بين الليل والحال هبت الذكرى

الواحد والثلاثون

(استغفرالله)
"جاكم العوض الجميل اللي يجمع افضل الحكايات"
ومشى يطلع من البيت لكنه لف من سمع احد يناديه:نياف
ناظرها بدون مايرد وكملت:وين بتروح
نطق بحده:مااتوقع يهمتس صح؟
كانت تبي تتكلم لكنه قاطعها يقول:ماني فاضي لتس ومابي اسمع كلامتس واعذارتس الكذابه
لف يعطيها ظهره لكنها مسكت يده وهي تقول:اسمعني طيب
سحب يده من يدها بقوه وقال:قلت لتس ماني فاضي لتس من وين تفهمين؟
مشى يتركها ووقف على صوت جواله يرد:
هلا تالين
تالين:هلا فيك نياف لاتجي الدوام
نياف:ليه؟
تالين:دكتور رائد استلم حالة معاذ مايحتاج تجي ارتاح انت
نياف:يابعدي والله يارائد، يعطيتس العافيه ماتقصرين والله يابنت الصقر
ابتسمت ترد عليه وقفل نياف يرجع لداخل ويدخل غرفته لكنه زفر بملل من شافها بغرفته:وش تسوين انتي هنا؟
لفت تناظره:وشو وش تسوين هنا
فتح باب الغرفه ينطق:وليف ماني رايق لتس اطلعي
تقدمت منه تنطق:الحين صرت مو رايق لي؟
مارد عليها وكملت:كنت تتمنى تشوفني كل دقيقه وثانيه والحين ماتبي شوفتي! وش تغير؟
ناظرها بعصبيه:كل شي تغير وانتي السبب عديتها كذا مره ياوليف كذا مره وانا ساكت وامشيها لتس لكن الحين والله ماامشيها لين تفهمين غلطتس وتتعلمين منه ، بس بسألتس لمتى وانتي كذا؟لمتى؟
-سكت شوي-شهرين وانا بالع جمره وساكت واعديها لأجل عيونتس لو تذكرين اني رجعت من خط سفر عشانتس مو عشان غيرتس !
سكتت تناظره وكمل:والحين اطلعي برا غرفتي
ماردت عليه وهي تناظره لكنه كرر مره ثانيه:
اطلعي برا
مشت تطلع من الغرفه بكل هدوء وناظرت امها قدامها وأمتلت عيونها بالدموع
ام يوسف:وش فيتس ياوليف
وليف:ماما عادي تجين شوي؟
قامت ام يوسف مع وليف ودخلو غرفة غزلان
ام يوسف:وش فيه خوفتيني
وليف:ماما نياف مو راضي يكلمني ابدا وانفجر علي يوم حاولت اكلمه
ام يوسف:لانتس تستاهلين
وليف:ماما !
ام يوسف:وانا صادقه تراتس تستاهلين اللي يسويه فيتس نياف لمتى وانتي تجرحينه بكلامتس وبعدها تقولين"لحظة غضب" أتعبي ياولييف أتعبيييي
سكتت وليف تسمع امها وكلمت ام يوسف:
نياف ولد اختي قبل يكون زوجتس وانا اعرفه اكثر منتس
هزت وليف رأسها بمعنى"لا"وقالت:انا اعرفه اكثر منكم كلكم اكثر من جده واكثر من جدي واكثر من فيصل ويوسف وسلوم ومعاذ وغزلان 
ام يوسف:ماتعرفينه وانتي تجرحينه بكلامتس ماتعرفييينه ! افهميي ياوليييف نياف هايييم فيتس لدرجة ان حُبه لتس واضح بعيييونه ونظراته وأهتمامه
وليف:طيب قولي لي الحل اللي أراضيه فيه
ام يوسف:أنا بكلمه بس تراها آخر مره
هزت وليف رأسها بتفهم وطلعت أمها من عندها وراحت لغرفة نياف
(عند وجدان)
لفت على صوت الباب
نوره:اهلي بيجون
وجدان:طيب؟
نوره:سوي قهوه وشاهي ونظفي الصاله
وقفت وجدان وقالت:ورا ماتسوينها انتي أهلي ولا اهلتس؟
عايض من ورا نوره:بتسوين وانتي ساكته
نطقت بعصبيه:والله انك تخسي وتعقبب مالها يدين تسوي فيها؟
عايض:يابنت تركي سوي وانتي ساكته واصلا انا جايبك هنا "خادمه"
