#مع_مر_الزمان
#مع_مر_الزمان_37
#جزء_من_حلقه_سابقه
محمد سعد:(بضحكه) انتى معندكيش عيانين فى المستشفى وعايزه تزترزقى من ورايا
هايدى:(بقلق)انا بتكلم جد على فكره ،، اعمل تحاليل انا عايزه اطمن عليك
محمد سعد:(بضحكه من تصميمها) هايدي بطلي شغل الدكاتره ده وسيبيني واسكتي
هايدى:(بأصرار)لا بجد اعملهم عايزه اطمن عليك يابني
محمد سعد: اطمني انا كويس(وقام وسبها)
هايدى:(بصتله بقلق) منا لازم اعرف فيه ايه هقول مينا وهو هيعرف ياخده يعمله التحاليل بمزاجه او غصب عنه منا هسيبه كده وافضل انا فى قلق
#بدايه_الحلقه_الجديده
(فـ الشاليه ظهر محمدسعد قاعد فـ الحديقة لوحده وماسك الموبايل بتاعه بس سرحان ومش مركز فيه جاله مينا وهايدي محمدسعد أول ماشافهم بصلهم بتنهيدة وقفل الموبايل وحطه جنبه)
محمدسعد:(بص لهايدي بتنهيدة) لحقت تروحي وتقولي يابنتي أنا كويس والله مش عارفة مقلقة نفسك ليه !
مينا:(بتساؤل وجدية) مش ملاحظ إنك بقيت تقعد لوحدك كتير وسرحان طول الوقت !
محمدسعد:(بتنهيدة زهق) عادي يعني يامينا فيها إيه لما أقعد لوحدي شوية يعني!
مينا:(بجدية) مش شوية يامحمد مش شوية إنت طول الوقت قاعد لوحدك وساكت مالك فيك إيه!
هايدي:(بخوف وقلق وقعدت جمبه) إنت تعبان صح! إنت فيك حاجة أنا متأكدة إنت خاسس خالص وكمان متغير الفترة دي أوي! قولنا طيب لو فيك حاجة إحنا إخواتك يامحمد عرفنا وطمنا عليك ياحبيبي..
محمدسعد:(بتنهيدة حُزن) مافيش حاجة ياهايدي ماتكبريش الموضوع هيكون مالي يعني ..
مينا:(بجدية) محمد ماتحورش علينا إنت لو مش شايف نفسك إحنا شايفينك بتسرح كتير وجسمك خس عن الأول كتير وبتشرب ماية كتير وبتدخل الحمام كتير حاجات بسيطة إنت لو مش واخد بالك منها فأنا أبوك وواخد بالي منها أوي إنت مش أخويا إنت إبني فاهم يعني إيه إبني يعني هحس بيك من غير ماتتكلم وتحكي حتي ! قولي إنت تعبان فيك حاجة طمنا عليك..
محمدسعد:(بصلهم بدموع مكتومة وتنهيدة حُزن) والله إنتو مقلقين نفسكم على الفاضي أنا كويس خالص وحاضر لو السرحان والقعاد لوحدي مضايقكم أوي ماعوتيش هقعد لوحدي ها كدهه إطمنتوا إنـيّ كويس..
مينا:(بجدية) إعمل حسابك لما الرحلة تخلص ونرجع القاهرة هتيجي معايا المستشفى تعمل شوية تحاليل ونطمن عليك..
محمدسعد:(بسرعة وتوتر ليجربه على التحليل) يامينا أنا كويس والله مش مصدقني ليه أنا لو فيا حاجة هقولكم !
مينا:(بجدية) هيا كلمة يامحمد هتعمل التحاليل ونطمن عليك بمزاجك أو غصبن عني مش مهم المهم هتعملها وده أخر كلام عندي ..
محمدسعد:(بصله بتنهيدة وهز رأسه بمعني ماشي) حاضر يامينا ربنا يسهل إن شاء الله..
هايدي:(مسكت إيده وقومته وبقلق) يلا قوم أقعد معانا جوا ماتقعدش لوحدك كدهه..
محمدسعد:(بضحكة وهزار) يابنتي أنا كبرت على معاملة الطفل اللي بتعامليني بيها دي ..
هايدي:(بضحكة) هتفضل صغير بالنسبة ليا وإبني اللي بخاف عليه حتى لو بقيت جدو حتي..
مينا:(بضحكة وهزار) ماتحاولش ده أنا الكبير وأوقات بتقلبلي دماغي لو جالي شوية صداع..
هايدي:(بصتلهم وحضنتهم الأتنين بحُب) أنا ماليش فـ الدنيا غيركم ربنا يباركلي فيكم ويديمكم فـ حياتي يارب..
عباس:(من وراها وبجدية مُزيفة) الله الله خيانة ع الملاء كدهه أحضان وكلام حلو وحاجة فل خالص..
مينا:(بضحكة) أختنا بقي عندك مانع ياعم الدكتور إنت ..
عباس:(بضحكة) لا ياعم ماعنديش مانع ربنا يخليكم لبعض(وبص لهايدي بغمزة وخبث) بس يعني عاوزين إحنا كمان زيكم ولا مالناش نفس يعني!
(هايدي بصتله بصدمة وخجل وإحراج وعباس وإخواتها قاعدين بيضحكوا على منظرها)
مينا:(حط إيده على كتف محمدسعد وبضحكة) طيب يلا يامحمد ندخل إحنا مش بحب أكون عذول ..
(مشي محمدسعد ومينا دخلوا الشاليه وهايدي بصت لعباس بغضب عباس بصلها بغمزة هايدي بصتله بضحكة وحضنته بحُب وبعد كده أخدها ودخلوا الشاليه وسط ضحكهم وهزارهم)
~~~~~~~~~~~~~~~~~~~~~~~~~~~~~~~~~~
فى نفس اليوم عند عمر وهنا ،، هنا قاعده قدام المرايا بتسرح شعرها
عمر:(طلع من الحمام و هو لافف فوطه على وسطه وماسك فوطه بينشف شعره) مش متخيله كنتي وحشاني ازاي.. من ساعة ما جينا هنا ومش عارف اتلم عليكي خالص
هنا: أنت اللي مش متخيل بقا انا ازاي مكسوفه
عمر:(قرب منها ومسك أيدها ووقفهاقدامه) مكسوفه من ايه بقا .. انتي من حقي انا لوحدي و من حقي اني اخطفك من وسط الكل وقت ما احب، بس بعيد عن الكلام يعني متبسطيش وانتي معايا
هنا: ياحبيبي أنا طول ما انا معاك وانا سعيده وفرحانه
عمر: انا بقول أشيل الفوطه دي ونكمل اللي بدأناه
هنا:(بضحكه ) لا بقا زمان الكل بيستنانا تحت عشان الغدا
عمر:(شدها لزقها في صدره و وشه في وشها ) وفيها ايه لما نتأخر على العشا شويه
هنا:(وهي بتحاول تبعد عنه) هيقولوا علينا ايه بس ياعمر
عمر: ما يقولوا اللي يقولوه
هنا:(بعدت عنه) لا لازم ننزل زي الكل
عمر:بضحكه) ماشي يا هنايا هننزل الوقتي بس الليل كله مع بعض تاني (هنا ضحكت وسابقته ونزلت وعمر ضحك وكمل لابسه ونزل هو كمان)
~~~~~~~~~~~~~~~~~~~~~~~~~~~~~~~~~~
(فـ الشاليه بعد الغدا ظهر يحيي في الحديقة بتاع الشاليه وماسك تلفونه وبيتكلم مع رحمة)
يحيى:(بإبتسامة) كان نفسي تكوني معايا جداً ............. مش أنا قولتيلك وإنتِ قولتي بباكِ مش هيوافق............. كان زمانك اقنعتيه وبقيتي معايا.............. إيه ده بقا........... ومن أمتى وإنتِ بتقولي كدا يارحمة ................. يعني إيه بتغيري وبتغيري من مين؟! من سلمى و فريده اللي هما إخواتي الصغيرين اللي زيهم زي سارة .......... متبرريش الغلط بالغيرة يا رحمة أنا مش عايزك تبقي كدا أبداً ........... أنا بفهمك بس عشان منتكلمش في الموضوع دا تاني........... وأنا كمان بحبك أوي ياحبيبتي ............ ماشي ياحبيبتي وأنا هبقى أكلمك تاني......... سلام
قفل وتنهد وقام دخلهم جوا
أدم:(شاف يحيي قرب منه وبتساؤل) كنت بتعمل إيه برا لوحدك بنسأل عليك من ساعتها ..
