بين الليل والحال هبت الذكرى

السادس والأربعون

-
فتح معاذ الباب يسمع صراخه وناظر حوله يشوف الأشياء المكسره ودخل يناظر نياف وركض له وقال:نيافف
لف عليه نياف وقال:أخذها يامعاذ أخذها ليييته أخذذ روحي ولا أخذها
معاذ:يانياف مايصلح كذا والله مايصلح ، قمّ معايّ أوديك المستشفى
نياف:مابيّ أروح مكان
معاذ:نيياف
نياف:تكفى معاذ أتركني لحالي
معاذ:ماهوب أنا اللي أتركك
سكت نياف يحط رأسه على الجدار وراه وقال معاذ:تدري ، خطبت وجدان ، بس عمي تركي قال مانيّ موافق ولا لك بنت عندي
لف نياف عليه وقال:هذا تركي مايتغير
تنهد معاذ يسمع صوت الجرس ووقف يفتح الباب وشاف أمه وقال:وش جابتس
ام يوسف:وين نياف
معاذ:داخل
دخلت ام يوسف وشافت البيت وقالت:الله لايوفقك يا باسم
دخلت الصاله وشافت نياف وشهقت من لمحت الدم بيده
-
بيت باسم
-
دخل وهو ماسك يد وليف ودفعها على الأرض وقال:والله أن شفتس عند قليل المروه هذا لا أذبحتس
وليف:وش سوا قل ليّ
قرب منها باسم يضربها على بطنها وصرخت وليف وهي تمسك بطنها وقال:كل هذا عشان وافقتي على نيافف
دخل يوسف البيت وشاف وليف على الأرض وأبوه قدامها وقال:وليففف
وليف وهي بالغصب تنطق:يوسف راح يايوسف
تقدم يوسف يشيل وليف من على الأرض يركض فيها لبرا وصرخ وهو ينادي وصال:
ياوصاللل أفتحي باب السياره
فتحت وصال باب السياره وقالت:وش فيها وليف
مارد عليها يوسف وركب السياره وركبت وصال جنبه ومشى يوسف للمستشفى
-
بالمستشفى
-
وصال:يوسفوه قل وش فيها
يوسف:أبوي ضربها
وصال:سامحني ، بس أبوك مريض
يوسف:وصال أسكتي
طلع الدكتور يناظر يوسف وقال:الحمدلله على سلامتها
يوسف:الله يسلمك ، بس هي شفيها يادكتور
الدكتور:نزيف داخلي وللأسف الشديد أنها
-
بيت ام حامد
-
وديان:كيفففف يعني بنتهمم كيفففف؟كيففف أطلع أخت نياففف اللي تبونه لورد كيففففف
حامد:وديان أهديّ
وديان:لاتقرب منيّ لاتقرببب
لفت وديان على ساره اللي دموعها على خدها وقالت:كنتي تعرفين ياساره وساكته؟ساره قولي أنك ماتعرفين
قربت ساره من وديان وقالت:وديان أنا تويّ عرفت معاك
صرخت وديان بقهر:لاتكذبينننن ، نيافف يقول الكل يعرف بس هو ووجدان وأنا ، كلكم تعرفونن كلكم
ورد وهي جالسه تشرب قهوه:أزعجتينا تراك ، شدعوه زعلانه عشان نياف طلع أخوك؟لو أنا مكانك كان طرت من الفرحه
وديان:ورددد أسكتييي
ام حامد بهدوء:لمّي عفشك عشان تعيشين عند أخوك
ناظرته وديان ونطقت بسخريه:الشي الوحيد اللي أحمد ربي عليه ، أنك مو أمي الحقيقه
ام حامد:طول عمرك جاحده للمعروف ياوديان طول عمرك ، مثل أخوك ، المعذره أقصد نياف
-
بعد ثلاث أشهر
-
بيت نياف
-
ناظر وديان جالسه بالصاله ومشى للمطبخ ولف على صوت جواله ورد وه ويقول:هلا فيصل
فيصل:جاء سميك
إبتسم نياف وهو يقول:ألف مبروك ماجاك يافيصل يتربى بعزك
فيصل:الله يبارك فيك ، ما أنت ناوي تجي؟
نياف:إلا بجيك
إبتسم فيصل وقفل ولف نياف يمشي لوديان وقال:وديان
ناظرته وكمل:قومي تجهزي نبي نروح نبارك لفيصل جاه ولد
وديان:مابروح لهم ويدي فاضيه
جلس نياف جنبها وقال:وديان ، تراتس أختي وفلوسي كلها لتس ، أنا أدري أنتس مو متقبلتني كـ أخ ، ولا أنا متقبلتس كـ أخت ، بس لازم نحاول ياوديان مايصلح نصير كذا ، إنتي أختي وأنا أخوتس وكلنا عيال سعود وغاليه
همست وديان:بس أنا ما أعرف لا سعود ولا غاليه ولا قد شفتهم
إبتسم نياف وفتح جواله يوريها صورة أمهم وأبوهم وقال:هذا هم ، وأنتي كنتي هنا عايشه- أشر على بطن غاليه -
إبتسمت تناظر الصور وقالت:يشبهونك
هز رأسه بالإيجاب وقال:ويشبهونتس إنتي بعد
وقف وقال:هاه عاد بنجلس هنا؟قومي يلا
وقفت قدامه وقالت:نياف ، عادي نمر ناخذ قهوه؟
هز نياف رأسه بالإيجاب ومشت وديان تدخل غرفتها وتلبس عبايتها
ونياف كذلك لبس ثوب وشماغ
وطلع من الغرفه ينتظر وديان
جته وديان وقالت:يلا
-
بالمستشفى
-
معاذ:صرت أبّ ياشايب
فيصل:بارك ياخوي
ضحك معاذ وهو يقول:مبروك مبروك
وليف:مبروك فيصل
حضنها فيصل وقال:الله يبارك فيتس يا أحلى عمه
وليف:وين مواليف؟
فيصل:داخل ، عندها البنات
مشت وليف تدخل الغرفه وشافت أمها وأمتلت عيونها بالدموع لأنها طوال الثالث الأشهر اللي فاتت ماشافت أمها
تقدمت تحضن أمها وقالت:وحشتيني
وصال:ياوليف ترانا مشتاقيين
ضحكت وليف تّبعد من حضن أمها وتقدمت تسلم على البنات وجلست جنب غزلان
لفوا كل البنات من دخلت وديان عليهم الغرفه ومعاها ورد
وقفت ام يوسف وهي تقول:هلا هلا بالغاليه بنت الغاليه
إبتسمت وديان بهدوء ونزلت الورد وتقدمت تسلم عليهم
بدور بهمس لوديان:نياف جاء؟
هزت وديان رأسها بالإيجاب وتقدمت تبوس رأس أم ذياب وجلست جنبها
ام وصايف:وش أخبارتس ووش أخبار نياف؟
وديان:بخير الحمدلله ، ايي صح نياف برا يبغى خالاته
وصال:ماعادهم خالاته بس وخالاتس إنتي بعد
صدت وليف بضيقه وقالت:مواليف وين البيبي؟
مواليف:عندهم شوي ويجيبونه
وقفت غزلان وقالت:يمه ما إنتي جايه معانا؟
ام ذياب:لا
ام وصايف:تعالي معانا يايمه
وقفت ام ذياب معاهم ومشو يطلعون من الغرفه
إبتسم نياف من شاف "خالاته"وتقدم يسلم عليهم
غزلان:وحشتني
ناظر ام ذياب جنب غزلان وتجاهلها وقال:
ماعلينا ، وش أخباركم؟ووش سويتو؟
ام يوسف:إنت اللي وش أخبارك
