مع نسمات الشتاء والامطار والهواء البارد والغيوم كان واقف بنص بيته في ديرة آل نجد تحت المطر يتأمله
غزلان:وش تسوي انت هنا
نياف:ماتشوفين واقف تحت المطر
غزلان:تدري اول مره اشوف وجه ضايق وهو تحت المطر
نياف:بس يحق لي اتضايق
غزلان:ماضنتي يحق لك قول شفيك
نياف:تذكرين يوم يمه قالت وفاة امك وابوك يانياف كانت بأيام مطر والحين واقف تحت المطر لاني بس اذكرهم
غزلان:طيب انت عارف ان موتهم قضاء وقدر وتعرف كل شي عنهم ليه تضايق حالك؟
نياف:مو بيدي الحين اشوف الكل مع ابوه وامه وقاعد يسولف الا انا مااروح لبوي وامي الابالعيد ويوم الجمعه ازورهم
غزلان:هذا انت وحتى وهم ميتين ماقطعتهم وش مستني من العالم اجل
نياف:مو مستني شي بس حاس بنقص كبير لانهم مو جنبي عارف انكم اهلي وانتي اختي وخالتي بس ياغزلان الام والاب محد يعوضهم
غزلان ك تغيير للموضوع:طيب شرايك ندخل داخل امي مسويه ذاك الفطور اللي يحبه قلبك
نياف:يلوموني فيتس وبيمه
دخلو داخل وشافتهم ام ذياب
ام ذياب:وش تسوي تحت المطر انت الحين تمرض
نياف:يايمه قلت اتونس واوقف شوي تحت المطر بعدين جت غزلان وسحبتني داخل
ام ذياب:وانتي ماتقولين اعلم امي عليه الحين يمرض الولد صدق انتس ماتستحين
غزلان:يمه شفيتس حولتي علي
ام ذياب:لاانتس خالته يالعوبا تحسبيني امس ماشفتكم انتي وياه وانتم طالعين اخر الليول
غزلان:ماعليتس مني ومنه يمه
قعدو ياكلون
نياف:الايمه صدق خالاتي بيجون
ام ذياب:اي
ابو ذياب:اجل يلا يا نياف نروح لمجلس الشياب
غزلان:يبه كان خليت نياف عندي
ابو ذياب:عشان يصير مثل امس وتروحون السوق ومحدن داري عنكم نياف رجله على رجلي
غزلان:بس يبه
ام ذياب:اسكتي يالعوبا خليهم يروحون عشان نزين البيت انا وانتي
راحو ابو ذياب ونياف تحت حلطمت غزلان
غزلان:الله اكبر عليكم ترا كلهن جواهر واصايل وغدير وعيالهم
ام ذياب:الا صدق امس دقت علي ام سعود جدة نياف بيجون الديره بعد كم اسبوع
غزلان:شتبي ذي تركوه وهو صغير وجاهم الغلا الحين والله يايمه ياحسرتي على ولد اختي
ام ذياب:تهقين جايين عشان نياف؟
غزلان:مااتوقع لانهم قبل جو وهو صغير وطردناهم لانهم كانو بياخذونه
ام ذياب:اجل قومي نرتب البيت ونزين الحلا والقهوه لوجيه خواتس ورجالهن
قامت ام ذياب وغزلان يرتبون البيت ويسوون الحلا
خلصو ترتيب الساعه ٢:٠٠الظهر
غزلان:يمه انا بروح اتروش قبل لايجون البنات
ام ذياب:وطلعي ثوب لنياف توه دق علي جاي يغير ثوبه ويرجع
غزلان:ابشري
راحت غزلان تطلع ثوب لنياف وبعدها راحت تتروش
جاء نياف
ام ذياب:علامك طولت انت
نياف:يايمه الطريق بعيد من هنا لمجلس الشياب والسياره خليتها هنا و يبه قال بطلق رجولي خلها
ام ذياب:اجل خلك هنا عشان تضيف رجال خالاتك
نياف:ابشري
راح يغير ثوبه وجلس مع جدته
ام ذياب:علامك وجهك اصفر وخاطرك ضايق
