#مع_مر_الزمان
#مع_مر_الزمان_3
#جزء_من_حلقه_سابقه
اما عند مينا ورنا الى كانو راجعين من بره ودخلو باب الفيلا
رنا: افتح يامينا
مينا: طيب يارنا بجيب المفتاح استنى
رنا: طيب (وطلع مينا المفتاح وفتح الباب وبصو قدامهم بدهشه وفرحه)
#بدايه_الحلقه_الجديده
عند محمد سعد الى راح لمروان دخل عليهم
يحيى:(قام وقف) اتفضل يا بابا
محمد سعد:(دخل) ايه الى انت عملته ده يا مروان
مروان:(وهو قاعد وساند ظهرو على ظهر السرير) عملت ايه يعنى
محمد سعد:(بزعيق) ما تتعدل ياله وانت بتتكلم هتكلمنى وانت نايم
مروان:(قام وقف وبص ليحيى بأستغراب ) طب انت متعصب ليه
محمد سعد:(بتنهد وبص لمروان بلوم)انا اه مصاحبكم وبعاملكم كواحد صاحبكم مش ابوكم بس مش هسمحلك لا انت ولا أي حد من اخواتك تقولوا كلمه تزعل امكوا ولا تجرحها
مروان: انا قولت ايه يعني يا بابا
محمدسعد: انا سمعت يامروان بس محبتش اظهر اني سمعتك قدام مامتك بس لتاني مره اقولك مس هسمحلك تزعلها واحترم نفسك عشان مش عايز ازعلك وخليني افضل اعاملك كصاحبك ,, اتفضل قوم اعتذر لمامتك ومتتكررش تانى
مروان: طب خليها للصبح
محمد سعد: روح يا مروان اعتزر لمامتك (مروان بص فى الارض ورجع بص لمحمد ,, محمد كمل كلامه) وبصو بقا انا عايز اتعامل معاكو على انى صاحبكو مش هاجى بعد ما كبرتو واوريكو الوش التانى والاحسن بلاش يطلع علشان هتزعلو منى اتفضل (مروان بص ليحيى وطلع من الاوضه ومحمد طلع وراه)
يحيى : ربنا يهديك يا مروان (وقعد على السرير بتنهيده)
...................................................................................................
اما فى بيت مينا ظهرو كلهم قاعدين مع بعض
مينا:(بص لاولاده بحب) ايه الى انتو عملتوه ده
رنا: كل سنه مفاجأه من شكل من وانتو اطفال لسه
سليم:( بص لاخواته ورجع بص لرنا) هما دول كانو اطفال
حازم: اومال احنا مولودين كبار كده
سلمى: كل سنه وانتو مع بعض ومنورين حياتنا يارب
رنا: كل سنه وانتو الى منورين حياتنا (موبيل مينا رن)
مينا:( بص فى التليفون) ده عمر متصل فديو (الكل قام جرى على الموبيل علشان يشوفو عمر)
رنا:(بلهفه) طب افتح عليه (مينا فتح ) عمر وحشتنى قووى
عمر: وانتى كمان ياماما ,, بابا وحشنى جدا
مينا: وانت كمان ياحبيبى عامل ايه
عمر: الحمد لله يابابا كويس(وبص لاخواته) وحشتونى يا بشر
حازم: وانت كمان يا ابيه
عمر: بابا ماما كل سنه وانتو طيبين وتفضلو ديما مع بعض على طول
مينا: وانت طيب يا حبيبى
رنا:(بدموع) هو انت متصل علشان كده ياعمر
عمر: ماما امسحى دموعك وافرحى بقا وبعدين ماكنش ينفع اعدى المناسبه دى من غير ما اقولكو كل سنه وانتو طيبين
مينا: وانت طيب يا حبيبى
رنا: خلى بالك من نفسك ياعمر علشان خاطرى
عمر: متقلقيش عليا يا ماما انا كويس ,, هقفل بقا علشان الوقت اتاخر والمفروض اكون نايم دلوقتى
رنا: ماشى يا حبيبى تصبح على خير
عمر: وحضرتك بخير يلا سلام
الكل: مع السلامه (وقفلو )
رنا:(تنهدت) وحشنى قوى
حازم: بابى هو اتعرفتو على بعض ازاى
مينا: (فى باله) سؤال كل سنه)دى حكايه طويله قوى
سلمى: احكى يابابا بقا