يحيي:(بإبتسامة) كنت بكلم رحمة..
أدم:(بضحكة وهزار) ﷲ يسهلو ياعم ..
يحيي:(بضحكة)عقبالك يارب وأفرح فيك يا أدم ..
أدم:(بضحكة)هيا مش كانت أفرح بيك ..
يحيي:(بضحكة ومشي من قدامه) لا انا خليتها أفرح فيك ..
أدم:(بضحكة ودخل وراه) برحتك ياباشا..
(وضحكو الإتنين قعدوا مع الشباب يكملوا القعده وسط ضحكهم وهزارهم)
~~~~~~~~~~~~~~~~~~~~~~~~~~~~~~~~~~
(بالليل فـ الشاليه ظهروا كلهم قاعدين في الحديقة وعاملين حفلة شواء ظهروا الشباب على الشواية بتشوي والبنات بتعمل السلطة وبتجهز الحاجات التانية والرجالة ورنا وهايدي ودينا قاعدين معاهم بيتكلموا)
فريدة:(راحت للشباب وبإبتسامة) الله الله بقي علي الريحة القمر دي إنتوا هتخلصوا أمتي!
مالك:(برفعة حاجب) مش مطمن للدخلة بتاعتك دي عاوزة إيه يعني من الأخر ..
فريدة:(بضيق) هعوز منكم إيه يعني مش عاوزة حاجة..
مالك:(بخبث) يعني مش عاوزة حاجة خالص متأكدة !!
فريدة:(ببراءة) يعني مافيش ضرر من حتة لحمة أدوقهالكم وأقولكم عاملينها حلو ولالا ..
سليم:(برفعة حاجب وضحكة) لا ياشاطرة هش من هنا مش عاوزين نعرف رأي سيادتك..
فريدة:(بضيق) على فكرة ياأبيه إنت قلبك قاسي (وبصت لأدم ببراءة وضحكة) أبيه!
أدم:(بصلها بضحكة وحنية) لو عليا أجيبهالك كلها بس العيال دول هيكلونـي وكمان خلينا نأكل كلنا سوا أفضل..
عمر:(بضحكة) مش هتفسطي يعني يافيري لو مادوقتيش الوقتي أهو إهدي ربع ساعة كمان وهنخلص ..
رائد:(بصلهم بجدية مزيفة وبدرامية) إيه القسوة اللي إنتو فيها دي! إخص والله مافيش فـ قلوبكم ذرة رحمة يعني ناقص البت تشحت منكم إخوات أي كلام ..
مروان:(بضحكة) إيوة بقي بدأنا التمثيل إنطلق يارائد ..
رائد:(بضحكة وأخد حتة لحمة) خدي يافيري دوقـي وفكك من العيال دي عندنا كام فريدة يعني..
فريدة:(أخدتها منه بفرحة) يخليك ليا يا أبيه ياللي ناصفني إنت يخليك للغلابة والجعانين..
رائد:(بضحكة) به به إمشي وبطلي شحاتة تك القرف فصلتيني..
فريدة:(بضحكة وحدفته بخيارة كانت فـ إيديها) ماشية من نفسي أصلاً ..
رائد:(أخد الخيارة وأكلها وبضحكة) أصيلة يابت يافريدة والله قلبك حاسس بيا ..
فريدة:(بضحكة) عدّ الجمايل دي بقي ياأبيه أي خدمة..
(فـ نفس الوقت ظهرت سلمي قاعدة بتنفخ وبتبص عليهم بضيق وغيرة ومش عارفة إيه سبب غيرتها من هزار رائد لفريدة طول عمرهم بيهزروا عادي)
حازم:(بهدوء وبتساؤل) سلمي إنتِ كويسة قاعدة تنفخي طول ما أحنا قاعدين فيه حد مزعلك !
سلمي:(بصتله وفجأة إتعصبت عليه وزعقت بصوت عالي) إنت مالك إنت أزعل ما أزعلش أنا حُرة وبعدين إيه اللي مقعدك هنا وسط الشوي والدخان..
حازم:(بصلها بخضة ودموع) إنت بتزعقي ليه! وبعدين أنا عاوز أقعد معاكم هقعد لوحدي يعني؟!
سلمي:(بعصبية) ولما تتنيل تتعب بقي القاعدة هتفيدك وقتها فـ حاجة ده إيه القرف ده..
رائد:(جه عليهم وبتساؤل) فيه إيه صوتكم عالي ليه!
حازم:(بحزن ودموع) مافيش يا أبيه..
سلمي:(بعصبية لما شافت رائد) لا فيه قاعد جنب الدخان ولا فارق معاه إنه يتعب ولاأي حاجة خالص ده أنا قاعدة ومخنوقة مابالك بقي هو تعبان وهو مُهمل ومش بيهتم بصحته..
رائد:(بهدوء وجدية) والله إنتِ إتخانقتي قومي وإبعدي هو قاعد وكويس خالص ماحصلوش حاجة إيه لازمتها بقي تزعقي وتزعليه منك مالكيش دعوة بحازم وماتزعقلوش تاني كدهه مفهوم (سلمي بصتله بزعل وحزن وسكتت كمل رائد كلامه بجدية وتحزير) وأخر مرة ياسلمي تعلي صوتك وإنتِ بتكلميني أو تعلي صوتك على حد أصلاً فاهمة ! (سلمي باصتله وفضلت ساكتة ومش بتتكلم كمل رائد كلامه بجدية) بكلمك على فكرة ومحتاج ردك فااااهمة !
سلمي:(بصتله بدموع وحزن وقامت وقفت) فاهمة ..
حازم:(بحزن علي سلمي وبص لرائد) زعقتلها ليه ياأبيه زعلت ومشت أهي كُنا قاعدين كلنا مع بعض..
رائد:(بضحكة على براءة حازم) الوقتي تيجي ماتقلقش إنت وماتزعلش ماشي يازوما !
حازم:(بهدوء وإبتسامة) مش زعلان ياأبيه والله ..
عمر:(بهدوء) زعقتلها ليه يا إبني ماتعرفش تتكلم براحة يعني..
رائد:(بضحكة) ياعم إخلص الوقتي تيجي وهصالحها بس هيا اللي ضايقتني نازلة فـ حازم زعيق زعيق على إيه بقي ماتفهمش يللا بقي بطلوا رغي علشان نخلص أناااا جوعت ..
يحيي:(بضحكة) طفس ده كويس إنك ماسك نفسك وما أكلتيش الأكل وإنت واقف..
رائد:(بضحكة) علشان بس تعرف أنا بجاهد أد إيه !
حاتم:(بضحكة) فيك الخير يا أخويااا يللا علشان نخلص من الموال ده أنا هبطت..
(بدأت الشباب تكمل شوي والبنات كملت السلطة وسلمي كانت رجعت تاني قعدت معاهم وسط حزنها إنها زعقت لحازم وهو مالوش ذنب وحزنها بسبب زعيق رائد ليها شوية وظهر رائد بيبصلها وبيغمزلها بمعني ماتزعليش بصتله بعتاب وحزن ولفت وشها بغضب طفولـي وما إتكلمتش رائد بصلها بضحكة وكمل اللي بيعمله)
~~~~~~~~~~~~~~~~~~~~~~~~~~~~~~~~~
(فـ الشاليه بعد ما الشباب خلصوا الشوي والبنات جهزوا السفرة وكلهم قعدوا على الأكل بدأوا يأكلوا وسط كلامهم وضحكهم وهزارهم)
فريدة:(بضحكة) اللحمة طعمها جميل تسلم إيديكم والله طلع يجي منكم أهو..
سليم:(برفعة حاجب) ده أحنا يجي مننا عنكم ياشبر ونص إنتِ آل يجي مننا آل..
فريدة:(بضيق طفولي) أنا مش شبر ونص أنا طويلة على فكرة ..
مالك:(بضحكة) آها طبعاً طويلة وكلنا واخدين بالنا من طولك إنتِ بتقولي فـ إيه!