نياف:يمه انتي وغزلان متفقين علي مافيني شي نياف الطبيعي
ام ذياب:نياف واعرفك اعرف وجهك اذا ضاق واعرف اللي بخاطرك
نياف ابتسم بضيق:يمه شرايتس تقولين قصة امي وهي صغيره
ام ذياب:والله اني داريه انك تذكرتها يانياف ليه تتضايق كذا ياوليدي هي عند اللي ارحم مني ومنك
نياف:يمه والله اني ماشفتهم ولااذكرهم مااعرف عنهم ولاشي حتى الصور اللي عندي لهم ماتكفي حتى القصص اللي تقولينها عنهم تخلي قلبي يوجعني كل يوم صحيح اني مااعرف عن ابوي شي الا ان اسمه سعود حمدان آل ناصر وماعنده الا اخو واخت وحده واسمهم سعد وذكرى وجدتي ام ابوي مها هذا اللي اعرفه عن ابوي واهله وامي القصص والكلام اللي تقولينه عنها يكفي اني اعرف انها كانت عنيده وتقولين اني طالع على عنادها وانها قاسيه شوي وفيني من قساها وانها كانت تتمنى اني اجي وتشوفني عريس بس هذاني شوفي انا جيت وهي راحت من كان عمري اربع سنين وابوي مثلها وتقولين لاتتذكرهم يانياف
ام ذياب:يانياف القضاء والقدر ماهو لابيدي ولابيدك الموضوع بيد ربي وربك ورب الكل مااقولك لاتتذكرهم يانياف تذكرهم وادعي لهم بالخير بس يانياف ياعين جدتك انت الحين لو امك وابوك عايشين وشافوك مابيقولون هذا ولدنا نياف هم يبون ولدهم قوي تدري ليه انا الحين اقولك قصص امك وابوك عشان تتذكرهم وتصير مثلهم وانت قوي وتقدر على كل شي
نياف:طيب شرايتس الحين تقولين قصه من قصصهم
ام ذياب:راسك يابس مايفهم بس بقول
قالت ام ذياب قصه وكانت تحت مسامع نياف
نياف:وين غزلان
ام ذياب:بغرفتها تتجهز للبنات
نياف:ام شوشه بتترتب
ام ذياب:هاه نياف اشوفك تتكلم على بنتي
نياف:يازينتس انتي ويازين بنتس
ام ذياب:روح روح شوفها يالكذاب
نياف:افداتس ياشيخه تفهميني
ام ذياب:اذا مافهمتك من يفهمك
نياف ابتسم وباس راسها وراح لغرفة غزلان
نياف:اقدر ادخل ياغزلاني؟
غزلان:ادخل ادخل
نياف:ايي تتزينين ياام شوشه
غزلان:نياف شتبي اخلص
نياف:مابي شي جاي عندتس ولا وماتبيني اجي عندتس
غزلان:تعال عندي بس اليوم اشوفك توطوط عندي ياويلك يانياف
نياف:شسويت حرام عليتس ترا يمه قالت لي متى ماتبي تدخل البيت ادخل يعني كيفي
غزلان: طيب البنات كبرو معادهم يطلعون
عليك
نياف:الله اكبر عليتس حسستيني اني جالسن بينتس وبينهم تراني حالي حال نفسي
غزلان:نشوف الحين يجي عشيرك ونشوف هبالكم
نياف:ياحبي له فصفص اشتقت له تدرين
غزلان:فيصلللل ولد اختي جواهر صار فصفص
نياف:سوالف بيني وبينه شتبين انتي
غزلان:واشتقت لرُوح بعد ولا سحبت عليها
نياف:الورعه ذي ماخذه حبكم كلكم
غزلان:نياف
نياف:لبيه ياغزلاني
غزلان:لاتقول كذا كنت بطردك
نياف:وتقولينها بوجهي بروح عند يمه اطلق
ــــــــــــــــــــــــــــــــ
عند بطلتنا
ــــــــــــــــــــــــــــــــ
يوسف:اخلصي علي ساعتين وانتي تضبين ملابس