مينا:(بتنهد وبص لرنا بزعل ورجع بص لاولاده) جدكو الله يرحمو كان هو المحامى الى ماسك القضيه بتاعتى انا واخواتى
حاتم: قضيه ايه يابابا
مينا: قضيه اننا نرجع حقنا الى اهلنا اخدو مننا مش هنخش فى تفاصيل بس شوفتها فى حفله فى بيتهم وعاجبتنى جدا وكلمت اخواتى عنها بس اخواتى خوفونى وبالذات محمد لان يومها قالى انو احنا مش من مستواهم ومش هيوافقو بيك وكان محمد عندو بعد نظر جامد جدا خوفت يومها بس هايدى قالتى كمل واتقدم والى فيه الخير ربنا يقدمه بس واتقدمت ووافقو وعشت معاها اجمل تلات سنين خطوبه
سلمى: طب عمركو نمتو زعلانين من بعض فى يوم
رنا: كل بيت فى خناقات وده العادى الحياه مش كلها حلوه ومش كلها وحشه بس عمرى مانمت زعلانه او سبت بيتى وغضبت يوم واحد (وبصت على حازم) ايه ده حازم نام
حاتم: ده خم نوم يا ماما بينام فى اى مكان واى زمان
مينا: مالوقت اتاخر ويلا بقا لازم نطلع ننام كلنا
رنا: سليم(سليم بص لرنا ,, كملت رنا كلامها) شيل اخوك طلعه الاوضه
سليم:(بصدمه) نعم (وبص لحازم ورجع بص لرنا) اشيل مين يا ماما ده شحط
رنا: دا اخوك الصغير ونايم شيله طلعه أوضته
سليم: وليه نشيل يا ماما وازاي اصلا مااحنا هنصحيه
حازم:(وهو نايم) ما تشيل ياعم انتوا هتفضلوا تتناقشوا
سليم: قوم ياله انت هتمثل
حازم:(مد ايده لسليم) شيل
سليم:(شد من ايده وقفه) اقف عدل واطلع وانا ساندك اهوه (حازم طلع مع اخواته وسلمى طلعت اوضتها)
رنا:(مسكت ايد مينا) كل سنه وانت معايا ياحبيبى
مينا: كل سنه وانتى جمبى وفى حضنى (وبغمزه) يالا نطلع لحفلتنا الخاصه (رنا ابتسمت وطلعت مع مينا الاوضه)
.....................................................................................................
عند دينا الى قاعده على سريريها وبتقرأ فى كتاب الباب خبط ومروان دخل دينا اول ما شافت مروان قلعت النظاره وقفلت الكتاب ونامت واتغطت
مروان:(قرب منها) ماما انا اسف متزعليش منى (دينا مردتيش عليه ,, مروان تنهد وكمل كلامه) ماما انا مش همشى غير لم تسامحينى
دينا: مروان انا عايزه انام لو سمحت اطلع بره
مروان: لا مش هطلع انا قاعد هنا بقا للصبح
محمد سعد: خلاص بقا يا دينا هو جاى وبيعتذر
دينا:(قامت قعدت وبصت لمحمد) والاعتذار هيفيد بايه بعد الغلط الى حصل
محمد سعد: خلاص بقا عيل وغلط
دينا: افضل انت حاملهم
مروان: لا والله يا ماما ده كان بيزعقلى علشانك والله
دينا:(بصت لمحمد ورجعت بصت لمروان) طب روح نام بقا علشان الوقت اتاخر
مروان: يعنى مش زعلانه منى
دينا: مبعرفش ازعل منكو
مروان:(حضن مامته بفرحه) ربنا يخاليكو يا احلى دودو فى الدنيا
دينا: (بضحكه) امشى ياله (مروان خرج من الاوضه ومحمد قعد جمب دينا ,, دينا بصتله) بتبصلى ليه كده
محمد سعد: وحشتينى
دينا: يا سلام ومن امتى الحنيه دى
محمد سعد: من زمان بس انتى الى مقفله
دينا: عايزايه يا محمد
محمد سعد: بقولك وحشتينى
دينا:(بأرتباك) العيال لسه صاحيه وانا عندى شغل الصبح تصبح على خير (ونامت وسبتها محمدسعد تنهد بزهق ونام على السرير)
.................................................................................................