نطقت بصراخ:ناظر عاد انت وياها ! عاملتوني أزفت معامله وعديتها لكم وسكتت لكن أنك تهينوني أنت وهي تخسون
عايض ضربها كف وقال:بتسوين ورجلك فوق راسك
ناظرته بحده وقالت:انت ماتفهم شمعنى كلمة تخسي؟اذا ماتعرفها دق على نياف يعلمك معناها
نوره:نياف ونياف درينا انتس عاشقه لنياف
ناظرتها بصدمه وقالت:تستهبلين انتي؟
عايض:يانوره قصدك انها عاشقه لمعاذ
صرخت فيهم صرخه سكتتهم وقالت:انتو للحين صاملين تجيبون طاري معاذ؟عاشقه لنياف ولالمعاذ مالكم دخل فيني تفهمون؟
نطق عايض بحده:لالي دخل دامك زوجتي
تكتفت تناظره:زوجتك؟ضحكتني صراحه !دامني زوجتك تمد يدك علي؟دامني زوجتك ترفع صوتك علي؟دامني زوجتك تعاملني معاملة "الخادمه" تدري شمعنى هذا كله؟
معناه انك تخسي وتعقب اكون زوجتك ! لاتقول وقعتي وصرتي زوجتي لاني زوجتك بالغصببب مو برضاييي
نوره نطقت بخسريه:لاتحسبين انه بيعاملك معاملة "زوجة" وانا بقلبه تفهمين؟
رفعت حاجبها بسخريه:من زينه عاد عشان اتمنى انه يعاملني معاملة زوجة
"بالنسبه لعايض اللي كان ساكت ويسمع كلامها هو ندم أشدد الندم انه مده يده عليها ماتمنى ان حكايته تكون معاها كذا ماتمنى ان معاذ يدخل المستشفى والسبب هو "عايض ابن وافي آل رشيد" ماتمنى ان نظرة القرف والاشمئزاز تكون بعيونها ماتمنى انه يفرق اثنين مُحبين يعشقون بعض هو حضر لقائهم عدت مرات لكنه؟ لكنه فرقهم والسبب أنتقام أقل ما يقُال عنه سخييف!"
نوره لفت عليه:ورا ماترد عليها
عايض سكت يناظر نظراتها ولف يناظر وجدان واخييراً قدر يحط عيونه بعيونها
ناظر نظرات القوه بعيونها عيونها تذكره بشخص واحد ماغيره"نياف ابن سعود " "ولد خاله سعود"صحيح نياف مو اخوها لكن وجدان شبيهة أمه "غاليه"
وعى على صوت نوره وهي تقول:عايضض وش فييك انت؟ساكت ورا ماتسوي لها شي؟
عايض بهدوء:ادخلي يابنت تركي لغرفتك
ناظرته وجدان بصدمه وقالت نوره:بس كذا؟ماراح تضربها؟تتكلم علي وانت ساكت وانت تناظـ.....
قاطعها صوت تقفيل الباب
(بيت ابو ذياب)
طلعت ام يوسف من غرفة نياف وناظرت وليف وقالت:ادخلي عنده
مشت وليف تدخل الغرفه وسكرت الباب بالمفتاح
جلست جنبه وكانت ساكته وهو ساكت
لكنه قطع هالسكوت وهو يقول:تكلمي ليه ساكته؟
نزلت عيونها لكفوفها وقالت:آسفه مااعرف ايش يقولون غيرها ادري بتقول مو اول مره لكن نياف ماقدرت اتحكم بأعصابي وقتها
قاطعها بكلمته:أعصابتس؟اجل حتى انا مااعرف اتحكم بأعصابي
سكتت تسمعه يكمل:انا تعبتت ياوليف وانتي ماتعبتي ! تعبت أتغاضى أغلطاتس تعبتت تعرفين وش الاشياء تحملتها ؟ عشان تتكلمين علي كذا؟ماتعرفيني ياوليف ماتعرفيني
هزت رأسها بمعنى"لا"وقالت:اعرفك والله اعرفك
تنهد يكمل:تدرين اني بعت الدنيا ورضى ابوي اللي رباني عشان اخذتس؟تعرفين اني دخلت معاه بحرب عشان اخذتس؟تعرفين وش كثر كنت مبسوط اني اخذتس؟تعرفين اني ضحيت بدنياي كلها واحلامي بس عشانتس؟بس الحين ياوليف الحين ماانتظر منتس شي غير انتس تتركيني بحالي
سكرت عيونها بقوه تسمعه ينطق:والحين اطلعي برا واتركيني بحا