وليف:يوسف ليه ماتتروح انا قلت لك اني بروح مع فيصل انت ميت واللي يروح معك بيصير مثلك
يوسف:مالت عليتس انتي وفيصل
وليف:ياطول لسانك
يوسف:طالع على اختي
وليف:انقلع انقلع بس
طلع يوسف من غرفتها وهو يضحك لانه رفع ضغطها
دق جوال وليف
وليف:هاه مواليف شعندك
مواليف: وجعاه تخيلي سحبو عليي ووصايف ماترد اتوقع مشت
وليف:خلص انتظريني انا وفيصل الحين بنحرك
مواليف:احبتس منقذتي
وليف:عشقي
قفلت مواليف وارسلت لوصايف
وليف:مشيتي ولاقلتي لي؟
وصايف:شسوي ابوي سحبنا فجأه وقال بنزلكم واسلم على نياف وعمي واحرك
وليف:يعني مابيضل؟
وصايف:مااتوقع الحين تخيلي اننا بالطريق وحر وقرف وعطش
وليف:بديتي حلطمه لو انتس منتظره اخذتس مع مواليف
وصايف:اما بتاخذينها
وليف:اي ومع فيصل بعد تخيلي الفله
وصايف:ليه ماقلتي كان وقفت بعز القوايل
وليف:عشان جده تقول تجمعن وبس ناقصكن غزلان
وصايف:اشتقت لها تخيلي انها مصوره نياف وهو يطقطق عليها وعلى شوشتها
وليف:ماشفت القروب بشوفه اذا وصلت يلا باي
وصايف:باي
وليف قفلت الجوال ولبست عبايتها وراحت لفيصل وحركو لبيت مواليف
وليف:ساعه كان طلعتي من زمان
مواليف:اكلتيني تعرفين توي اجهز ومن خرشة فهد حيل عصبي وبغى يضربني
وليف:ياكرهي له يقهر
مواليف:غثني تخيلي يقول كان جهزتي نفستس مع رُوح وانا بلشانه توي اجهز شنطتي وبدور وبيان ماسوو معاي ولا شي
وليف:يوه بيان ذي لو امسكها وربي انتفها لتس تنتيف
مواليف:ماعليتس منها
وكملو سوالف وماحسو بالطريق وفيصل ساكت ومتحمل
ــــــــــــــــــــــــــــــــ
بسيارة ابو وصايف
ــــــــــــــــــــــــــــــــ
وجدان:بابا وقف عند البقاله
ابو وصايف:ابشري ياعيون ابوك
وصال:بابا خير تدلعها وانا الصغيره؟
ابو وصايف:شوفي وصايف قلبي ووجدان عيوني وانتي ياوصال روحي
وصايف بعبط:وماما؟
ابو وصايف:امتس كلي لها
صفقو البنات
وجدان:الله عليك ياابو وصايف
وقف ابو وصايف عند البقاله وقالت وصايف:بابا تكفى جيب معاك بطاطس
ام وصايف:لاتجيب ماهوب صحي
ابو وصايف:انا اسمع كلام امتس
وصايف:مالي خلق انزل طيب جيب يابابا تكفى
ابو وصايف:هاه ياغدير اجيب؟
ام وصايف:جيب جيب بس لاتكثر لها
راح ابو وصايف ووجدان جيبيبون الاغراض
ــــــــــــــــــــــــــــــــ
نرجع ل نياف وغزلان
ــــــــــــــــــــــــــــــــ
غزلان:نياف شوف اول الوصول خالتك أصايل
نياف:يويطي فهد النفسيه
جت روُح تركض
نياف:ياعين نياف ياناس
حضنها نياف وهو واقف وقال وهو يشوف خالته:ارحبييي ياام فهد
ام فهد:البقى ياعيون خالتك وشعلومك
نياف:بخير ياعساتس بخير
ام فهد:الا وين امي وابوي
غزلان:اشوفتس سحبتي علي وسلمتي على نياف
ام فهد:نياف خذا كل الحب منكم هذا عيون خالته
غزلان:ماالومك حتى انا احبه مااقدر اقول له شي
دخلت ام فهد ودخلو البنات وغزلان ودخل نياف فهد للمجلس
فهد:للحينه انت على مبزرتك؟