نرجع لبيت مينا
في اوضة سلمى
سلمى : لا يا مامي بليز مبحبوووش
رنا : عشان خاطري ياقلبي تعالي على نفسك بس المره دي
سلمى : لا كل يوم بتقوليلي المره دي وبتصممي تاني يوم برضه
رنا : ياسلمى ياحبية قلبي دي كوباية لبن ودي بيضه مسلوقه يعني مش سم ولازم تاكليها وتشربي اللبن عشان انتي ضعيفه، وبباكي لو عرف انك مبتهتميش بأكلك ولا بتشربي اللبن ده هيصمم انه يجيبلك ادويه وحاجات مبتحبيهاش بقا
سلمى(مسكت كوباية اللبن بزهق و قرف):يووووه انا بكرهه بكرهه بكرهه (وشربت اللبن واكلت البيضه)
رنا(ضحكت): هتفضلي تصرفاتك تصرفات طفله مهما تكبرى
.............................................................................................
تانى يوم في شركة مينا وتحديدا برا مكتب سليم
السكرتيره : يافندم لازم أبلغه قبل ما تدخلي عشان ميحصليش انا مشكله
ريناد : انتي غبيه مبتفهميش ، بقولك عملهاله مفاجأه وانتي تقولي لازم اقوله
السكرتيره : يافندم انا مش بإيدي....
ريناد(قاطعتها): ششششش انا لسه هسمع مبررات انا داخله(وسابت السكرتيره ودخلت والسكرتيره دخلت وراها)
سليم(اول ما شافها وقف باستغراب): ريناد !!
السكرتيره : والله يافندم هي اللي دخلت وانا قولتيلها ان مينفعش غير لما ابلغك
ريناد(بزعل مصطنع): الغبيه دي مكنتش عايزه تدخلني وعايزه توقفني برا على ما تبلغك انت لازم ترفدها حالا
سليم(بص للسكرتيره): اتفضلي انتي يا هيام(خرجت السكرتيره وبص لردينا وكمل كلامه) اتكلمي كويس مع الناس عشان محدش يكرهك بسبب كلامك
ردينا : ما تكرهه عادي هي الاشكال دي عايزاها تحبني ليه؛ وبعدين بقولك ارفدها
سليم : ارفدها ليه عشان بتشوف شغلها وبتنفذه صح ، وبعدين متدخليش في شغلي لانه ميخصكش
ريناد(بتقرب منه بدلع): لا يخصني.. انت تخصني واي حاجه تبعك تبقى تخصني ولا ايه؟!
