(Unicode)
"ခြုံခိုတိုက်ခိုက်ခြင်း"
ယီကွမ်းသည် ကုံးမင်ခံတပ်၌ ခဏတာအနားယူနေစဥ်အတွင်း သူ၏ထုံးမူအတိုင်း စာအုပ်များသာ ဖတ်ရှုရင်း အချိန်ကုန်နေခဲ့သည်။ မိအာနှင့်ပိအာသည်ကား သူ၏တဖက်တချက်၌ ခစားနေခဲ့ကာ လန်က သူ၏ခြေရင်း၌ မှေးစက်လျက်ရှိ၏။ အနှီဝံပုလွေပေါက်မှာ ယီကွမ်း
ကျန်းဟူ၌လှည့်လှည်သွားလာစဥ်က ရှာဖွေတွေ့ရှိကယ်ဆယ်ခဲ့ရသော ဝံပုလွေပေါက်လေးပင်....။
လန်၏မိခင်မှာသင်းကွဲလာသည့်နောက်
မုဆိုးများလက်ချက်နှင့်သေဆုံးသွားပြီး လန်တစ်ကောင်တည်းသာ
ကျန်ရစ်သည့်အခိုက် ယီကွမ်း ထိုအကောင်လေးကို ကယ်ဆယ်ခဲ့သည်။ မိခင်၏အလောင်းနံဘေး၌ သွေးသံတရဲရဲပေစွန်းကာ တုန်ယီနေခဲ့သော ဝံပုလွေပေါက်လေးက
သူ၏အတိတ်ဘဝမှတစ်စုံတစ်ရာကို အမှတ်ရစေသည်မို့ ယီကွမ်းထိုအကောင်ပေါက်လေးကို မွေးစားရန်ဆုံးဖြတ်ခဲ့သည်။
လန်ကရက်စက်ကြမ်းကြုတ်သော
သားရဲပီပီ
အခြားသောလူသားများကို
အကြိုက်မတွေ့သော်ငြား ယီကွမ်းနံဘေး၌မူ အချိန်ပြည့် အမြဲကပ်နေလေ့ရှိ၏။ ယခုလည်း ဤအတိုင်းပင် ယီကွမ်းခြေထောက်အပေါ်ခေါင်းမှီလျက် အိပ်စက်၍နေပေ၏။
ယီကွမ်းစာဖတ်နေစဥ်၌ တစ်စုံတစ်ယောက်၏ လျင်မြန်လှသောအရိပ်ကို တွေ့မြင်လိုက်ရပြီး သူ၏စာဖတ်ခြင်းကိုအဆုံးသတ်ကာ စာအုပ်ကိုတစ်ဖက်သို့ တွန်းပို့မိသည်။ မျက်စိတမှိတ်အတွင်း သူ၏ရှေ့မှောက်၌ကား
ဒေါသမျက်လုံးများဖြင့် စိုက်ကြည့်နေသော သူ၏ဆရာသခင်ရှိနေခဲ့ပါ၏။
"ရှစ်ဖူ လာတာမြန်သားပဲ။ "
"မြန်ရမှာပေါ့။ငါ့တစ်ဦးတည်းသော တပည့် လက်ထပ်ပြီး အခြားတိုင်းတပါးကို သွားတော့မှာကို ငါလာနှုတ်ဆက်ရမှာပေါ့။ "
ဆရာသခင်ယဲ့လီချန်းချိုး၏ အံကြိတ်လျက်ဆိုသည့်စကား၌ ယီကွမ်းက ပေါ့ပါးစွာရယ်ရင်း မိအာနှင့်ပိအာကို အဆောင်ဝ၌သာ စောင့်ကြပ်နေရန် ခိုင်းစေလိုက်သည်။ သူကပေါ့ပါးစွာပင် ရေနွေးကြမ်းငှဲ့နေသည်ကို ကြည့်ရှုကာ ယဲ့လီချန်းချိုးမှာ အားမလိုအားမရဖြစ်လာရပြီး မေးမြန်းလာ၏။
YOU ARE READING
||Lost Love|| (矢恋 ) (Completed)
Historical FictionWarning:This is not a translation!!! Characters and plot are all mine. It's my Own Creation. ယီကွမ်းသည် ထိုစဥ်က အလွန်ငယ်ရွယ်ခဲ့သည်။ သူသည် မစဥ်းစားပဲ အမြဲတစေ လီတိုင်းပြည်မှ ရန်ချင်းဝမ်ကိုသာ အလိုရှိခဲ့ပြီး တိုင်းပြည်ပျက်သုဥ်းခဲ့ရသည့်တိုင် သူ့ကိုချစ်...