نياف:وانت شدخلك خلك بنفسك بس
فهد:اشوف طلع لك لسان
نياف:بتقول كلمه زينه قول مابتقول انطم واشرب قهوتك وانقلع لشغلك ناقصني انا
راح نياف بدون مايسمع رد فهد وشاف سيارة يوسف وراح يسلم عليه
ام يوسف:شعلومك يانياف
نياف:يامرحبا ياخاله بخير شعلومتس انتي
ام يوسف:بخير ياحبيب خالتك بخير
نياف:وين فصفص
يوسف:لايسمعك بس وربي يذبحك تخيل ماخذ مواليف و وليف وتخيل المعاناة
نياف:تخيلتها ادخل عند فهد
يوسف:يويطي النفسيه ذا وش جايبه
نياف:قاهرني ياولد بغيت اذبحه
دخل يوسف ومعاه نياف ولاتكلمو مع فهد وطلع نياف يجدد القهوه وشاف سيارة ام وصايف وصرخ بأعلى صوت
نياف:ارحبييي ياعيون ولد اختك ارحبي
ام وصايف:ياهلا بنياف ارحب ياقلب خالتك
نياف:البقى ياخاله شخبارتس عساتس طيبه
ام وصايف:بخير شخبارك انت
نياف:بخير ياخاله ادخلي انتي والبنات
دخلت ام وصايف وبناتها وسلم نياف على ابو وصايف ودخله المجلس ورجع يجدد القهوه وبعدها راح يقهوي ابو وصايف وجاء عند فهد وبهمس:فهود شرايك اعلمه بكل شي واخليه ينقد عليك
فهد:اقول نياف ماودك تسكت
ضحك نياف وراح يجلس جنب يوسف لين دق جوال يوسف وطلع فيصل وطلع هو ونياف برا ينتظرونه
وصل فيصل ومواليف و وليف
ونياف من شاف فيصل حضنه وقال:عشيرييي فصفص اشتقت لك
فيصل:انت والدلع الخايس ذا بس دامك اشتقت هات حضن ثاني
يوسف:انت وياه امشو ندخل عند الرجل لافهد يفشلنا هالنفسيه
فيصل:يويطي جاي النفسيه
نياف:اي امشو ندخل
دخلو وسلم فيصل على ابو وصايف
ــــــــــــــــــــــــــــــــ
عند البنات
ــــــــــــــــــــــــــــــــ
غزلان:اييي قلن وش صار معاكن
مواليف:تخيلي غزلان ان فيصل قلب فهد
غزلان:فيصلل جاء
وليف:غزلانوه تستهبلين صح؟من جابنا اجل
ام ذياب:ياغزلان روحي ل نياف خليه يصوت ل ابوتس
غزلان:يمه خلي رُوح تروح له
ام ذياب:ياطول لسانتس قومي اخلصي
غزلان:رُوح حبيبتي روحي لنياف وقولي له جده تقول لك صوت ل جدي وقولي له يوديتس البقاله وجيبي لنا مفرحات
وليف:اما بالديره عندكم بقاله
غزلان:لاتسوين نفستس ماتعرفين ديرتنا يلا روُح روحي له
رُوح:بس نياف عنده فهد وفهد عصبي
غزلان:اذا عصب عليتس نياف يجلده لتس
راحت رُوح ركض ل نياف وشافها فهد وقال:شجابتس انتي عند الرجال
نياف:شعليك انت تعالي رُوح شعندتس
رُوح:جده تقول صوت لجدي وانا ابي البقاله ودني لها
فهد:الصغار بدو يطلبون
نياف:فهد انطم احسن لك بعدين وش فيها خلها تطلب اشتري لها البقاله واللي فيها بعد
فهد:محد مدلعها الا انت
نياف ناظره بدون رد وشال رُوح:وش تبين من البقاله
فيصل:انتظرني بجي معاك
راح فيصل مع نياف وبدو يسولفون ويطقطقون على عيال الديره بمزح وراحو لجدهم وصوتو له وراحو للبقاله
فيصل:الله يعينك على دفع الحساب
نياف:متعود نفس طبع غزلان تقش البقاله
فيصل:الله يعينك اجل
راح نياف ل رُوح وشافها تشتري من كل شي تسع
