بين الليل والحال هبت الذكرى

النهايه

~النهاية~
~بين الليل والحال هبت الذكرى~
"بدايتها أبتدت معاكم ونهايتها بتنتهي معاكم"
-
فتحت عيونها وجدان وماشافته حولها وقفت تتوجه للحمام"يكرم القارئ" وتغير ملابسها وطلعت من الغرفه وإبتسمت من شافته جالس على الكنبه وقدامه ظروف تقدمت له ولف عليها وقال:هلا هلا
ميلت راسها وجلست جنبه وقال:تدرين
ناظرته وكمل:النهايه قربت
عقدت حواجبها ماتفهمه وكمل:كلنا تزوجنا محد بقى
-
بيت نياف
-
ناظرته وهي ساكته وقال:وليف وش فيتس؟ماتردين
تنهدت وليف تصد عنه وقال:أنا مسوي شي؟
قايل لتس شي مضايقتس؟
ماردت عليه وليف وقال:وليففف
لفت عليه وقالت بعيون دامعه:كنت تقول ليّ إنك تبي غمّور تجي بحياتنا ، عشان تغمرك بالحُب والموده نفس معنى أسمها ،
عقد حواجبه مايفهمها وكملت:عارفه إنك تبي أطفال لكن نياف
قاطعها نياف وقال:وليف لاتخوفيني عليتس
نزلت دموع وليف تنطق:بتجيك غمّور بعد ثمان أشهر
ناظرها نياف بصدمه وضحك من أستوعب وحضنها وقال:اسألتس بالله ياوليفف
ضحكت وليف تحضنه وهزت راسها وقالت:
بتجينا غمّور يانياف
وقف نياف وقال:لازمم أبشر أمي مناير وغزلان
وليف:لانياف ، ما أبيّ أحد يدري بسويها لهم مفاجأه
جلس نياف جنبها وقال بهدوء:يعني بتجي غمّور؟بتلعب بيننا وهنا حولنا ومعانا؟بتلجأ لحضني لاعصبتي عليها؟بتنام بيني وبينك؟
بتكون حنونه عليّ؟ونخرب لك البيت أنا وهي؟-نطق بحنيه-بتجيني ، وأنا راجع من الدوام تشوف إذا جبت لها شي او لا ، وإذا لعبتي معاها تجي تركض ليّ تبيني أخبيها ،
وإذا جينا ننام ماتنام إلا بحضني ومعايّ ، وفي يوم تجي تنام بيني وبينك وتوخرك عني بس عشان تنام بحضني
ناظرته وليف وهمست:تتوقع تحبني؟زيّ ما الكل يحب أمه؟
رفع نياف يدينه يحاوط وجهها وقال:إنتي أم عظيمه وبتحبك ماتخليك كذا ، بتكونين لها الملجأ وقت الضيقه ، والحضن الحنون والدافي ، بتكونين أم عظيمه بعينها ، بتحبنا كلنا أنا وإنتي ، بنكون عائله ، وعائلتها ، وبتكون فخوره فيني وفيك ، على كل اللي مرينا فيه بتحبنا مابتخلينا وماتحبنا ، بتجيك يوم وتقول ، أنا فخوره فيك ياماما
ناظرته وليف تسمع الكلمات الحنونه اللي يقولها وتسمعها منه وكم تمنت أن الكل يمتلك حنية نياف
سكت ينتظرها تتكلم ورفعت يدينها على صدره وقالت:بتغني لها جيتني مع الشُروق اللي محى عتمّ الليالي؟
هز نياف راسه وقال:أتمنى أنها تجي وقت الشُروق عشان أغني لها وأتمنى أنها تجي بيوم يكون فيه القمر مُكتمل عشان تجينا قمر
-
تسريع الأحداث
-
ضحكت وديان تناظر وليف وقالت:وش سالفة البالونه ذي
وليف:طيب لو قلت لتس بتصيرين عمه وش بيكون شعورتس؟
صرخوا البنات وضحكت وليف وقالت: جمعتكم اليوم عشان نعرف جنس الجنين وأتمنى من الجميع ياخذ هالورقه ويكتب عليها وش يتوقع ويحطها بالصندوق ذا وطبعا يكتب اسمه عليها
وصال:طيب إنتي تدرين؟
هزت وليف راسها وقالت:ادري
مسكوا الأوراق يكتبون توقعاتهم وحطوها بالصندوق ورفعوا جوالاتهم يصورون