نياف:على حالي ماتغيرت
ام ذياب:ناحف يانياف
تجاهلها نياف وقالت ام فهد:قاطع ماتقول أزور خوالي وأجي أسلم عليهم
نياف:وخوالي ليه مايجون بيتي؟
غزلان:أعزمنا
نياف:بعد أسبوعين؟
ام وصايف:تم
لف نياف على صوت معاذ وهو يقول بصوت عالي:ياهلا بنياف الصغير أرحب وأنا عمك
إبتسم نياف وقال:هلا باللي عجزت ألقى عذاريبه هلا باللي تحبه كل أسبابي
وتقدم للعيال من دخلوا خالاته
نياف:عطوني أياه
مده فيصل لنياف وقال نياف:هلا هلا بالسميّ هلا هلا ، هلا بدنيا نورتها يانياف
يوسف:يييوه وش هالترحيب
نياف:لاتلومني
فيصل:هاتوه بدخله
نياف:طلبتك أنا بدخله وبسلم على مواليف
سلمان:نسينا أن مواليف تتحجب عنك
ضحكوا العيال وقال فيصل:أمش يلا
طق الباب فيصل وقالت غزلان:أدخل
دخل فيصل ووراه نياف
سكنت ملامحها من شافته ماتوقعته يدخل ماتوقعت أنها بتشوفه
وعت على نفسها من سمعت صوته:ألف مبروك يامواليف وجعله من البارين والصالحين فيتس وبأبوه
مواليف:الله يبارك فيك ، وجعله يشابهك ياولد الغاليه
نياف:خليه يشبهني بكل شي إلا الحظ
ضحكت مواليف ولف نياف على وديان وقال:
مشينا وأنا أخوتس
وقفت وديان وحاوط كتوفها نياف وقال:
مع السلامه
ومشت وديان تطلع معاه وهو محاوط كتوفها قدام عيون"وليف" هي سمعت ترحيبه بنياف الصغير"نفس ترحيبه فيها"
ترحيبه اللي تعشقه
وجدان:مواليف وشو هذا صغييير مره
بيان:نتفه وأمه بغت تموت
ضحكوا البنات وقالت ام ذياب:جيت وجعلك ياسميه تشبهه قدر وفعايل لاتنادوا بأسمك اللي أرتفع قدر ومكانه يكفي أن أسمك شبيه لـ ولد سعود المرفوع شانه
مواليف:وجدانوه حطي اللي قالته جده بالإستقبال
وجدان:مواليف مو أنا اللي مسويه الاستقبال
مواليف:من اجل
وجدان:هديلوه
مواليف:هديلي بالله حطيها
هديل:من عيوني
وجدان:أنا تقولين ليّ وجدانوه وهي هديلي ، صدق كلبه
وصايف:وش تبين فيها كيفها
وجدان:وعع
-
يوم أستقبال الحفيد الجديد
نياف ابن فيصل آل راشد
الحفيد المُميز بـ"أسمه"
-
غزلان:وش عندتس إنتي
وصال:وطنيتي عاليه
دخلت بيان وهي تردد مع الأغنيه:
سعودية رفيعة راس عظيمة في عيون الناس
الى من اقبلت يقبل معاها العز و النوماس
اهلها اهل كرم و الجود ربت في عز ابن سعود
صفقت وصال وقالت:الحمدلله إني سعوديه
غاده:بتجي وديان؟
غزلان:كلمت نياف وقال أنهم بيطولون شوي
وصايف:تصدقون ماشفته من ثلاث شهور
هديل:اييه غرقانه بالعسل مع أستاذ عز ترانا ماشفناتس من يوم عرسكم
"زواج وصايف وبيان بالأشهر الثالث"
وصايف:ياشيخه خانقني هالعـّز مايطلع إلا وهو ماسك يدي ، وماينام إلا وأنا جنبه حشى بزر
ضحكت وجدان وقالت:حوبت نيييافف
وصايف:تصدقون حتى الفستان اللي لابسته الحين هو مختاره ليّ ، أحمر مره وحده وعع
هديل:حدتس عاد إلا الأحمر
وليف من وراهم:أوه أحمر وعلى الجسم نار ياوصايف
وصايف:ماهوب عاجبني
وجدان:ماهوب عاجبتس ليه شاريته
وصايف:مدري
وجدان:تصدقين وصايف ، ياحظتس بعز ، والله يضحك
وصايف:خير إن شاء الله
ضحكت وجدان وناظرت جوالها وسكنت ملامحها من لمحت رساله من رقم غريب مكتوب فيها:تعالي بيت ام سعد
عقدة حواجبها وكتبت:مين
:تعالي ومعاك معاذ
تنهدت وجدان وقالت بدور:تكفون قولو لـ وديان تجي بسرعه
غزلان:والله كيفهم عيال سعو
سكتت غزلان من سمعت صوت نياف وتوجهوا كل البنات للشباك وشافوا نياف وجنبه وديان وكان نياف يرحب بنياف الصغير:هلا بالغالي هلا بالزين كله
وديان ناظرت نياف وهمست:صغييير مره
هز نياف رأسه بالإيجاب وقال:روحي داخل عند البنات وإذا أحد ضايقتس قولي لي
وديان:أقدر أقولك على خشمي نفس ماتقول إنت؟
ضحك نياف وقال:روحي روحي وأنا أخوتس
ضحكت وديان ومشت تدخل للبنات
وشافتها وليف وصدت بحزن وتقدمت وديان بعد مانزلت عبايتها وقالت:أخبارك وليف؟
وليف:بخير
ام يوسف:هلا هلا بالغاليه بنت الغاليه هلا هلا
إبتسمت وديان تسلم على ام يوسف وقالت:
هلافيك ياخاله
ام يوسف:تعالي داخل عند خالاتس وعماتس
وديان:بشوف البنات وأجي
ام يوسف كانت بترد عليها بس سمعت صوت العيال المرتفع برا وقالت:وش صاير
وديان:أطلعي شوفيهم ياخاله
طلعت ام يوسف تشوف العيال ولفت على هايف اللي يلعب مع رُوح وقالت:وش السالفه ليه صوتهم أرتفع
هايف:باسم شاف نياف وضربه ضربه توجع ونياف قال أنا بنتك طلقتها وش تبي مني بعد وباسم قال روحك وعاد بعدها دخلو المشب إلا نياف ومعاذ وفيصل وسلوم
تنهدت ام يوسف وتقدمت للعيال وقالت:
نياف
لف نياف عليها وقال:مافيني شي ياخاله
ام يوسف:وشو مافيك شي يانياف وشفتك المجروحه وخشمك اللي ينزف وش سالفتهم
نياف:أنا بتصرف ، إذا فيه أحد بالمدخل قولي له يدخل بروح للمطبخ
معاذ:فيصللل أترك أنا الممرض هنا
فيصل:ممرض وواقف كذا
سلمان:ياهمج
فيصل:سلوممم
سلمان:لو سمحتوا بعدو عن صديقي العزيز
نياف:فكوني بالله
ومشى يدخل داخل بعد ما أشرت له ام يوسف وتوجه للمطبخ ولحقته وديان وغزلان
فتح الثلاجه ياخذ ثلج ولف وقال:بسم الله الرحمن الرحيم
وديان:من مسوي فيك كذا
غزلان:نيافوه منن أنطق
نياف:ابو يوسف
تنهدت غزلان من هالحال اللي هم عليه وقالت:نياف
نياف:غزلان مو وقته أنا وراي شغل أنتبهي على وديان
وديان:وين بتروح
نياف:برا عند العيال
مشى نياف يطلع وطلعت بوجهه وليف
ناظرها وهو مصدوم وهمس:وليفي !
