجعنا كلنا ضحكنا فاتت خالة جنان للبيت ، استقبلتني وسلمنا على بعض ، وكعدنا .. كلت الها :خالة اني هنا اجيت حتى اسمع قصصكم .. واول قصة عنوانها أنت
ابتسمت : قصتي يا خالة اني ما تحصلين منها غير الهم و ضيجة الخلك .
- واني هنا حتى اسمعها
- منين ابديلج يخالة شو جبتها ضيم بضيم
- من النقطة اللي تحسين منها قصتج بدت .
صفنت .. رجعت هزت راسها : قصتي بدت من ذاك اليوم القررت بيه قرار اهلي واخوتي جانوا ما راضين بيه.
- زواجج ؟
- اي
-أحجيلنا
- ما حبيت واحد غريب النعجبت بيه يصير اخو جنتنا ..
اني مثل هواي بنات بذاك الوكت خلصت الثالث متوسط وكعدن، لإن حسب نظرة اهلهن البنية ما الها غيرة البيت.
جان يومية او كل كم يوم يمر ألنا لبيت بحجة يسلم على اخته .. جان يكعد بالحديقة وياها ، وجان كل ما يجي .. مرت اخوي تصيحني ، ولما اجي تكلي : جيبي مي لفاضل .
فاضل أخوها
لما اروح اجيب المي واقدمله يباوعلي بنظرات كل بنية تعرفها نظرات أعجاب ...
انعاد الموقف مرة ومرتين وتلاثة
وصارت مرت اخوي تقرب بيناتنا وتأملني بيه وتسولفلي فاضل هيج يحجي بيج فاضل هيج متخبل عليج ... واني مثل كل بنية كاعدة بالبيت ما عندي غير هاي الافكار التحتل مخي وتسيطر عليه .
كامت مرت اخوي منتهى كلما تريد تروح لأهلها تطلب من ابوي واخوي حتى اروح وياها واني هم اكوم اتوسل بابوي حتى اروح واطلع شوية .
مرة مرتين رحت ..
المرة الثالثة امي كامت تمنعني اروح
والعرفته مرت اخوي حاجيتلها على اهلها يريدون يجون يخطبوني لفاضل اخوها .
بنبذة عن بيت اهل فاضل
ابوهم جانت متزوج اثنين الاولى يكولون عليها خوش مرة صايمة مصلية واهلها ناس اجاويد ومعروفين ، خلفت من عنده ٤ ولد وبنية ، بس ابو فاضل متعرف على وحدة امها جانت تشتغل فراشة بالدائرة الجان يشتغل بيها ... حبها وراد يتزوجها ويطلك مرته الاولى ، بس الاولى كالته ( روح تزوج بس لا اطلكني اني عندي ولد وبنية واخاف عليهم من السمعة المو زينة ) هجرها وذبها عد اهلها وراح تزوج بت الفراشة وخلف منها فاضل واثنين بنات نوال و منتهى اللي هي مرت اخوي .
فاضل جان الولد الوحيد من مرته الثانية رباب ، ومدلل اهله لحد ما كبر خربت اخلاقه ، كام يشرب يجيب نسوان، ينصب على هذا وذاك ويومية طلابة ويومية مشكلة على اهله من ورا فاضل ، والناس تكللهم : زوجو خل يعقل ، زوجوه وهو يبطل سوالفه هاي .
واخته جانت تحجيله عني
وكامت تواعده يجي للبيت حتى يشوفني
بس من كايله لامي اهلها يريدوني لفاضل ، امي رادتها ومنعت بعد اروح وياها لاهلي .
الا ما بيوم من الأيام ...
جنت كاعدة بالهول صاحت عليه منتهى مرت اخوي اسعد ، كمتلها واني اجاوبها : ها ؟
- تعاي يمي
تقربت منها على كيف حسيت اكو موضوع مهم تريد تحجيلياه ، شاورتلي : فاضل اخوي جايبلي ثوبي من الخياطة طلعيله انت اخذي
-يمه اني اطلعله ؟
- شبيج غمة ، ما تريدين تشوفينه
- اي بس اخاف
- لا تخافين شو هي امج ومنجفيه هي وابوج بغرفتهم ونايمة واخوج منسدح ع التلفزيون اطلعي بساع وارجعي .
باوعت ماكو واحد من اهلي منتبه كلت على السريع اطلع اخذ العلاكة منه وافوت للبيت .. المهم اشوف
لإن اني كل عالمي متعلق بيه وكانه الفارس الجنت انتظره على حصان ابيض .
طلعت بسرعة للباب فتحت كال : هلا جنان الله يساعدج
- هلا فاضل
- شلونج ؟
- زينة بس العلاكة
- مستعجلة عليمن مشتاقلج اني
- روح فدوة عيوني لا يشوفك احد وتصيرلي مصيبة
- المصايب التجي منج محلاها ، بس خل احاجيج
- كول
- اني خطبتج من اهلج وامج ما رضت ، ليش شبيه وما ترضون بيه .