سليم(بيحاول يبعد عنها) : ريناد احنا في مكان شغل مينفعش اللي بيحصل ده
ريناد(لفت ايدها حوالين رقبته): ما انت بتوحشني يابيبي والشغل دا واخدك مني خالص
سليم : هانت ياحبيبتي وهنبقى مع بعض على طول
ريناد(وهي لسه بنفس الوضع ولافه ايدها على رقبته): انا مش مصبرني عليك انت وشغلك غير ان فرحنا قرب(وقربت باسته من خده)
سليم(ابتسم بحب): احنا في الشركه
ريناد(قربت باسته من خده التاني): عادي ما انت حبيبي وهتبقى جوزي قريب(فجأه سمعوا صوت من وراهم الاتنين بعدوا عن بعض برعب)
مينا(بغضب): ايه اللي بيحصل دا يا بشمهندس
سليم(بتوتر): با.. احم بابا احنا يعني ال
مينا(بصيلهم الاتنين بجديه): المفروض ان انتوا محترمين والمناظر دي متنفعش اصلا لكن انتوا معندكوش أي مسؤليه وناسين ان انتوا في شركه وحواليكوا موظفين
ريناد(بكسوف): سوري يا أنكل
مينا(بصيلها وحاول يتمالك اعصابه): اتفضلي ياريناد روحي عشان يشوف هو كان بيعمل ايه ويخلص الشغل اللي وراه
رينا(بصت لسليم ورجعت بصت لمينا): بعد ازنكوا (و مشت)
مينا(بص لسليم ولقاه باصص في الارض بإحراج ، رماله الملف اللي كان في ايده على المكتب): راجع الملف دا وابعته للحسابات في اسرع وقت (واتجه للخروج)
سليم : بابا...
مينا(قاطعه): مش وقت كلام خالص انا اصلا مش طايقك ولا طايق عمايلك فاسكت بقا (و سابه وخرج، وسليم قعد على المكتب بتنهيده وحزن)
...................................................................................................
اما في بيت مينا
حازم(متجه ناحيه الباب بزهق): طيب طيب ياللي على الباب احنا هنطفش(وفتح شاف حاتم اخوه ، كمل كلامه) انت مبتفتحش بمفتاحك ليه ولا انت غاوي تتعبنا
حاتم( بجديه وظاهر عليه الألم): اسندني ياحيوان مش قادر ادوس على رجلي
حازم(باستغراب وقلق): مالك مالها رجلك
حاتم : اسندني ادخل وابقى ارغي (سنده ودخلوا جوه و قعدوا)
حازم : مالك بقا
حاتم : روح نادي ماما كده وخف انت يعني فاهم حاجه
سلمى(نزلت واتجهت ناحيتهم باستغراب): في ايه!
حاتم : نادي لماما يا سلمى رجلي مش طايقها
سلمى(بقلق و وطت تشوف رجله): هي مالها زرقه ليه كده
حاتم : وانا داخل من البوابه وقعت ورجلي اتخبطت في طوبه كبيره و وجعاني اوي
حازم : لو وارمه و زرقه يبقى انت في التمام يامعلم ومافيش فيك حاجه ولو مش وارمه ولا زرقه يبقى لازم تتجبس
سلمى : العكس يامتخلف .. يعني لو وارمه وزرقا تبقى هتتجبس
حاتم(بعصبيه): انتوا واقفين تستظرفوا ما تنادوا لماما وتخلصوا
حازم : طيب طيب بتزعق ليه طااااه (وراح نادا لرنا و جت معاه بسرعه)
رنا(قربت منه بقلق): مالك ياحبيبي حصلك ايه و رجلك مالها
حاتم : متقلقيش يا ماما بس شوفيها عشان حاسس انها اتكسرت
حازم : دي ماما زمانها نست الطب اصلا
حاتم : اطلع اوضتك عشان انت بتوترني
رنا : خلاص يا حازم بقا(ومسكت رجل حاتم عشان تشوفها)
حاتم(بوجع): اااه براحه ياماما دي باين والله مكسوره
رنا : لا مافيش فيها كسر الحمدلله دي كدمه بسيطه هحطلك عليها مرهم وتربطها وهتبقى كويسه باذن الله
حازم : ما رجلك كويسه اهو اومال انت اوفر ليه و اسندني ومعرفش ايه
حاتم(بعصبيه): لا وجودك في نفس المكان اللي انا موجود فيه بيوترني، أقولك انا هقوم اطلع اوضتي انا وسيبهالك خالص
.............................................................................................
قرب العشا عند سليم اللي رجع من الشركة دخل البيت وقابل حازم أخوه)
حازم(بإستغراب) إنت إتأخرت ليه! ده بابا جه من فترة
سليم(بتوتر) ها مافيش كان فيه مشوار كده بخلصه بعد الشركة وإتأخرت!