رنا:(بتساؤل) مالك ياسلمي قاعدة ساكتة ليه!
رائد:(بص لسلمي بضحكة ورجع بص لرنا بضحكة وهزار) عملت إضراب عن الكلام..
عمر:(بضحكة) سيبها فـ حالها ياض لأقوملك..
رائد:(أخد قطعة لحمة وحطاها قدام سلمي بضحكة وهزار) خدي يابرنسيسة أحلي قطعة لحمة لأحلي سلمي فـ الدنيا ماتزعليش بقي ها ما أقدرش على زعلك يازلمااا ..
سلمي:(بصتله بغضب طفولي) زلمااا !!
رائد:(بغمزة وضحكة) شوفتي بقى حد دلعك الدلع ده قبل كدهه عدي الجمايل دي عندي كام سلمي أنا !
(سلمي بصتله بغضب طفولي ورائد بصلها بغمزة وضحكة سلمي بصتله بضحكة وسكتت)
سارة:(بضحكة وتساؤل) هو إحنا مش هنروح ملاهي !
حازم:(بسعادة) أيوة إحنا عاوزين نروح ملاهي ماروحتهاش من زمان ..
عباس:(بهدوء وبص لحازم) عاوز تروح فين ياحازم أصل ماسمعتيش..
يحيي:(بضحكة) إستلم بقي يازوما ..
أدم:(بضحكة وهزار) حازم ده بيجيب الكلام لنفسه ..
مينا:(بضحكة)عاوز تروح فين يازوما إنت مش ناوي تجيبها لبر مع عمك عباس شكلك كدهه..
حازم:(بحزن) عاوز أروح ملاهي فيها إيه دي يعني إشمعنا هما كلهم هيروحوا وأنا لا ..
محمدسعد:(بضحكة) مافيش حد هيروح ياعم إهدي بس وماتزعلش نفسك..
عباس:(بضحكة) يابني إنت لسا حِمل بهدلة وشكشكة إنت مابترحمش نفسك ليه من المرمطة اللي بتمرمطها لنفسك دي ولما تيجي تأخد علاج بتفضّح الفضايح..
حازم:(بضيق وغضب طفولي) خلاص مش عاوز أروح فـ حتة ..
سليم:(بضحكة وهزار) ما أنت مش هتروح بالفعل ..
مينا:(بضحكة)طيب يللا كملوا أكل وبطلوا كلام إنتو مابتصدقوا حد يفتح وتشتغلوا ..
( كلهم سكتوا وكملوا أكل وبعدين خلصوا أكل والبنات نظفوا المكان وكملوا سهرة مع بعض وسط كلامهم وهزارهم وضحكهم)
~~~~~~~~~~~~~~~~~~~~~~~~~~~~~~~~~~
(فـ الشاليه ظهر محمدسعد قاعد على السرير فـ أوضتهم شوية ودينا خرجت من الحمام بعد ما أخدت شاور وكانت بتنشف شعرها سرحت شعرها وقعدت على السرير)
محمدسعد:(بإبتسامة وحُب) أنا أسعد إنسان فـ الدنيا وأكتر واحد محظوظ إن ربنا رزقني بالقمر دي تكون زوجتي ورفيقة عمري..
دينا:(بكسوف وجدية) شكراً يامحمد ..
محمدسعد:(بضحكة) شكراً يامحمد هو إيه اللي شكراً يامحمد يابنتي إنتِ ناسية إنك مراتي ولاإيه لو ناسية أفكرك عادي ماعنديش مشاكل..
دينا:(بهدوء) محمد ماينفعش كدهه إحنا كبرنا ع الكلام ده ..
محمدسعد:(بإستغراب) كبرنا على إيه يابنتي أنا كلمتك أصلاً ولل جيت جمبك! وبعدين هو أنا علشان أحب فـ مراتـي لازم أستأذنها الأول وأعمل حدود ف معاملتي معاها ماعوتيش فاهمة يادينا بجد ..
دينا:(بجدية) فيه إيه يامحمد إنت عاوز تتشاكل وخلاص ..
محمدسعد:(بهدوء وحكمة) لا يادينا مش عاوز أتشاكل وخلاص طيب بقولك إيه بكرة إيه رآيك مانخرجش مع العيلة ونقضي اليوم سوا ونخرج لوحدنا ..
دينا:(برفض وهدوء) لا أنا بحب نخرج كلنا سوا مالهاش لازمة نخرج إحنا الإتنين لوحدنا خلينا معاهم..
محمدسعد:(بحزن من كلمتها) يعني إيه يادينا مالهاش لازمة نخرج لوحدنا الواحدة المفروض تحب تخرج مع جوزها وتحب تبقي معاه ف كل مكان يروحه..
دينا:(بهدوء) عارفة ياحبيبي بس إحنا رحلة جماعية مع العيلة كلها نخلينا معاهم أفضل ..
محمدسعد:(قرب منها وبإبتسامة حُب) طيب بقولك إيه إنتِ وحشتيني أوي..
دينا:(بعصبية بسيطة) محمد أنا عاوزة أنام ومش كل شوية وحشتيني وكلام وشغل المراهقين ده قولتلك إحنا كبرنا ع الكلام ده وماينفعش كدهه ..
محمدسعد:(بجدية وحزن باين فـ صوته) أنا مش قصدي اللي فــ دماغك خالص يادينا مش شايف فيها مشكلة أو عيب لما أقول لمراتي وحشتيني بس شكل سيادتك عندك رأي تانـي وأول وأخر مرة تعلي صوتك عليا يادينا فاهمة مش علشان بحبك تدوسي على قلبي بطريقتك دي !
دينا:(بوعي لكلامها وحزن) محمد أنا ..
محمدسعد:(طفي النور ونام على السرير وإعطاها ظهره) نامي يادينا مش عاوزة تنامي إتفضلي نامي ..
(دينا بصتله بتنهيدة ونامت على السرير ظهر محمد بيفتح عينه وسرحان فـ دينا ومعاملتها وسط حزنه وزعله)
~~~~~~~~~~~~~~~~~~~~~~~~~~~~~~~~~~
(فـ الشاليه بعد الفطار ظهروا كلهم قاعدين تحت ورنا وهايدي ودينا والبنات فـ المطبخ فـ الوقت ده كان حازم قاعد وماسك موبايله ومش مركز معاهم)
عباس:(بهدوء) زوما كفاية تليفون يللا علشان تأخد علاجك..
حازم:(بصله برعب وخوف ودموع) لا بقي والله ما هأخد حاجة أنا تعبت وزهقت بقي والله مش هأخد حاجة..
مينا:(بهدوء وجدية) متحلفش يا حازم إنت كدا كدا هتأخدها حتى لو قعدت تحلف من هنا للسنة الجاية فـ يللا وماتتعبش نفسك وتتعبنا معاك..
حازم:(يعياط وخوف لما عباس بدأ يجهزها) برضو والله ما هاخدها عمو عباس ماتعملش حاجة مش هأخدها بقي والله صعبة وبتوجعني ..
يحيي:(بهدوء وحزن) معلهش يازوما إستحمل بس شوية وخدها علشان تبقي كويس وماتتعبش..
حازم:(بعياط) لا والله ماليا دعوة مش هأخدها ..
عباس:(بعصبية وزعيق لأول مرة فيه) حااااازم هيا كلمة يللا يعني يللا ومتعصبنيش عليك إنت ليه مش حاسس بحالتك وإن مينفعش تهمل في علاجك ولا في صحتك ولو إنت هتهمل أنا مش هسمحلك بقي حتى لو هشّد عليك..
حازم:(بخوف وعياط) بس أنا مش عايز حقن وعلاج أنا كرهت العلاج و كرهت حياتي كلها أصلاً ..
عباس:(بحزن بس أخفاه وبصله بجدية) مش هتأثر بكلامك ده وهتاخدها برضو ويلاا علشان أنا مجهزها من زمان..
حازم:(بعياط بصوت عالي) مش عااااايز ومش هاخدها ..
عباس:(بص لسليم بجدية) سليم إمسك أخوك يلا وإخلص ..