ابتدا صوت العد ورفعت وليف يدها تفقع البالونه وصرخوا البنات بفرحه من تناثر الورق بلون جنس الجنين بكل مكان
ضحكت وليف تناظر ردة فعلهم ولفت على أمها تحضنها وقالت ام يوسف:نياف يدري؟
هزت وليف راسها بالنفي وقالت غزلان:
غريبه المفروض أول واحد يدري هو
مشت وليف توقف بينهم وقالت:مناوب ما أمداني أقوله
وصال:كيف بتعلمينه؟
وجدان:اييي وليف قولي لنا تكفييييين
وليف:ما أبيه يدري الحين وإنتوا هنا أبيّ أنا وهو لحالنا
هديل:والله لاأموت بشوفكم لاأذبح نياف ويموت ونفتك منه
وليف:بسم الله عليه فال الله ولافالتس
هتاف:كل ذا عشق؟
غاده:آخر وحده تتكلم إنتي رحتي مع سلوم لبيته بدون عرس
هتاف:ليه التكاليف؟
سكتوا كلهم من سمعوا صوت ضحك نياف وهو داخل البيت
ام ذياب:قوموا قوموا نروح
وليف:وين تو الناس أجلسوا
غزلان:أجلسي مع زوجتس
وقفوا كلهم يطلعون ولحقتهم وليف ولفت للعامله وأشرت لها تنظف المجلس قبل يدخله نياف وتقدمت العامله تنظف المجلس ومشت وليف تطلع فوق لغرفتهم
فتحت الباب وشافته منسدح على السرير بتعب وتقدمت له بهدوء وقالت:نياف تبي أكل
هز راسه بالنفي ومشت تدخل غرفة الملابس وضحكت من سمعته ينطق:
وشهو جنس الجنين؟بعرفه
ماردت عليه ووقف يمشي لغرفة الملابس ووقف وراها وقال:وليفي علميني
لفت عليه وليف وقالت:محد قالك تستلم مناوبة سلوم !
تنهد نياف بتعب وقال:والله داري ومقصر معاتس كثير بس هذي حياة مرضى ماهيب لعبه
سكتت وليف تناظره وكمل:يعني مابتعلميني بس عشاني كنت مناوب بالدوام؟ياخي على الاقل لمحي ليّ
ناظرته وليف ونطقت بهدوء:لو تطلعني برا البيت بقول لك
هز نياف راسه بالنفي وقال:والله تعبان
مشت وليف تتركه وقال نياف:نص ساعه وتكونين بالسياره
ضحكت بإنتصار ولف نياف يسحب له ثوب وشماغ ولبسهم ومشى يسحب العقال ويثبته براسه ومد يده للعطور وأختار واحد منهم ورشه ولف على وليف اللي تلبس عبايتها وقال:أنتظرتس تحت
لفت عليه وقالت:أنتظرني
وقف ينتظرها وخلصت ولفت عليه ومد يده لها ومسكتها وليف ومشوا ينزلون تحت وركبوا السياره ، وقف سيارته قدام المطعم اللي هي أختارته ونزل ومشى يفتح لها الباب وقالت:وش هالدلع الحلو ذا؟
ضحك نياف يمسك يدها وقال:تستاهلينه
تقدموا يدخلون المطعم وجلسوا على طاوله حاجزتها لهم وليف وقال نياف:مابتعلميني
هزت راسها بالنفي وقالت:بعد الأكل منهاره من الجوع الحين
عقد حواجبه نياف يناظرها وضحكت وليف تطلع جوالها وتفتح الباركود وتختار وناظرته وقالت:وش تبي تاكل؟
تنهد نياف يرجع ظهره للخلف:على ذوقتس
طلبت وليف من الجوال ، ورفع نياف عيونه من سمع صوت أغنيه ولف على اثنين يضحكون وقال لوليف:واضح مسوي لها مفاجأه بس مايبيها تدري
ضحكت وليف وقالت:ليتك تتعلم منه بس
ناظرها نياف وقال:أتعلم؟
ناظرته وليف وقالت:أنتظر بصور الحفله الحلوه
وطلعت جوالها تصور وتنهد نياف يناظرهم جنبه وتقدم يتكي على الطاوله وعدل جلسته من تقدموا له اللي يشتغلون بالمطعم ومعاهم بوكس كبير وصحن مكتوب فيه:
بتنور غمّور دنيتنا يا أبو غمّور
رفع عيونه نياف على وليف وناظرها بصدمه وضحكت وليف تصوره وأشرت له على البوكس وفتحه نياف وإبتسم من شاف ملابس لبنوته صغيره
ضحك بصدمه وبفرحه وبسعاده وهو يشوف حلمه يتحقق بتجيه بنت زيّ ماتمنى
لمعة عيونه وقال:حلم ذا؟
هزت وليف راسها بالنفي وقال:الحمدلله يارب الحمدلله
-
بعد كم يوم
-
بالسياره كانوا نياف ووليف ومعاهم رُوح وهايف ونياف"الصغير"
ضحكت رُوح تردد مع الأغنيه:یا بنات، یا بنات، یا بنات اللي مخلفش بنات ماشبعش من الحنية وماداقش الحلويات حلوة الأيام فى عينيا
إبتسم نياف يمسك يد وليف وقال: عصافير الجنة يا توتة تعصرلك شهد التوتة ترقص لك فوق شباكك وتزغرتلك زغروتة
إبتسمت وليف تفهمه وتفهم إنه يبغى البنات أكثر من العيال وهذا الشي واضح على نياف لأن البنات فيهم حنيّه تكفي الجميع فيهم رُوح حلوه ويعطون أمل للحياة
نطق هايف بعصبيه:نيافف حط لنا شي حلو
نياف:وش تبي بس
هايف:سلطان البريكي
ضحكت وليف بصدمه وقال نياف:وش تسمع له
سكت هايف يفكر ونطق:ياساكن القلب والشريان وعروقي
ضغط نياف على البريك بصدمه ولف على هايف وقال:أحلففف
هايف:والله
-
بيت ذياب
وتحديدا شقة سلمان وهتاف
-
دخل الشقه وماشافها ونزل الأغراض على رف المطبخ وتقدم يدخل الغرفه
إبتسم يتكي على الباب من شافها جالسه تقراء كتاب
تقدم لها يجلس على السرير وقالت:متى جيت؟
إبتسم بهدوء وقال:قبل شوي ، بس أمي شفيها معصبه؟
تنهدت هتاف تقفل الكتاب وقالت:معصبه عليّ ، تقول ليّ ليه ماسويتي غداء وكانت بتضربني بس جاء عمي ووقفها
تلاشت إبتسامته وقال:وإنتي ليه وجهتس أحمر؟كنتي تبكين؟
هزت راسها بالنفي وقالت:كنت أسوي لك الغداء
تنهد يوقف ومشى يدخل غرفة الملابس وقال:جهزي لتس شنطه نبي نروح
ناظرته هتاف بصدمه وقالت:وين
مارد عليها ووقفت تلحقه لغرفة الملابس وقالت:سلمان وين بنروح
لف عليها وقال:سلمان؟غريبه ماقلتي سلوم نفس الباقين
سكتت تناظره وكمل:ناديني سلمان ، عشان تكونين مُختلفه عن الباقين ، سلمان
ناظرته تهمس:صعب
هز راسه وقال:عليهم بس على هتاف؟ماهوب صعب
إبتسم يناظرها وقال:أنا شنطتي جاهزه جهزي شنطتس عشان نروح وما أبيّ اسئله وين بنروح ومدري وشو ، أعتبريها مفاجأه
مشى ياخذ شنطته ونزل تحت ينتظرها ووقف من سمع امه تناديه
مضاوي:وين بتروحون؟
سلمان:تحقيق هو؟
مضاوي:جاوببب
سلمان:مكان لزوجتي
مضاوي:وليه ان شاء الله؟
سلمان:أمي تكفين خلاص عاد تراتس زودتيها ، فوق ما أنها ماتبي عرس تضغطين عليها؟ولاكنتي بتضربينها اليوم؟ليه؟
مضاوي:مسرع شكت لك
سلمان:زوجتي خط أحمر ، ماتمدين يدتس عليها ولا ترفعينها عليها ماهيب محمد وزوجته المستقبليه اللي إنتي بتختارينها
سكت من شافها تنزل ومشى يشيل الشنطه عنها وطلع ولحقته وركب السياره وشغلها ولفت عليه وقالت:ليه تتهاوش مع أمك عشاني؟
سلمان:لأني حتى أنا تعبت وأنا أشوفتس تعانين والسبب أمي
سكتت تناظر الطريق ولفت عليه وقالت:
طيب تدري وشو اليوم؟