نياف:ليه كل ذا
رُوح:خاله غزلان قالت جيبي لنا وهم ثمانيه وانا معهم تسعه
نياف:اجل مقدر اقول شي دام غزلان تبي
خلصت رُوح وحاسب نياف وراحو البيت ويوم دخل صوت بأعلى صوت:غزلان وينتس
جته غزلان تركض:نعم شعندك
نياف:ليه موصيه البزر تشتري كل شي بالبقاله
غزلان:حرام يعني نبي ناكل مفرحات طيب وانت ماجيتني عشان اقول لك
فيصل:ماعليتس منه تعالي سلمي علي
حضنت غزلان فيصل واخذت الاكياس من نياف وراحت داخل للبنات
مواليف:عصب ذا شعنده
غزلان:نياف ومزحه الدايم ماعليكن منه
ام وصايف:الا ي غزلان نياف ماقال لتس شي عن اهل ابوه؟
غزلان:وش بيقول يعني
ام يوسف:يعني انهم ارسلو له وانهم بيجون عشان يشوفونه ويسلمون عليه
غزلان:من وين جايهم الحنان ذولي بعد عشرين سنه جاهم الشوق بعدين نياف مايحب طاريهم ولايدانيه ابد
مواليف:غزلان هدي شوي شفيتس
غزلان:من القهر يابنات عذبوه وهو صغير وجاهم الشوق يوم كبر وصار رجال وقد نفسه
وليف:لاتضايقينا بموضوعه تكفين
غزلان:ليه ياروحي لايكون نياف حبيبتس وانا ماادري ترا الكل مايدري عن اللي بنياف الا انا واليوم تراكن ماشفتنه والدمعه بعينه
مواليف:غزلان تكفين اسكتي بعدين صدق نبدأ نصايح ولاماهو اي صياح صياحنا على نياف
غزلان:بخلي الصياح بالليل واعلمكن كل شي لاننا بننام بغرفته
وليف:ليه بغرفته؟
غزلان:لاني مطردته منها لانها اكبر غرفه بالبيت وكلنا بننام بها
بيان:من الحين اقول لكن السرير لي
بدور:وانا معاتس
غزلان:لاياروحي انتي وهي نياف وصاني مااخلي احد على سريره
بيان:والله لو انه من ذهب
غزلان:بيان مالي خلق اتضارب معاك خلك هاديه وكملي سوالف
رُوح:خالتو غزلان
غزلان:قلبها وعيونها
رُوح:وين خالتو ام نياف دايم اشوف نياف يقول ل فيصل انه اشتاق ل ماماته وهو ماشافها
غزلان:لايارُوح شفتي جده؟
رُوح:ايوه
غزلان:هي ام نياف ونياف دايم يشتاق لها
رُوح:بروح اسأل جده
مواليف:اهجدي
رُوح:مالتس دخل
راحت رُوح لجدتها ووقفت قدامها
ام ذياب:شعندتس
رُوح:جده بقول شي
خذتها ام ذياب بحضنها وقالت:قولي
رُوح:انتي ام نياف ياجده؟
ام ذياب:اي انا امه
رُوح:اجل ليه البنات مايطلعون قدامه دامه خالهم مثل خالو ذياب
ام فهد:ياكثر سوالفتس روحي العبي
رُوح:ابي اعرف الصدق قولو عشان اذا ماماته راحت اجيب له ماما ثانيه
ام وصايف:يارُوح روحي العبي سوالف الكبار لاتتدخلين فيها
رُوح:الا انا سمعت نياف يقول لفيصل ان ماماته راحت وانا كبيره قولو لي
ام ذياب:رُوح منهو قايل لتس هالكلام
رُوح:اذا ماقلتو بروح لنياف واخليه يقول لي
ام وصايف:امه راحت الجنه
رُوح:يعني نياف معاد يشوفها؟
ام ذياب:اي معاد يشوفها الا بالجنه
رُوح:جده اذا جبنا له امه يقدر نياف يحضنها؟
ام ذياب:رُوح روحي العبي مع الصغار
طلعت رُوح وجلست ام ذياب تفكر(صحيح هي صغيره بس فاهمه كلام نياف ولاشدراها ان امه ميته وان الناس تشتاق للميت)