حازم(بإبتسامة) تمام حمدلله على السلامة
سليم(بإبتسامة مرتبكة) الله يسلمك ياحازم (وبسرعة وتوتر) هو بابا فين صحيح!
حازم(بإستغراب من إرتباكه) من ساعة ماجه من الشركة وهو جوا ف أوضة المكتب بيقول عنده شغل وماخرجش لسا
سليم(بإبتسامة) تمام هروحله أشوفه
حازم(بعدم فهم) ماشي!
(مشي حازم وراح سليم ناحية أوضة المكتب بتاع أبوه وسط إحراجه وتوتره من مواجهة أبوه خبط ودخل بعد مامينا أذنله بالدخول)
مينا(رفع عينه ناحية الباب لقى سليم واقف عند الباب وحاطط وشه في الأرض وساكت بصله بتنهيدة) هتفضل واقف عندك كتير قرب تعال!
سليم(راح لأبوه وقف قدامه بتوتر وإحراج منه وماإتكلمش)
مينا(بتنهيدة وزهق) ماتتكلم يابني! انت جاي علشان تبص للأرض وتسكت!
سليم(بإحراج) بابا أنا أسف
مينا(بصله بتنهيدة) على إي!
سليم(رفع وشه وبصله بعدم فهم وبتوتر) على اللي شوفته الصبح ف المكتب وكده أنا والله ماأعرف ده حصل إزاي فجأة لقيتها عندي ف المكتب وفجأة لقيتها ..(وبصله بتلعثم في الكلام وسكت)
مينا(بجدية) أنا هقولك على إي بالظبط ياسليم على شغلك اللي مابقاش جد زي الاول! ولا على إستهتارك اللي عمري ماشفته منك! ولا على وضعكم انت وريناد حتى لو مخطوبين ماينفعش الانفتاح ده بينكم سامع! حافظ عليها علشان ف الحلال تبقى كل حاجة حلوة عارف إنها اللي بتعمل كده ومنفتحة في تصرفاتها بس إنت الراجل مش هيا الكلمة كلمتك! مش هقولك طبعاً الكلمة كلمتك يبقى خلاص تبقى سي السيد عليها وتفرد عليها رجولتك بس لازم يكون فيه جدية في حاجات كتيرة ماينفعش فيها تهاون مش كل حاجة هتعملها ولا هقولها هتمشي وراها سامع ياسليم بلاش سلبية في حاجات لازم تبقى فيها الجد الجد كمان علشان الأمور ماتفلتش منك وتندم بعد كده وتقول ياريتك اللي ماكان كان!
سليم(بإحراج من نفسه وبص لأبوه بندم باين علي ملامحه) حاضر يابابا بس أهم حاجة متزعلش مني أنا ماقدرش على زعلك وانت عارف كده كويس
مينا(بتنهيدة وبصله بإبتسامة) وهو أنا يعني اللي بعرف أزعل منكم إنت غبي يللا
سليم(بصله بإبتسامة) يعني خلاص ياكبير عفوت عني كده سماح!
مينا(بهزار) لا عفاف ياظريف!
سليم(بضحكة وهزار) أيوة بقى وبنهزر ونألش كمان لا ده فيه تطور ياباشااا
مينا(بصله بضحكة وجدية مزيفة) إمشي يللا إنت هتصاحبني
سليم(بضحكة) خلاص خلاص ماشي هدى نفسك ياكينج!
مينا(بصله بجدية) ركز في كلامي كويس ياسليم ركز في كل كلمة وحطها حلقة في ودنك علشان ماتندمش ف وقت ماينفعش فيه الندم سامع
سليم(بصله بإبتسامة وراح حضنه) حاضر يابابا ماتقلقش ربنا يباركلنا فيك
مينا(بتنهيدة قلق) ويباركلي فيكم ياحبيبي يلا روح غير هدومك وسلم ع مامتك وإرتاح شوية قبل العشا ومتتكررش تانى انك متبقاش معانا على اى اكل
سليم(بإبتسامة) حاضر يابابا يلا سلام
مينا(بإبتسامة) سلام ياحبيبي (خرج سليم راح يسلم على مامته ويغير هدومه ومينا باصص على مكان خروجه بقلق عليه)
............................................................................................