- ما ادري اني محد كايلي
- احجي ويا امج ترضى ترا رايدج على سنة الله ورسولة يعني الا انهبج لو اسوي وياج مكسورة يلا يرضون بيه اهلج
جاي يحجي طلع اخوي : جنان منو ع الباب ؟
ارتبكت بسرعة وما عرفت شحجي كمت اكله : اااه هذا شسمه فا ف فا فاضل فاضل ..
فتح الباب وعكد حواجبه : شعدك فاضل
- بس جايب علاكة الملابس امي ودتهن لمنتهى
خزرني اخوي اسعد واخذ العلاكة من عنده اني شردت جوا بساع ، شويه وفات وراي يصيح : جناااااان شعندج انت اطلعين ، اني مو هنا امدد ما كلتيلي الباب يندك
-ما ادري ااا جنت يعني جنت بره
- فاضل هذا ما اريدج تفتحيله الباب ولا بعد تشوووووفينه
منتهى : على كيفك عيوني شصاااار ، لو ما اختك هي العاشكته وتتلزكله ، جاي تذب بلاك باخوي
كام يصيح اخوي عليها وهي تصيح وتكله : قابل هو يدري راح تفتحله الباب ، غير هي الكاعدتله من ساعة الكلت اخوي راح يجيبلي ثياب و هي مكابلة الباب
كمت ابجي واكلها : ليش هيجي تكولين مو انت الكلتيلي اخوي راح يجي اطلعي اخذي منه العلاكة
شهكت وكامت تلطم على خدها وفتحت ثوبها من يم صدرها وتصيح : جنينة تتبلين عليييييه ، اختك تتبلى عليييييه اسعد
خبصت البيت وسوتها هوسة وامي تعاركت وياها وابوي يصيح واسعد كتلها ، وامي جرتني للغرفة كضتلي النعال وطكتني وهي تكلي : اني مو متوبتج ما توصلين شوداج وفتحتييييله .
صارت هوسة بذاك اليوم ..
ومنتهى تعمدت تكبرها وراحت لبيت اهلها زعلانه وحجت السالفة كلها وعود على اعتبار اني متنطرة اخوها حتى افتحله الباب .
عافت جهالها هنانة واتبهذله بالزغار واخوي تبهذل و حاقد عليه وما يحجي وياي والبيت متكهرب ، لحد ما ابو فاضل فتح موضوع الخطبة ويا ابوي وكايله : كصة بكصة بنيتكم عدنا وبنيتنا عدكم وان شاءالله أحنا اهل
من حاجي ابوي
امي ما رضت ، بس من شافوا اني ما عارضت ولا كلت ما اريد واخذت جانب السكته اعتبروه رضى وصاروا ضد امي لإن ما راضي بالزواج وصاحبة الانه ما معترضة .
قسمة ورايدة تصير
والخطبة صارت خطبوني لفاضل
جنت فرحانة حيل حسبالي خذيت حبيب العمر عشتو
بس على كولة امي ( يردح حيل الما شايفها ).
مرات القدر ينطينا اشارة حتى بلكي نتراجع
بس احنا اللي انصر على اغلاطنا ، واكثر من عرضة صارتلي بهالزواج بس اني جانت عقليتي محدودة بفاضل وما اشوف غيره .
قبل العرس ب٣ ايام انطونا بطايق العرس حتى نوزعهن على اقاربنا .. واختي جانت جاية على مود العرس بس بشهرها .. من كد ما كامت تشتغل ويانا وتنظف الطفل نزل كامت امي ومشت بيها للجدة ، واحنا هوسة وبعدنا ما عزمنا كل احبابنا على الهوسة ، وجانت ماكو تليفونات يعني تمر على احبابك واحد واحد ادك الباب وتعزمه على عرس مو مثل هسه تحديد على الواتساب ودز رسالة .. جانت ايامنا غير .
اختي تعسرت ولادتها .. عدها طلوك وماكو ولادة وامي حايرة بيها و بعرسي .. بيوم الحنة طلعت اني واختي للصالون وامي اخذت اختي للمستشفى بلكت تجيب .
سويت شعري بف ونزلت البراجم وذاك المكياج الزين، لزمت القرأن الصغير بيدي وفرحانة وما ابالي غير روحي عشتو راح اتزوج .
ل١ واجا ابن خالتي بسيارة تكسي وخالتي وياه بس الوجه جان ما يتفسر : خالة شكو صاير شي .
- امشي خالة نوصل للبيت وتفتهمين
- شكو صايرة مشكلة ؟
- امشي خالة امشي .