هز راسه وقال:اييه الأثنين
تأففت تلف لقدام وضحك هو يفهمها ويعرف وش اليوم
وقف عند الشاليه ونزل وتوجه لبابها يفتحه وقال:أنزلي يلا
نزلت معاه ومشت داخل الشاليه ونزلت عبايتها وصرخت برعب من أنطفت الأنوار
رفعت صوتها تناديه:سلمان ، سلمان وينك ، سلماننن
جلست على الأرض وهي تناديه بعالي صوتها
نزلت دموعها من أشتغلت أغنية"عيد عمري"
أشتغلت الأنوار وتقدم سلمان ومعاه كيكه ووقف قدامها وقال:أعرف وشو اليوم ، وأعرف كل شي ، وأعرف أنه ميلاد زوجتي وحبيبتي وروحي ودنيتي
وقفت تمسح دموعها وإبتسمت تناظره وقرب منها وقال:طفيّ شموع عمرك الجديد
إبتسمت تطفي الشموع ولفت عليه وقالت:
شكراً
رفع حاجبه يناظرها وقال:بس؟
هزت راسها وقال:لاتصغرّين النفس وأنتي كبيره ولاتمسكين الوقت وأنتي الخيارات ولاتكشفين الجرح وأنتي ستيّره ولاتحجّمين الدرب وأنتي المسافات ولاتسمعين الزيف وأنتي بصيره ولاتغيّرين الطبع وأنتي القناعات ولاتزرعين الورد وأنتي عبيره ولاتحترين الشمس وأنتي الصباحات ولاتشابهين بشي وأنتي الأخيره ولاتسابقين الغير وأنتي البدايات ولاتقبلين القِل وأنتي كثيره
ولاتطلبين الحل وأنتي الإجابات
ناظرته هتاف ماتفهمه وماتفهم وش مقصده بهالكلام
إبتسم سلمان ينطق:تعالي قطعي الكيكه
إبتسمت هتاف تناظره وتقدمت تقطع الكيكه وهو جنبها ومعاها ويده تلامس يدها وصدره يلامس ظهرها
تنحنح يعدل وقفته وقال:مابتفتحين الهديه؟
ناظرته بصدمه وقال:وشو تراني جايب هديه عادي أفتحيها
تقدمت تجلس على الكنبه وقالت:مو متعوده أحد يجيب ليّ هدايا بيوم ميلادي
جلس جنبها يمد لها الهديه وقال:تعودي لأني بجيب لتس
أخذت الهديه تفتحها وإبتسمت من شافت شنطه هي تبيها وعاجبتها ، رفعت عيونها تناظره وقال:شكراً مره سلمان
إبتسم يناظر لمعة عيونها وقال:أخوانتس بيجون يحتفلون معاتس ، جايب لتس فستان فوق تحصلينه بالغرفه ألبسيه
ناظرته تهمس:وإنت؟
وقف وهو ينطق:بنام فوق تعبان مالي خلق أرجع للبيت
هزت راسها تفهمه ومشى يطلع فوق للغرفه ومعاه شنطته
رجعت راسها هتاف ورا وهي تناظر الفراغ وتفكر ، وقفت تاخذ هديته معاها لفوق ودخلت الغرفه تشوف نايم وتقدمت تلحفه زين وشهقت من سحبها تصير جنبه
رفع راسه يناظرها وقال:بكل مره خافيّ عليّ من البرد
سكتت تناظره ورفع يده على شعرها وقال:
وش ذنبي وإنتي حلوه هالكثر؟
زادت نبضات قلبها تسمع كلامه وهمست بصوت راجف:سلمان
تنهد يبعد عنها ووقفت هي بتوتر تطلع من الغرفه تتركه
مشت للغرفه الثانيه وفتحت الدولاب تاخذ الفستان تشوفه ، إبتسمت تشوف ذوقه وهمست:يعجبني
نزلت الفستان على السرير وفتحت شنطتها تطلع أغراضها ، شغلت الأستشوار تسوي شعرها ، إبتسمت تتقدم تلبس الفستان
وقفت قدام المرايه تتأمل ذوقه عليها
نزلت تحت من سمعت صوت الجرس ،
فتحت الباب وشافت اخوانها كلهم
حضنها سعود وقال:ميلاد الهناء ياعيون سعود
إبتسمت هتاف وقال هتان:سعود وخر هذي ليّ
ضحكت تفهم هتان وتقدم هتان يحضنها