فى مكتب مروان فى مكتب المحامى
مروان: ان شاء الله هيطلع برئ وهيرجع بيته قربيب
الست: ياريت يابنى انا بقالى كتير بلف ومش عارفه اعمل حاجه خالص
مروان: متقلقيش بأذن الله خير
الست: ماشى يابنى بعد اذنك
مروان: اتفضلى يا امى (ومروان اخد الورق ودخل للمحامى)
المحامى: ها عملت ايه يا مروان
مروان: هانا رايح النيابه بكرا بأذن الله بس محتاج توجيهات من حضرتك بردو
المحامى: بص يا مروان فى شغلانه المحامى لازم تكون انت مقتنع من جواك انو الى انت بدافع عنه برئ
مروان: هو برئ انا عارف بكده وحاسس بس كل الادله ضده
المحامى: انت اسمع منه واربط الكلام ببعض
مروان: انا هشوفه بكرا بأذن الله
المحامى : اسمع كلامه كويس وركز فيه وخير بأذن الله
مروان: يارب استأذن حضرتك انا همشى
المحامى: ماشى وربنا معاك وبلغنى بيالى حصل معاك
مروان: ان شاء الله بعد اذنك(وخرج مروان من المكتب ولم حاجته ونزل)
.............................................................................................................
عند مالك الى فى قاعد فى اوضته وبيعزف على الكمان دخل عليه آدم
آدم: ايه يابنى قد كده الموسيقى مش مخليك سامع خبط الباب
مالك: لا سامع بس مش عايز اقطع تركيزى
آدم: ياسلام افرد بقا ماما ولا بابا الى بيخبطو
مالك: ماما وبابا بيدخلو لم بيسمعو المزيكا(وبص لآدم) فين فريده
آدم: فى اوضتها
مالك: فريده زعلانه منى انا حاولت اكلمها اكتر من مره وهيا مش عايزه
آدم: مانت الى عيل صغير وكل حاجه تجرى على بابا وتقوله انا مش عارف انت هتكبر امتى
مالك: طب اعمل ايه يعنى
آدم: كنت تعالا قولى وانا كنت جبتلك واحد وكنت بردو هكلمها بس انت لسه عيل
مالك: انا مش عيل يأدم
أدم: لا عيل واكبر بقا وبلاش تقول كل حاجه لبابا وماما ماشى (وبضحكه سخريه) وحط قدامك مخده واشرب اللبن واغسل سنانك ورجيلك ,, تصبح على خير يا بيبى (وسابه وخرج ومالك بصاصص ليه بزعل وصدمه من كلامه)
....................................................................................
فى مكان ما.. ظهر عمر مع صديقه رائد
رائد : هما قالوا هيقولولنا على ميعاد الهجوم وقت الهجوم نفسه مش قبله حتى معرفش على ايه يعني بيعملوا كدا
عمر : ما انت عارف ان دا طبيعة شغلنا ياعم واتعودنا على كدا عادي يعني
رائد : ربنا يستر ونرجع من العمليه دي على خير لان العصابه دي في ناس زمايلنا كتير معرفوش يقبضوا عليهم وفيه اتصاب كتير واستشهد بسببهم
عمر : متقلقش هنرجع بالسلامه وهنقبض عليهم كمان بس قول يارب
رائد : ياااارب
عمر : انت مش ناوي تتخمد بقا بدل ما تنت سهران ومسهرني معاك كدا
رائد : في ظابط محترم في القوات الخاصه بقول لصاحبه اللي زي اخوه اتخمد
عمر : اه في انا بقول كدا عادي
رائد : طب بقولك ايه بما اننا مش جايلنا نوم ما تقوم نعمل أكل وناكل
عمر : انت مستفز ياله، انت مش جايلك نوم قوم انت اعمل واطفح لوحدك لكن انا عايز انام ومش جعان
رائد : يبقى يلا نساعد بعض بقا ايه رأيك نعمل مكرونه بالجبن
عمر(بصيله بضحكه): انت اهطل
رائد(بضحكه): اه يلا بقا بالله عليك قوم معايا
عمر(بضحكه) : يلا يا اخرة صبري
...............................................................................................