ناظرته بـ ربكه ، بـ توتر ، بـ شوق ، بـ حنين
صد عنها ، وهو مو متعود يصد عنها هي وليفه
مشى يطلع وناظرت مكانه وليف وتنهدت بضيقه
-
المجلس
-
ام عقاب:يقولون نياف رجع يا ام ذياب
ام ذياب:راجع صار له ثلاث شهور
ام عقاب:رجع وجاب لكم أخته هالمسكينه مدري وين لاقيها
وديان:نعم؟مسكينه؟مدري وين لاقيها؟وش شايفتني حبيبتي ، للمعلوميه ، أنا وديان أخت نياف ، وماني مسكينه ، ووين لاقيني شي مالك دخل  ، وإذا براسك شي طلعيه وبتشوفين نياف قدامك ، وأضبطي لسانك دامك بمجلس خوالي ، وأحشمّي عمرك يا عجوز ، وأيّ وحده بالمجلس بتتكلم عنيّ أو عن نياف بيجيها الرد
ناظرتها وجدان بفخر وهمست لها:تربيتي ضحكت وديان وقالت:أفا عليييك أزهلي بس
وصايف:وديان أنتبهي يكرهونتس هالعجايز
وديان:ماهموني
وجدان:ودياني ، تخاوين
وديان:وين
وجدان:نشوف رقص العيال
هتاف:ماقلتي عندتس موعد؟ليه ماتروحين له
وجدان:لو سمحتي هتاف ، موعدي مو الحين
وقفت وجدان وقالت:يلا يابناتت
وقفوا وراها كل البنات ومشوا عند باب المدخل يشوفون رقص العيال
-
عند العيال
بعد ماراحوا الضيوف ومابقى إلا ابو عقاب
-
نياف:والله جوكم مخيس
معاذ:أنتظر الحين أجيب راسك
نياف:تحلم ، مايجيب راسي إلا اللي براسي
يوسف:أقعددد يالساطي أرفق بحالك
مارد نياف عليه وتنهدت يوسف من حال نياف معاه "هو فقط"
ذياب:شغلوا لنا شي
ابو عقاب:أبوك توه متوفي وإنت تقول شغلوا لنا شي؟
نياف:وش دخلك إنت؟بكل شي قاط؟من عازمك اصلا؟
باسم:أنا عزمته
وقف نياف وقال:دامك عازمه ، أطلع معاه ، لا أشوف خشتك هنا
يوسف:نيافف حشمّ عمرك
نياف:أنطم إنت ، أطلعوا من البيت إنت وياه
ابو عقاب:والله ماعرفت تربي يبو ذياب
نياف:أيييه أنا قليل تريبه وقليل حياء ، اصلا أنا ماني متربي ، بالإختصار ، ما أستحي على وجهي
تقدم باسم وقابل نياف وهمس لـ نياف:
بتندم على كل شي يانياف
ضحك نياف وقال:من تكون عشان تخليني أندم؟من إنت
باسم:ابو وليف
نياف:اعلى مابخيلك أركبه يبو يوسف ، وصدقني بيجي اليوم اللي أشوفك فيه طايح وتعرج وتستنى أحد يسندك ، ومحد بيسندك حتى عيالك كرهوك لأنك قليل أصل
ناظره باسم بقهر وهمس نياف:غريبه ماضربت؟يازينك وإنت خايف وقامط أم العافيه
باسم:أنا عمك باسم يانياف
نياف:تخسي وتعقب
ابو عقاب وقف وقال:أمش ياباسم فيه ناس قليلة تربيه
ناظره سلمان وقال:أقعددد يالشيبه طلع لك لسان؟ورا ماتذلف؟
مشوا باسم وابو عقاب وقال نياف وهو يناظرهم يمشون:الحين شغلوا الأغاني
"لف عليه باسم وعرف أنه غير مرحب فيه وكمل مشي"
تقدم يوسف لنياف وهمس:زودتها
نياف:لو سمحت ، بّعد عن طريقي ماليّ خلقك ، بالمعنى الأصح أذلف
فيصل:تعال تعال ياسميّ ولدي
تقدم نياف مع فيصل وقال:عاششش ابو نييافففف
إبتسم فيصل و وقفت الأغاني وقال معاذ:
نبيّ نغنيّ
نياف:اللي ودك فيه يصير
معاذ:مع بعض
صفقوا العيال وهم جالسين ورددوا مع بعض: فز الخفوق بالسلامات ما بين شوق و تهلي يوم ٍ لمحت الذي فات سَمّرني واقف مَحلّي ودي أبوق المسافات و أصير ظله و ظلي في خطوته أمشي خطوات في ساقته صرت أعلي رد بعيونه ابتسامات چنه يقول لا تخلي يا طير غرد ولا تبات و النوم خله يولي
‏و اشكيله الشوق آهات و انقش على القلب خليّ
"كانت كل هاللحظات تتصور كانت لحظات سعيده تجمع العائله والضيوف"الغاليين"
معاذ:طيب طيب نيافوه وش يقول؟
نياف:صابني بالعيون والحجاج الذبوحي و أحمر المبسم اللي ما يعالج صوابه منك روحي خطيرة يا حبيبي تروحي الهوى يذبح العاشق وهو ما درابه
صفر فهد وقال:عاشققق
نياف:القلب يعشق مره مايعشق مرتين والقلب للحينه مع الحبيب الأولي
-
عند البنات
-
وصايف:تتوقعون وقع مره ثانيه؟
غزلان:ليه لا
ريف بهمس:ما أصدق أنه يحب غير وليف
بدور:توقعي من العيال كل شي
رحيق:وجدان وين
هديل:بتروح موعدها
غاده:تقول الأوبر برا
-
عند وجدان
-
ناظرته بين العيال ونادته:معاذ
لف عليها معاذ وقال:أرحبيي
ووقف بـ لهفه وتقدم لها وقال:ياهلا ياوجدان قلبي
وجدان:أبيك تروح معايّ
معاذ:وين؟
وجدان:لبيت ام سعد
معاذ:ليه؟
وجدان:تروح معايّ؟
معاذ:أمشي
مشت معاه وجدان
-
العيال
-
سلمان:منهي ذي
نياف:يمكن أخته
"كان صوتها مو واضح للعيال ولا شكلها"
فيصل بهمس لنياف:مو قادر تنطق اسمها؟
نياف:فيصل يرحم ليّ أمك أنسى هالموضوع
فيصل:طيب يانيافوه كانت مُنى روحك وقلبك وش تغير؟وش صار؟
نياف:اللي تغير إني تعبت اللي صار إن حيلي أنهددد اللي تغير إني غصب متحملللل
يوسف:نياف
نياف:أنطم إنت لا أسمع حسك
يوسف:قلّ ليّ وش سويت؟
نياف:مخبيّ عليّ يايوسف؟ولاقلت ليّ؟ورحت ورا أبوك وأنا قاعد أنزففف دم يايوسف ناظرتي ولا أهتميت ، مشيت من جنبي كأنك تقول تستاهل اللي جاك يانياف ، حملتنيّ الخطا مع أبوك وإنت تدري إني ماني غلطان ، طول الثلاث الشهور مادقيت عليّ ولاجيتني ومبلكني من كل مكان ! وتقول وش سويت؟وش بقى ماسويت يايوسف؟أقولها لك بالإختصار؟فوق ما حيلي مهدود جيت إنت وهديته زياده
وقف نياف يمشي يتركهم وراه ووقف يوسف يلحقه وطيحه على الأرض واعتلاه وهو يقول:
ياحمار أفهم ، والله الرقم ماهوب معايّ ، جبت رقم جديد ياتيس ، وتقول ليه مشيت من جنبي ولاجيتني؟نيافف يانياففف أنا ماجيتك عشاني داريّ أن العيال بيجونك لحقت على أبوي بس ماسويت شي ثاني ، وتقول ليه مبلكني من كل مكان؟حساباتي تهكرت ياحمار ، بس اللي مايفهم مصيبه
-
عند البنات
-
وديان:ذبح أخويي
وصال:أهجدي قاعدين يتناقشون
وديان:وش هالنقاش هذا اللي فيه ضرب
غاده:وديان ، أفهمي نياف ويوسف متهاوشين وقاعدين يطلعون حرتهم ببعض
وصايف:عاد ضلوع نياف خفيفه تتكسر بسرعه
بدور:تخيلوا يضربون بعض وناسه
بيان:وشو وناسه إنتي بعد
بدور:نسينا إن يوسف زوجتس نعتذر
بيان:بدور أنطمي
رحيق:شوفوا
ناظروا البنات لـ نياف ويوسف وشافوا يوسف يضرب نياف
وديان:قلت لكمم بيضربون بعض
غزلان:وديان
-
العيال
-
يوسف:ليه مو راضي تفهم
نياف:قمممم عني
يوسف:نياففف
سكت نياف يناظر يوسف وكمل يوسف:
والله الأمر ماهوب بيدي يانياف أفهم
نياف بهدوء:قم عني
وقف يوسف ووقف نياف قدامه وفتح نياف يديه وضحك يوسف يحضن نياف وصرخوا البنات بفرحه وقال يوسف:لاتصير غثيث مره ثانيه
نياف:حاضر ياحضرة المهندس
-
عند معاذ ووجدان
-