طلعوني من الصالون ورحت للبيت بس كل فرحة عرس ماكو بوجوهم ، وصلنا لباب البيت واشوف الباب مفتوح طلاقتين ، عبالي لإن حنة !
نزلنا صوت بجي قوي
كلبي رجف ردت بس اعرف شكو وليش الناس جاي تبجي بحنتي .. باوعت لخالتي ولزمت ايدها كلتلها : خالة فدوة لعينج شكو شصاير ليش البجي .
- اختج ... جاي تحجي ابن خالي قاطعها
- يمه عروس لا تفجعينها ماكو شي طبي جوا اختج جابت وابنها مات هاي كل القصة .
- الطفل فدوة المهم هي بخير .
جاي يحجي صفت سيارة الكل هم وطلع للباب وعافني ورا ، ما جني عروس الكل مطيتني ظهورها .. نزلت امي من السيارة وهي تصرخ وتزلغ بوجهه وتصيح ( راحت بنيتي يممممممه )
شكلي مثل المرايا الملمعة ومزينة .. واجت طلقة بنص هالمرايا كسرت كلشي حلو بيها ، كمت ابجي واصرخ بمكاني .. اختي ماتت بيوم حنتي !
زينب ماجد : اوووي كزبر جسمي شنو هالحظ خالة ، معقول اكو هيج فال شؤم .. جان المفروض تنهين هذا الزواج .. شصار ؟
- المفروض بس اني جان معمي على عيوني واريده .. وخذيته بلا زفة عرس .. بس خلصت الفاتحة لفلفوها شلون ما جان و جابوني عروس اله .
مينا : الكل جان مصدك بابا مو زين إلا اني ! اكره خوالي حيل لإن دائما يذمون بأبويه .. اكره كل واحد يكول ابويه مو زين .
ايناس : اني جنت اشوف بابا اجمل أب بالدنيا
مياس : جنت احبه لإن رغم ماما مخلفة ٣ بنات وجنت اشوف الكل يلوم بماما وكأن ذنبها تخلف بنات متخلف ولد بس ما شفت ابويه تذمر فد يوم لو كال ليش ما عندي ولد بالعكس جنت اشوفه يحبنا حيل .
زينب ماجد : شفت خالة جنان أبتسمت بيأس وهي تسمع بناتها يحجون هشكل .. بادرت بالسؤال وكلت الها : اشوف ابتسامة بغير محلها ؟
رادت تحجي خالة ، سبقتها أيناس : لأن امي سبب تفكيرنا هذا ، امي حريصة متخلينا نطلع على مشاكلها هي وبابا ومنكد ما تحبه دائما تحببنا بيه وتصورنا ابونا هو احسن اب بالدنيا لحد ما فد يوم .... وهنا جانت بداية قصتنا :
بغداد، الأمين الثانية
الساعة ١٠ الصبح
صوت باب يندك بقوة ، الكهرباء طافية، بداية شتا بارد بس الجوا صافي ومشمس .. وماكو احد بالبيت غير صوت الباب يندك بقوة ..
أيناس : فزعت من مكاني مرعوبة على صوت الباب ، ما لابسه غير بجامة وتيشيرت مال نوم من الفزعه رحت اركض للباب ما عنيت بملابسي ، فتحت الباب واني ورا اندفعت اني والباب ورجال صاح : فاضل وييييين ، اليوم اذا ما يطلع فاضل نهجم البيت والله ، فاضل ويييين .
كمت ارجف ورا الباب واصيح : والله محد بالبيت بس اني عمو والله بابا مموجود .. منو انتم
- ابوج **** اذا ما اجا نشيلكم اليوم نهجم الدار فوك روسكم كو****
رديت الباب وسديته بوجهم وركضت للبيت اخابر على ماما مشغول ، اتصلت بابوية مغلق .. ادية ترجف عيوني مورمة من النوم و بعدني ممستوعبة الديصير .. جسمي ديرجف بشكل مو طبيعي .. دكيت على ليث ابن عمي .. بسرعة رد : ها ايناس
- ليث اكو ناس هجموا على بيتنا واني وحدي بالبيت دا ارجف والله متت من الخوف بداعة امك تعال بسرعة .
فزع من مكانه وهو يسأل - منو ذولة شعدهم ، شكالولج .. شرادوا .. شصاير
- ما ادري بس شوف بابا وين .
- جاي جاي هسه راح اخابر على ابوي .
سديته من عنده ، اتصلت امي بسرعة : هاااا
- ماما ناس هجموا على بيتنا يريدون ابوي ويهددون يفلشون البيت شصاير ابويه وينه ؟
- الله لا ينطيك فااااضل الله لا يهنييييك ، هسه جاية يلا .
جريت ملابس لبست واني ابجي والخوفة بكلبي .. صفت سيارة بالباب اعتقدت رجعوا بسرعة تصنمت بمكاني وكامشة هدومي ولامتهم لصدري ، اندك الباب بقوة مرة ثانية ... ظليت اردد : دخيلك يا الهي ، دخيل اسمك ربي .