تانى يوم في شركة مينا اللي كان عامل إجتماع وكان فيه كل الموظفين المهمين في الشركة)
مينا(بجدية) طبعاً كلكم عارفين الصفقة دي قد ايه مهمة جداا للشركه فمش محتاج أقولكوا اني مش عاوز اي غلط لاني اصلا مش هسمح بأي غلطه ومش هسمح أن الصفقه دي ترسى على حد غيرنا
سليم : متقلقش يا مستر مينا احنا مظبطين كل الاوراق ومافيش اي غلط
حاتم : متقلقش يا باشا كل حاجه تمام التمام
خالد : بإذن الله خير يافندم وهنتجمع المره الجايه عشان نحتفل بالمناقصه انها رست علينا
مينا : بإذن الله، يلا بقا كل واحد يروح يكمل شغله ومش عايز لعب لان مافيش وقت (والكل انصرف)
............................................................................................
في مكان ما، شبه مكان مهجور
ظهر بعض الرجال العمالقه وشكلهم مرعب واقفين ويجلس أمامهم رجل يظهر عليه هيبته وشخصيته
الرجل: انا عايز الموضوع دا يحصل في أسرع وقت ومش عايز أي غلطه لان الغلطه بموتكوا ، فـ لو خايفين على عمركوا بقا العمليه دي تتم بسرعه
رجل١: متقلقش يا باشا كل حاجه هتم زي ما انت عايز وفـ اسرع وقت كمان
رجل٢: ولو عايزنا نخلص عليه كمان ياباشا ننفذ...
الرجل(قاطعه بعصبية): انتوا بهايم مبتفهموش.. بقول مش عايزكوا تأذوه انا عايزه هنا في ايدي وتحت عيني لغاية ما اللي عايزه يحصل وهنرجعه تاني يعني هو مجرد تهديد بس ومش عايز أي غلطه بقا
الراجلين(مع بعض): عُلم وسينفذ ياباشا
الراجل(بضحكة شر): أما اشوف هتعمل ايه بقا والجبروت اللي انت فيه دا هيروح ولا لأ ويا انا يا انت في السوق بقا
...................................................................................
(في بيت مينا ظهر كلهم قاعدين في الصالة وقلقانين ورنا بتعيط ومينا قاعد يلف في الصالة رايح جاي وسط قلقه)
رنا(بعياط) وبعدين يامينا الفجر خلاص هيأذن وحاتم لسا ماجاش! عمره ماإتأخر كده!
مينا(بتوتر وقلق) إهدي يارنا م أنا قلقان زي زيك أهو إهدي تلاقيه عند حد من إصحابه ولاحاجة ونسي نفسه..
سليم(بقلق) أنا برن عليه يابابا الموبايل مقفول
سلمي(بعياط) طيب هيكون راح فين يعني أنا قلقانة أوي
حازم(بقلق ودموع) بإذن الله شوية وهيجي ماتقلقش ياجماعة
مينا(بقلق وبصوت مسموع) يارب يارب إنت فين يابني كل ده
رنا(بعياط) رن عليه تاني يامينا بالله عليك قلبي مش مطمن عليه قلبي بيقولي ان حاتم فيه حاجة والله وإن إبني مش بخير!
مينا(بصلها بقلق) لالا باذن الله هيبقى كويس إدعي انتي بس وهو شوية وتلاقيه داخل علينا(قطع كلامه رسالة على الفون بتاعه فتحها بسرعة مجرد مافتحها بص عليها بصدمة وبصوت عالي) مستحيل! مش معقول!
.......................................................................................
ياترى ايه الى حصل وحاتم فين لو حابين تعرفو استنونا الحلقه الى جايه
#hadeer
#rody
#hager