قاطعته تقول:مااتركك تفهم؟مااتركك
وقف يمشي يطلع برا لكنها مسكت يده:
اسمعني طيب!ليه مو راضي تسمعني
لف عليها ينطق:تعبت وانا اسمع تعبت
نزلت دموعها تنطق:اسمع اخر شي عندي وبعدها روح كيفك وبراحتك
شدت على يده وهي تقول:اعرف انك زعلان عشاني تكلمت كذا بس والله طلع بدون ادارك مني ! انت تتوقع اني اقول لك كلام كذا بدون سبب؟نياف انت تعرف قد ايش احبك؟تعرف قد ايش اموت في روعة هواك؟
تعرف اني اعشق أصغر تفاصيلك؟تعرف اني انتظر اللحظه اللي احضنك فيها ونكون انا وانت "ببيتنا"؟اذا ماودك تعديها لاتعديها لكن اعرف اني احبك
ناظرها ومشى يطلع برا الغرفه وراح للمشب
ابو ذياب:وينك من اليوم
نياف:بالغرفه
يوسف:تعبان؟
نياف:لابس خمول
محمد:هذا الخمول يجي بعد التعب
سلمان:مسوي تعرفه؟تراك ماتتعب
ضحك فيصل وقال:سلوم اخوك ذا هد شوي
سلمان:وانت انطم بعد
فهد:صار وجدان يمشي ويسكتنا
تلاشت أبتسامة نياف وقال فيصل:والله لها فقده من زمان ماكلمتنا
سعود:حتى عايض ماصار يكلمنا
يوسف:غرقانين بالعسل
عز:ايي حتى امه مايرد عليها
فيصل:حتى وجدان صارلها اسبوع ماكلمت امها
هتان:الا نياف شعنده سكت؟
نياف:اسمع سوالفكم
فيصل:فاقد وجدان
نياف:فيصل اشرب فنجالك وعض لك شحمه
ابو ذياب:وش عندك معصب انت؟
نياف:مصدع مو معصب
ذياب:اشرب دواء
نياف:مايحتاج
فيصل:صح نياف ترا جده مناير فاقدتك تقول ماصار يجيني
نياف:بروح اشوفها
ومشى يطلع للمجلس وقال:ياولددد طريق
قاموا البنات من المجلس ماعاد وليف وغزلان ووصال
دخل نياف وسلم عليهم وقالت ذكرى:وش عندك مختفي
نياف:اشغال
ام سعد:الله يوفقك يمه
ابتسم نياف بهدوء وقالت عنود:صاير ماتمرنا وتسلم على جداتك
نياف:مشغول ياعمه بس ابد متى مافضيت مريتكم
ذكرى:اللي يسمعك يقول تاجر وعنده شركات
نياف:ماعندي شركات بس عندي مرضى اهتم فيهم
ام وصايف:عايض ماكلمكم ياذكرى؟
ذكرى:لاوالله منقطع عنا مايجينا ولايكلم
نياف:سمعت انهم بيجون قريب
ام ذياب:وانت وش دراك؟
نياف:كلمت وجدان
ام وصايف بلهفه:وش اخبارها عساها طيبه؟
نياف:بأفضل حال تسلم عليكم جمييع
ام فهد:متى كلمتهم؟
نياف:امس او اللي قبله والله اني ناسي
ام وصايف:اذا كلمتك مره ثانيه بكلمها
نياف:ابد ابشري
وقام طلع من المجلس ولحقتهم وليف
وليف:نياف
لف عليها:هلا
همست بهدوء:متضايق مني؟
هز رأسه بمعنى"لا"ومشى يتركها وراه
غزلان من وراها:وش فيه ذا
وليف:زعلان علي
غزلان:تستاهلين
وليف:غزلان والله مو وقتس
غزلان سحبتها معاها ودخلو غرفة نياف
وليف:وش عندتس انتي؟
غزلان:اسمعيني للأخير ، ادري انه زعلان منتس ومتضايق بعد بس ترا معاه حق يزعل ويتضايق ، لاتلومينه على شي انتي السبب فيه انتي اللي تكلمتي هالكلام قدامنا كلنا وتجين تقولين "لحظة غضب" وليف لو على الغضب كلنا بننفجر على نياف او غيره ! بس انتي زودتيها بزياده ياوليف ، لو تشوفين الحُب اللي كلنا نشوفه بعيون نياف تندمين على كل كلمه وجهتيها له ! تدرين انه يقول انتس بتكونين العوض الحلو بحياته؟لليوم وهو يقولها حتى وهو زعلان منتس يقولها
.........