ليث : هناااااا .. افتحي الباب ايناس هذا اني ليييث .
من سمعت باسم ليث ركضت للباب فتحته بسرعة دخل : شكو منو ذوله ، شكالولج
- ما اعرف ، هجمو يهددون يريدون بابا اذا ملكوه يفلشون البيت
حجيتها وبجيت
- اش هسه ابوي جاي لا تبجي ، غسلي وجهج تعاي .. دغسلي وجهج .
وكفني ع المغسلة وشغل البوري اخذ مي بيده ودنك راسي : لا لا بارد ما اريد غوفني .
- بس غسلي ، شوووو
شمر المي بوجهي دنكت وغسلت وجهي ، جر الخاولي وهو يكلي : ماكو شي اني بدلي تروحين لبيتنا ، ليش وحدج ترا ما يصير .
دخل عمي ( حسن ) وهو يكول : ها شصاير ؟ شكو فزعتونا
ليث : ناس جايين هدادة ع البيت
- فاضل ومصايبة الما تخلص شمسوي هالمرة وهادين ع البيت .
- ما ادري عمو اني جنت نايمة دكوة الباب دكة كلت راح ينكسر ويطبون علينا لهسه جسمي يرجف اخابر بابويه مغلق.
شال التليفون وهو يخابر على ابوي ، فاتت امي ظلوا يحجون هو وامي ويتصايحون ويخابرون على ابوي مغلق .. انخبصوا بيناتهم واني كاعدة على دجة الدرج ابوعلهم وما جاي استوعب اللي ديصير شكو .
وليث منتجي على المحجر مال الدرج ويخابر ويحجي ويا ابوه : عمة مو المفروض تجيبين البنات من المدرسة خاف كلشي يصير عليهن .
ايناس : شيصير؟ ب٢ اني لازم بالمستشفى
- عوفي المستشفى اليوم .
حجت امي : خلي تروح للمستشفى ما اعتقد هم يهددون البنات .. كل همهم فاضل .
ليث : واذا ما لكو عمي فاضل احتمال يحاولون يوجعونه ببناته
- ومن يمتى هو اهتم لبناته حتى هسه يهتملهن
استغربت جواب امي ليش دا تكول هيج .. وعمي يجاوبها : وهو هذا الينخاف منه ما يهتم .. امشي عمي كومن روحن ويانا .. يلا .
جنان : لا تسلم الله ينطيك العافية خلينا هنا
- شلون خليكم يا ام ايناس.. وذولة مهددين البيت يصير ما يصير وانتن نسوان شلون نعوفكم .. كوموا
- الله موجود انت تعرف الحال
- اذا على حنان سهلة ترا ما تكول شي لو اجيتوا عدنا .. والوضع صعب يا ام أيناس .
بضغط من عمي .. والحاح ليث
لبسنا اني وامي ورحنا ويا عمي وابنه لبيتهم
بس كارهين الروحة لإن ماما ومرت عمي ميحجون ويا بعض ومرت عمي تشوف ابليس ومتشوفنا ، هيج من يوم فتحت عيني ع الدنيا نسوان عمامي وامي وحدة متريد اللخ .
مشى ليث و حسام ولد عمي على مياس ومينا يجيبوهن من المدرسة واجوي لهنا .. مياس الموضوع اخر همها صعدت يم بنات عمي اول ما اجت محاولت تعرف ليش اجينا لهنا بس مينا .. الموضوع جان مختلف وياها .. مينا حيل تحب ابوية وهذا الموضوع سببلها قلق .
مينا : واكفة واحس مرت عمي تباوعلي بشمئزاز
بس اعرف نظراتها شنو سببها .
لما صرت ثالث بنية وامي شالت الرحم مالها .. كاموا يلبسوني لبس ولد .. ويكصون شعري ولادي .. ويعاملوني معاملة الولد .. خاصة ابويا يفرح من يشوفني اشبه الولد .. كبرت واني هذا حالي .. شعري كصة ولد ولبس ميناسب احد ..
لابسة صدرية وينطرون ورافعة الصدرية وشادتها من يم بطني وشعري حفر من جهة ، وجهة بيها شعر .. وعمتي عايفة حجي امي و عمي والدنيا وواكفة تباوعلي .
ضجت من نظراتها ومقهورة حيل على ابوي طلعت من جوا البيت ردت كعدت ورا البيت ومنطوية على روحي وافكر باللي يصير ..
ليش ديحجون هيج على ابوي
ابوي اكثر واحد مدللني ، بيوم عيد ميلادي جابلي الايفون سفن هدية ومحد بكدي شايله .. ودائما يفضلني ع الكل ويطلعني وياه وميخجل مني ويكول بنتي هاي وبحسبة زلمتي .. واني افرح من يتباها بيه ويحسسني اني قوية حيل مثل الزلمة .