(حازم بصله بخوف وعياط وقعد يهز دماغه بمعني لا وحاول يهرب من سليم بس سليم مسكه حازم أول ما سليم مسكه جسمه هيسيب ويصرخ فجأة بصوت عالي وخوف رنا هتيجي جري من المطبخ وتبصلهم بقلق)
رنا:(بخوف وقلق) فيه إيه ياحازم مالك ياحبيبي..
حازم:(بعد عن سليم وبعياط وخوف) أنا خايف وإنتوا كدا بتخوفوني أكتر بالله عليك ياعمو والله مش عاوز حاجة أنا تعبت وجسمي بيوجعني والله بلاش النهاردة..
عباس:(بتنهيدة حُزن) للأسف مش هينفع ياحازم لازم تأخدها والله مش هتقدر تكمل من غير علاجك هتتعبت جداً وصحتك هتبقي فـ النازل وإحنا عاوزينك تبقي كويس ياحبيبي وتخلص من الشكشكة والبهدلة اللي إنت فيها دي..
حازم:(بتعب وعياط بصوت عالي) مش عاوز مش هأخدها ..
أدم:(بهدوء وحنية) طيب إهدي خالص لإنك من كتر العياط بتنهج خالص أهو إهدي (حازم بصله بتوتر وقلق كمل أدم كلامه بهدوء وحنية) إيه رأيك أعطيهالك أنا مش هتحس بيها إن شاء الله وهتبقي سهلة..
حازم:(بعياط وتعب) لا يا أبيه بتبقي صعبة برضو والله..
أدم:(بهدوء وحنية) وعد والله هعطيهالك بسرعة وهتبقي سهلة بإذن الله ومش هتحس..
(حازم بصله بخوف وعياط بصوت عالي وما إتكلمش عمر راح مسك إيده ووقفه قدام أدم بهدوء وسط خوف ومعافرة حازم يبعد عنهم)
أدم:(بص لعباس بهدوء) هات الحقنة يابابا هعطيهاله ..
حازم:(أول ماسمعهم طلع من حضن عمر وبص لأدم بخوف وعياط) مش عاااوز يا أبيه بالله عليك بلاش النهاردة..
أدم:(بإبتسامة هدوء) إهدي بس يازوما هخلص على طول والله قول بسم الله يللا وأحضن عمر وماتخافش..
عمر:(حضنه ومسكه كويس وبهدوء) ماتخافش ياحبيبي..
(عمر حضن حازم ومسكه كويس وأدم قرب منهم وبدأ يعطيه الحقنة وسط عياطه وصريخه)
حازم:(حضن عمر جامد وبعياط) آآآآآآه آآآآآآه كفاية يا أبيه شيلها بقي بالله عليك آآآآآه ..
أدم:(بحزن) خلاص والله خلاص هتخلص أهي..
عمر:(بيطبطب على ظهره وبهدوء) إهدي يازوما خلاص خلصت ياحبيبي ماتعيطش ..
أدم:(شال سن الحقنة وبصله بإبتسامة) خلاص يازوما خلصت إهدي بقي وماتعيطش..
حازم:(بوجع وعياط) رجلي وجعتني ..
مينا:(بحزن على إبنه) خلاص ياحبيبي الوجع هيروح الوقتي..
(حازم بصلهم بحزن وتعب ومشي براحة وهو بيعرج بسيط من وجع الحقنة وكان طالع أوضته فجأة رائد مسك إيده)
رائد:(بحزن بس بصله بإبتسامة) رايح فين يازوما إحنا قاعدين مع بعض شوية علشان هنروح البحر ..
حازم:(بدموع وتعب) مش عاوز أنا عاوز أطلع أوضتي ..
رائد:(بإبتسامة) مافيش طلوع الأوضة الوقتي يللا علشان نجهز نفسنا وبعدها هنروح البحر ماتعيطش بقي والحقنة وجعها هيروح الوقتي ياحبيبي..
(قعدوا يهدوا فـي حازم وسط دموعه ووجعه من الحقنة شوية والكل كان جاهز راحوا كلهم على البحر وسط ضحكهم وهزارهم)
~~~~~~~~~~~~~~~~~~~~~~~~~~~~~~~~~~
(أخر النهار ظهروا الرجالة قاعدين على الشط وكل واحد قاعد مع مراته وقاعدين يتكلموا كلهم جه عليهم حازم وهو باين عليه الحزن والضيق)
حازم:(بضيق وحزن) هو أنا هفضل كدهه كتير فيها إيه لما أنزل البحر لوحدي مش هعوم ولا هعمل أي مجهود والله..
مينا:(بتنهيدة وهدوء) زوما مش لسا طالع من شوية مش نزلت شوية خلاص بقي..
حازم:(بحزن) ده هما ربع ساعة وطلعت يابابا أنا مابلحقش أستمتع ولا أعمل حاجة وإنتو عارفين إنـي بحب البحر والماية..
عباس:(بجدية) ولما تنزل والنوبة تجيلك وتتعب يعني وتأخد حقن وتتبهدل وقتها هتكون مرتاح..
حازم:(بحزن) مش هتعب بإذن الله ياعمو ..
عباس:(بتنهيدة زهق) أقعد طيب وإهدي لما حد من الشباب يطلع من البحر وينزل تاني يبقي يأخدك شوية..
حازم:(نفخ بزهق وقعد على الرمل) قعدت أهو قعدت ..
(كلهم بصوله بضحكة على تصرفاته الطفولية شوية والشباب كلهم طلعوا ومعاهم البنات ماعدا عمر وهنا)
مينا:(بتساؤل) إنتوا طالعين كلكم مع بعض يعني خير وفين عمر وهنا ماطلعوش معاكم ليه!
رائد:(بهدوء وإبتسامة) كفاية كدهه بقالنا كتير فـ الماية وعمر قالنا شوية وهيطلع ورانا ..
سليم:(بص للبحر لمح عمر وهنا طالعين) جُم ع السيرة أهم طالعين أهم ..
رنا:(بقلق) هو فيه إيه هيا هنا مالها شكلها تعبانة..
(كلهم وقفوا بقلق وخوف عمر خرج من الماية وقرب منهم وهو مسند هنا وسط تعبها وتوجعاتها وماسكة بطنها كلهم قربوا منهم)
مينا:(بتساؤل وقلق) فيه إيه ياعمر مالها هنا ؟!
عمر:(بقلق) مش عارف يابابا فجأة وإحنا ف الماية حاسة بمغص جامد ومش قادرة فطلعنا ..
(قطع كلامهم مع بعض صوت توجعات جامدة من هنا بصوا عليها لقوها بتنزف جامد عمر بصلها بخوف وقلق وإشتالها وراح بيها ع الشاليه وكلهم وراه)
(فـ الشاليه ظهر عمر قاعد جنب هنا بعد ماحطها على السرير وسط خوفه وقلقه شوية وهايدي دخلت الأوضة بعد ماطلبت علاج وأخذته ودخلت وكلهم باين عليهم القلق ومش فاهمين حاجة)
رنا:(بصت على عمر وشافت خوفه وقلقه على هنا بصتله بهدوء) أخرج إنت ياعمر ماتخافش ياحبيبي هتبقي كويسة ماتقلقش..
(عمر بص لهنا بخوف وخرج وهايدي قربت من هنا وبدأت تكشف عليها بمساعدة رنا شوية وخرجلهم برا فـ الوقت ده كانوا كلهم باين عليهم القلق وعمر رايح جاي وسط خوفه وقله عليها وهيتجنن كل أما يسمع توجعاتها أول ماشاف عمته ومامته قرب منهم بخوف وقلق)
عمر:(بتساؤل وخوف) مالها ياعمتو طمنيني بالله عليكِ
هايدي:(بصت لعمر بحزن) إنت إنسان مؤمن ياعمر وعارف إن كل حاجة بتحصلنا قدر ومكتوب..
عمر:(قاطعها بخوف وقلق) فيه إيه ياعمتو ماتقلقنيش !
هايدي:(بحزن) هنا كانت حامل وتقريباً مكنتش تعرف و نزولها البحر مع الموجة والحركة الجنين نزل (كلهم بصولها بصدمة وحزن وعمر بصلها بصدمة وغمض عينه جامد بحزن كملت هايدي كلامها بهدوء وحزن) أنا أعطيتها علاج عشان ينضف الرحم خالص و كمان مسكن لأن الوجع مش سهل ..