ناظرتها وليف بهدوء:عارفه كل هذا بس هو مب راضي يكلمني حتى ! كلماته معاي مُختصره
غزلان:عاد تحملني نياف بالزعل شييين
ومشت تطلع من الغرفه تتركها لوحدها
(بيت أم حامد)
ورد:توك تحطين العشاء؟
وديان ماردت عليها
حامد:ليه ماتردين على اختك الكبيره؟
وديان:كلو وانتو ساكتين محد رايق لكم
ام حامد وهي تجلس:تجهزوا بنروح ديرة آل نجد
ساره:ايش؟
ورد:ماما ايش يودينا لديره؟
ام حامد:ديرة اهلي وبروح اشوفهم
حامد:متى ودك تروحين يالغاليه؟
ام حامد:الود ودي نمشي اليوم
ساره:وديان تروحين معانا
وديان:لا
ام حامد:بتجين وانتي ساكته
وديان:ترا مب غصب اجي معاكم ؟ انا يالله متحملتكم بالبيت
حامد:جهزي اغراضك وانتي ساكته
وديان:قلت لكم مابي اروح من وين تفهمون؟
حامد ضرب الطاوله:بتجين ياوديان ورجلك فوق رأسك
وديان بهدوء:أكسر رأسي قبلها ياولد غريب
وقامت تتركهم على الطاوله
ساره:تكلمو معاها بهدوء مو كذا
حامد:كملي اكلك وانتي ساكته
ورد:سارونه تراك أوفر خليهم يكسرون رأسها
ساره:ماتفهمون انتو؟توها البنت ماتخطت وفاة ابوي عشان تقولون كذا
حامد:مو لازم تتخطى
ام حامد:انا بروح اتكلم معاها
حامد:خليها لاتجينها لين تهجد
ورد:ماما ليه مانزوجها من اهل ديرتك ونفتك منها
ساره:ورد تستهبلين؟تو عمرها عشرين
ورد:وأذإ عشرين عادي
ام حامد:يصير خير
ساره:ماتزوجونها توها صغيره
..........................
تعريف سريع
أبو حامد(غريب)متوفي
أم حامد(سعاد)
حامد الولد الكبير(34)
ورد البنت الكبيره(26)
ساره(24)
وديان(20)
..........................
حامد:ساره كملي أكلك وانتي ساكته صوتك مزعج
ساره:حامد اسكتتت لااسمع صوتك
........................
(بيت أبو ذياب)
كانو جالسين بالحوش الأمامي
نياف جلس جنب ام ذياب وهمست له:
وش فيك ماانت عاجبني هالأيام
ابتسم بضيق:حتى انا مو عاجبني حالي
ام ذياب:وش فيك
نياف:ابد ولاشي
ام ذياب ناظرت وليف اللي تناظر نياف وقالت:تعالي ياوليف
وليف:مرتاحه هنا ياجده
ام ذياب:تعالي تعالي
قامت وليف وجلست جنب ام ذياب
ام ذياب:مو هنا جنب زوجتس
وليف بهمس:ماابي اضايقه
ام ذياب:ماانتي مضايقته قومي قومي
قامت وليف وجلست جنب نياف ناظرها نياف وهمست له:لاتخاف ماراح اتكلم بسكت
مسك يدها بهدوء وناظرته بهذول وهمس لها:بيننا كلام ياوليف ماينتهي كلامنا هنا
أبتسمت بهدوء تناظره
———
(بعد أسبوع)
كان أسبوع مُمل وحزين وطويل على الكل
كانو جالسين الصاله ساكتين كلهم
لكنهم لفو على صوت جوال نياف
نياف:هلا
تالين:عندي لك خبر
نياف:وشهو
تالين:معاذ صحى
نياف وقف بصدمه وقال:اسألتسسس بالله تقولينهااا صادقهههه
تالين:اييوالله توه قبل نص ساعه صحى
نياف:جايييكم
وقفل وناظرهم
ام يوسف:وش صاييير
نياف:معاذ صحى ياخاله صحى
صرخو البنات بفرحه ونزلت دموع الكل بفرحة واخييرا رجعت بهجتهم رجعت رُوحهم