كاعدة واحايرة بيه وخايفه عليه ليش صارله يومين ماكو ومزو ذولة الهددونا ، شنو الديصير ؟
واني كاعدة بهالختلة ..
طب ابن عمتي رابي وبيده علاكة ملفلفة جوا اباطه واجا للحديقة ، ما يدري اني موجودة ورا البيت، ظل يتلفت منا ومنا والجكارة بطرف حلكه، كعد بزاوية الحديقة كام يحفر بأديه ، فتح لفت العلاكة باوع بيهن طلع السلاح ويلاوع بالعلاكة!
ظل يحسب ويباوع .. رجع السلاح ودفنه جوا ، اجا صوت يصيح ( ابو صعب ) صاح رابي : جييييت .
فز بسرعة وكام يدك برجله على مكان ويرص التراب حيل ويساويه بحذائه .. اندار .. سمعت صوت امي تصيح عليه ..
كمت من مكاني .. هو يمشي واني طلعت من ورا البيت ومشيت ورا، اندار يباوعلي باستغراب تعديته وفتت، ظل دايخ وسؤال بداخلة يتراود ( معقولة شافت شي ؟ )
امي : تعاي تغدي
- ما اريد غدا اريد ارجع للبيت
ليث : رابييييي
رابي : وزقنبوت مو كلت جاااي
ليث : شنو قصتك يا اخي وين جنت
- مرتي انت شدخل خشمك ...
- صارلك ٣ ايام حتى خوالك ما رايحلهم وين جاي تبات
- يم جماعتي
- يا جماعة
- عمة جوعاااان شمسوين غدا .
- وما تاكل برا شنو اني فاتحة مضيف كل اليجي تعاي طبخيله وحطي كباله ، سويت تمن احمر اليريد ياكل ياكل والما يريد ذاك الشارع بيه اكل الدنيا كلها .
جنان: ما يحتاج تبسمرين ، جاينج خطار ساعة ونروح ما نظل ولو ما ابو ليث جان والله حتى ما اجينا ، شلون نفسية شو كومن .. كومن .
ايناس : نرجع للبيت
- ليش منتظرتنا ننطرد حتى نروح .. كومن
رابي: اااا انتي ، هنا
مينا : باوعتله بأستغراب (اني ) !!
- اي ، صبيلي
جاوبته : ليش ما عندك ايد
جنان : صبيله وخل نروح يلا بدلن
ايناس : اني تاخرت ع المستشفى ما اكدر ما اروح انتو روحو للبيت .
حسن : وين رايحين
هم يحجون ورابي يخز وكان دياشر .. مشيت للمطبخ اخذت ماعون حجه : كانج ما شفتي شي .
حجاها ومد ايده ياخذ الجفجير من ايدي : شتقصد
صب تمن واخذ ماعونه وكعد على دجة باب المطبخ ياكل التمن بيده ، ردت اروح حجه : سمعتي
- عفته وراي ومشيت
رابي ابن عمتي وابن خالي بنفس الوكت
من استشهد خالي اسعد ب٢٠٠٤ جان عنده عمتي منتهى ولد واحد اللي هو رابي و٢ بنات .. رجعت لاهلها عاشت عدهم ..
من بعد استشهاده بسنة تقدملها واحد تكريتي حال و مال وخير من الله متزوج وحدة ويريدها الثانية بشرط تاخذ بس بناتها ما تخلي ولد عدها .. ميريد ولد يعيش عنده لإن ابنها جبير ميريده ابيتهت .
كامت امه شمرته على عمامه اللي هم خوالي وراحت تزوجت بتكريت .. جان عمر رابي وكتها ١٣ سنة .. عمامه يشمرونه على خواله ، وخواله يشمرونه على عمامه .. وهيج هو عاش ضايع بين عمامه وخواله ، بس اكثر شي يبقى عد بيت خاله حسن .. اللي هو عمي .. بس اكثر وكته بالشارع مكضيها ..
وين مكضيها وشلون
بس الله يعلم !
........
عابد بسيارته كدام الباب .. داس هورن مرة مرتين تلاثة ... وصوت أغنية سيف نبيل عالية بالسيارة وهو يغني ( جاوينه ) طلع اخوه فتح الباب ويتمركص على صوت الأغنية
ضحك عابد وهو يطوطله بالهورن فوت السيارة ونزل : يول ما بقالك سنة وتتخرج من كلية العسكرية ، شيسجلون بملفك ضابط برتبة راكوص هي داكوك .
احمد : جيب الحر بتموزه ما نكعد وكت العوزة نفصل روحه من الجوزة نحط الجيلة بلوزة وانا معلم اعلى الطك والطكات تشهدلي .