غزلان:يابنات سؤال رُوح عور قلبي بشوف نياف
وليف:وين تشوفينه اهجدي عنده ابو وصايف
غزلان:مدري مدري بدق عليه بشوفه
مواليف:غزلان صدق امه كيف ماتت؟
غزلان:بحادث
ــــــــــــــــــــــــــــــــ
بالبارتات الجايه بنعرف كيف صار الحادث وتوصيات ام نياف ل امها قبل الحادث
ــــــــــــــــــــــــــــــــ
مواليف:كانت تشبه نياف؟
غزلان:مااذكرها بس عندي صوره لها هي وزوجها كان نياف مثل عيون امه وملامح ابوه الحاده
وليف:يوه غيرو الموضوع تكفون
بدور:غزلان
غزلان بمزح:انتي بذات تقولين خاله غزلان
بدور:وع كنسلي ماني قايله لتس شي
غزلان:يويطي يالدلوعه
وصال:غزوله ماودك نطلع ب الجو الحلو ذا؟
غزلان:الصغيره طلع لها صوت
وصال:هاه بخاطري اطلع
غزلان:مااتوقع ابوي بيوافق بعدين شعندتس انتي وياها ماسلمتو على ابوي
وصايف:جدي بالمجلس شلون ندخل؟
غزلان:يوه ضيعتوني بروح ل نياف
وليف:وحنا بنكون ورا الباب شرايتس؟
غزلان:تعالي انتي وهن يلا بسرعه
راحو ورا باب مجلس الحريم ودقت غزلان على نياف وجاها
نياف:هاه شعندتس
غزلان:لابس قلت اتطمن عليك
نياف:والله انتس كذابه يالكذوبه وراتس شي شعندتس
غزلان:مالت وانا بتطمن عليك
نياف:ليه تتطمنين ياروح نياف؟
غزلان:تعرف قلبي دايم يقول ياغزلان نياف ولد اختس اخوتس الصغير صديق طفولتس ف اتطمن عليك
نياف:غزلانوه قولي شعندتس اخلصي قلبي مو مرتاح لتس
غزلان:الصراحه يعني كلامك الصبح يخلي الواحد يتطمن عليك اربع وعشرين ساعه
نياف:اجل للحين تتذكرينه تراني ماقلت الا الصدق
غزلان:نيافوه تكفى لاتتعب نفسك ولاتفكر واجد بالاشياء اللي كذا
نياف ابتسم بضيق:غزلان هذولي مو تفكير هذولي امي وابوي خليني اتخيل لو هم عايشين بكون نياف اللي قدامتس الحين طبعا لا والله داري انتس انتي ويمه ويبه مانتو مقصرين معاي بولا شي بس ذولي ام واب محد يعوض مكانهم خليني اقولتس لو عندي اخت او اخ يمكن بكون احلا من كذا ولابقول كل ذا الكلام بس ربي مارزقني ب اخوان بس عوضني ب احلا خاله واخت
غزلان وهي تمسح دموعها:غصب تنزل دموعي انت
نياف حضنها وضحك وقال:شعندتس جايبه بنات خواتس معاتس
مواليف من ورا الباب:يعني شفتنا؟
نياف:اندسي زين انتي وياها فيه وحده منكن رجولها طالعه
ضحكت غزلان وضربته على صدره:نياف طلبتك
نياف:علامتس وشهو طلبتس
غزلان:لاعاد تتضايق بهذا الموضوع
نياف:على ذا الخشم توصين بشي
غزلان:سلامتك
راح نياف وطلعو البنات من ورا الباب
وجدان وهي تشاهق:غزلان ذا ولد خالتي نياف؟لامستحيل
وليف:
ــــــــــــــــــــــــــــــــ
بيكون انتهاء بارتنا الاول
كيف بتكون حياة نياف؟هل بيقدر يتخطى كل شي بحياته؟كل التفاصيل بنعرفها بالبارتات الجايه
بين الليل والحال هبت الذكرى❤️.
الكاتبه:منيره❤️.
ــــــــــــــــــــــــــــــــ