ام يوسف مدت يدينها لنياف وحضنها نياف وقال:تجهزي بتروحين له
ابو ذياب:كلنا بنروح اجهزوا
نياف:اللي يجهز بسرعه بيروح معاي
وركض لغرفته يبدل ملابسه ويلبس ثوب
فيصل:ماني مصدق والله
يوسف:الحمدلله الحمدلله
سلمان:والله ان الدنيا مو شايلتني من الفرحه
نياف:هاه من يروح معاي
ام ذياب:كلنا لان سيارتك كبيره
نياف:مااقول لا فيصل تجي؟
فيصل:معاك
ومشو للسياره كلهم وكانو باقي العيال بسيارة يوسف
نياف شغل "سلطان البريكي"
ام وصايف:ياجعلها دايييمه
نياف:افرحو جعل الفرحه دايييمه عليكم وماتفارقكم لو ثانيه
غزلان اللي كانت تصور كل شي من لحظة الخبر اللي قاله لهم نياف لين ركبو السياره
(وصلو المستشفى)
ونزلو نياف وفيصل من السياره وراحو لسيارة يوسف والعيال كانو يرقصون قدام المستشفى وشاركوهم نياف وفيصل ورفعو البنات جوالاتهم يصورون تجمعوا الناس عليهم واللي يصورهم واللي يرقص معاهم فعلاً فرحة عظيييمه جدا
أعتلت أصوات العيال وهم يرددون:
ليلة من كثر ماطرها بغى قلبي يندي
السماء زرقاء مثل صدري وسع ورحوب
وقفو كلهم يدخلون لداخل المستشفى وهم مبتسمين كيف مايبتسمون ومعاذ البهجة والرُوح ينتظرهم بالغرفه؟
دخلوا الحريم والبنات اول وبعدها لحقوهم العيال
دخل سلمان وهو يرقص ونياف مثله وفيصل يغطرف
معاذ بضحكه:وش فيكم انتو؟
نياف صفر وهو يسلم عليه:مبسوطيين مبسوطيييينن
معاذ لف ليوسف:ساعدني اوقف
ساعده يوسف ووقف فعلاً وأخذ عصاة جده وصار يرقص معاهم
ام يوسف:اجلس يامعاذ للحينك ماشفيت
معاذ:من بعد شوفتكم شفيت
نياف:اجلس اجلس وكل وعب بطنك يبو كرشه
ساعدته ام يوسف ياكل ولفو من دخلو تالين ورائد
رائد:الحمدلله على السلامة وآخر الأوجاع
أبتسم معاذ بهدوء وقالت تالين:بتقعد يومين تحت المراقبة وبعدها تطلع
معاذ:ليه يومين مايمدي اطلع قبلها؟
رائد:للأسف لا
معاذ:طيب ماابي اقعد اكثر بالمستشفى
نياف:معاذ اصبر كلها يومين
معاذ:بطلع على مسؤولية نياف
نياف ناظره بصدمه وقال رائد:دكتور نياف
ناظره معاذ بترجي وقال نياف:خلاص بتطلع
تالين:مايقدر يطلع نياف باقي مافحصناه
معاذ تنهد وقال:خلاص بقعد يومين
فيصل:ايي خلك كذا
دخلت الممرضه تبلغهم بإنتهاء وقت الزياره
وطلعو كلهم ولف نياف على معاذ
معاذ:وينها ماجت ولاشفتها؟
نياف:بتجي بعدين مو الحين
معاذ:صاير فيها شي؟
نياف:لا
معاذ:نياف اشتقت لها يانياف ابي ألمح عيونها
نياف:أصبر أنت الصبر زين
معاذ:وش بعد الصبر ذا قل لي؟
نياف:شوفة عيونها كل ليلة
أبتسم معاذ بهدوء وطلع نياف بعدها
(عند وجداني)
وقفت من دخل عليها عايض وسحب شعرها وطاح فيها ضرب
حاولت تفلت من يده لكنها ماقدرت
وخر عنها من أغمى عليها وطلع وتركها بالغرفه
نوره:وش سويت فيها؟
عايض:مدري مدري هذي هي بالغرفه شوفيها
دخلت نوره على وجدان وشهقت ولفت عليه وهي تقول:يامجنون ايش سويييت فيهاا
عايض:انتي السبب انتي اللي خليتيني امد يدي عليها