ضربه على علباته و ضحك : راكوص ما تنفع وياك كل جاره .
طكه ومشى طب جوا واحمد يتبعه ويسأل : ابشر شصار على سالفة العمارة
- بكوة الله اليوم العصر نمشي نتكاتب .
ابو عابد : الله يكويك بويه
- يكوي حيلك ابوي
- رضوا الجماعة ع المكاتب ؟
- الامر ما بقيدهم عمارة ورايدين نشتريها الجوارين ياهو النابش شيب ابوهم .
- مو اني خبرني عمك وكال الجماعة رايدين العمارة وحاطين احطاطهم عليها واحنا يوليدي مو حمل ملاوة كافي بيوتنا العفناها بديرتنا وعلى الله جاي نرسى .
- خلي هالموضوع يمي ولا تشيلو هم .. يمه غداج مطول حتى اعرف امري اسبح لو انطرج .
- لا يمه هسه العشا ينزل عدك .
احمد : يعني اليوم تتكاتب
- بحيل الله اناملي ساعة ونطلع نتكاتب وننطي الفلوس .
ميثاق : الله يكتب على خير يوليدي
- امين يابه امين .
حطو الغدا اكلت ومشيت نمت ساعة والعصر سبحت وطلعت تكاتبنا ع العمارة .. وانطينا الفلوس .. خابرت على احمد اخوي تا يجي يشوفها ويفرح .
العمارة بعدها بس هيكل ما بنية
اشتراها واحد بعدو توا يبني .. كام وباعها وبسعر خيالي الاسباب ما اعرفها وما بمخي اعرفها .. اعتبر هالشروة لكطة ما كليوم احصل هيج شروة .
بس اول ما نوينا على الشروة .. الجيران حطوا خشومهم ويكولون احنا نريدها هاي العمارة كلت الهم اني حطيت ايدي عليها كبلكم .. ومصر الا اشتريها .
صعدت فوك العمارة ٣ طوابق .. امشي واتخايلي افتح كوفي املينو العاب بليارد وفيشة وكعدات شباب وبلازمات جبيرة تا تتفرج هالشباب على الطوبة ..
صعد احمد : الله جابك ... شلونها بدينك
- موقعها رهيب ، كاتبت صدك
- اي الف الحمد لله الوالد جان وياي بس راح ، اكلك دحك هين نحط طاولة البليارد .. وهاذ الحايط اصبغو اسود ...
احمد : تسويها كوفي ؟
- اي والطابق الثالث برايك شخلي
جاي نحجي دك الوالد : الو هلا يابه
- هلا ابني عمك هين وجاي تا يحجي وياك .
- ابشر ول ابوي ، جاااي ان شاءالله
سديت الخط : الله يهالعثرة عمي ما بركلو يكعدة حصوة بزردومي، اروح اشوف شنو امرا .. وانت شوف المكان عدل وسد الباب واطلع .
احمد :- يجرى يجرى .
.....
ليث : ايناس لحظة
- ها ليث
- مو خطر عليج تروحين بهيج وكت
- شيريد يصير هو ابويه المهدد مو احنا ... وابويه وينه
- ميخالف اوصلج
- عندك سيارة وتوصلني ؟
- الا سيارة يا عيني بتكسي منا .
- ميحتاج صدكني
- دمشي امشي
طلعنا اني ويا نتمشى الفرع ، وهو يحجي : مرتاحة بشغلج
- الحمد لله لتخاف عليه
- الاطباء زينين
- لا كلشي زين ، الفضل الك لو ما انت ما اتعين بهالمستشفى
- الحمد لله الفضل لابو احمد حجيتله ودرج اسمج .
-اتعينت اني وانت باقي بلا تعيين .. دشوف النصيب
- كلشي بامر الله شسوي هاي جاي اشتغل بمحلي والحمدلله على كل حال .
صرنا نمشي واحنا ساكتين .. احسه يريد يحجي بس ساكت مفهمت سكوته .. دا يريد يحجي كال : ايناس
وكفت سيارة .
- وكفها .. احجي وياي
وكف دنك للسيارة اتفق ويا ع الكروة واندارلي فتحلي الباب الورى .. وكعد ليكدام : ليث عليمن تجي ترا ميحتاج وكروة روحة ورجعة ما عليه شي والله .
- شاكيلج وكايلج ما عندي ؟
اشرلي بيده وكعد ومشت السيارة وصلني للمستشفى اتفق وياه مرجع .. نزلت من السيارة وهو نزل وراي : اينااااس
انداريت : بلي
- ااا ردت اكلج شي
- كول
باوع ع الشارع و هو يمسح على شعره والكلام مسجون بين اسنانه .. حجه : بس ديري بالج على نفسج ، ولا اطلعين برا ابد ، وخابريني باجر من اتريدين اطلعين .
