Bulletproof (Querio Series #1)

Kabanata 16

Kabanata 16

"Mama, saan tayo pupunta?" Tanong ni Olivia na hawak hawak ng kanyang ina sa kamay. May ice cream siya sa kabilang kamay.

"Papakilala kita sa Papa mo. Hindi ba sabi mo 'yun ang wish mo sa birthday mo?" Nakangiting sabi ng mama niya.

Ngumiti ng malapad si Olivia. Iyon ang hiling niya sa seventh birthday niya at hindi niya akalaing matutupad agad iyon.

Tumigil sila sa isang gate. Lumapit ang isang guard sa kanilang para tanungin.

"Pwede bang makausap si Mayor Villafuerte?" Tanong ng kanyang ina.

Namamangha si Olivia sa ganda ng bahay sa loob ng gate. Kita niya ang fountain sa gitna, at may mga batang nagtatakbuhan doon.

"Sino sila?" Tanong ng guard.

"Ako si Ofelia Urdaneta. Pakisabi at makikilala niya ako." Sabi nito sa guard. Sakto namang may lumapit na babaeng mayordoma sa kanila.

"Tinyo, buksan mo ang trangkahan, lalabas sina Mayor..." Napatingin ito sa kanya at nanlaki ang mga mata.

"Lia... Anong ginagawa mo dito?" Tanong ng mayordoma.

"Manang Rose, kailangan ko pong makausap si Mayor."

Natahimik ang mayordoma at napatingin kay Olivia na may walang kamuwang muwang.

"Hindi magandang oras ito para diyan, Lia. Ang padre de pamilya na si Don Emanuel ay sinugod sa hospital."

"Pero... Manang... importante ito. Alam niyo naman..."

May bumusinang sasakyan sa harapan. Binaba nito ang bintana at tumingin sa kanilang nagtatalo.

"Manang, ano ito? Nagsosolicit?" Dumungaw ang isang babaeng may alahas na perlas at nagtaas ng kilay.

"Ma'am Esmeralda." Sabi ni Manang Rose na halatang kinakabahan.

"Solicit o scholarship? Mabuti pa'y pumunta sa tanggapan ni Eduardo sa tamang araw. Alam mo namang nasa hospital si Papa." Ani to pero halatang naiinis.

Dinungaw ni Ofelia ang bintana ng sasakyan at nanglaki ang mga mata nito.

"Mayor," Sabi ni Ofelia.

Tumikhim ang Mayor at tiningnan ito sa balisang mukha. Dumungaw pa ito para tingnan si Olivia na hawak hawak ngayon ni Ofelia. Halata ang kaba nito.

"O-Ofelia... "

"Mama, akala ko pupuntahan natin ang Papa ko?" Biglang singit ni Olivia.

Nagulat ang lahat sa sinabing ito. Mabilis na tumikhim si Mayor at sinarahan ang bintana ng sasakyan at punaharurot ito kahit na sunud-sunod ang sigaw ni Ofelia sa pangalan nito.

Nagising na lang si Olivia sa kakaibang kwarto. Pawis na pawis siya nang mapanaginipan muli ang ilang tagpo noong kanyang pagkabata. Hanggang ngayon ay malinaw pa din ang mga detalye ng mga iyon. Ang pagpasok niya sa mundo ng mga Villafuerte.

Tila isang masamang panaginip iyon. Ang alaala niya sa kanyang ina, ang pagpasok ng mga Villafuerte, ang pagsira nila sa buhay ng kanyang ina. Matagal na din simula ng huli siyang managinip noon.

Tumunghay siya mula sa pagyuko . Nabalik sa kanyang isip na iba ang kwarto kung nasaan siya. Di gaya ng kanya na halos pink ang mga gamit, halatang panglalaki ito. Blue at gray ang mga gamit dito.

Tinanggal niya ang kumot na nakatapis sa kanya. Iba na ang damit niya. Isang malaking itim na t-shirt at basketball short. Nilingon niya ang purse at nakitang naroon sa bedside table.