دخلوا بيت ام سعد وناظرها معاذ وقال:
وش السالفه
وجدان:أمش ندخل
مشى يدخل معاها وشاف عايض وذكرى ونغم جالسه على الكرسي المتحرك
معاذ بهمس لوجدان:وش السالفه
عايض:اهلا اهلا بطليقتي
وجدان:أنطم ، خير ياذكرى وش الموضوع المهم لدرجة ذي؟
نغم:أنا قلت لها تناديك إنتي ومعاذ
سكتت وجدان وكملت نغم:وجدان ، سامحيني والله من بعد ظلمي لك وأنا حالي بالحظيظ ، أسوي اللي تبينه بس سامحيني
عايض:سامحينها وسامحيني ، وسامحني إنت يامعاذ أخذت منك حبيبتك ورجعتها لك وهي كارهه الدنيا
وجدان بقهر:والله لو مايبقى بينهم وبين الجنه إلا مسامحتي ماسامحتكم لا إنتو ولا أمك ، الله يبليكم ببلوه غير ذي ، هذا ولا شي والله ولا شي ، كل شي بينرد لكم من ظلم من حقاره من ضرب كله بينرد لكم
ذكرى:طلبتك تسامحينا
وجدان:أنا تعبتتت ماتفهمين تعبتتت ، أنا عشت حياة ماهيب حياتي ، عشت مع ولدتس حياه غير اللي أتمناها مع معاذ ، جاء ولدتس وأخذ كل شي زرعه معاذ ، ليه ماتفهمون ليه؟ليه ماتفهمون أن هذا عقاب ربي وهذي جزاتكم ، ولدتس وبنتس و إنتي بعد كنتوا تدرون إن قلبي مع معاذ رغُم ذلك رحتوا وطلعتوني رخيصه قدام أبوي وأهلي كلهم ، طلعتوني حُثاله بعين اللي حولي ، محد صدقني ، أمي اللي ولامره مدت يدها عليّ مدتها والسبب إنتوا، أبوي اللي ماعمره غصبني على شي ، غصبني على ولدتس
تقدمت نغم تمسك يدين وجدان وقالت:
أبوس يدك سامحيني
دفعتها وجدان وقالت:والله ما أسامحك ، شبيتوا بداخلي حرايق محد عرف يطفيها إلا عزاكم ، حتى الرحمه نزعتوها من قلبي ،
ضحكتي أخذتوها ، سرقتوا أيام من حياتي المفروض ماتكون لكم ، أنا عشت حياتي أبني حياتي وجيتوا إنتوا بيوم وليله هدمتوها ،
حتى نياف خربتوا حياته ، حتى معاذ مو بس أنا ونياف ، عشت وعشت وعشت عشان نفسي بس إنتوا جيتوا وخربتوا عيشتي ، خربتوا عليّ راحتي وسعادتي وأماني وضحكتي وأحلامي اللي بنيتها ، أنا وجدان اللي نزعتوا الحنّيه والرحمه من داخلها ،
سكتت تاخذ نفس وكملت :أحاول ألقى لكم عذر عشان أسامحكم بس مافيه أيّ عذر ، يغفر لكم خطاكم ، كنت أجلس عند رجولك ياعايض إذا تذكر وأترجاك ترجعني لأهلي بس كنت تضربني وتمد يدك عليّ ، حتى زوجتك خليتها تضربني ، كنت تقول إذا تبين ترجعين لأهلك صيري خدامه ، ويوم كلمني نياف كنت تهددني والسلاح بيدك عشان ما أقوله شي ، بس الحين الدنيا دارت دارت وجيتوا تطلبوني أسامحكم ، والله ما أسامحكم  ، بذات إنتي ياذكرى والله ما أسامحك حتى لو شفتك تموتين قدامي ما أسامحك
ذكرى:لهدرجة كرهتينا؟
وجدان:وأنا متى حبيتكم؟ياخي أفهموا ، بسببكم الكل حسب نياف سبب اللي صارلي بسببكم عاتبوه كلهم والسبب إنتوا ، كنتوا تقولون ليّ عشيقة نياف ومعاذ كنتوا تخلوني عشيقة واحد متزوج ، وكل ماجبت طاري معاذ ضربتوني كل ماجبت طاريه وقلت إنه أحسن منكم - صرخت بأعلى صوت - بسببكم أنا ما أقدر أكمل حياتي طبيعي بسببكم ، بسببكم الكل وقف ضد نياف بسببكم ، كل شي بسببكم ، كل شي ، كل المُعاناة اللي أنا فيها بسببكم ، كل الآلم اللي أنا فيه بسببكم كل الوجع اللي أنا فيه بسببكم كل الدموع اللي نزلت مني بسببكم ، كيف كيف تبوني أنسى كل شي سويتوه ليّ كيفففف؟أنا وجداننن اللي عذبتوها وحبستوها بدون أكل لأيام طويله ، كنتوا تناظروني كلكم وكأني حيوان عندكم ، كذبتوا على أهلي أن عايض مايتصل عليكم وإنتوا كل يوم عنده ، الله لايوفقكم وين مارحتوا الله لايسامحكم ، جعلكم تنزفون دم نفس ماخليتوني أنزففف دم ودموع وآلم ، حتى لو متيّ إنتي يانغم ما أحللك ولا أسامحك ، كنت أدور شي جميل سويتيه ليّ بس مالقيت ، مالقيت لو شعره تخليني أسامحك
صرخت بعلو صوتها تردد:كل شيي بسببكم كل شيي
لف عليها معاذ وهمس:وجدان
نزلت دموعها تناظره وقالت:معاذ خذنيّ من هنا تكفى
لف عليهم معاذ وقال:الله لايوفقكم
ولف يمشي معاها يطلعون من البيت وركبوا السياره وحرك معاذ يروح لمكان بعيييد
-
وقف السياره من سمع شهقتها ونزل من السياره يفتح بابها وقال:وجدان
لفت وجدان عليه وقال:معاذ تكفى طلعنيّ من هالحريقه اللي أنا فيها
نزلها معاذ من السياره وحضنها ، صرخت بقهر وهي بحضنه ، كررت صرختها أكثر من مره ، شدّ عليها معاذ وقال:والله إني معاك حتى لو كنتي على خطا ياوجدان
وجدان:معاذ تعبت يامعاذ تعبت والله تعبت
ناظرها معاذ وقال:تكلمي لاتخلين شي بداخلك
وجدان:أذوني معاذ أذوني تعبت والله تعبت ، مابيّ شي من هالدنيا غير الراحه ، مابيّ شي ثاني
-
بعد أسبوعين
-
بيت نياف
-
وديان:حيّ الله من جانا أدخلوا
دخلوا البنات وام ذياب وبناتها وقالت وصال:وين نيوفي
وديان:راح يجيب كم غرض للعشاء
مواليف:رُغم أن مالي خلق جيتكم
وديان:ياحبيبتي إنتي تعالي أجلسي بخليك تجلسين على كرسي المساج حق نياف
ضحكت مواليف وقالت:يويلنا من نياف
وديان:لاماعليك قالي إذا جت مواليف حطيه بالمجلس وخليها تجلس عليه
إبتسمت مواليف ومشت تدخل المجلس ومشت وراها وديان وتقدمت تقهويهم
وجدان:ست بيت
وديان:شدعوه عشاني بس قهويت؟
وجدان:إلا تعالي وش هالكشخه؟
وديان:شرايك بس
وجدان:حلاك مامثله
لفت وديان على ام ذياب وقالت:جده تبين أجيب لك شي؟
ام ذياب:لالا أرتاحي
وديان:عاد نياف موصيني عليك قال أمي حطيها بعيونك
إبتسمت من ام ذياب من أهتمامه فيها رُغم زعله منها
وصايف:تعالوا نتفرج على العيال أسمع صراخ برا
وصال:حبيبتي ممنوع أجلسي
وقفت وديان من سمعت صوت نياف يناديها وراحت له وقال:هاه بشريّ
وديان:كلشي كويس وواضح أنهم مرتاحين مره
نياف:أجل أمسكي
أخذت وديان الأغراض وطلع نياف للعيال برا ورجعت وديان المجلس وقالت:تبون نرقص خطوه جنوبيه؟
وجدان:ما أقول لا
غزلان:تكفون نبيّ نجلس مره وحده بدون رقص
وجدان:يع كبرتي بالعمر
تنهدت وصايف من شافت رسالة عز المكتوب فيها:تعالي من باب المطبخ الخلفي
وقفت وصايف وقالت:وديان وين الحمام؟
"يكرم القارئ"
وديان:جنب المطبخ
مشت وصايف للمطبخ وطلعت من الباب الخلفي تدوره بعيونها وشهقت من سحبها وقال:يامرحبا لين مايبقى مرحبا
وصايف:شبغيت يازوجي العزيز؟
عز:أبد قلت أشوف زوجتي العزيزه اللي صارلها يومين ساحبه عليّ ونايمه عند خوالها
وصايف:عرفت خطاك؟
هز راسه بالإيجاب وقال:عرفته
ناظرته وهمست:أعتذر ليّ !