باوعتله ببرود : ميخالف .
(الجلسة)
زينب ماجد: برودج يكتل يا اختي
- ما جانت عندي وياه اي مشاعر ، معتبرته اخ ما جابته امي وداعت ماما وغلاتها والله ما فد يوم فكرت بيه بغير نظرة الاخ ، وهو ما فد يوم تجاوز ويايه حدود الاخوة ، بعيدا عن الزوبعة اللي ادور بكلبه ..
اني الكدامي اخ جبير وكلش احبه لإن احس الله رازقني باخ مسؤل ويخاف عليه وعلى خواتي مثل خواته .
- والله شكله هالاخ راح ينشلع كلب كلبه ..
خالة جنان : مو بس هالأخ .. كل واحد بهاي القصة راح ينشلع كلبه وينحط بأيده.. وكل واحد بينا حاط كاتم لضميره ان جان زين او مو زين .. الزين البينا كاتم على ضميره وهو يشوف المصايب الكدامه وما يدخل حتى ميلوحه الطشار والظالم بينا كاتم على ضميره للأبد ...
يومها اخذت مياس ومينا ورجعت للبيت
جنت خايفة حيل واحس استفذت كل قواي بأن اخلي لهالبنات اب يسندهم .. بس كل ما يمشي العمر اشوف هالاب عالة على هالبنات مو سند .
جبت عمري شغل بشغل ولا يوم ارتاحيت لو كعدت مثل النسوان بالبيت واديت دوري كأم تربي بناتها .. من بعد السقوط اشتغلت ويا وحدة اسطة كيك واتعلمت الحرفة منها الله يرحمها ماتت وبقيت اني ورثت المهنة منها وصاروا كل معاميلها يمي اشتغل بالكيك لحد ما الله وفقني وفتحتلي محل حلواني وعندي جوا ايدي كم عاملة يشتغلن والشغل خير من الله ، لميت الاكدر عليهن وسلف والدين اخذت هالبيت ٧٥ متره وبنيته طابقين ، غرفتين فوك ، غرفة النا وغرفة للبنات ، وجوا هول ومطبخ وصحيات وكراج.
اما الرجل المتزوجته فهو (اسمك رجل يهواي)
اشتغل وياي بالكيك .. وسوا علاقة ويا وحدة من العاملات وصارت مشكلة جبيرة وتخاربنه اني وياه ووصلت للطلاك وبعدين كام يودي ناس ويتعذر وكلت مو مهم العيشة الهم هالبنات اخلي ابوهن فوك راسهن
رجعنا بس شرطت ما يوصل المحل ، كام يشتغل ويبيع بالسيارات .. ويفيك اني هيج اشتريت سيارة بناتي هيج اشتريتلهن تليفونات ، اشترينا من كذا ماركة .. يشتري احدث انواع الاجهزة الذكية ويكعد يتباهى بيهن وين ميروح يكول اني اشتريت واني حطيت ..
والكل يكول هنيالها جنان فاضل يجيب ويحط بحلكها وهو الربع دينار مينطي للبيت ولا يشترك بمسواكه ... متعود هاي الشغلة شغلتي .. بس اكولي شلي بالمشاكل ودوخت الراس ع العلاكة يطبها طوب الله موفقني واكدر اجيب احن علاكة مسواك المهم العيشة دابرة والراس خالي .
الا هاليوم حرت بامره ذوله الاجو ع البيت هدادة شنو ؟
وشعدهم ويا فاضل .. كعدت اخابره لحد ما خويت ماكو مغلق جهازه
دك تليفوني .. باوعت
رقم غريب رديت : الو
- انت جنان مرت فاضل
- اي اني ، منو انت
- اسمعي ال١٠٠ مليون اذا ما يرجعن خلال أسبوع ، والله لنهدم بيتج فوكاج وفوك بناتج
- ءءء دخيلك خوية ١٠٠ مليون شنو
- فاضل موقع على صفقة سيارات .. ب٣٠٠مليون استلم ١٠٠ مليون واختفى وما جاي نلكاله اثر وكالو هذا بيته .. اذا ما ترجعون فلوسنا قسما برب السماوات بناتج ما تشوفين بيهن خير .
- استر علينا الله يستر على عرضك اني ام بنات و النذل والله ما ادري بيه وين حالي من حالك صار يومين ما جاي للبيت ، دخيلتك اني خوية
- لا خوية ولا اعرفكم .. الفلوس اذا ما يرجعن هذا الله كتبه عليكم.
قفل الخط وخلاني ادك على راسي واصرخ .
....
احمد قفلت العمارة و طلعت بسيارتي مشغل اغاني وامشي .. طلعت ع السريع وسيارة لاحكتني .. ظليت ادحك بالمرايا واميل عنها اتحاشاها .. بس جنه الجلب كاصدني .