نوره وهي تدفعه:ايوه انا اللي قلت لك؟ بس ماقلت خليها تموت بين يدينك
مارد عليها وكملت:تبي تنسجن؟تبي نياف يوديك بستين داهيه؟انت تعرف نياف ليه تسوي كذا ليييه
ناظرها ونطق بهدوء:خليها تموت بشوف نياف وش يسوي
ناظرته بصدمه وقالت:حمار انت؟مو انت كنت تقول انك تخاف من نياف وتخاف يسوي فيك زي ماسوا بخالك وذياب؟عايض صحصح ذيي وجدان
"هي نطقت بهالجمله وخلته يصحصح
هو فعلاً مد يده عليها لكن السبب "نوره"
نطقت نوره:انتبه على نفسك من نياف تراه مب هيييين
ناظر فيها بهدوء
"هو فكر بكلمتها وعرف ان لو نياف عرف بيوديه بستين داهيه بالذات لان ذي
"وجدان"مو احد غيرها هو يعرف ان غلا وجدان بقلب نياف موب هييين ، يعرف ان نياف يكره اي شي يجي بنات "غدير"يخاف عليهم اكثر من نفسه ، كره نفسه بهالساعه كره كل شي حوله الشي الوحيد اللي يحاول مايفكر فيه هو "نياف" يعرف ان لو نياف عرف بيصير شي ماراح يرضيه"
ناظر جواله بصدمه وقالت نوره:مين؟
همس بهدوء:نياف
ناظرته بخوف وقالت:لا ترد
زفر وهو يرد على نياف:هلا
نياف:وين وجدان؟
ناظر نوره وقال:نايمه
نياف بإستغراب:تنام ذا الوقت توها الساعه ١٢؟
عايض:واذا الساعه ١٢؟ ماتنام يعني
نياف:اذا قعدت خلها تكلمني ابيها بشي
وقفل نياف بدون مايسمع رد عايض
غزلان:نياف
نياف:هلا غزولي
غزلان:بنسوي عشاء لسلامة معاذ؟
انسدح نياف وهو ينطق:مدري والله عن ابوي شوفيه
ناظرته بتردد وقال:وش عندتس قولي
زفرت بقوه وقالت:وجدان وش اخبارها؟ليه ماترد علينا؟ليه ماتجينا صارلها اسبوعين لاارسلت لنا ولادقت ولاجتنا
نياف:بتجي قريب
غزلان:وش دراك
نياف:لاني انا اللي بجيبها اطلعي وقفلي الباب
طلعت غزلان وراحت لغرفتها وجلست بين البنات
وصايف:وليف الحين صدق صار يتكلم معاتس طبيعي
وليف:لا ادرري شايل بخاطره بس الواحد يغلط
بدور:انتي ياكثر ماتغلطين ويعديها لتس نيافي
وصال:تغار لاتقولين نيافي
بيان وهي تلبس عبايتها:وش تبون من البقاله
وصال:جيبي اندومي تكفين
هديل:ايي بيوني تكفين اندومي وبطاطس
بيان:تمام
وطلعت من غرفة غزلان وتوجهت للبقاله
، شافها تطلع لحالها ولحقها من غير ماتحس فيه
غاده:تخيلوا عاد تطب علينا وجدان وحنا كذا
وصايف:اشتقت لها
غزلان:نياف بيجيبها قريب
بدور:ليه نياف يجيبها؟زوجها ليه مايجيبها
وصال:اسكتي بالله
وليف:تبون الصدق يابنات؟
البنات بصوت واحد:اييي
وليف:نياف متغيير والتغير ذا واضح عليه ماصار يطقطق علينا ولايطلعنا ولاشي حتى جده مايجلس معاها ويتعذر بالشغل حتى انا فقدت ضحكته وإبتسامته ولمعة عيونه
غزلان:كل ما أشوف وضعه قلبي يعورني بشكل مو طبيعي أحسه يبي شي بس ماادري ايش ذا الشي
وصايف:تذكرون يوم كان يطقطق على فيصل ومواليف
مواليف:محد ضحكني ذاك اليوم كثره
غاده:نجي للصدق؟نيافي سعادتنا
وليف خزتها وقالت غاده:وليف لاتغارين عليه منا!حنا قرايبه ونعرفه وميانه معاه!