(ظهروا كلهم واقفين باين عليهم الصدمة وباصين لعمر بحزن وزعل وعمر واقف بيسمع وعينه مليانه دموع وتايه ومش معاهم)
عمر:(بحزن وتوهان) ينفع أدخلها ياعمتو !
هايدي:(بحزن) آه عادي ياحبيبي بس متحسسهاش إنك زعلان وربنا يعوض عليكوا يارب ماترعلش نفسك..
(عمر هز دماغه بمعنى ماشي وسابهم ودخل أول ما دخل هيشوف هنا نايمة على السرير ودموعها نازلة قرب منها وقعد جمبها ومسك إيديها وباسها ومسح دموعها)
هنا:(بتعب وعياط) مكنتش عارفه ياعمر لو كنت أعرف مكنتش هتحرك كنت هفضل محافظه عليه ..
عمر:(بإبتسامة حزينة وحط إيده على بؤها) ششششش متقوليش كدا دا مكتوب وطالما قدر ومكتوب لازم يحصل وربنا هيعوضنا بإذن الله ونجيب بدل العيل عشرة ماتزعليش نفسك ياحبيبتي..
هنا:(بتعب وعياط) كان نفسي أوي أكون عارفة والحمل دا يكمل عشان أسعدك وأفرحك..
عمر:(بإبتسامة حزينة) ياحبيبتي إنتِ وجودك في حياتي هو أكبر سعادة ليا ربنا يباركلي فيكِ..
هنا:(بعياط) بس أنا عارفة إنك طول الوقت كان نفسك يحصل حمل ونجيب بيبي عارفة انك نفسك تبقى أب وأنا بإهمالي حرمتك من الإحساس ده ..
عمر:(بإبتسامة) حرمتيني إيه بس ! ما إحنا هنجيب عشر عيال كمان بإذن الله مش عيل واحد إنتِ بتعيطي ليه إهدي كدا وإمسحي دموعك دي يلاا ياهنايا (هنا بصتله بصتله بعياط وسكتت كمل عمر كلامه بتساؤل وقلق) مالك ياحبيبتي إنتِ تعبانة حاسة بوجع!
هنا:(بتعب ودموع) شوية مش أوي..
عمر:(بتساؤل) مش عمتو إعطيتلك مسكن؟!
هنا:(بتعب) آه بس في تعب بسيط ..
عمر:(بحنية وإبتسامة) طب بصي حاولي تنامي وأنا هفضل جمبك أهو مش هخرج يللا حاولي تنامي..
(هنا غمضت عينها وهو فضل جمبها بيقرألها قرآن لغاية ما نعست وراحت فـ النوم وعمر فضل بيبصيلها بحزن وزعل ودموعه نزلت)
~~~~~~~~~~~~~~~~~~~~~~~~~~~~~~~~~~
(فـ الشاليه ظهروا كلهم قاعدين وباين عليهم الحزن على هنا وعمر وساكتين ومش بيتكلموا قطع الصمت ده مينا )
مينا:(بحزن بس أخفاه وبجدية) يلاا ياجماعة إعملوا حسابكم علشان ننزل القاهرة ماينفعش نقعد علشان هنا هتبقي تعبانة ومحتاجة راحة وكمان مافيش حد هيجيله مزاج يقعد فـ يللا كله يروح يجهز حاجته وهدومه علشان نتحرك ونمشي ..
(راحوا الشباب والبنات كل واحد يجهز شنطته وحاجته ومينا قعد مكانه وسرحان وباين عليه الحزن وكان معاه عباس ومحمدسعد ودينا وهايدي ورنا راحوا يجهزوا الشنط والحاجة شوية وعمر جه عليهم)
عمر:(بص لباباه بهدوء وحزن) معلهش يابابا أنا وهنا هننزل القاهرة مش هنقدر نقعد..
مينا:(بحزن وهدوء) إحنا كلنا هننزل ياعمر الشباب وكلهم بيجهزوا الشنط وهننزل كلنا روح إنت كمان جهز حاجتكم إنت وهنا علشان نمشي كلنا ومانتأخرش ..
(عمر بصله بهدوء وهز دماغه بمعني ماشي ولسا جاي يمشي مينا ندهه عليه عمر بصله تاني)
مينا:(بهدوء وحنية) ماتزعلش نفسك ياحبيبي بكرة ربنا يعوضكم ماتزعلش نفسك كله قدر ومكتوب..
عمر:(بحزن بس أخفاه وبص لباباه بإبتسامة بسيطة) الحمدلله يابابا قدر الله وما شاء فعل إدعيلنا ..
مينا:(بحن على حزن إبنه) ربنا يعوضكم خير ياحبيبي يللا روح جهز شنطتكم علشان نمشي ومانتأخرش..
عمر:(بهدوء) حاضر يابابا بعد إذنك ..
(مشي عمر وسط حزنه ومينا متابعه وباصص عليه بتنهيدة حُزن وقعد مكانه وفضل ساكت وسرحان)
محمدسعد:(بحزن) ماتزعلش نفسك يامينا هيبقوا كويسين ياحبيبي بإذن الله ماتزعلش نفسك..
مينا:(بتنهيدة حزن) أنا حاسس بيه وحاسس بالحزن اللي جواه اللي هو بيحاول يخفيه عني وعننا كلنا ..
محمدعباس:(بهدوء وحزن) عمر قوي يامينا ماتقلقش عليه هيقدر يتجاوز حزنه ده ويحتوي حزن وتعب هنا كمان ماتقلقش عليه رينا يكرمهم يارب ويرزقهم ..
مينا:(بهدوء) يارب يارب ..
~~~~~~~~~~~~~~~~~~~~~~~~~~~~~~~~~~
( بعد ساعات وصلوا القاهرة عمر ظهر شايل هنا ودخلها أوضتهم ونيمها على السرير ومعاه رنا اللي قاعدة ساكتة وبتبصلهم بحزن)
رنا:(بصت لعمر بهدوء) عمر !
عمر:(بص لرنا بهدوء وتوهان) نعم ياماما !
رنا:(بحزن) إنت كويس ياحبيبي ساكت من ساعة اللي حصل وما إتكلمتش ولاقولت حاجة إتكلم ياحبيبي ماتكتمش جواك أنا عارف إنك زعلان ومستحيل تبين زعلك وحُزنك قدامنا بس أنا أمك ياحبيبي ووجعك من وجعي إحكيلي مالك فضفضلي..
عمر:(بهدوء وتعب) مافيش ياماما ماتقلقيش ياحبيبتي أنا كويس هيا هنا كل ده نايمة من ساعة ما سافرنا للأن حتى ماقلقتش فـ الطريق ولا الوقتي وإحنا بنتكلم وكدهه !
رنا:(بصتله بتنهيدة على حزنه اللي بيخفيه عنهم وبهدوء) طبيعي ياحبيبي الإجهاض اللي بيحصل ده بيبقي مُتعب جداً وعمتك معطياها مسكن قوي فطبيعي تنام كتير ده عمتك هايدي كانت قلقانة عليها من السفر وكده بس الحمدلله إطمنت عليها وهيا كويسة ماتقلقش ..
عمر:(بتنهيدة حُزن) ربنا يخفف عنها يارب..
رنا:(بهدوء) طيب روح أي أوضة تانية نام فيها وإرتاح شوية من السفر ياحبيبي وأنا هفضل معاها عشان لو إحتاجت حاجة ..
عمر:(برفض وهدوء) إنزلي إرتاحي إنتِ يا ماما هي نايمة وإنتِ بتقولي عمتو بتقول إنها مش هتصحى الوقتي..
رنا:(قامت وقفت وبهدوء) طب أنا هنزل أحضرلها حاجة تاكلها وأجيلها تاني..
عمر:(بهدوء وهز دماغه بالموافقة) ماشي ياماما اللي يريحك..
(نزلت رنا تعمل أكل لهنا وعمر وعمر قعد جنب هنا ومسك إيديها وبيبص عليها بحزن وسرحان)
~~~~~~~~~~~~~~~~~~~~~~~~~~~~~~~~~~
(بعد مارجعوا من السفر فـ شقة محمدسعد ظهر قاعد فـ أوضة مكتبه اللي فـ البيت وباين عليه التعب جداً سند راسه على المكتب وشوية الباب خبط وإتفتح ويحيي دخل منه وقرب من باباه وهو قلقان)
يحيي:(قرب من محمدسعد بخوف وقلق) بابا حضرتك كويس
محمدسعد:(بصله بإرهاق وتعب) أيوة ياحبيبى أنا كويس ليه فيه حاجة مالك!