إبتسم وقال:أعتذر وترجعين معايّ لـ بيتنا؟
رفعت كتوفها بعدم المعرفه وقالت:يمكن نسهر عند وديان هنا ويمكن ننام عند وديان
رفع يده على وجهها وقال:لافيه نوم ولافيه سهر ، بترجعين معايّ لـ بيتنا
هزت راسها بالنفي وقالت:عـّز تكفى بس أسهر مع البنات
سكت عز يناظرها بإبتسامه وقالت:أعترف لك بحاجه؟
هز راسه وكملت:اصلا أنا الغلطانه مو إنت ، بس تعرف يعني دلع البنوتات كيف ، آسفه
ناظرته ساكت وقالت:عـّز قول شي لاتسكت والله تأنيب الضمير يلعب بداخلي
ضحك عز يناظرها وقال:أنا آسف ياضيّ أقماري وأنا الغلطان ولاتزعلين
إبتسمت وكمل:بس دلع البنوتات مايليق إلا عليك ياوصايف ، تعبتي قلبي بهالدلع
ناظرته وصايف ومسكت أطراف شعرها بتوتر وكمل عز:أسهري مع البنات ومتى مابغيتي تروحين أرسلي ليّ
هزت راسها ومشى يتركها ووقف من سمعها تناديه:عـّز
لف عليها وقال:سمّي
تقدمت له ورفعت نفسها تُقَبّل خده وإبتسم عز وقال:ضاعت علومي
ضحكت وصايف وإبتسم عز من ضحكتها وقال:رضى قلبي كله على طرف ضحكتك
نطقت وصايف بهدوء:طيب الحين توصيّ؟
شافته ساكت ومشت تتركه ووقفت من سحبها وقال:طيب أنا ماقلت لك إني ما أوصيّ بشي
عقدت حواجبها تناظره وهمس:بوصيك بشي
رفعت يدها على كتفه وقالت:وش؟
قرب منها وحاوط خصّرها وقال:تسمحين ليّ؟
همست بإرتباك:أسمح بـ وش؟
رفع يده لشعرها وقال:قولي أسمح لك يا عز وبس
سكتت تناظره وقال:قولي
نزلت يدها من كتفه وقالت:أسمح لك؟بوش أنطق أخلصن
قاطعها من أنحنى يُقَبّل عُنَقَهَا
-
عند البنات
-
وصال:وين وصايف كل ذا حمام؟"يكرم القارئ"
بيان:يازينكم مصدقين أنها بالحمام؟تراها عند حبيب القلب
وليف:خلوها تتونس معاه
بدور:ايي ايي تتونس
دخلت عليهم وصايف وقالت وجدان:
وين كنتي؟
وصايف:بالحمام"يكرم القارئ"
وجدان:عساه أعجبك ياضيّ الأقمار
سكنت ملامح وصايف وضحكت وجدان وهمست لها:لحقتكم
وصايف:بلا قلة أدببب
وديان:مواليف بسابع حلم
لفوا كلهم على مواليف وضحكوا البنات وقالت مواليف:يالله يالراحه الله يسعد نياف
ام يوسف:ناديه ياوديان ماشفته صارلي أسبوعين عنه
وديان:أبشري
وقفت وديان تنادي نياف:نياففف
جاها نياف وقال:وش صاير
وديان:يبونك خالاتي داخل
نياف:والبنات؟
وديان:تغطوا
مشى نياف يدخل معاها وقالت ام يوسف:
ياهلا لين مايبقى هلا
ناظرتها وصايف بصدمه وضحكت وجدان وهمست لها:أنا وخاله لحقناتس
تنهدت وصايف ولفت تناظر نياف وهو يسلم على خالاته
لف نياف على ام ذياب وأنحنى يقبل راسها وقال:وش أخبارتس يا دنيتي؟
إبتسموا كل اللي بالمجلس ونزلت دموع ام ذياب وقال نياف:ليه الدموع ليه تبكين
جلس نياف عند رجولها وقالت وهي تبوس خده:والحال بعد شوفتك سرور  ترد الروح لو انها دقايق
إبتسم نياف وقال:ياجعلني قبلتس يادنيتي
وجدان:ياليتني نياف والكل يحبني مثل كذا
نياف:إنتي بذات كثيره على قلوب الناس يكفيتس قلب واحد
وجدان:نياف لو سمحت لاتقول كذا
نياف:شي ثاني أستاذه وجدان؟
وجدان:سلّم ليّ على الحبيب
ضحك نياف وقال:تعالوا أجلسوا معانا برا
ام يوسف:بس أسمع أطرد عز
نياف:ليه
ام يوسف:نخاف يرحب فينا ونستحي
عقد نياف حواجبه بعدم فهم وقالت وجدان:
غريبه يانياف مافهمت؟تقصد أنه يرحب فينا لين نستحي - أشرت على وصايف -
نياف:فهمت فهمتت ، لا أبد أبشروبي بطرده دامه يخليكم تستحون
وصايف:نيافففف
ضحك نياف وقال:نسينا أنه زوجتس ياوصايف بس أعذريني ما أبيّ خاله جواهر تستحي
وصايف:ماتستحي على وجهك
نياف:أمشوا أمشوا
مشوا معاه وكانت جنبه وديان وهو محاوط أكتافها
معاذ:جايب حبايبك وجاي؟
نياف:جايب الدنيا أفسحوا الطريق
عز:حياكم حياكم
نياف:إنت مطرود
عز:وش سويت
نياف:ليه تخليّ خاله جواهر تستحي؟
عز:أنا؟والله ماليّ دخل شكلها ملخبطه
ام يوسف:لالا ماني ملخبطه
ضحك نياف وهمس لعز:بشويش على بنيتنا
لاتحترقين
ناظره عز بصدمه وقال:وش دراك
نياف:المباحث علموني
وأشر على وجدان وهمس له من جديد:
ترا بيتي محترم مافيه هالحركات يالمتزوج
عز:نياففف أسكتتت
وصال:نيافففف ناظرر وجهه
عز:والله خسارة الألفين اللي دفعتهم لك ياوصال
وصال:ذليتني عليهم ذللل
فيصل:وين ام نياف؟
وليف:داخل نايمه
ناظرها نياف وتلاقت عيون "العشاق"
وتنهد نياف يصد عنها وقالت وجدان:نياف
نياف:هلا
وجدان:أبيّ أسمع منك أغنية ياحنينه ، من زمان ماسمعت صوتك
نياف:أبشري
وديان:صوته حلو؟
وصايف:فوق الخيال
وديان:ماقد قال ليّ
بدور:توكم بمرحلة تعارف
نياف:تراها أختي مهيب زوجتي عشان أتعرف عليها ، أعرفها وأعرف وش تحب ووش تكره
وجدان:كنسل الأغنيه وقول وش تحب وديان ووش تكره
إبتسم نياف وحاوط أكتاف وديان اللي جالسه جنبه وقال:نبدا باللي تكرههم ، تكره الكذب ، وتكره الورد لأنها تقول يجرح ،
قاطعته وجدان من قالت:لالا يالطيب قول وش تكره من أكل
نياف:طيب أنتظري أتذكر
وديان:نسيتتتهم؟
ضحك نياف وقال:لا ، ماتحب الكرز لأنها تتحسس منه ، وماتحب الرمان لأنه كان سبب في أختناقها وهي صغيره ، وماتحب الأناناس لأن عندها منه حساسيه بالدرجة الأولى
وديان بإبتسامه:طيب وش أحب؟
نياف:أول شي تحبيني أنا طبعا ، وتحبين كل الموجودين هنا ماعاد العيال ، نجي للمهم ،
أقول كل اللي تحبينه من أكل وأشياء ثانيه ،
أول شي تحبين تسمعين لـ عبدالمجيد عبدالله ، وبرضو تحبين الشاهي ، وتحبين الفراوله ، وتحبين البزارين ، وتحبين الحياة ، وتحبين كل شي حولتس وماتكرهين إلا القليل
وجدان:لو سمحتي وديان ، تراتس من جيتي سرقتي أخو قلبي مني ما أسمح بهالشي
معاذ:الله أكبر
وجدان:لو سمحت معاذ أسكت شوي بتناقش مع نياف
نياف:أفاا ، وأنا أقدر أنسى وجدانوه؟
وجدان:أنقلع بس ، يالعزوبي
نياف:ليه إنتي متزوجه؟
وجدان:لا توي ليه ناوي تزوجني؟
نياف:إذا أبوتس وافق أزهلي
وجدان:أمزح لاتصدق مابيّ أتزوج
ام فهد:وش زينه الزواج ياحلوه بس
وصال:متزوجه عمي عبدالله ياخاله أكيدد يازينه ، والله لو عندتس ولد غير فهيد غير أتزوجه
ام فهد:ليه ناقصة عقل أنا أزوج ولدي وحده لسانها هذا طوله؟
وصال:أصير مؤدبه لعيونه
ام فهد:تبين فهيد خذيه
وصال:لا ولدتس الشيب بوجهه كثير اللي يشوفني جنبه يحسبني بنته