(الطرف الثاني)
دخلت بيان البقاله واخذت الاغراض اللي تبغاهم
لفت على صوت عامل البقاله وراها
بيان:وخر!
مارد العامل عليها وهو يقرب لها أكثر
صرخت بصوت عالي وهي تدفعه بقوه
رجعت ورا من شافت يوسف يسحب العامل ويضربه
يوسف بصوت عالي:اطلعي برا انتظريني
أخذت أغراضها وطلعت برا تنتظره هي خافت ترجع لحالها بعد هالموقف
غمضت عيونها بقوه تسمع شتم يوسف للعامل
طلع بهدوء وهو ينطق:ليه طلعتي بدون ماتاخذين معاتس احد؟
نطقت بصوت راجف:مدري ماحسبت بيصير كذا
لاحظ رجفة يدينها وصوتها وقال:لاتخافين
ماردت عليه ولف يوسف على صوت
ابو طلال وهو يقول:وش مسوي بهالعامل انت؟
يوسف:ماسويت شي بس ضربته
ابو طلال:وليه تضربه هاه؟
يوسف:وانت وش دخلك يالشايب
طارق:احشم عمرك وانت تتكلم مع ابوي فاهم؟
يوسف:ماني حاشم عمري وش بتسوي؟
طارق:لاتحدني على الردي ياولد باسم!
يوسف:لاانا ابي احدك على الردي وش بتسوي
بيان بهمس ليوسف:يوسف خلنا نرجع البيت
مارد عليها وهو يناظر طارق ومسكت يده وهي تهمس:يوسف امش
شد على يدها وناظر طارق وقال:امسك عاملكم عن بنات الناس
ومشى مع بيان يتوجهون للبيت
تركت يده من استوعبت انها ماسكتها
ضحك بقوه وهو ينطق:ماسكتها طول الطريق توتس تستوعبين
ناظرته بحده وهي تنطق:مو رايقه لك ابدا
تنحنح وهو ينطق:لاتقولين لأحد اللي صار
ناظرته بإستغراب وكمل:بيقولون لتس تزوجي يوسف وانتي ماتبيني
نطقت بدون وعي:من قال اني ما أبيك؟
ناظرها بصدمه وقال:صدق والله؟
أستوعبت اللي قالته ومشت بسرعه تدخل البيت وأبتسم يوسف يتذكر كلمتها
دخلت الغرفه وهي ترجف من الخوف والصدمه
وليف:بيان وش صاير
بيان:و ولاشي
بدور وهي تسحب الكيس:مايهمني وش صاير معاتس ، المهم وش جبتي
وصال:ورعه وين الاندومي!
بيان:اوفف عادد البقاله مافيها اندومي
وصايف:وش فيتس معصبه
بيان:مافيني شي
(عند وجدان)
فتحت عيونها وشافت المكان حولها
نوره:صحيتي واخيرا
نطقت بهدوء:وين انا
نوره:بالمستشفى
ناظرت يدها وقالت:اللي يشتغل فيه نياف؟
هزت نوره راسها بمعنى"ايوه"وقالت وجدان:
خليه يجي أبغاه
نوره:سألنا عنه وقالو مو مداوم
دخل عايض وشافها وقال:من ترجعين جهزي اغراضك
ماردت عليه وهي تناظر يدها المكسوره
غمضت عيونها بقوه وقالت:وش صار فيني
نوره بهمس:ضربك عايض وأغمى عليك
لفت تناظر نوره وقالت:ابي مويه
مدت لها نوره مويه وشربتها
عايض:بيجي الدكتور الحين واذا سألك من مسوي فيك كذا صرفي الموضوع
ماردت عليه وقالت نوره:عايض خلاص عاد لمتى وانت بتعذبها
عايض:وانتي وشدخلك
سكتو من جاء الدكتور يتطمن على وجدان
لفت على نوره بهدوء وقالت:بروح اخذ الدواء واجي
وقفت وهي تتركهم وراها وراحت للممرض
وقالت:ابغى غرفة معاذ ابن باسم آل راشد
الممرض:تعالي معاي
مشت وراه وآشر لها على غرفة معاذ ودخلت الغرفه وشافته نايم ، قربت منه ترفع يدها لوجهه ودموعها على خدها ، أنحنت تُقبل خده ، مكان غمازته ، عيونه ،