يحيي:(بهدوء وقلق) لا أنا مش مطمن على فكرة طول ما إحنا فى الطريق وحضرتك ساكت ومبتتكلمش..
محمدسعد:(بهدوء) زعلان علشان عمر وهنا بس ياحبيبي ماتقلقش أنا كويس..
يحيي:(بهدوء) أيوة يا بابا كلنا زعلانين كلنا بس مكناش زى حضرتك برضو وغير الزعل باين عليك التعب خالص أنا مش مطمن وقلقان..
محمدسعد:(بيحاول يبين إنه كويس) لا يا حبيبى أنا كويس والله ماتقلقيش وبعدين ده تعب السفر بس وهرتاح شوية وهبقى كويس ..
يحيي:(بعدم طمأنينة) بابا ماتيجى نعمل شوية تحاليل وفحوصات من باب الاطمئنان بس ..
محمدسعد:(برفض وهدوء) إنت عارف إنـيّ مبحبش المستشفيات ولو روحت عمتك مش هطلعنى من هناك إلا بعد وقت إنت مش بتشوف بتعمل إيه فى عمك مينا لم يروح يعمل تحاليل..
يحيي:(بهدوء) ما إحنا لازم بردو نطمن على حضرتك بقالك فتره طويلة معملتش تحاليل والوقتي باين عليك التعب..
محمدسعد:(بهدوء وتعب) أنا كويس ياحبيبى مش مستهلة بجد بطل قلق بقي..
يحيي:(بعدم إطمئنان) علشان خاطرى يا بابا ..
محمدسعد:(بنفاذ صبر وتنهيدة) بعدين يا يحيي حاضر سيبنى دلوقتى ورايا كام حاجه عاوز أعملها..
يحيي:(بهدوء) طب حضرتك إطلع إرتاح شوية وبعدين إعمل اللي إنت عاوزه..
محمدسعد:(بهدوء) حاضر يا يحيي هخلص بس وهطلع أنا يللا بس سبنى أكمل اللي كنت بعمله ..
يحيي:(هز راسه بمعنى ماشي وقام وقف) ماشي يا بابا بعد إذنك..
(خرج يحيي وهو مش مطمن من شكل بباه وحاسس إنه هو فيه حاجة ومخبيها أما محمدسعد مجرد ما يحيي خرج مسك دماغه وغمض عينه وفتحها بإرهاق جامد وتعب باين عليه ورجع سند دماغه على المكتب وسط سرحانه)
~~~~~~~~~~~~~~~~~~~~~~~~~~~~~~~~~~
( فـ بيت مينا بعد أما رنا إطمنت على هنا وعمر ظهرت قاعدة فـ الصالة ومعاها وسلمي وسط حزنهم وزعلهم على اللي حصل لهنا وعمر)
سلمي:(بحزن وبصت لرنا) ماما هيا هنا كويسة ولالسا تعبانة!
رنا:(بهدوء) كويسة ياحبيبتي وهتبقي كويسة خالص بإذن الله أسبوع بالكتير وهترجع تمام ماتقلقيش..
سلمي:(بحزن) بس شكلها تعبانة أوي ياماما ..
رنا:(بحزن وزعل) طبيعي ياسلمي الإجهاض ده مش سهل وبتنزف كتير فطبيعي يبقي صعب وتتعب بس هتبقي كويسة ياحبيبتي ماتقلقيش..
سلمي:(بحزن وتساؤل) أبيه عمر كويس!
رنا:(بحزن لما إفتكرت إبنها وحُزنه) كويس ياحبيبتي ماتقلقيش عمر قوي وهيقدر يكمل ويصبر ع الإبتلاء ده وربنا هيعوضهم بإذن الله ويرزقهم..
حازم:(بحزن) بس أنا شوفته كان باين عليه الحزن خالص وتعبان وكمان شكله مُرهق وتعبان..
رنا:(بإبتسامة تطمنه) عمر كويس يازوما ماتقلقش ياحبيبي وإبقي إطلعله كمان وإطمن عليه بنفسك لو مش مصدقني..
حازم:(ربع رجله وبسرحان وحزن) ياااه لو هنا كانت تعرف بالحمل ده وكان تم على خير كان أبيه عمر هيبقي بابا وأنا عمو كان نفسي يجي أوي ..
سلمي:(بحزن) أبيه عمر هيبقي أب جميل أوي وحنون ..
رنا:(بحزن على كلامهم) قدر الله وما شاء فعل بإذن الله ربنا يرزقهم ويعوضهم ..
حازم:(بسعادة وحماس) بإذن الله علشان أبقي عمو بقي ..
سلمي:(بضحكة على حماس أخوها) هتبقي عمو صغنن أوي ياخلاثو ياناس..
حازم:(بضيق طفولي) أنا مش صغير بطلي تكلميني وكأنـي فـ الحضانة كدهه..
سلمي:(بصتله بتحدي) لا صغير هه بس ده أنت تكة وهتنقرض بحجمك الصغير ده ..
حازم:(بصلها بضيق طفولي) أعععع ماما خليها تسكت ..
رنا:(بضحكة عليهم وقامت وقفت) أنا مش هخلص منكم ومن مناقرتكم دي لما أقوم أشوف أنا ورايا إيه ..
(قامت رنا راحت المطبخ وسلمي وحازم قعدوا يلعبوا ويهزروا مع بعض وسط ضحكهم وفرحة رنا اللي شيفاهم من المطبخ وشايفة هزار وضحك حازم اللي من رقت تعبه قليل لما بقت تشوفه بيهزر وبيضحك)
~~~~~~~~~~~~~~~~~~~~~~~~~~~~~~~~~~
تانى يوم الصبح عند هنا الى قاعده على السرير بتتكلم فى التليفون
هنا:(بدموع مكتومه) انا كويسه ........ لا لا مافيش داعى يا ماما .............. ايوه ايوه انا عارفه انو حضرتك مشغوله .............. تمام. ......... ماشي......... مع السلامه (وقفلت التليفون ورمته جمبها بدموع طلع عمر من الحمام
عمر:(بصلها بقلق وقرب منها) مالك يا هنا انتى تعبانه
هنا:(بدموع) لا ياعمر انا كويسه
عمر: اومال بتعيطى ليه
هنا:(وهيا بتمسح دموها) مافيش يا حبيبى حاجه
عمر: انتى كنتى بتكلمى مامتك هيا زعلتك ولا ايه
هنا:(بصتله) عادى يا عمر
عمر: مش انا حبيبك مش ديما تقوليلى الزعل لم اتنين يشيلوه بيخف احكى بقا
هنا:(بدموع) هقولك ايه ياعمر ،، هقولك انى ماما عارفه انى تعبانه وفضلت عليا عرض ازياء هقولك انها مكلمتنيش الا لم انا رنيت عليها وكانت عاوزه تقفل معايا باى طريقه مكنتش عاوزه تطمن عليا هقولك انى عشت طول عمرى بتمنى انى احضنهم مع انى فى حضنهم طول الوقت بس حساه مش دافى مش حضن ام لبنتها ولا اب لبنته لم كان عايش بحس انو بيحضنونى علشان شكلهم ميبقاش وحش مش انى محتاجه الحضن ده بحس انهم بيتفضلو عليا بيه (بعياط) انت عارف اول ما جيت هنا انا كنت فاكره انو طنط رنا كده وعمو مينا كده بس انا لاقيتهم غير كده بحس انهم بيحضنكو علشان هما الى محتاجين الحضن ده حسيت فعلا يعنى ايه ام ويعنى ايه اب حسيت بجو العيله الى انا عشت طول عمري بحلم انى حتى المحه بس (بعياط بصوت عالى) انا تعبانه من جويا قووى انو محدش من اهلى حاسس بيا خالص ورايحين يجرو وراء عرض ازياء او صفقه هتجبلها فلوس الى هيا اصلا مش محتاجها (وبصتله بضعف) حتى جوزى كنت حاسه انو صفقه ياخدها الى يدفع اكتر (عمر محسش بنفسه غير وهو واخد هنا فى حضنه وفاق على صوت عياطها