ام فهد:وإنتي صادقه هالمشيب
رُوح:نياف
ناظرها نياف وقالت:بتتزوج ورد؟
ناظرتها وليف بصدمه وقال نياف:ورد؟ذيك بنت غريب؟
رُوح:أخت دودي
تنهد نياف وقال:رُوح قفلي الموضوع بالله
سلمان:نياف متى بتداوم
نياف:بكره ان شاء الله
لف معاذ لوليف وقال:وإنتي بتداومين؟
وليف:لا قدمت أستقالتي
ناظروها الكل بصدمه وقال فيصل:ايش ايش
وليف:كانت رغبة أبوي وشرطه الوحيد عشان يخليني أرجع عند أمي ورحت وقدمت أستقالتي وقبلوها
نياف:وعلى أيّ أساس تقدمين أستقاله؟
ناظرته وليف وسكت نياف "لأنه نسيّ أنهم الحين مو لبعض ولاهي حليلته"
معاذ:ايوه يالشيخ نياف
نياف:لاتفهموني غلط ، أنا أقصد
ضحكت ام يوسف وقالت:فهمناك يانياف ، تقصد ليه تقدمها وهي تعبت بالدراسه
أرتاح نياف وناظر خالته اللي غمزت له وقال:
بالضبط ذا اللي أقصده وبعدين وليف بنت خالتي ، وإذا أحتاجت شي بساعدها
غزلان:تصدقون من زمان ماتجمعنا كذا
نياف:جلسة عزابيه وش زينها
وصال:لالا فيه ناس متزوجه ، عندك خالاتي كلهم معاد غزلان ، وعندك وصايف والشايب ذا ، وعندك بيان ويوسف ، ومواليف وفيصل
نياف:يلا عقبالتس
وصال:آمييينن ، ويجيني طوييل ومعضل وحلو ويكون توه بنهاية العشرين ، ومتوظف ويدلعني دلع ماصار ولا أستوى ، ولايعيشني أمييييييره حتى الشوكه ما أمسكها من الدلع وكل يومين يهديني شي غالي وكل شهر سفره
سلمان:وماتبين عنده بنك وشركه؟
وصال:إلا ، هذولا الأساس ويكون مهتم فيني ويحبني نفس حب الشايب لـ وصايف
عز:أعوذبالله من الشيطان الرجيم ، وش تبين معلقه عليّ إنتي دوري غيري
وصال:حبيتك الصراحه شسوي بعد
عز:ناظري نياف عزوبي هو ومعاذ وسلوم
وصال:لانياف مستعمل ما أبيه ومعاذ يحب
صرخ سلمان بخرشه من ناظرته وقال: لاتكفيننن لا
وصال:سلوممم
سلمان بهمس:الله ياخذك ياعز
وصال:إنت لاتحب ولاتم أستخدامك شرايك تصير قدوتي بالحياة يا أحلى سلوم؟
سلمان:ومن قالتس إني ما أحب؟أنا عاشقق
وصال:أعرف تقول كذا عشان تصرفني بس مستحيلل ياولد الخال
مضاوي:بعدي عن ولدي
وصال:لالو سمحتي أخذته وصارلي ، صار يخصني
سلمان:لايمه
وصال:تصدق سلوم ، سبحان الله حتى نظرة عيونك تقول إنك منتب كفو أحد يعطيك وجه يالخايس يالسامج ياللي ماتستحي تبيعني أنا وصال الحلوه الدلوعه المزيونه وتسحب عليّ قدام أهلي وأهلك؟صدق أنك خسيس
سلمان:والله من الكذب من قال إنتس حلوه؟ومزيونه
وصال:أنا قلت كذا
سلمان:أنطمي بس حولي على المستعمل نياف
نياف:وشو هييه ، شايفيني أثاث؟أنطموا بس
وصال:نياف تزوج مره ثانيه عشان ماتصير مستعمل ، ترا الناس ماتحب الشي المستعمل
نياف:بعد؟شي ثاني؟أخطبي ليّ
وصال:صدققق
نياف:أنطمي بس ، تقول وحده من الجاسوسات إنتي وهالعبايه ذي
"كانت عبايتها خضراء"
وصال:شعرفك إنت هذي موضه
نياف:أقعددد يالجاسوسه "سام"بنت غابي
ضحكوا كل الموجودين وقالت وصال:أنقلع نيافففففف
نياف:أبشري بس متى بتروحين عملية سريه؟
وصال:أنطم
نياف:شعندتس زعلتي ، قاعدين نطقطق طبيعي يابنت الخاله
وصال:مازعلت ياعنتر بن شداد
نياف:مسويه تذبين؟صارلتس ساعتين تدورين ذبه ماتضحك
وصال ناظرتهم وضحكوا كلهم وقال نياف:
لاتزعلين وصوله أمزح معاتس
لفت وصال على وليف وقالت:أرجعي له تكفين ، تراه صاير غثيث
معاذ:طيب ياوصال شرايتس تسكتين ولتس مني عشر آلاف
وصال:موافقه
دق جوال ام يوسف وردت وحطت جوالها سبيكر:هلا ام حامد
ام حامد:اخبارك يا ام يوسف؟
ام يوسف:الحمدلله اخبارك أنتي
ام حامد:بخير بخير ، بغيتك بموضوع
ام يوسف:عسى خير
ام حامد:خير خير ، بس أنا دقيت أقولك إني بغيت بنتك وليف لولدي حامد
غص نياف بالقهوه اللي كان يشربها ولفوا عليه كلهم وأمتلت عيون وليف دموع تناظره
ام حامد:ام يوسف
ام يوسف:موجوده موجوده ، والله مدري وش اقولتس يا ام حامد ، لكن رأي البنت أهم
قفلت ام يوسف من ام حامد وقالت وصال:
معاذ خل العشر آلاف لك بتكلم ، خير ذي من تبي؟وين عايشه؟مريضه؟متخلفه
سكتت وصال من شافت نظرات الكل تتوجه لـ نياف
تنحنح فيصل من شاف مواليف جايه وشايله ولدها وقال:هلا هلا بـ ولدي هلا
تنهد نياف يصد عنهم كلهم وطلع جواله
يناظر رسالة تالين:نياف ، إذا تقدر بكره تعال بدري فيه مريض ماعرفت ايش يبغى
إبتسم نياف يرد عليها:أبشري بجي بدري بكره
قفل جواله وقال:ماودكم تتعشون؟
ام وصايف:بعد ماتغنيّ لنا راح نتعشى
نياف:ابد أبشري بس تعشوا أول وبعد العشاء أجيب العود وأغني لكم
وقفت وديان وقالت:أجيبه هنا ولا أخليه داخل
ام ذياب:جيبيه هنا ناكل كلنا مع بعض
وقف نياف جنب وديان وقال:أمشي أمشي وأنا أخوتس
دخلت وديان المطبخ وناظرت نياف اللي يطلع الصحون وقالت:نياف
نياف:سمّي
وديان:تضايقت عشانها أنخطبت؟
نياف:لا ، بنت خالتي وأتمنى لها كل خير ليه أتضايق عشانها أنخطبت؟الله يوفقها بحياتها
غزلان من وراه:تكذب على من؟تحبها وتبيها بس باسم واقف بوجهك
لف عليها نياف وكملت:نياف صحصح شوي شوف الدنيا حولك ، ناظرنا كلنا ، وليف أنخطبت نياف بتروح منك وبيربح باسم ، بيحرق قلبك هو وحامد بيحرقونه
نياف:ليه ماتفهمون؟والله ماعاد باقي ليّ بهالدنيا لاحُب ولا شي ، أنا أنسان طاب خاطره طاب ، تعبت ليه ماتصدقون إني تعبت ، هم بيحرقوني؟ فاهمين غلط ،  أنا اللي بحرقهم أنا اللي بحرقهم بخليهم يتمنون الموت ، بس عشان كم ضربه بخليهم ينزفون دم
ام يوسف:بعيده عليك يانياف ، وليف تحبك وإنت تحبها ، ونظراتكم توضح هالشي ، لاتظلم نفسك وتظلمها تكفى يانياف ، بنتي الوحيده هذي وقلبها متعلق فيك ، وأبوها وعارفته بيجبر وليف على حامد
سكت نياف وأخذ الصحون ومشى يطلع برا وناظر وليف اللي تناظره
تنهد نياف وقال:غزلان تبيتس داخل
مواليف:غزلان تبي من؟
نياف:وليف
"ناظرته وليف وهي متعوده يضم "ياء التملك"لـ أسمها ماتعودت تسمعه منه بدون "ياء التملك"نزف داخلها نزف حنين ، نزف شوق ونزف تعب من حالهم "
-
انا بـاادي رجـمٍ ععذابٍ على راعـيه
وحطيت مبدا الرجم فـي شبتي سنه
ويازوع قلبـي زوعة الطيـر من راعيه
تصـرم سبوقـه والهبـاايب ، تـقفـنه
عسى من حداني عن وليفي وانا باغيه
تحده ذننـوبه مايجـي بـاارد الجنه
مغيـر اتسنح كل يـوممٍ وانا واطـيه