شلت تليفوني واتصلت على عابد اخوي ..
رد : الو ها ابو شهاب
- عابد هاي سيارة لاحكتني وكصدتني
-وين انت ؟
- اني ع الخط السريع
- ول احفظ رقم السيارة دحكو
- ما جاي اركز عاااابد ما ادري
- ردد الرقم دحك وشوف منو البسيارة
باوعه صفت السيارة وياه باوع بوجه السايق .. بسرعة السايق دفع دفعة قوية بسيارته والسيارة سريعة انكلبت السيارة ٣ كلبات واحمد بداخلها وعابد ع الخط يصرخ بكل علو صوته : احممدددددد حاجيني احمممد .
.....
أيناس : دخلت للمستشفى عادة ابو البصمة صديقنا .. حتى اذا نتاخر يغطي علينا بالبصمة ، بس اليوم على حظي صديقنا منقول وجاي ابداله واحد لوكي للمدير مال المستشفى .
ردت ابصم كال: اصعدي للمدير شوفي شنو يكول ما اكدر
- والله صار عندي ظرف وتأخرت ما تنعاد
- اي يم المدير ايناس قابل اني شبيدي
- دمشيها من يمك ليش من المدير
- لا هذا القانون
تنهدت وانداريت عنه الجذاب اكبر لغاف بالمستشفى ويصيح قانون .. صعدت للمدير فورا .. دكيت الباب كال : تفضل
- العفو دكتور بس ع البصمة اتاخرت ساعتين عن دوامي لإن صار ظرف طارئ مكدرت اجي .
- الساعة راح تصير بالخمسة يا ايناس .
- اعرف بس والله الاحنا بيه مو سهل اصلا جاية وبالي كله يم اهلي وياريت لو تكدر تنطيني اجازة ارجع لاهلي ما اكدر ابقى ، اتمنى منك استاذ .
كام من مكانه سد الباب و كال : لا احنا نقدر ظروف الواحد خاصة اذا كان هالواحد بنية حلوة وحبابة مثلج ... كلشي تامر بيه يصير .
حط ايده على جتفي دنكت و بعدت منه : شكرا الك عمو بس ياريت تبلغ مسؤل البصمة حتى اباشر عملي .
عفته وطلعت : بكد جدي الشيب تارس راسة ويكلي بنية حلوة .. معدتي كلبت راح اتقيئ على كد ما لعبت روحي من الموقف .
رحت لابو البصمة كال : بس هالمرة المرة الجاية تعذريني ايناس .
ما حجيت وياه طالعة روحي ، وبس احجي اتعارك صعدت للعناية عاينت الحالات و طلعت للرسبشن محمد كاعد : اكلك اوس وين ليش جاي هذا الحقنة ياسر
- انقل للردهات
- حرامات والله شلون شعل دمي الحيوان اكله عديها يكلي قانون لو ما كلنا نعرف سوالفه
- اي جان رايد يقفص عليج تنطينه ويعديها
- انطي سم بكلبه اللوكي فور دمي والمدير بعد اكثر منه
- اش
اشرلي وراي ، باوعت الممرضات مال الردهات هنا ، وكفن سألن محمد وراحن .. اجا اتصال رد محمد : نعم
- حادث سير ع سريع محمد قاسم لازم نطلع نسعفه فورا وبالطوارى اكو نقص عدد ، بلغ الممرضين اليمك بالعناية فورا .
- ايناس حادث اسعاف انزلي فورا
- تمام يلا ..
ركض سجلت وصعدت بالأسعاف فورا وتوجهنا لمكان الحادث .. السيارة مكلوبة الف كلبه وبالقدرة مطلعين الشاب من بطنها الدم يجري من كل مكان بوجهه .. فاقد الوعي .. الدكتور يفحص بكلبه واني افحص بالضغط .. صاح شيلوووا .. شالو بسرعة للاسعاف وصعدنا .. اجريناله الاسعافات الاولية .. بس الولد ٩٠% عنده نزيف داخلي ونسبة العيش مالته كلش ضعيفة .. امره يم الله مو يم بشر .
نقلناه للمسشتفى فورا واسعفوا للعمليات فورا دخلوه .. رجعت للطوارى ..
طول ما اني بالطريق تليفوني رجاج ويرج بجيبي امي تتصل .. ما رديت لحد ما رجعت ، اتصلت بماما ردت : الو اينااااااس الحكيلي ولج يمممممممه .
-خييير
[الجلسة]
زينب : والله شكله اني اللي ما راح اشوف خير من هالرواية
ايناس: يووووووه طريقنا طويل ومصايبنا هواي .. سمي بسم الله واكلي الثواب ....يتبع
☆☆☆☆☆
بداية دسمة انطوني رايكم باولى الاحداث وطريقتها
ولا تنسوا التصويت
#زينب_ماجد