عمر:(وهيا فى حضنه) ششششششششش متعيطيش انا مش بحب اشوف دموعك دى علشان خاطرى يا حبيبى انا امك وابوك واخوكى وابنك انا هبقى كل حاجه ليكى
هنا:(بعياط وهيا ماسكه فيه اكتر) انت فعلا كل حاجه ليا انا ماليش غيرك اصلا متسبنيش واوعى تتخلى عنى فى يوم
عمر: حد بيقدر يتخلى عن روحه انتى روحى وعمرى وحياتى انتى بقيتى النفس الى بتنفسه
هنا:(غمضت عنيها وقالتله بتعب) عمر سبنى نايمه على صدرك كده مش عاوزه اتكلم تانى انا عاوزه افضل كده لحد ما انام (عمر اتعدل جمبها على السرير هنا حطت راسها على صدر عمر وغمضت وعنيها اما عمر الى زاد وجعه من كلام هنا ووجعها واقسم انو يعوضها عن كل الي شافته)
~~~~~~~~~~~~~~~~~~~~~~~~~~~~~~~~~~
فى الشركه ادم قاعد على مكتبه الباب خبط ودخلت السكرتيره
مروه: تحت امرك يادكتور
ادم: لو سمحتي اطلبيلي القهوه بتاعتي وهاتيلي كل الأوراق اللي واقف ومحتاج امضتي
مروه: حاضر
ادم: هي انسه تيا موجوده في الشركه
مروه: دكتوره تيا بقالها يومين مبتجيش اصلا بس الواضح أنها جت النهارده
ادام:(بصيلها بقلق جدا) طب اخرجي انتي وكلميها خليها تيجي عشان عايز اسألها على حاجه ،، بعد شويه الباب خبط تانى و تيا دخلت بعد ما ادم أذنلها بالدخول
تيا فضلت واقفه ووشها في الأرض وشعرها نازل على وشها وبتتكلم من غير ما ترفع وشها
تيا:(من غير ما ترفع وشها) حضرتك طلبتنى يا دكتور
ادم:(باستغراب) ايوه طلبتك عملتى الى قولتلك عليه
تيا: بكره هيبقي خلصان بأذن الله
ادم:(بصلها باستغراب اكتر) ارفعي وشك انتي باصه في الارض كدا ليه (تيا بصتله ادام بصدمه من وشها الى باين عليه اثر ضرب عنيف) ايه اللي في وشك ده
تيا:(بصت في الأرض) مافيش يا دكتور
ادم:(قام وقف و قرب منها ومسك ايدها بعصبيه)ارفعي وشك و ردي قوليلي ايه ده
تيا:(بعدت ايده عن ايده وبدموع) لو سمحت يادكتور مينفعش كدا
ادم:(بغضب) اخوكي برضه اللي عمل فيكي كدا (تيا فضلت ساكته وباصه في الأرض من غير كلام ،، كمل ادام كلامه بغضب) يبقى هو (كمل كلمه بتنهيده وعصبيه وراح قعد على الكرسي بتاعه تانى) قوليلي عنوان بيتكم وانا هروحله وهتشوفي هعمل فيه ايه (تيا مردتش عليه وفضلت باصه في الارض ،، كمل ادم كلامه) خلاص انا هتصرف واكيد عنوانك في الملف بتاعك وهروحله وحسابه معايا عسير على اللي عمله فيكي ده
تيا:( بعياط) بصفتك ايه ؟! ( ادم بصلها باستغراب وتساؤل ،، تيا كملت كلامها بعياط) تروحله وتحاسبه بصفتك ايه... صاحب الشغل الي بشتغل فيه دا ميعطكش الحق انك تحاسبه لان هو من وجهة نظره هو اخ كبير بيربي أخته وانا لازم اسمع كلامه في كل حاجه حتى لو هيرميني للنار بإيديه ويجوزني واحد قد جدي بالغصب(ادم بصلها بصدمه وهو مش مصدق اللي بيسمعه أن اه يعمل في أخته كدا ،، مسحت دموعها وكملت كلامها بصوت مهزوز) اظن وجودي في المكتب حاليا مالوش لازمه انا هروح اكمل شغلي (وخرجت وسط صدمته اللي مش قادر يفوق منها)
~~~~~~~~~~~~~~~~~~~~~~~~~~~~~~~~~~
ف نفس اليوم بالليل ف شقه عمر ظهرت هنا قاعدة على السرير وباين عليها التعب وعمر قاعد جمبها وماسك إيديها )
عمر:(بهدوء) بقيتي كويسة الوقتي ياحبيبتي!
هنا:(بضعف وتعب) الحمدلله أنا كويسة طول ما أنت جمبي ياحبيبي ..
عمر:(بصلها بإبتسامة ورجع شعرها ورا ودنها) مش عايزك تفكري في حاجة ولا تزعلي نفسك خااااالص وكوني واثقة إن ربنا هيعوضنا في أسرع وقت..
هنا:(بإبتسامة وحُب) بإذن الله ياحبيبي..
عمر:(قام وجاب راح عند الترابيزة وجاب صنية الأكل وراح قعد جنبها بإبتسامة وحنية) يلا بقي عشان تاكلي الأكل دا كله ماما عملاهولك وأنا هأكلك بإيدي..
هنا:(بتعب ورفض) مش قادرة أكل خالص والله ..
عمر:(برفض وإبتسامة) تؤ تؤ تؤ هتاكلي والله(ويكمل كلامه برفعة حاجب وضحكة) هتأكلي ولا هأكلك بالغصب هااا عايزة تأكلي بالغصب!
هنا:(بضحكة بسيطة) خلاص خلاص هأكل ..
(بدأت هنا تأكل وعمر بيأكلها بإيده وهو بيبصيلها بحب وحنية شوية وخلصت أكل وعمر حط الصينية على جنب)
عمر:(بصلها بحُب) ها شبعتي!
هنا:(بإبتسامة) الحمدلله ياحبيبي تسلملي ..
(عمر مسك الصينية وقام قف وبصلها ولسا بيقولها جاي يتكلم قطع كلامهم رن جرس الشقة)
عمر:(حط الصنية مكانها وبصلها بهدوء) هفتح أشوف مين وجاي على طول..
(راح عمر يفتح الباب لقى حازم واقف عمر بصله بقلق ليكون تعبان أو حد فيهم حصله حاجة دخله وقفل الباب)
عمر:(بقلق) زوما إنت كويس ياحبيبي إنت تعبان !
حازم:(بهدوء) أنا كويس ياأبيه أنا جاي أطمن على هنا وعليك علشان وحشتني وماشوفتكش من إمبارح من ساعة ماجينا من السفر ..
عمر:(بصله بحُب ومسك إيده ودخله الأوضة) تعال ياسيدي هنا قاعدة أهي إطمن عليها بنفسك..
هنا:(بإبتسامة) تعال ياحبيبي عامل إيه يازوما ..
حازم:(بإبتسامة) أنا كويس الحمدلله إنت عاملة إيه !
هنا:(بإبتسامة وهدوء) كويس خالص ياحبيبي الحمدلله ..
عمر:(قام وقف وبصلهم) هروح أحط الصينية فـ المطبخ وأجيب لزوما عصير وجاي..
حازم:(قام وقف وبصله) هجي معاك يا أبيه..
(عمر بصله بإبتسامة وأخد الصينية ومشي وحازم خرج وراه وراحوا المطبخ سوا)
عمر:(بتساؤل) ها يازوما عاوز عصير إيه أكيد مانجا صح !
حازم:(بهدوء وضحكة ) لا يا أبيه مش عاوز أنا شربت النهاردة كتير كفاية كدهه..
عمر:(بضحكة) بالصحة ياحبيبي..
حازم:(بتساؤل وهدوء) أبيه إنت كويس !
عمر:(بهدوء وإبتسامة) آها يازوما كويس خالص ياحبيبي بتسأل ليه فيه حاجة..
حازم:( بصله وحضنه فجأة وبهدوء) أنا عارف إنك زعلان علشان البيبي بس ماتزعلش أنا واثق إنك قوي وهتقدر على الإبتلاء ده وبإذن الله ربنا هيرزقكم ويعوضكم..