على ضامر السرجوف جريت بـ الونه
-
غزلان:وليف تعالي معايّ فوق وإنتي دودي ناديّ نياف وقولي له تعال معايّ طلع العصير
وديان:تم
وليف:وش صاير
سحبتها غزلان لـ غرفة نياف"اللي كانت غرفتهم"
وليف:غزلان وش فيه ليه تدخلين غرفة الولد كذا؟
غزلان:ماعاده ولد وليفف إنتي تحبينه وهو يحبتس ليه ماتفهمين
وليف:طيب؟
غزلان:وليييفف
لفت غزلان من سمعت صوت نياف وهو يقول:وديان ياوديان وشو العصير اللي فوق بغرفتي
طلعت غزلان من الغرفه وسحبت المفتاح معاها وقالت:أنا قلت لها ، تعال أدخل أبيك
دخل معاها نياف وشاف وليف قدامه وقال:
شسالفه؟ليه داخلين غرفتي
غزلان:أبد أشتقنا للغرفه
نياف:مافهمت
غزلان:بتفهم الحين
وطلعت تسكر الباب عليهم بالمفتاح ومشت تتركهم هي ووديان
نياف:غزلان أفتحي الباب لاتتصفقين
ضرب الباب أكثر من مره ولانفع وجلس على الأرض يناظر الفراغ قدامه
ناظرها بعد مده وشافها تناظره وهمس بجمله وحده:ليه ياوليفي؟
نزلت دموعها وأرتفع صوت نياف:قولي ليّ ليييه سويتي فيني كذا؟ليه؟وش سويت لتس ياوليف وش سويت؟ليه وقعتي على ورقه جابها لتس أبوتس وإنتي تعرفين وش مكتوب فيها ! ليه ياوليف ليه ، ليه خليتيني أشقى حياتي كلها وبالأخير تركتيني؟
وقف وهو يكسر كل شي حوله ويقول:
أنا بفهمم شي واحد ليه تصدقين أبوتس؟
ليه تصدقينه ليه؟
وقفت وليف قدامه وقالت:لأني تعبت ، تعبت ماتفهم؟تعبت نياف أنا تعبت أبوي ضربني بس عشان أوقع على ورقة طلاقنا وأوهمك إني موافقه على الطلاق أنا ماوافقت ماوافقتتتت ، أوهمك عمك باسم اللي تشوفه قدوه؟أوهمك وصدقته صح؟
ليه توصلنا للحاله ذي يانياف ليييه؟
أقعد بالمستشفى لـ أسابيع وإنت تدري ولاجيتيني ليييه؟ماكنت حليلتك وقتها؟يوسف ماقالك إنه جاني وأنا أنزف؟وش صار يانياف وش صار؟ليييه ماجيتيني وأنا بحتاجك؟كنت كل شي بحياتك كل شي ، كنت أفراحك وأحلامك كلها أنا وكان الهوى في دنيتك كله أنا يانياف؟ وش تغير
نياف:تغييير كل شي تغير ، تغير لأنتس بتتزوجين حامد ، تغير كل شي من وقعتي على ورقة طلاقنا ياوليف تغير كل شي
-قرب منها يهمس- مثل ماقدرتي تعيشين الثلاث أشهر عيشي باقي حياتس يابنت الخاله
دفعته وليف وقالت:ماتفهم إنت ماتفهم؟
نياففف أفهمنيي أفهمنييي ، ما أبيّ أحد غيرك بدنيتي ما أبيّ ، أنا عشقتك وهويتك وعشت فيك يانياف لاتسوي فيني كذا
ناظرها نياف وتوجه لـ غرفة الملابس وطلع هداياه اللي منها كلهم وقال:ماتبيني أسوي كذا -رمى الهدايا بالارض وصرخ-هاه شوفي شسويت رميت كل ذكرياتس ورايّ ولا عادتس شي بحياتي كنتي شريكة حياتي بس ماراح ترجعين تكونين شريكة حياتي دامتس بتتزوجين حامد
ناظرته وليف وصرخت بعلو صوتها وهي تكسر الأغراض وقالت وهي تضربه:ليه ماتفهم نياف ليه؟قلت لك أبيك أبيك الله يلعنك أبيك ، تعبت نياف تعبت والله تعبت لاتتعبني زياده
ناظرها نياف وشاف حالتها وسكت وكملت وليف بصراخ:لو كرهتني أنا ماكرهتك أنا كل يوم حبي لك يزيد -قربت منه تهمس-
عادي تضمني؟بس ش
قاطعها من سحبها لحضنه وصرخت وهي بحضنه وراسها على صدره وقالت:نياف لاتتركني ماليّ غيرك والله
بّعد عنها نياف وقال:أنتبهي لنفستس أنا مانيّ دايم لأحد
ناظرته وليف بإستغراب وكمل نياف:كنتي بنت خالتي ولازلتي بنت خالتي ياوليف ، بتكونين زوجة واحد ثاني ، الله يوفقتس بحياتس يابنت الخاله
وليف:نياف
ناظرها نياف وقال:أعتبريه حضن وداع ، أنا هويت وتعذبت بحياتي ، هويت هوى نجد العذيه بسماك ياوليف بس محد عطاني مرادي بالدنيا لا إنتي ولا غيرتس ، مابلغت مرادي ومناي وغايتي ، ياما كنتي غايتي بين المخاليق ومناي ومرادي ، بس أبوتس غير كل شي ياوليف غير حياتي غير حُبي لتس ، كنتي دنيتي ودنياي كنتي مُلهمة حياتي بس أبوتس السبب ، بتعاتبين أحد عاتبي أبوتس ، لأني أنا تعبت وأنا أسمع غيري ومحد يسمعني ، أنا نياف وإنتي وليف بنت خالتي
وليف بهمس:متى صرت قاسي
ضحك نياف بسخريه وقال:مانيّ قاسي ، إنتوا السبب بكل شي صارلي
لف على الباب من فتحته غزلان وقال:أخر مره تسوين هالحركات ياغزلان
ومشى يتركهم ونزل تحت
-
تحت بالحوش
-
كانوا يدرون عن خطة غزلان ويسمعون صراخ وليف ونياف
جاء نياف وجلس بينهم وقال معاذ:نياف
ناظره نياف وقال معاذ:شرايك نسافر الطايف
نياف:متى تبي؟
معاذ:بعد يومين ، كلنا نروح
نياف:خلص تم
وديان:نروح كلنا؟
نياف:ايوه
وجدان:متكسرين تكفون أجلوها
معاذ:يومين نغير جو ونجي
فيصل:وام نياف ماتروح تجلس هنا
مواليف:مو على كيفك
فيصل:توتس والده وين تروحين
مواليف:فيصللل
ضحك فيصل وقال فهد:إذا مواليف ماراح فيصل مايروح
مواليف:تستاهل يافيصل
فيصل:أعذريني يا أم نياف ما نعيدها لا أنا ولا ولدي
إبتسمت مواليف وقال نياف:طياره ولاسياره؟
سلمان:سياره
نياف:وشاليه طبعاً
ام وصايف:متى بتغني لنا يانياف؟
نياف:الحين لو ودتس ، العود هنا
ام وصايف:غن لنا الحين
وجدان:نختار ولا تختار إنت
نياف:لا أنا بختار
معاذ:أخلص علينا
مسك نياف العود وبدا يغني:
جاني كلام إني معك كنت كذاب واني محملك الشقى والأسيه واني ابيع الود وابيع الأحباب وش باقي ما قلته حبيبي عليه ظالم واخاف عليك من يوم وحساب ياخي حرام اللي تسويه فيه ارفع إيديني طالبٍ رب الأرباب واتذكر العشرة وانزل إيديه ، شمت فينا اغراب وابعاد واقراب خليت ذا يحكي وهذي وذيه اهديلك البسمة وتهديني انياب ليش الوفاء في شرع مثلك خطيه الله بلاك بناس تفرش لك اهداب والله بلاني بناس ماهي وفيه ياليت عندي شوي من غدر الأصحاب ياليت عندك من وفايا شويه
معاذ ناظر وجدان وقال:كذاب ماحبني حب يتسلى بي
ناظره نياف وقال:الحب لو هو تسلي يوضح يامعاذ ولو مو تسلي مايوضح الحب بالقلب حتى تسلى فيك هالشخص تلقاه يحبك
وجدان:وإذا ماهوب تسلي بس الشخص تعب كيف يوضح للشخص الثاني؟
نياف:لايوضح ، يبرر ، والثاني يتفهم الوضع
وجدان:عاد أنا اللي عندي حمير مايفهمون حتى لو قلت إني تعبت
وصال:من تقصدين إنتي
وجدان:الكل  ، ماعاد أمي وخاله جواهر وأصايل وجده مناير
بدور:إنتي تقصدين شخص واحد؟
وجدان:لا
نياف:عطوني السميّ بالله
مواليف:أمسكه أجل
أخذه نياف منها وقال:ياهلا ترحيبه كلها لك يبو العيون السود