مشت بتطلع من الغرفه لكنها لفت على صوته وهو يناديها:وجداني
همست بهدوء:معاذ
مشت له ودموعها على خدها حضنها بقوه يعوضها عن الليالي اللي مضت يعوضها عن كل ليلة مضت وهو مو معاها ، شدت على التيشيرت حقه وهي تشهق  ، وخر عنها يناظر عيونها أشتاق لها وجدا ، اشتاق لإبتسامتها ، اشتاق لعيونها ، اشتاق لشعرها ، اشتاق للمسة يدينها الدافئه ، اشتاق لحنانها ، اشتاق لسماع أسمه من ثُغرها النديّ ، اشتاق لأصغر التفاصيل فيها
نزل أنظاره ليدها وقال:من مسوي فيك كذا ياعروقي من
ماردت عليه ودموعها تنزل ،
رفع يده ينزل نقابها وحجابها يشوف الكدمات بكل أنحاء وجهها ناظرها بهذول وقال:اللي مسوي فيك كذا صح عايض؟
هزت راسها بهدوء وقرب منها يُقبل جميع انحاء وجهها ،
همست بهدوء:وحشتني
أبتسم بهدوء يسمعها تنطق بالكلمه اللي انتظرها الكلمه اللي يحبها الكلمه اللي يعشقها من "ثُغرها النديّ"
رفع يدينه يحاوط وجهها وقال:وحشتيني اكثر
أبتسمت بوسط دموعها وقال:أحُبك كثر تعذيبك
ماردت عليه وقال:عرفت أنك زهر عمري ياوجدان قلبي
رفع عيون يناظرها ونطق بهدوء:أحُبك أفهمي شعوري ياربيع قلبي وعمري ، وحشتيني ياعروقي وحشتيني
ناظرته وهمست بهدوء:قلت لك لاتحبني بتتعب ويتعبونك زياده
شد على يدينها وقال:لو التعب بعده شوفة عيونتس اتعب سنين عمري كلها
وخرت عنه وقالت:بروح ينتظروني
وقف بالغصب وقال:لاتروحين وتتركيني
ناظرت يده المكسوره مثل يدها وقالت: برجع بس مااعرف بعدها اتركك او لا
ناظرها وقال:ماتتركيني لأنتس تحبيني
لفت تعطيه ظهرها وقالت:مو وقتك ابد
وطلعت من الغرفه بعدها تتركه وراها
مشت لعايض ونوره وقالت:الصيدليه مقفله
مشو قدامها ومشت وراهم
(بيت أبو ذياب)
قام نياف من على العشاء وهو يكلم
فيصل:صاير يهتم بالجوال اكثر منا
يوسف:كل وانت ساكت تراك مزعج
ابو ذياب:والله لو انه زوجتك يافيصل ماقلت كذا
فيصل وهو يشرب المويه:لاياجدي مواليف غير
ناظره أبو ذياب بصدمه وقال فيصل:تراني صادق مواليف مو مثل نياف
سلمان:فيصل ترا جدي بيمحطك انتبه
فيصل:يوه عاد تراني صادق وش فيكم انت وياه عشاني اعترفت اني احبها زوجتي ياخي زوجتي
وقام يتركهم على العشاء ودخل داخل ونادها وجته وهي تضحك
ابتسم يناظرها وقال:جعلها دايمه يابعدي
أبتسمت بهدوء وقالت:ايي شفيك معصب
نطق بهدوء:يقولون لو نياف زوجتك ماقلت كذا وانا
قاطعته بهدوء:وانت وش قلت والله لااذبحك اذا قلت انه احسن مني
ضحك بخفه وقال:اخسي اصلا ، قلت مواليف غير
أبتسمت تناظره وتناظر لمعة عيونه وقالت:
وفيصل قلبي غير
مسك يدها وقال بهدوء:تجين معاي؟
نطقت بهدوء:وين
قرب منها وهو ينطق:بيتنا اشتاق لنا
ضحكت وقالت:بس انا مااشتقت له
سكت وكملت:بس بجي معاك لاني راحمتك
ابتسم وراحت تلبس عبايتها تطلع معاه يتوجهون "لبيتهم"
.............................................
انتهى بارتنا هنا ، القادم مُذهل
الكاتبه:منيره آل عبدالعزيز💙.