ريف:طيب تراها تؤامي وخروا
هايف:توته
أنحنت هتاف تبوسه وقالت:تعالوا أدخلوا
موده:سحبني عليّ أنا وعز؟
ضحكت هتاف تبوس موده وتقدمت تحضن عز
جلسوا بالصاله وجلست هتاف جنب هتان وقال سعود:وين سلوم؟
هتاف:نايم فوق
لف عليهم عز وقال:أنا قايل لكم الرجل يبي يقعد مع زوجته بس إنتم
هتان:أنطم هو قايل لنا تعالوا
هتاف:إلا صدق أمي وأبوي وجده مها ليه ماجو؟
ريف:أبوي نايم وأمي وجده بيروحون عند جده مناير
هتاف:وغزلان ووصايف؟
عز:كلهم ببيت جده مناير
هايف:نقطع الكيكه؟
هتان:دقيقه وشهي هدية سلوم؟
عز:وش دخلك إنت؟
ضحكوا كلهم ووقفت هتاف ولفت تناظر ريف وقالت:وميلادك بعد تعالي
وقفت ريف جنبها تقطع معاها الكيكه وقال سعود:أنا من دخل وأنا ملاحظ العُقد اللي لابسته ياهتاف من مين؟
هتاف:من سلمان
صفر عز وقال:أقعدددد عنده حركات هالبزر
سكتوا كلهم من لفوا يناظرون موده اللي نامت على الكنبه وقال هتان:المستريح اللي من العقل خالي
ضحكوا كلهم وقالت هتاف:حرام علييك
هايف:توته شوفي سعود وش جاب هديه لك و لـ ريف
لفت هتاف على سعود وقال:أنا عندي هديتين وحده لكم كلكم ووحده للتؤام
ريف:ايش هم؟
سعود:أول هديه بتصيرون عمام ولدي
صرخوا البنات وقال عز:سلومم نايم
هتاف:صدق سعود؟
هز سعود راسه وقال:الهديه الثانيه البوكسات ذي
تقدموا يفتحون الهديه ولفت ريف على سعود وقالت:دايييم تعجبني
ضحك سعود يحضنها وقالت هتاف:شكراً سعود مره حلوه
عز:ياعيال متأكدين ذي أختنا؟ماتشبهنا بولا شي هاديه
هتان:وش حلات الهادي يهبل
إبتسمت هتاف وقالت:الهدوء حلو
عز بطقطقه:بجلسك مع الملسونات بنات غدير ماعاد زوجتي عشان تعرفين الهدوء
سعود:ملسونات ومتزوج أختهم؟
عز:عاد القلب وأختياره يبو سيف
هتان:سَيف بن سعود ابن سعد
ريف:يييوه ياشين الأسم كلهم حرف السين
سعود:أقولل ريف
ضحكت ريف وقال عز:ماودكم نمشي؟
هتاف؛توكم جيتوا
سعود:والله ياحبيبتي مستعجلين جده مناير عزمتنا على عشاء
هتان:وإنتي أجلسي عند سلوم
هتاف:طيب على الأقل تعشوا
سعود:معزومين على عشاء
وقفوا كلهم يطلعون من الشاليه وإبتسمت هتاف تودعهم ورجعت لداخل ترتب
نزل سلمان يناظرها وإبتسم وقال:ليه راحوا؟
لفت هتاف بخوف وقالت:وش مقعدك؟
نزل من الدرج ووقف:مانمت اصلا
صدت هتاف تنطق:أزعجناك؟
هز راسه بالنفي وقال:الفستان حلو
تنهدت بربكه وقرب منها ومسك معصمها وقال:ماكنت أصدق نياف يقول قدوتي بالحُب فهد المساعد ، بس اليوم صدقته وأول مره أقولها ، إنتي دُعاي المستجاب والأمنيات الأوله جيتك على متن السحاب في نظرة عيوني وله !
رجفت يدينها تناظره وكمل:أنا مُلهم من وقت شفتك بغرفة نياف ، كنت أضحك عليه لانه يقول غرفتي محطة لقاء العاشقين وصدقته من شفتك ترجفين من الخوف والوجع من حرق صغير
غمضت عيونها تسمعه وأنحنى يُقَبّلَهَا ونزل يده لخصّرها
-
ولأن الحُب نعرفه بالأفعال مو بالكلام هو قرر يثبت حُبه لها بالأفعال ، ولأنهم كبروا بنفس اليوم قرروا يبدون عُمر جديد مع بعض ويتركون كل شي وراهم
-