فيصل:الله الله
نياف:وياهلا ويامرحبا بالسميّ نياف
سلمان:بسميّ ولدي نياف عشان بس ترحب فيه
نياف:سمه اللي ودك وأرحب فيه
ام ذياب:غن بسميك يانياف
نياف بضحكه:ياحلوه ويازينه سحرني حلا عينه سحرني حلا عينه
صفقوا كل الموجودين وكمل نياف وهو كاتم الضحكه:سحرني حلا عينه سحرني حلا عينه
ويازينه ويازينه
وقف عز وهو يضحك وقال:جعلها دايمه عليكم جميع
ناظرته وصايف وكمل عز:يلا ياوصايف مشينا
نياف:وين تو الوقت
عز:متزوجين حنا يالعزوبي
نياف:نسييت إنك تنام بدري يالدجاجه
وقفت وصايف مع عز ومشوا يطلعون من البيت وناظرته وصايف وقالت:ليه؟
ناظرها وقال:أركبي نتفاهم بالبيت
ركبت وصايف وصفقت باب السياره بقوه وضحك عز وقال:ترا هالحركه ماتنرفزني دوري غيرها
وصايف:أسكت بالله
ناظرها عز ومد يده يشغل أغنيه وصدت وصايف تناظر الطريق
-
بيت نياف
-
كان واقف عند الباب يودعهم
معاذ:توصيّ؟
نياف:سلامتك ياولد الخاله
معاذ:تسلم تسلم
ومشى يطلع معاذ ولف على غزلان الواقفه تناظره وقال:وش بلاتس؟
غزلان:مدري
فتح نياف يدينه وقال:تعالي تعالي
تقدمت غزلان تحضنه وقالت:أنتبه لنفسك ياحبيبي
نياف:أنتبهي على نفستس وأنتبهي على أمي وإذا أحتجتوا أيّ شي كلميني
غزلان:تمام
بّعدت عنه ومشت تطلع وأشر لهم نياف يمشون وضحك من فتحت رُوح الشباك تغني له:نياف نيوفي نياف نيوفي
صفق لها نياف وقال:وقفوا وقفوا
وقفوا كل السيارات وتوجه لها نياف وشالها وقال:شغلوا شي نرقص عليه أنا ورُوحي
معاذ:أرقص أرقص
ضحك نياف من شغل معاذ
"قايد الغزلان"
لفحت رُوح بشعرها وضحك نياف وقال:
هلا هلا
نزلوا العيال من السيارات يشاركونه الرقص
وقال يوسف:صرنا مهبل
نياف:ماعليه ماعليه
معاذ:هيضني لعب قايد الغزلان
وقفوا كل العيال من تغيرت الاغنيه إلى
"قفلوا باب المشاريه"
نياف:يسعدد جوتس ياوجدان
رفع نياف رُوح على كتفه وقال:ايوه يارُوحي ايوه
صفر معاذ وهو يناظر رُوح وقال:ايوه ايوه
هزت رُوح كتوفها وضحكوا العيال لأنها أخذت هالعاده من "نياف"
فيصل:دقيقه بنشغل غيرها
ومشى يغيرها ويشغل"أنا وأنتَ لوحدينا"
فهد:وش جونا ياعيال؟
سلمان:تصدق مدري
نياف:أسمعوا أسمعوا
معاذ:ياطالع الطايف قلبي عليك خايف ياطالع الطايف
صفقوا العيال وقالت ام ذياب:ياطالعين الطايف نبي بيوتنا اخلصوا
نزل نياف رُوح وقال بصوت عالي:أستودعكم الله
-
بيت وصايف وعز
-
عز:وصايف
وصايف:لو سمحت أسكت مابيّ أتكلم معاك
عز:بتكلم
وصايف:تكلم مع الجدار ياولد سعد
عز:طيب قولي ليّ وش مضايقك
وصايف:اللي مضايقني إنت ، تطلعنا بدري من هناك ليه؟عـّز
قاطعها عز من نطق:عشاني قلت لك قومي بنروح؟تستهبلين وصايف؟
وصايف:مو شغلك
عز:لاشغلي
جلست وصايف على الكنبه وجلس جنبها وهمس:آسف حتى لو ماكنت غلطان آسف
تكتفت وصايف وصدت تناظر الفراغ ونزلت دموعها وناظرها عز بصدمه وقال:ليه الدموع ليه
ماردت عليه وصايف وقال عز:وصايف
وصايف وهي تمسح دموعها:مابيّ أحسسك إنك غلطان وإنت مو غلطان ، لاتعتذر ليّ
أعتذر لنفسك لأنك تزوجتني وأنا ما أتحمل أيّ شي
عز:والله ياوصايف لو بعتذر لنفسي كان أعتذرت لكن ، على حياتي قبلك على عدم معرفتي بك من زمان ، إنتي وصايف الزّين ياوصايف
لفت عليه وإبتسمت بوسط دموعها وقال:
للحين زعلانه عشاني أخذتي بدري؟
هزت راسها بالنفي ووقفت وقالت:بس للأسف إنك بتنام بالصاله اليوم
عقد حواجبها بإستغراب وقال:ليه؟
مشت تتركه وراها جالس بالصاله وأخذت بطانيه توديها له
عز:تستهبلين؟
هزت راسها بالنفي وقال:هين ياوصايف هين
جلست جنبه وصايف وقالت:وش تبي فيلم؟
ناظرها عز بـ إبتسامه وقال:اللي ودك فيك
ناظرته وقالت:أختار لين أغير ملابسي وأجي أتابع معاك
وقفت تمشي لغرفة الملابس ولبست توب أسود وبنطلون أسود وتركت شعرها على طبيعته
ناظرها عز وقال:تعالي
قربت منه وصايف وجلست جنبه وقال:
أقربيّ
ناظرته وصايف وشافته يأشر لها تنسدح على صدره وقربت منه وحاوط أكتافها وقالت:
يدك حاره !
رفع يده يلعب بشعرها وقال:تأثيرك عليها
يكفي
وصايف:أسكت شوي برتاح
شدّ على أكتافها وقال:ويني عنك من زمان؟
تنهدت وصايف بخفه وهي تناظر الفيلم وأنحنى عز يُقَبّل كتفها وهمست:عـّز
تنهد عز ورفعت راسها وصايف تناظره وقالت:مُمكن اسألك؟
هز راسه بالإيجاب وقالت:وش الفرق بين يمكن و مُمكن
ضحك عز وقال:الفرق إنك تفتحين سالفه مثل الناس ياضيّ أقماري
وصايف:سولف الفيلم ماعجبني
عز:أسولف عن حُبي لك؟ولا أسكت؟
وصايف:عن أيّ شي أبي أسمع سوالفك
عز:تعرفين شعور الحُب اللي إذا شفتي شخص ينبض له قلبك؟كان هذا شعوري لك ياوصايف ، كنتي شي ماهوب عادي ، وش تبين أسوي قولي ما أشوف إلا إنتي حولي أطلبي منيّ تنوليّ وش أبي دامك قباليّ؟زان عمري وزاان حالي ، أحُبّكْ محبه عاشق ما يحب أثنين عطاك المحبه والقصيد وقوافيه
إبتسمت وصايف بهدوء وقالت:كييوت
ضحك عز يناظرها وقالت:وش فيك؟
عز:وشو كيوت ردي رد معقول ياوصايف !
وصايف:كيف أرد رد معقول؟
عز:مدري فكري
ناظرته وصايف ورفعت نفسها تبوس خده لكنه غدر فيها من لف يُقَبّلَهَا
-
بيت ام ذياب
-
ام يوسف:وشلون يعني موافقه؟
وليف:موافقه يعني موافقه على حامد
غزلان:تستهبلين؟
وليف:لا
غزلان:ونياف؟
وليف:نياف يكفي صراخه عليّ ويكفي أنه حملني كل شي
ام يوسف:وليف
وليف:قالي أني بضل بنت خالته ولابيرجع ليّ ماهو مصدق أن مالي دخل بشي والله تعبت بس ماهو مصدقني ، قالي أن أبوي هو السبب وأنا ما ألومه اللي سواه أبوي فيه ماهوب شوي ، بس حتى نياف المفروض مايلومني
ام يوسف:نياف وأعرفه ياوليف ، قاعد يجبر نفسه مايفكر فيتس ويجبر نفسه يصير قاسيّ عليتس
وليف:محد قاله يصير قاسيّ ، وقولي لأم حامد أني موافقه
ووقفت وليف تطلع من الغرفه
غزلان:يعاندون بعض ذولا
ام يوسف:الله يستر بس
غزلان:لاتقولين لـ ام حامد أنها موافقه
ام يوسف:ماني قايله لهم ، وهذي التيسه خليها كذا تعاند التيس نياف
ضحكت غزلان وقالت ام يوسف:غثوني ، وغثني باسم جعله المغص
.......................................
ياطالع الطايف قلبي عليك خايف ، تجهزوا ورانا خط سفر
الكاتبه:منيره آل عبدالعزيز💙.