عمر:(غمض عينه فـ حضن حازم وحضنه وبهدوء) إيه العقل والهدوء ده كله ياولاد حبيبي يازوما ماتقلقش عليا أنا كويس خالص وبإذن الله ربنا هيعوضنا خير أنا واثق من ده..
حازم:(بصله بإبتسامة وحُب) أنا آها زعلان علشان كان نفسي ربنا يرزقكم وتبقي بابا وأنا أبقي عمو بس قدر الله وما شاء فعل بإذن الله ربنا هيرزقكم وقريب أوي كمان ..
عمر:(بإبتسامة وحُب) ده أنت هتبقي أحلي عمو فـ الدنيا كلها يازوما ربنا يباركلي فيك ياحبييي..
حازم:(بإبتسامة وحُب) لا يا أبيه إنت اللي هتبقي أحلي بابا فـ الدنيا دي كلها والله يابختهم بيك كفاية حُبك وحنيتك دي..
عمر:(باصص على حازم بحُب وإستغراب من كلامه) حبيبي يازوما وبعدين اللي هيجي بعد كده بإذن الله هيبقي الإبن التاني إنت ناسي إنك الأول ولاإيه!
حازم:(بص لعمر بحُب وحضنه) ربنا يباركلي فيك يا أبيه ويديمك فـ حياتي يارب..
عمر:(بإبتسامة وبيطبطب على ظهر حازم) ويباركلي فيك يازوما يللاا تعال نروح نقعد ف الأوضة بدل وقفتنا دي..
حازم:(بإبتسامة) لا أنا هنزل بقي كفاية كدهه أنا كنت جاي أطمن عليكم بس..
عمر:(بهدوء وإبتسامة) طيب أقعد إشرب عصير طيب..
حازم:(بإبتسامة) مرة تاني بقي يللا سلام..
(مشي حازم وعمر باصص عليه بإبتسامة وحُب وتنهد تنهيدة حُزن مع إبتسامة إنه هو الأكبر بس كان محتاج كلام حازم وحضنه اللي هون عليه إتطمن على حازم إنه نزل وراح الأوضة لقى هنا نامت من تعبها عدل عليها الغطا وقفل النور ونام جمبها)
~~~~~~~~~~~~~~~~~~~~~~~~~~~~~~~~~~
تاني يوم العصر فـ بيت رائد ظهر قاعد قدام اللاب بتاعه وسرحان فـ عمر وقلقان عليه قطع تفكيره وسرحانه رن جرس الشقة راح يفتح لاقاه عمر واقف قدام الباب وباين عليه التعب والإرهاق دخل ونام على الكنبة بإرهاق وتعب من غير مايتكلم رائد بصله وقفل باب الشقة ودخل قعد جنبه وفصل ساكت)
رائد:(بعد شوية من سكوته إتكلم بهدوء) إحكي!!
عمر:(قام قعد وبصله بإنتباه وهدوء وحُزن) أحكي إيه!
رائد:(بهدوء) إحكي اللي جواك ياعمر طلع اللي كاتمه جواك أنا حاسس بيك صدقني حاسس بيك وبوجعك إوعي تفتكر إنـي مش حاسس باللي جواك لو قدرت تخبي علي الدنيا كلها مش هتقدر تخبي عليا إحكي يلاا أنا عارف كل اللي جواك بس محتاج أسمعه منك يلاا طلع الكلام اللي جواك فضفض ماتبقاش كدهه ..
عمر:(بصله بعياط وضعف) مخنوق يارائد مش قادر حاسس إنـي عاجز من ناحية هنا وتعبها وتحملها نفسها الذنب إنها لو كانت تعرف عن الحمل كانت حافظت على نفسها وعلى الجنين ومن ناحية تانية الجنين مش هكذب عليك أنا كنت مستنيه أوي مستني اللحظة اللي هنا هتقولي إنها حامل اللحظة اللي أبقي فيها بابا أنا ماشوفتوش ولا كنت أعرف إن فيه حمل وجنين ولا كل الكلام ده بس قلبي واجعني يارائد حاسس بالعجز الكل حاول يواسيني وإخواتي كلهم بس حاسس بحزن رهيب..
رائد:(بحزن على صاحبه) أنا فاهمك والله ياعمر بس أنا متأكد إن عمر قد الإبتلاء ده وهيقدر يتجاوزه ويعديه وهو تمام التمام كمان أنا قوتـي بستمدها منك ياض والله العمر قدامكم ياحبيبي وهتجيبوا بدل الواحد عشرة المهم أنكم كويسين وبخير وهنا كويسة ده أهم حاجة يعني خليك معايا واحدة واحدة كده لو كان ربنا قدر إن الجنين يجي الدنيا وبقيت أب وهنا لقدر الله حصلها حاجة وقتها هيكون الأمر أصعب بكتير الجنين تقدروا تجيبوا غيره وتعوضوا طول ما إنتو بصحكتم ومع بعض ياحبيبي ماتزعلش نفسك على الجنين ده قدره ونصيبه لعل وعسى كان يجي ويبقي تعبان ولا يجي ويبقي ذرية فاسدة ربنا لما يمنع عن الإنسان حاجة كله بأقدار وتدابير وبإذن الله هيعوضكم بالذرية الصالحة المُصلحة اللي تنسيكم كل الوجع والحُزن ده ..
عمر:(بتنهيدة حُزن ودموع) بإذن الله يارائد بإذن الله..
رائد:(فتحله إيده وبصله بضحكة وحنية) تعال ياض هات حضن ماتزعلش نفسك ياحبيبي أصلاً ماينفعش عمر يبقي زعلان ورائد موجود ده لو بأيدي أخد حزنك كله بس عمر مايبقاش حزين وزعلان ..
عمر:(بدموع فـ حضن رائد) ربنا يباركلي فيكِ يارائد ويديمك فـ حياتي يارب..
رائد:(بضحكة وهزار) ويباركلي فيك ياعمر ويعوضكم وتجيبوا ولد وتسموه رائد بقي علشان يبقى شبهي..
عمر:(بضحكة وهزار) أصلنا قادرين على رائد واحد لما يبقى منكم إتنين ناقصين إحنا ولا المجتمع ناقص..
رائد:(برفعة حاجب) عندك مانع !
عمر:(بضحكة) ياعم هو أنا أقدر أتكلم وخف عني وقوم إعملي قهوة مصدع ..
رائد:(قام وقف وبضحكة) كمان قهوة ! إنت جاي عليا إنت وصحوبيتك بخسارة على فكرة..
عمر:(بضحكة)ماتخلص ياض وإعمل وإنت ساكت ده إيه الهم ده بس ياربي!
رائد:(قام وراح ناحية المطبخ) هعملك قهوة وهجي أرد عليك وأعرفك أنا هم إزاي(وبتذكير وتساؤل) إنت سبت هنا لوحدها؟!
عمر:(بهدوء) لا سارة وفريدة وعمتو هايدي وطنط دينا ورحمة خطيبة يحيى جم عشان يشوفوها وماما وسلمى معاهم فسبتهم وجيت..
رائد:(بصله بإبتسامة) كويس إنك جيت هقوم أعملك القهوة وجاي على طول..
(عمر بصله بإبتسامة متعبة وهز دماغه بمعني ماشي راح رائد المطبخ يعمل قهوة لعمر اللي متابع رائد وهو ماشي بنظرات حُب وإمتنان ونام على الكنبة مكانه وغمض من الصداع اللي عنده لحد ما رائد يجي)
~~~~~~~~~~~~~~~~~~~~~~~~~~~~~~~~~~
(فـ المدرسة ظهرت دينا فـ أوضة المكتب بتاعها ومشغولة جداً وفى ايديها ورق قطع شغلها صوت تليفونها بصت فيه وتنهدت ومسكته ورفعت الموبايل على ودنها وقبل ما تنطق بحرف وقفت بصدمة وحطت إيديها على بؤها
~~~~~~~~~~~~~~~~~~~~~~~~~~~~~~~~~~
ياترى فى ايه وايه الى حصل لو حابين تعرفو استنو الحلقه اللي جاية ..
#hadeer
#rody
#hagee
